| لطلب خدمة التعبير الهاتفي فضلا ابعث رسال لرقم الجوال:0568849911,أخي الزائر / أختي الزائرة مرحبا بكم في موقع بشارة خير ولتفسير أحلامكم نرجو اطلاعكم على المواضيع التالية:,منتدى التعبير المجاني بموقع د/ فهد بن سعود العصيمي,تفعيل خدمة الدعم الهاتفي (رسائل واتس أب) وإشتراك الدعم (الماسي), |
 |
| الدكتور فهد بن سعود العصيمي |
 |
| اللهم ارحمهما واغفر لهما واجعل مثواهما الجنة |
 |
  |
| صاحب السمو الملكي الأمير فيصل بن عبدالرحمن بن عبدالعزيز حفظه الله ورعاه |
 |
 |
||
 |
 |
 |
 |
 |
 |
 |
 |
مساحة إعلانيه |
| لطلب خدمة التعبير الهاتفي فضلا ابعث رسال لرقم الجوال:0568849911,أخي الزائر / أختي الزائرة مرحبا بكم في موقع بشارة خير ولتفسير أحلامكم نرجو اطلاعكم على المواضيع التالية:,منتدى التعبير المجاني بموقع د/ فهد بن سعود العصيمي,تفعيل خدمة الدعم الهاتفي (رسائل واتس أب) وإشتراك الدعم (الماسي), |
|
|
أدوات الموضوع | انواع عرض الموضوع |
قصة أبكت ملايين البشر ... فيصل السعودي ومها الكويتيه ...
هذه قصة قرأتها قبل يومين في أحد المنتديات , قصة من أروع وأجمل القصص التي قرأتها في حياتي , قصة تشعر معها أنك تعيش أحداثها ,
أحببت أن أنقلها لكم مع التعديل والتغاضي عن بعض الأحداث التي كتبت بجرأه شيئاً ما .. القصه طويييييييله لكن رائعة اقرأوها أنتم واحكموا ,, لا أطيل عليكم .. أترككم مع القصة ... المقدمه: ضاحي ابو ناصر: يالله ياعيال ...يالله نتعمر عمرة الوداع ورانا درب للكويت...وودي اواصل ... ام ناصر: يالله يامها قومي بسج نوم ...قومي ساعديني على الاغراض مها وهي على فراشها: يمه مالي خلق ابي انام شوي ......تو الناس لاحقين ابو ناصر: مها يابوج متى بتخلين نوم الظهر هذا اللي يتعب الجسم ؟....قومي يالله عاوني امج وفي المغرب تجهزت العائله الكويتيه اللي كانت في زياره للاراضي الطاهره ........وفي طريقها للكويت...... الطريق كان طويل ...وقطعوه بالسوالف والضحك ..... مرت الساعات ثقال وحس ابو ناصر انه تعبان خصوصا انه ماعنده ولد كبير يسوق عنه....لكنه ضغط على روحه علشان عياله اللي اشتاقوا لديرتهم واصدقائهم... الساعه 1 في الليل ..... ام ناصر: مها روحي ورى عند الاغراض وسوي صمون وجبن لاخوانج والله مافيني حيل مها: خليهم يولون توهم ماكلين شيبس وبيبسي ابوناصر: أي والله روحي سويلي انا بعد مشتهي صمونه وجبن من ايدج مها: خلاص زين.... بس عشانك سوت مها لاخوانها وابوها الصمون ونامت ورى بالسوبرمان صارت الساعه 3 وابو ناصر ينعس بشده وماهو قادر يشوف الطريق والعيال كلهم ناموا ....حس الدنيا ظلمه جدامه .... انحرف عن الطريق ومالت السياره حاول انه يسيطر على الموقف وداس على البنزين بقوه وكان هالشي مو من صالحه لانه فقد السيطره وانقلبت السياره عدة مرات ..........وكان حادث مأساوي مضت ثلاث ساعات وكان الشارع فاضي ....ابوناصر وام ناصر والولد الصغير اللي كان بحضن امه على طول توفوا اما الاولاد الاثنين الباقين فكانت حالتهم خطيره ....ومها كانت بغيبوبه والله العالم بحالتها .... مرت سياره من مكان الحادث كان شاب وهو اللي بلغ عن الحادث وشاف مها على بعد خمس امتار من مكان الحادث وكانت جنطة الملابس الكبيره على رجولها ...حاول هذا الشاب انه يساعدها ورفع الجنطه عنها .....فيها نبض ...وصلت سيارات الاسعاف.....لكن متأخره وماتو الولدين وهو في سيارة الاسعاف
التعديل الأخير تم بواسطة الهمة العالية ; 2009-01-30 الساعة 9:08 PM.
|
الجزء الاول :
وعت "مها" بنفسها بعد غيبوبه دامت اسبوعين لقت اجهزه التنفس حولها والشاش مغطي جسمها وهي في قلبها تقول :"ياربي شصار؟ كل عظمه بجسمي تعورني !وين اهلي؟؟" ولما التفتت يمين لقت حرمه بجنبها كانت مها ودها تكلم بس الكلام ماهو قادر يطلع منها ... سبقتها الحرمه وقالت : الحمدلله على سلامتك يابنتي انا فاطمه وبنتعرف على بعض اكثر لما تلطلعين بالسلامه انشالله ... في هذه الاثناء دخلت الممرضه المصريه : الحمدلله على السلامه يا مها ايه الجمال ده الله الله اليوم وشك منور تطالعها مها ونظراتها كلها تقول شالسالفه حاولت تنطق تكلمت وبصعوبه : سستر ..وين اهلي...؟؟؟ الممرضه والحيره بوجهها وعلامات الارتباك باينه عليها : هم اهلك !!!حيكونوا بخير طبعا ؟؟انتي خايفه ليه؟ تكلمت الحرمه اللي كانت قاعده : يابنتي يامها انتي عارفه ان الحادث اللي صار لكم مو سهل وهلك مثل حالتك مها: يعني شنو؟ اهلي فيهم شي شصار بالضبط وانا اللحين وين؟ "كانت مها في قمة توترها" فاطمه: انتي اللحين في الرياض ... مها:وشجابني للرياض ؟ اذكر ان الحادث صار في منطقه بعيده عن الرياض !!!! زين وين اهلي وين امي وابوي واخواني فاطمه: قلتلك اهلك مثل حالتك صدقيني وانشالله تشوفينيهم بس مو ألحين مها : ومتى اقدر اشوفهم؟ فاطمه: لما تتحسن حالتك وتبقي اقوى من كذا ؟ مها: زين منو انتي ؟ فاطمه:قلتلك انا اسمي فاطمه اخت فيصل الشاب اللي جابك لحد هنا واذا تبغين.....أي شي اطلبيه مني واعتبريني زي اختك مها: انتي متأكده ان اهلي مافيهم شي .... فاطمه: مها انتي تعبانه الحين ارتاحي خصوصا انك طايحه بغيبوبه من اسبوعين ...ريحي نفسك ولاتفكري كثير سكتت مها وبداخلها خوف كبير بس الالام اللي بجسمها خلتها ماتفكر اكثر الا بنفسها.... خوال مها كانوا كلهم مسافرين لسوريا اصلا هم مجرد ولدين وبنت وعلاقتهم مقطوعه معاهم من زمان لخلافات كبيره بينهم وكان ابوها وحيد امه وابوه اللي ماتوا من زمان يعني ماسأل عنها احد ولا اهتم فيها أي مخلوق، غير فيصل اللي نظر للموضوع نظرة تعاطف مع هالبنت كان فيصل على قد الحال نقدر نقول اقرب للفقر منه للغنى. وهو اللي وداها مستشفى قريب بس المستشفى للاسف كانت امكاناته محدوده بلغ الجهات المختصه وفهمهم ان هو قادر يسفرها للرياض ويدخلها مستشفى خاص ونظرا لان حالتها خطره وماتسمح الانتظار مافكروا كثير ووافقوا بسرعه لان اذا طولوا ممكن تروح فيها البنت، سفرها فيصل للرياض على حسابه الخاص ولما وصل الرياض اخذ سلفه ودخلها مستشفى"دله"الخاص ووقف معها الرجال وقفه مايوقفه احد. بعد اسبوع : كان الحاح مها على الممرضه كبير ...ودايم تسألها عن اهلها ... مها: انتي ليش ماتخليني اروح لاهلي واتطمن عليهم ؟ الممرضه: انتي لسه تعبانه ...تتحسن حالتك انشالله وانا بنفي حوديكي ليهم مها: سستر انا حاسه بشي مو زين قوليلي اهلي فيهم شي... وفي هذي اللحظه يدخل الدكتور السعودي اللي كان مدين.... الدكتور: الحمدالله على سلامتك يااخت مها ....ابشرك انك اللحين تعديتي مرحلة الخطر وحالتك مستقره مها : دكتور ممكن اعرف شصار لامي وابوي واخواني الدكتور: صح انتي لازم تعرفين عاجلا ام اجلا وان ماعرفتي مني بتعرفين من غيري مها: ................. الدكتور: اول شي الله سبحانه وتعالى قال في كتابه الحكيم" كل نفس ذائقة الموت" ....خلي ايمانك بالله قوي وهذا القضاء والقدر واللي كاتبه الله ليكي ولغيرك مها: دكتور انت شتقصد ...اشوفك تطري الموت الدكتور وهو واقف: الموت حق علينا وعظم الله اجرك بوالديك واخوانك مها مصدومه من اللي تسمعه: يعني.....اهلي ماتوا .....انت شقاعد تقول .....اهلي لا ماماتوا انت تجذب علي الدكتور: ........ مها: سستر قولي شي...انتي قلتيلي ان انتي بنفسك بتوديني لهم انهارت مها بالبكاء واغمى عليها ...عطاها الدكتور مهدئات ..... "أي احد مكانها بيكون عارف بشنو هي تفكر وشنو مدى الجرح اللي هي تحسه والحزن اللي عايشه فيه " :::::::::::::::::::::::::::::::::::::::::::::::::: ::::::::::::::::::::::::::::::::::::::::::::::: فاطمه: البنت صح مسكينه وتكسر الخاطر بس انت ليه تسوي كل هذا ؟ فيصل:والله يافاطمه ماعندي علم ؟ بس البنت مسكينه ومالها احد في المملكه وانا بغيت الاجر فاطمه: يعني لوكانت مزيونه قلنا حبيتها بس البنت ملامحها موباينه للحين كل وجهها كدمات وجروح؟ فيصل: هههههه ياشطنك يافاطمه وشتبين توصلينله معنى كلامك اني ساعدتها لغايه في نفسي ؟ فاطمه:مدري يافيصل احس مافيه سبب تساعدها وانت ماتقدر بلغ السفاره الموجوده هنا وهم بيساعدوها اكيد فيصل: فاطمه انا بديت بهالشي وانا اللي انهيه ..خلاص انا طالع بغيتي حاجه فاطمه:سلامتك ياخوي بس وين رايح؟ فيصل:رايح المستشفى......اشرايك تروحين معي؟ فاطمه:قول كذا من الاول !اكيد اروح معك اجل ها اخليك لحالك لاياحبيبي ....الا صحيح انا سمعت من الممرضه ان الدكتور خبرها عن اهلها السبت اللي طاف وانا لما كنت عندها كانت على طول نايمه وماتحس بأحد فيصل: لاحول ولا قوة الا بالله...... الله يكون بعونها انشالله .....حاولي انك تخففي عنها يطلع فيصل وهو يقول :خمس دقايق اذا ماجيتي انا ماشي ...) وتلبس فاطمه عبايتها وغشوتها وتلحق باخوها ويطلعون للمستشفى . وفي المستشفى يطق الباب على مها .. مها بصوت متحشرج مبحوح: منووو؟ فاطمه وهي تدخل :انا فاطمه ممكن ادخل ؟ مها: هلا فاطمه فاطمه: الحمدلله على سلامتك ...... مها: ...................... فاطمه : انا عارفه ان اللي حصل ليكي ماهو قليل بس الله موجود يامها مها تبكي ..... فاطمه: بس يامها خلاص اللي راح راح والحي ابقى من الميت مها: اهلي يافاطمه شلون ماابجي عليهم وانا مالي غيرهم؟ فاطمه : طيب امسحي دموعك لان في ضيف يبغى يشوفك مها باستغراب: منو هالضيف؟ فاطمه وهي تقعد على السرير: اخوي فيصل سبق وقلتلك عنه !!هو اللي ساعدك مها: ايه تذكرته حياه الله انا بعد حبيت اشكره فاطمه وهي طالعه تنادي اخوها من عند الدكتور اللي كان يسأل ويكمل باقي الاجراءات معه .. ومثل ماتعرفون في الكويت الغشوه شي مو اساسي علشان كذا لبست مها شيلتها بس . طق فيصل الباب ودخل .سلم على مها وتحمدلها بالسلامه ماقدر يرفع عينه ويناظرها كان مستحي ومو متعود يشوف وحد مفرعه مها بنبرة حزن: انت اكيد فيصل اللي ...اللي... وبكت بكى يقطع القلب انتبه فيصل ورفع راسه حاول انه يتكلم لكن انبهاره فيها كان اكبر من انه ينطق , لا اله الا الله . وأخيرا تداركت فاطمه الموقف : اذكري الله يامها لا تتركين الشيطان يضحك عليك لا تصيرين ضعيفه،،،،قول شي يافيصل ؟؟؟؟ فيصل مثل المنبله: هاه صح لا يامها لاتصيرين ضعيفه هذا تصرف غلط اهلك ماتوا الله يرحمهم هذا المكتوب ادعيلهم الرحمه مها وهي لاتستطيع ان توقف دموعها : بس هذيل اهلي تعرفون يعني شنو اهل يعني الدنيا كلها وين اروح عقبهم؟منو يقبلني ؟خوالي احنا على خلاف معاهم ومااظن يقبلوني وابوي وحيد اهله اللي ماتو من زمان ماتقولون لي وين اروح انا هني(هنا)مثل الغريبه مالي احد فيصل:افا عليكي يامها واحنا وين رحنا والله لاصيرلك اكثر من اخ وسند وعون انشالله.. مها وهي تمسح دموعها : اكثر من اخ ؟؟؟ فيصل انا حبيت اشكرك من كل قلبي على انقاذك لي وهذا فعلا كان عمل انساني منك انا اشكرك لانك تستحق الشكر في نظر الناس لكن انا اعاتبك ... " تبكي " ...ليش ماخليتني اموت معاهم ؟؟؟؟ فاطمه وهي تقرب من مها وتضمها : مها حبيبتي بسك عاد يمكن الله له حكمه في اللي صار وانشالله امورك تتحسن وماتدرين عن المكتوب؟ مها: ونعم بالله !!! فيصل مابي اكون وقحه وجريئه معك بس ممكن طلب؟ فيصل : افا والله يامها انتي تامري ماتطلبي مها: تسلم//// بس انا ابي ارجع الكويت فيصل يرتبك ويحاول يخفي ارتباكه: الله يهديكي بس الزم ماعليكي راحتك وانا اخوك وبعدين يحصل خير مها: ماتقصر بس انا حاسه بتحسن شوي ...اقول اخ فيصل ..انا سمعت ان هذا المستشفى خاص وتكلفته كبيره وانا ماودي اثقل عليك فيصل وهو يقوم وماوده اصلا يقوم: يابنت الحلال لاتشيلين هم شي اللحين انا اللي ادفع والا انتي ..آيالبخيله؟؟ مها: بخيله! انا مو بخيله من قال؟؟؟؟؟؟؟ فيصل: هههههه حطي نفسك مكاني وش تسوين مها : مدري!!!!!! فاطمه: مو كأنكم نسيتم وحده ضعف اعماركم وراها عيال وبيت ومجابلتكم ؟؟؟؟ حس الاثنين ان فاطمه تجمعهم بالكلام وكأنهم يعرفون بعض من زمان بس كان شعور غريييب فيصل: ماعاش من ينساكي يافطوووم بس يالله عاد مشينا ثقلنا على البنت وهي تعبانه يطلعون من عندها وترجع مها للحزن وللمراره والكأبه والدموع اللي بعدها ماجفت وترجع فاطمه لبيتها وعيالها ويروح فيصل بأفكاره يفر شوارع الرياض ويدور براسه هالحوار: والله انها قمر احلى بنت شفتها بحياتي..هو انا من كثر ماشفت بنات...بس عن جد حلوه رغم اثار الجروح بوجهها وانها مكسره بس فيها براءه عجيبه يحليلها والله انها حبيبه..... مسكينه هالبنت.....
التعديل الأخير تم بواسطة الهمة العالية ; 2009-01-30 الساعة 8:29 PM.
|
|
عجبته مها رغم انه ماشافها بكامل صحتها ..مايحتاج اقولكم عمق المأساة اللي كانت فيها مها ومدى الالم اللي تعيشه والجرح اللي تشيله كان كفيل انه يعيشها الحزن مدى الحياه كانت تدعي على نفسها وتمنت انها ماتت معاهم بعدين ترجع وتحسر ....اكيد كان الشعور الطاغي ...الغربه
فيصل شاب في مقتبل العمر 23سنه اهله عايشين في منطفه تبعد عن الرياض حوالي 250كم وهو لظروف شغله كان ساكن عند اخته بالرياض اللي عايشه عند زوجها اللي هو ولد عمها وفيصل ساكن عندهم . فيصل شاب ماعليه كلام في الجمال وطبعا الرجال بشخصيته وافعاله بس هو فعلا كان جميل :طويل ضعيف اسمرمو كثير شعره اسود كثيف ناعم طويل لحد ما.له شوارب ولحيه خفيفه .فاطمه هذي اخته وعمرها 35سنه متزوجه ولد عمها نواف اللي يموووت فيها لانها وبجداره جابتله 6عيال الله يخليهم لها وبنت صغيرونه هي اللي مدلعه بالبيت كله اسمها اميره وعمرها ثلاث سنوات . فيصل وهو داخل بيت اخته:السلام عليكم فاطمه اللي كانت ترقد بنتها بالصاله : وعليكم السلام والرحمه هلا والله بروميو كيف الحال ياعنتر هلاوغلا بقيس فيصل:ههههه قيس وعنتر وروميو من بقى من العشاق ..يالله انا اخليك تعبان وبروح ارقد فاطمه: ماالومك تعبان من التفكير بست الحسن والجمال !!!!!!! فيصل وهو يقعد في الكنبه اللي مقابلتها والظاهر ان الموضوع شده: فطمطم شقصدك ياحلوه؟؟؟؟؟؟؟ فاطمه: والله محد فاهمك كثري يافصيل ماخبرتك تهتم بالبنات ولاانت براعي سوالف خرابيط ...لا وصايرلي حاتم الطائي فيصل وهو يتنهد: اكيد تقصدين مها فاطمه:شوف ياخوي انا مو ضد فعل الخير والبنت انا معاك انها مسكينه بس انت سويت اللي عليك وكفايه عاد تحمل نفسك ديون انت منت قدها ياخوي ارحم بحالك الدين يكسر الظهر وانت منت بقده فيصل: انا رجال ومتحمل اللي يصيرلي ليه شايله همي؟ فاطمه:انا اختك ومن حقي اشيل همك واشوف ان هالشي يضرك اكثر من انه ينفعك فيصل يفكر: طيب شتشورين علي ياوخيتي فاطمه :البنت غريبه وصارلها اكثر من شهر ونص محد سأل عنها حرام تعيشها بعذاب انا اقول تبلغ السفاره وترد لديرتها وتشوف اللي لها واللي عليها فيصل: يافاطمه انتي ما تفهمين ! اقولك البنت مالها والي لاعم ولاخال فاطمه: وانت منت بولي امرها لا تحمل المسئوليه منت باللي صدم اهلها ولاانت واحد من معارفهم ديرتها تكفل فيها فيصل بأسى: اشوفك قاسيه يافاطمه وهذا مو من طبعك ؟؟؟؟ فاطمه:الله يسامحك ياخوي هذا وانا اويتنلك لاتقول كذا قلبي معها المسكينه بس انت وشتقدر عليه فيصل يتنهد: يعني برايك اروح للسفاره بكره وانهي الموضوع فاطمه: أي والله ياخوي هي بحاجه تروح وتغير تجو وترد ديرتها يمكن تحسن حالتها اقتنع فيصل وقال بقلبه وهذا اللي بيحصل انشالله ومن الصبح استئذن من عمله وراح للسفاره وانهى الاجراءات معهم وسلمهم اوراق البنت اللي كانت بحوزته واللي من خلالها عرف كل شي عنها لا وصورهم الحبيب بعد .قاله موظف السفاره : احنا لازم نتصل الاول على اقربائها هناك ومدام حالتها مثل ماتقول تحسنت تقدر تسافر من اللحين بس لازم احد منا يروح لها ويشوف شنو تحتاج وشناقصها عقب يصير خير طلع منهم فيصل وهو متضايق ماوده تروح لكن شيسوي هذا اللي لازم يصير مهما كان لازم ترجع لديرتها وناسها .كان معزم يروحلها المستشفى واخذ معه كولا وشكولاته وشيبس ومن هالشغلات الفنكيه "اللي تفرفش" طق الباب وماسمع الاجابه "انا فيصل ممكن ادخل" هم محد رد عليه استغرب ..قرر يدخل ودخل ...كانت نايمه ..انصدم من زمان ماشافها كانت اخته هي اللي دايم تزورها ..عقله يقوله:استح على وجهك واطلع مو عشان البنت ماوراها والي تسوي اللي تبيه خاف ربك اللي هو وليها ..وقلبه يقول: اقعد بس ماعليك منه هو التعبان اقعد بس مهو كل يوم بيحصلك مزيونه مثلها , مسكينه شلون تستحمل كل هالالم وقال بنفسه: اطلع اللحين احسنلي وبعد شوي اجيها حرام البنت نايمه مو حلوه افزعها ...وضع الاكياس على الطاوله ولما جا بيطلع شد انتباهه صوت ارتطام قوي على الارض: طررررررررررررراااااااااااااااااااااااااااااااخ
التعديل الأخير تم بواسطة الهمة العالية ; 2009-01-30 الساعة 8:33 PM.
|
|
[الجزء الثاني:
التفت فيصل بسرعه على مها اللي صحت من نومها مفزوعه والتفت الصوب الثاني على صوب الصوت وقلبه يدق بقوه "حسبي الله عليك يالكولا يالدب روعت البنت وروعتني معاها " يقولها فيصل وهو مبتسم : ماعليك كملي رقادك مغير الكولا وقع على الارض مها: فيصل من معاك فاطمه معك؟؟ فيصل متفشل: ها لالا مغير انا لحالي مريت قريب من المستشفى قلت اشتريلك غريضات مها: من متى انت هني؟ فيصل: أأأ من دقايق ضربت الباب مارد علي احد و....و...خفت عليك الصراحه مها : ياليت خوفك كان بمحله واني فعلا مت وارتحت وريحت فيصل: لاتقولي كذا حرام عليكي عاد انا جايبلك خبر انما ايه؟؟ بطيرك من الوناسه وبتفرحين كثيييير مها وهي تعدل من جلستها: والله يافيصل مااظن في فرحه بعد انتهت الافراح من دنيتي فيصل: واذا فرحتك وونستك ...شتعطيني؟؟؟؟؟؟؟؟؟؟ مها وهي تنزل عيونها تحت وبنبره حزينه وبصوتها المبحوح: شتبي اعطيك يعني؟ فلوس! تستاهل انا راح اردلك كل ريال صرفته علي فيصل: الله يسامحك بس كذا زعلتيني منك انا ماجيت اطالبك بفلوس ولاطرتلي على بال مها:.............. فيصل: طولتها ها؟؟؟ههههههه؟ تصدقين كل اصدقائي يقولون عني مليغ بس مرااااات وبالموت يضحكون علي؟ برايك معهم حق مها تبتسم: وربعك ماتقولي وين بيلقون مثلك!!!!! ماقلتلي شعندك من اخبار فيصل: ايه نرجع لمحور حديثنا هذا طال عمرك انا رحت للسفاره الكويتيه وكلمتهم عن حالتك و...ورفضوا مها بأسى: رفضوا! شنو يعني رفضوا فيصل ساكت ويطالع تحته:.......... مها بقلق: تكلم يافيصل ارجوك حرقت اعصابي فيصل بإنزعاج: لا يامها انتي اللي ارجوكي اعفيني من الاجابه تبكي مها وتصرخ : كافي صدمات كافي تكلم صدقني خلاص مات الاحساس فيني شصاير بعد؟ فيصل يرفع نظره تجاهها ويقول بنفسه: والله اني سخييييييف وماعندي سالفه ألحين انا ووجهي امزح مع بنت مااعرفها ولاتعرف اطباعي وعايشه بمأساة ......قام من مكانه واتجه صوبها : مها انا والله امزح معك كنت بقولك انهم رفضوا يخلون القمر بعيد عن الكويت لانهم مايستغنون عنه ...بس انتي اللي يهديك خربيتها وبكيتي بسرعه ...ووقف لحظه يشوف تعابير وجهها مسحت دموعها بطرف كمها وشافته : فيصل يعني انت كنت تغشمر معاي؟؟؟؟ فيصل: "اتغشمر" لا انا مااتغشمر انا كنت امزح معك مها تبتسم: تغشمر يعني تمزح فيصل: ههههههههه سامحيني مافهمتك .... مها : متى برد الكويت؟ فيصل: وليه مستعجله ؟ عاجبك الحر اللي هناك مها: ياحلوها وياحلو حرها وبردها مهما كان ديرتي وابيهااا فيصل: غصب يعني تبينها.........ههههههه اتمغشر معك لاتزعليييين تنفجر مها بالضحك لمدة دقيقتين وعيونها تدمع ...استغرب فيصل من ضحكها عليه مها: هههه فيصل هههه مو تمغشر ...الكلمه تغشمر ههههههه فيصل وهو مفتشل : هههههههه عادي طوفي مها تنهد : ماقلتلي متى برد الكويت فيصل : مدري لكن بيجي موظف من السفاره ويشوف حالتك مها: ....... فيصل: انا طالع اللحين تامريني على شي ؟ مها سرحانه وتناظر الارض:......... فيصل : طيب خذي هذا رقم جوالي واتصلي علي ان احتجتي شي ولايردك الا لسانك ....يكتب لها الرقم ويضعه على الطاوله.... ومشى الى ان وصل الى الباب وقبل يطلع سمع صوتها تناديه مها: فيصل ....فيصل فيصل : نعم مها: ابي اقولك شي فيصل : امري مها: ابغى سلامتك ودير بالك على روحك ..تركد ولا تسرع ...وماعليك من ربعك دمك خفيف وتضحك ...طيب و... و... ومشكور على كل اللي سويته معاي يمكن انا مااستاهل بس الله يجزاك خير فيصل: اعجبك انا......والله يامها ماابغى غير سلامتك ولاتنسي الرقم على الطاوله ...ماودي اطلع بس مضطر ...مع السلامه مها : مع السلامه .................... اسبوع مر وفيصل وفاطمه كل يوم فيه كانوا يزورونها ويشوفون احتياجاتها .... اليوم الثلاثاء في المطار .... فاطمه: يالله يامها مع السلامه ومااوصيك على نفسك مها:مع السلامه يافاطمه وماتقصرتي كنتي لي اكثر من اخت الله يجزاك خير ... فيصل: ماودي تصير هاللحظه ونتوادع بس مااقول غير مصير الحي يتلاقى مها: هذي الدنيا وعسى الله يوفقكم ....فيصل انت وفاطمه انتم لازم تزورون الكويت وهذا عنواني لازم تجون هناك عليكم حق ولازم اتمه فيصل من لقافته مد ايده بسرعه واخذ الورقه وقال: الله يهديك بس أي حق واي خرابيط مها:ولو هذا دين برقبتي ....هذاك اللي بيسافر معاي يأشرلي تصوروا ولاواحد من اهلي تطوع وقرر يساعدني الله يسامحهم سلمت مها على فاطمه ومد فيصل ايده علشان يصافحها ...صافحته مها وباللحظه قال بصوت خفيف مايسمعه غيرها"ابيك بأي طريقه لكن تأكدي مو غير الحلال".... مافهمته مها وراحت تمشي على هونها بعكازتها لانها مااستردت كامل عافيتها ...ركبت الطياره وتفقدت اغراضها ...كل شي اوكي...حان الان موعد اقلاع الطائره .... في الطياره :تغمض عيونها وترجع الكرسي ورى وتفكر بكل اللي صارلها ..تذكرت اهلها ...ابوها اللي كان امنيته يشوف بنته محاميه مشهوره بس مجموعها ماساعدها تدخل كلية الحقوق ومع ذلك فرح لها لما قررت تدخل كلية الآداب تخصص انجليزي ..تذكرت جملته اللي قالها لها لما نجحت بالثانويه العامه وجابت نسبه تدخلها الجامعه ..قالها: والله ورفعتي راسي يابنيتي اللحين عندي شي افتخر فيه واذا قعدت بالدوانيه اقول:يكفيني ان بنتي جامعيه وانتم بناتكم ماخلصوا الثانويه ....تذكرت لما يشتريلها الساعه اللي بميتين دينار اللي تمنتها بيوم كانوا بالسوق ووعدها ابوها انه يشتريها اذا نجحت ... "مدام لوسمحتي مابدك عصير" قامت متخرعه على صوت المضيفه اللي عكر عليها صفو ذكريتها "لا... مشكوره "...قالت جملتها الاخيره ولفت راسها صوب الدريشه : " يايمه هذي فترة امتحانات ولازم تغذين عدل علشان تستوعبين وتفهمين دروسج" ....تبكي مها لما تتذكر امها ..."وينج يايمه انا من بعدج ضايعه... اللحين من يهتم فيني من يحرص على راحتي" تذكرت اخوانها وخواتها ...كلهم غادروا بلمح البصر كل شي يختفي ...الام ..الاب ..الاخ والاخت..صج ان الخساره في العمر في هالحظات الكئيبه تذكرت كتاب الشعر اللي هي مسويته ومجمعه الاشعار اللي فيه من الصحف والمجلات وكانت ماخذته معاها تسلى فيه بالسفر ...فتحت الجنطه وطلعته ..كان سليم ومافيه أي شي ...ضحكت لما شافته تذكرت موقف قديم مع ابوها وهالكتاب ...وهذا هو الموقف: احمد اخوها الصغير يدخل الصاله : مها هذا كتابج عهود الوصخه بنت جيرانا تقول خلصت منه.. كانت مها حزتها برابعه متوسط وكانو اهلها كلهم متجمعين بالصاله ...فزت بسرعه واخذت الكتاب وراحت تركض غرفتها وكانت خايفه ..ابوها ناداها: مها...مها...تعالي وريني شهالكتاب؟؟؟ ماردت عليه مها وكملت مشوارها ...عصب الوالد وحسب ان الكتاب فيه شي مو زين ولحقها لين غرفتها وضرب الباب بقوه وهو يقول : والله ان مافتحتي لكسر هالباب على راسك ...وهي خايفه فتحت الباب وشدها مع شعرها :اقولج طلعي الكتاب شفيه؟؟؟؟؟؟ ...مها وهي تبجي : يبا كتاب عادي من رفيجتي اكتب فيه ذكرى ..الاب وهو يهد شعرها: ممكن اشوفه تطلعه مها وهي خايفه : هاك شوفه ....يقلب ابوها الصفحات ...وبعدين سكر الكتاب وتأمل وجهها الخايف ..سكت لحظات بعدها انفجر بالضحك وقال:الله يقطع سوالفج شفيها يعني لو خليتيني اشوف الظاهر انج ماتدرين اني احب الشعر سكتت مها ....ورفعت عيونها : صج يبه انت تحب الشعر ... ابتسمت لما طرالها هالموقف عقب قعدت تقلب بصفحاته ...لفت انتباهها شعر ...يقول : - الموت حق وخل نفسك قويه ...ياما بهالدنيا تشوف النكايد - تغارقت عيونها بعد ماانهت قرائته وقالت بنفسها : انا لازم اصير قويه الدمعه هذي خلاص المفروض ماتنزل مره ثانيه.. حاولت تدوس على حزنها قد ماتقدر وتنسى اللي صار ....مع ان النسيان كان من سابع المستحيلات الكويت..... نزلت من الطياره ...التفت يمين شمال .."هذا اللي توقعته"..."محد موجود وين اروح" ...قالت للمرافق اللي معاها : ادري تعبتك معاي بس لوماعليك امر ممكن توصلني ... المرافق: أي ولو حياج تفضلي انتي بس وين وجهتج؟ مها بقلبها "بيت خالي ...المكان الوحيد اللي الجأله " ووصفت للرجال المكان اللي تبيه ...
التعديل الأخير تم بواسطة الهمة العالية ; 2009-01-30 الساعة 8:37 PM.
|
|
في بيت خالها :
الخال: لا والله توج تذكرين ان لج خال ؟؟؟؟ مها : حرام عليج ياخالي هذا بدل لاتقول عظم الله اجرج ! ماتشوفين شر! ترى اللي صارلي مو شويه ؟؟؟ الخال: الزبده شتبين هاتي من الاخر ؟؟؟؟؟؟؟ مها: ياخال انا مالي مكان اروحله و....... الخال: وبيت ابوج ؟؟؟ مها: انت عارف ان احنا مو عايشين ببيت ملك لنا كنا عايشين بملحق واجار بعد الخال: ومدام ان انتم فقر وعلى باب الله شمسفركم؟؟؟ مها: رحنا عمره سافرنا لبيت الله ياخالي الخال: تدرين ؟لو ابوج ذكي وحاسبها عدل فباله جان ماصار اللي صار وموتوا هههههههههه مها وصلت حدها : خاف ربك ياخالي هذا يومهم وهذا المكتوب حرام عليك الخال: ترى انا وراي مشاغل ومالي خلق لج مها: يعني شلون انا مالي احد بالدنيا غير الله ثم انت الخال: ووين كنتي طول الفتره اللي طافت .... مها: اللي راح راح واظن ان انت مقصر معانا بعد ..امي كانت اكبر منك وكان حق عليك زيارتها الخال: اووووووه ردينا على امج المهم انا ماعندي غرف فاضيه غير غريفه وحيده بالسطح وحاطين فيها الخيام تبين حياج الله ماتبين الشوارع يمدحونها القطاوه هههههههه مها: بس البيت كبير حرام تقطني بالسطح لحالي الخال: والله تبين كان بها ماتبين الباب ياسع جمل ويطلع خالها بسرعه قبل يسمع ردها .." مالي حيله وين اروح بعد " وتاخذ اغراضها وتتبع الخادمه السطح كان اقذر مكان بالبيت حتى الحمامات كرمكم الله كانت انظف منه ..وغرفتها عباره عن دار صغيره 4×5 وبجنبها حمام صغير تكرمون ....كان خالها بيحطها للسايق بس السايق رفض الا ينام في المقلط لانه على حد قوله يخاف ...لاتلومونه المكان رهيب ... ومثل أي سطح كان مرتع للحمام والدجاج ومثلكم عارف مخلفات هالحيوانات وازعاجها...وفوق كل هذا الحشرات اللي بالغرفه وصوتها المزعج .....والقوارض الخايسه مثل :الفيران والصراصير و"عنز الما"اللي كان صوتها بحد ذاته يجيب المرض.....مسكينه مها "ياربي انا شذنبي كل هذا عشان اهلي ماتوا ؟ ليش يعاملني جذي" ومثل هالاسئله كانت دايم ترددها مرت الايام سريعه وبعد شهر وهي عند بيت خالها بدى الجو يبرد وانقضى اسبوع من بدى شهر رمضان الكريم ومها حياتها مو مثل الناس الذكريات تحطمها تبكيها تألمها النوم صارشبه المستحيل والراحه مداها بعيييييد ...خصوصا اجواء رمضان ذكرتها بالغالين اهلها وجمعتهم وصلاة التراويح مع امها واخوانها..."اهل البيت هذا مايعرفون صلاة؟" ودها تقول حق خالها بس خايفه من الرد... مها: خالي ودي اروح صلاة التراويح ممكن تخلي السواق يوديني؟ الخال: تكفين؟ خاف صج بس؟انتي على بالج السواق فاضيلج ؟ مها: بس هذي صلاة وانت مو من حقك تمنعني عنها الخال: صلاة المرأه في بيتها؟؟؟ مها:بس انا مااشوفك تصلي بالمسجد الخال بعصبيه:انتي مو ربي عشان تحاسبيني !!! بعدين انتي شدراج عني اخاف تراقبيني وانا مدري ؟؟ مها:زين انت ليش معصب ؟؟ الخال:اللحين شتبين؟ مها:بروح الصلاة؟ الخال: صلي من قاضبج؟؟؟؟والله انتي عينج قويه؟؟؟؟شوفي شوفي بلا عوار راس المسجد ورى الشارع روحي مشي رياضه هههههههه... ::::::::::::::::::::::::::::::: في المملكه العربيه السعوديه : فيصل: والله ماني عارف امك هذي وش اسوي معها؟؟؟؟ فاطمه: يافيصل حرام عليك هذي امك ولازم تراضيها وتزوج فيصل :اتزوج أي ميخالف بس اللي امي اختارتها لي لا والف لا ...يافاطمه انتي ماشفتيها !!! فاطمه:امي تبيلك الزين واذا البنت مش حلوه اكيد اخلاقها زينه فيصل:فاطمه انتي ترضين لاخوكي الوحيد ياخذ شينه وخبله بعد ؟ فاطمه: انت شتبغى بعرف مو عاجبك العجب ولا الصيام برجب؟ فيصل وهو واقف: انا ابغى بنت حلوه مؤدبه هاديه و..... فاطمه تقاطعه: يافصيل لايكون حاط وحده ببالك؟؟؟؟؟؟؟ فيصل يرتبك:ها لا انتي تعرفيني انا ماعندي هالسوالف فاطمه:تغبي على من؟... انا اعرفك ياخوي وانا اللي مربيتك فيصل:صدقيني يافاطمه مااعرف وحده معينه بس احلم ببنت مثل هالاوصاف فاطمه:واللي يقولك انك عاشق ومفلس يضحك فيصل ويطلع من البيت وقبل يطلع من الباب سمعها تقول ولاتنسى تزور امي ترى تسأل عنك .... وهو في السياره : أي والله اني عاشق ...والله اني احبها والحب ماهو خطيه بس هي وين وانا وين ياربي وش اللي معها اللحين ؟؟؟؟؟يارب ارفق بحالها يارب انت تعرف اني احبها يارب تساعدني.... عند ام فيصل: فيصل: عساكي على القوه يمه الام:انا وين والقوه وين ؟؟؟؟))))))) (((((امه متسلطه نوعا ما))) فيصل:لاتقولين كذا يمه انتي ماشالله عليكي قويه وزينه احسن من غيرك الام: خلنا من الهرج اللي مايجيب ولا يودي ...وقلي متى تبغانا نملك على البنت ترى انا عطيتهم كلمه فيصل بعصبيه: وانا؟ انا مالي كلمه ؟؟خلاص طبختيها الام: وش اللي طبختها ما طبختها ؟؟؟ فيصل يحاول يتكلم بالعقل: يايمه ياحبيبتي انا اللي بتزوج مو انتي عشان تقرري على كيفك والدنيا ترى اخذ وعطا الام: انت اصلا تبغا تعصاني مو صيدك شي ثانيّّّّّّّّّّّّّّ!!!!!!!! فيصل: يايمه حرام عليك والله اني اغليك وانك شي ثاني بدنيتي الام:طيب قولي شفيها موزه بنت حلوه ومؤدبه فيصل: الله يهديك يمه وش الحلو فيها تجيب المرض الام:عيب تقول كذا عن بنت خالتك فيصل: يمه ممكن سؤال؟ الام: انت سائل سائل قول وشعندك فيصل: انتي تحبيني؟؟؟؟؟؟؟؟؟ الام: لعنبو دارك عشيقتك انا ؟..عشان تقول تحبيني ماتحبيني وش هالخرابيط فيصل:يعني انتي ماتحبيني؟؟؟؟؟؟؟ الام :يا فيصل انت ولدي الوحيد وماعندي اغلى منك واللي بقلبي لك اكثر من الحب فيصل:وتدورين على راحتي؟ الام:أي والله ابغى راحتك فيصل: وانا راحتي بعيده عن موزه الام :وخالتك وشقولها ؟ فيصل: مدري يمه اهم شي طلعيني من الموضوع الام: طيب خلصنا من هالموضوع فيصل وهو يحب راس امه: الله يخليكي لي يمه ولا يحرمني منك الام: ماتقولي يافصول ليه مااخذت اجازه السنه هذي؟؟؟ فيصل: والله يمه كذا العطله ملل وماعندي شي اسويه قلت اشتغل افيدلي ام فيصل "حرمه ورجال" بنفس الوقت... معتمده على روحها... وهي متعلمه وتعرف تقرى وتكتب وتطقطق بالانجليزي ... عندها سايق وخادمه ومأجره بيتها اللي فوق وفيصل يجيها كل يومين... وكذا مره طلبت فاطمه منها انها تجي وتسكن عندها بس امها رفضت... فاطمه بيتهم كبير وزوجها عنده حلال وكريم وماكان بيرفض بس امها مابغت ....فيصل كان موصي علىاخته انها ماتقول لامه عن قصة "مها" نهائيا ماكان يدري شنو السبب بس حاس ان امه مراح ترحمه اذا عرفت المبلغ اللي تدينه عشان يساعدها ... ::::::::::::::::::::::::::::\ سالم"خال مها": اقول مها ...كم صار من ماتوا اهلج؟؟؟؟؟ مها"بقلبها:والله ماسألت لله اكيد وراك مصيبه": مو اقل من 3 شهور سالم: طيب انا بسألج سؤال : اذا هندي جا الكويت وسكن بشقه ....برايج يدفع ايجار؟ مها بغيظ : اكيد اذا ماكان ساكن عند خاله نوره مرة خالها: والله انج فهيمه يامها ماشالله عليج سالم بعصبيه: انتي تعرفين تقطين نغزات ؟؟؟ مها: انت تدري اني مقطوعه من شجره ومحد ملزوم فيني غيرك وصدقني لو طردتني القانون يردني لك غصب بدون ايجارات سالم: بلا كلام فاضي بكره تزهبي من الساعه 6الصبح ابيج قاعده هني بالصاله مها باستغراب: ليش؟؟؟؟؟؟ وين اروح سالم : بنروح البنك راحت روحج وجيبي بطاقتج المدنيه معاج وجنطة ابوج اللي جنها حظج مالت الاوراق المهمه مها: وليش من الساعه 6 عاد؟؟ سالم: شوفي اذا مالقيتج من6قاعده والله وامان الله لجرج من شعرج من فوق لين تحت فاهمه مها: خلاص لاتعصب زين راحت مها لغرفتها وحطت تلفونها على المنبه تلفونها اللي كان مصفر مافيه الا12فلس "يحليلج يمه كروت تلفوناتنا انا وياج بسرعه تصفر ويالله بالموت نقول لابوي اللي مايقصر.....الله يرحمكم برحمته ::::::::::::::::::::::::: فيصل: ياعامر انا محتار مدري شسوي تعبت من التفكير اكل راسي عامر"صديق فيصل": تعرف رقم جوالها؟ فيصل:ايه وحافظه بعد... عامر:اتصل فيها وتطمن على احوالها فيصل:استحي ياخوي بصفتي من عشان اكلمها علمر: طيب وشرايك تخلي اختك تكلمها ؟؟؟ فيصل: أي والله خوووووش راي وين راحت عني هالفكره الرهيبه ويقوم فيصل يركب سيارته ويناديه عامر: فصول تعال يالخبل مش اللحين بعدين ياولد لاحق مارد فيصل عليه كان سرحان وترك عامر لحاله بالدوانيه وطلع فاطمه : انت واحد فااااااضي فيصل: هذا وانا اول مره اطلبك ترفضين فاطمه: انت عارف كم الساعه اللحين فيصل : ايه11 واذا عادي احنا برمضان فاطمه:معك حق بس يمكن البنت نايمه حرام نوقظها فيصل: انا متأكد انها مونايمه ..يالله عاد لاتصيرين ثقيلة دم خلينا نعرف البنت شخبارها فاطمه:الحبيب واثق انها قاعده اتصل بس لاتموت علينا فيصل وهو شاق الضحكه وطاير من الفرحه: الله لايخليني منك يااحلى اخت بالدنيا بس طلبتك قبل تقولي مع السلامه عطينياها اسلم عليها فاطمه: هيه انت روميو وين قاعد انا ماراح اطول معاها لان يصرف عليها فيصل وهو يدق ارقام جوالها: طيب بس اسمع صوتها.... اخذت فاطمه الجوال وحطته على اذنها:الحمدلله والشكر العشق بلوى .........هلا الو هلا مها فيصل انصدم مايدري شيسوي وتم يطالعها فاطمه:هلا بالغاليه مها علمينا وشخبارك وينك ووين ودتك الدنيا.......هلا مااسمعك اياي والله صحيح ...مبروك ياحياتي والله تستاهلين ...رفعت فاطمه عيونها على فيصل اللي شوي ودموعه تنزل.....ومن سعيد الحظ ؟ لا الله يهنيكي تستاهلين يالله انا مااطول عليكي اقول مها ترى فيصل يسلم عليكي....الوالوالووووووو يوه انقطع الاتصال الظاهر ماسمعت يوم قلت فصول يسلم عليكي ....اسفه فيصل خلاص خل البنت بحالها اخذ فيصل جوالها وطلع برا البيت ...كانت الدنيا ماتشيله نت الحزن مع ان قبل دقايق كانت ماتاسعه من الفرحه مها كان تلفونها مغلق طبعا بحكم ان بطاقتها منتهيه وكل اللي صار كان مجرد لعبه من فاطمه ...فاطمه اللعي كان عاز عليها حال اخوها فيصل ماكان يفكر الافيها وعنده امل كبير انه يتزوجه....يارب سامحني انا ماتعودت اكذب بس مبغى اخوي يتعلق بوهم ماابغاه يضيع حياته عشان وحده يمكن توافق ويمكن ترفضه بعد ماابغى امي يصير فيها شي اذا عرفت.......سامحمني ياخوي كله ترى لمصلحتك.. فيصل مايدري وين يروح :معقوله مها تزوجت معقوله! احس اني مو مصدق البنت اهلها متوفين مالهم الا3شهور وتدور العرس ..ياويلي والله اني احبها ليه يصير معي كذا , ضاعت من يدي خلاص يمكن خالها زوجها غصب عنها يبغا الفكه منها اكيد والا هي ماتبغا العرس ....اللحين انا وين اروح ؟؟؟؟ مادرى الا ودمعه نزلت من عينه وعرف انه مقهور هذي اول مره يبكي فيها عقب 12سنه من مات ابوه: انشهداني قاسي على نفسي كذا الموع تريح الواحد وانا حارم نفسي منها 12سنه من قال ان رجل مايبكي العن ابو القهر بس ..روحي يامها الله يوفقك ويريحك من همومك ويوقف على اقرب مسجد ويصلي ركعتين ويدعي ربه يرحمه ::::::::::::::::::::::::::::::::::::::::
التعديل الأخير تم بواسطة الهمة العالية ; 2009-01-30 الساعة 8:42 PM.
|
|
مها في الصاله من الساعه 6 الا ربع خافت من خالها وهو اذا قال يسويها ...ماصارت الساعه 6 الا هذا خالها هاجم مثل الثور واول ماشافها اعتفس وجهه اللي كان معفوس من الاساس كان وده ينفذ اللي قاله امس بس حسافه لقاها قاعده
سالم بدون نفس: انا طالع البس واجي انطري شوي مها: خلاص انا ناطرتك وبعد ساعتين ونص يجي الاخ ... سالم: يالله قومي... مها: خالي حرام عليك مقعدني من الساعه 6 حتى النورماطلع وتوك تجي سالم: حرمت عليج عيشتج قولي امين....انتي غبيه في بنك يفتح الساعه 6 والناس رمضان حتى تفكير ماعندج طالعه على امج طبعا مها:لا حول ولا قوة الا بالله الناس رمضان خاف الله سالم:بلا هذره زايده وقومي خلصيني في البنك تعرف مها ان كل رصيد ابوها كان الف دينار ومعاشه التقاعدي 500دينار ولها الف ونص بالبنك حساب الاشهر الثلاثه اللي طافت سالم : مها يابنت اختي العزيزه عندي لج راي مها: تفضل قول ياخالي انا اسمعك سالم: انا بجيبها من الاخر انتي حسابج كله الفين ونص ومعاش ابوج الشهري 500 ومدري كم ؟ وانا سجلت اوراقج وخلصت.. مها وهي تحس ان خالها بدى يهتم فيها شوي: جزاك الله خير ماتقصر ياخالي سالم: بس يامها كل خدمه ولها مقابل انا اذكر مره قلتيلي انج بتدخلين الجامعه مها: وانا اذكر الطراق اللي عطيتني يوم قلتلك سالم: شجاب طاري الطراق اللحين ...المهم عطيني الالف والنص وانا بصير كريم معاج وبخليلج الف وتنازليلي عن 300 من معاش ابوج وال200 مدي كم ؟ هم بصير كريم معاج وبخليهم لج اشرايج اذا بتزيديني ماعندي مانع مها وهي مصدومه: خالي حرام عليك انا مستعده اعطيك الالف واعطيك من المعاش مبلغ معقول بس مو كل هذا حرام عليك انا ...مااقدر سالم بعصبيه: يعني ماتبين الجامعه يعني ماتبين تاكلين يعني ماتبين تشربين وتنامين وتسكنين وتبين تنذلين وتنطقين وتنهانين مها: ليش الفلوس اللي اعطيك هي اللي بتعزني وتدخلني الجامعه سالم: شوفي انتي سويي اللي قلتلك عليه والله والله مااتعرضلك ولالي شغل وسويي اللي تبينه مها بقلبها"والله انك ماتستاهل حتى الربع دينار بس في سبيل دراستي: وانا موافقه فرح الخال وحس الدنيا مو شايلته :ههههههه هذا العشم فيج يابنت اختي مها : بس على شرط نطلع من هني ونروح الجامعه ونسألهم الخال: افا عليج ماطلبتي شي سالت مها وقدمت اوراقها واعذارها ووافقوا على طول انها تداوم الكورس الثاني وسجلت تخصصها : ادب انجليزي تمر الايام ثقيله على فيصل ويدعي ربه في العشر الاواخر من رمضان من كل قلبه ان الله يرحمه ...بس ذكراها دوم في باله ومها لاهيه مع الجامعه تروح وتشتري جناط وجواتي وتخيط عبي ومستلزمات الجامعه ..وخالها تغيرت معاملته لها عقب الفلوس هو فعلا مايحترمها بس يحاول يتجنبها ويخليها تروح مع السايق ..... :::::::::::::::::::::::::: في اول ايام عيد الفطر السعيد.... ::::::::::::::::::::::::: فيصل: صباح الخير يمه ...عيدك مبارك الام: هلا والله بوليدي صباح النور والسرور عساك من العايدين والفايزين يسلم على امه وتسلم فاطمه على امه وضحك وسوالف وشاي وقهوه ... الام: فيصل يمه ليه ماتكلم وليه ماتضحك فيصل: اتكلم يمه ويش اقول الام: فاطمه انتم ماتوكلون فيصل فاطمه: هههههه يمه الله يهداك تكلمين جد انتي اشيل اللقمه من فمي واحطها في فمه فيصل بقلبه"واضح ياام الاخبار الشينه" : ههه يمه الله يهديك وش مايوكلونك هذي الا انشالله اكل واشرب مافيني الا العافيه الام: والله اني اشوفك منت على بعضك وصايرن وجهك اسود وضعيف شفيك؟تشكي شي؟ فيصل: من الشغل يمه والله تعب نكرف ليل ونهار الام : وانت وش اللي حادك .... في هذي اللحظه توصل رساله لفيصل ونغمة الرساله تبط الراس فاطمه: الحمدلله والشكر احد يحط نغمة رسايل كذا فيصل: اسكتي انتي ياام الرسايل مخلي النغمات ليكي فيصل يفتح الرساله وانصدم لما قراها " عيدك مبارك وعساك من عواده ...توقعتك تتصل وتسأل عني ...بس ماعليه انت طمني شخبارك وشخبار فاطمه سلملي عليها....مها" قرى الرساله10مرات وتأكد من الرقم . الام: خير يافصول وش اللي في الرساله ؟ رفع فيصل راسه على فاطمه وطالعها بنظرات احتقار ووده يطقها بس مايقدر قلبه مايسمحله ...شال عمره وطلع عن الغرفه اتصل ما اتصل ياربي اتصل واللي فيها فيها .... مها بصوتها المبحوح: الو فيصل: السلام عليكم مها: فيصل؟؟؟؟ فيصل: ايه فيصل شخبارك مها:............. فيصل: العيد عليك مبارك يامها مها: عساك من عواده ...وينك لاحس ولا خبر فيصل: والله يامها اشغال بس اتصل عليك وكل مااتصلت يطلع مغلق مها: أي انا بطاقتي كانت منتهيه وشحنتها من جديد فيصل: اها علشان كذا ...طيب انا ماودي اطول عليك بس حبيت اعرف انتي شخبارك مها: يسرك الحال وانا عايشه عند بيت خالي فيصل: مها ....تزوجتي؟ مها:ههههههه من قالك؟ فيصل: مجرد سؤال مها: لا.... تطمن لا متزوجه ولامخطوبه فيصل: اجل انطريني بخطبك وتتزوجيني غصب عليك مها:........... فيصل: اسف اذا تماديت بكلامي مها: مسموح وانت ماخطيت فيصل: طيب مع السلامه... مها: مع السلامه :::::::::::::::::::::::::: ياكبر فرحتك يافيصل ... فيصل: مها تعالي شوي ابيك الام: ومن مها ذي ؟؟؟؟؟؟؟؟ فيصل: من مها انا قلت مها؟ انا قلت فاطمه الام: وشتبغا في فاطمه عندك شي قوله قدامي فيصل ماحب تشك امه فيه: ابغى اقولها ..... الام: تكلم شعندك فيصل: يايمه الله يهديك لازم يعني تخربين المفاجآت الام: يافاطمه الخبل هذا وشيقول فاطمه: علمي علمك يمه فيصل: والله انكن منتن بكفو اللي وده يوديكن يفسحكن الام: أي والله ياوليدي ضايق صدري من البيت بس عقب بنروح اول نروح نسلم على الجيران فيصل: طيب انا بروح اسلم على واحد من الربع وعقب امركم وهو في السياره كتب لها مسج وهو قلبه يدق من الخوف نطر ربع ساعه وعيونه على الجوال معلقه : ياربي شفيها اكيد ان رصيدها خلص ؟؟؟؟؟ ترك تلفونه على الصامت ونزل يسلم عل صديقه وبعد ماخلص من صديقه تذكر انه مواعد اهله يوديهم منتزه ترفيهي يغيرون جو..وقرر انه يتصل عليهم علشان يتجهزون... ...............الرسائل الوارده: 2....... الرجال طار من الفرحه وهو يقول بداخله:الحمدلله ماطنشتني والله انك نشميه يامها الرساله الاولى من عامر يقول فيها: "يارجال وينك الناس عيد يسلمون ويباركون وانت مايندرى عنك حي والا ميت مااقول غير:عيدك مبارك" ضحك فيصل من قلبه وهويقول الله يقطع سوالفك ياعامر انا كيف نسيتك؟؟؟؟؟وهو بيرد على رسالته تذكر الرساله الثانيه وقراها ... وفرح انها ما طنشته فيصل: الله علييييييييييك يافيصل من قدك نسى الرجال اهله وانه مواعدهم ...وراح سيدا لعامر صديقه ......... عامر : يعني ياحمار ماتذكرنا الا جاك شي من ست الحسن والجمال فيصل: حمار ها؟ اليوم عطله وبخليك اللي تبيه على راحتك عامر: الا قول اليوم عيييييد موعطله وعيدك انت عيدين فيصل: ههههههههههههههههه والله انك صادق وخذتهم السوالف لما رن جواله.. فاطمه: فصول ووجع انت وينك امي ترى مفوله حدها ....والله شكلها بتزعل عليك فيصل تغير وجهه: انت وشتبين لو سمحتي لاتتصلين علي مره ثانيه فاطمه: انت فيصل والا انا غلطانه بالرقم فيصل وهو طالع : الا انا فيصل يااخت فاطمه بغيتي شي فاطمه : فيصل شفيك علي ..انا وشسويتلك؟ فيصل: لا ماسويتي شي ...بس بغيت اقولك ان كسر الخواطر ماهو زين والكذب عيب يافاطمه ... وسكر الجوال في وجهها ....وعرفت فاطمه غلطتها وتندمت على اللي سوته ...... :::::::::::::::::::::::::::::::::::::::: في الكويت: :::::::::::::::::::::: ثاني ايام عيد الفطر السعيد: ::::::::::::::::::::::::::::::::::: ومها قاعده في غرفتها تقرى كتاب عن الجامعه والكليه اللي بتدخل فيها ..... دخل عليها "علي" ولد خالها "9سنين" علي: مها انتي صمخه ماتسمعين ابوي معصب حده بح صوته وهو يناديج ...الله ياخذج تعبتيني مها: وشدعوه عاد بروحك جاي باللفت أي تعب تكلم عنه؟ علي: ترى انتي لسانج طويل ويبيله قص قومي عاد وانقلعي يالله لااعلم ابوي على اللي قلتيه يقص رقبتج مو لسانج عاد انتي تعرفين غلاتي عنده مها:لا يمه خوفتني تكفى بس ...وشيبي ابوك بعد علي: شنو ...؟ شنو شيبي ابوك وين اصرفها هذي؟؟؟؟هييييين انا اروح اقوله................. مها: هذا وهو هالطوله ويعرف سوالف المحارش الله يعينا عليه بعدين وفي الطابق الارضي : سالم: انتي هيييييه ماتستحين ليش ماتجين بسرعه وليش تطولين لسانج على ولد خالج اللي انتي اصلا قاعده في بيته مها: عيدك مبارك ياخالي العزيز امس نزلت وماشفتك يقولون طلعت البحرين مع ربعك الحمدلله على السلامه سالم: ها؟؟؟؟ خلاص خلاص سكري على الموضوع مالي خلق تفتحيلي باب مع نوره توني مناقشها بالموضوع بروحي رايح وهي ماتدري مها: بغيت شي والا اطلع غرفتي؟ سالم: مها حسني اسلوبج معاي انا خالج ؟ مها: وانا شقلت ؟ انت ناديتني شتبي فيني؟؟؟؟ سالم: ابي فلوس.. مها: وانا منوين لي فلوس بروحك ماخذ نص المعاش سالم: والالف اللي في البنك مها: حرام عليك يااخي خاف الله فيني عندك مزرعه وبيت اجار وحاط عينك على الالف اللي عندي ..والله حرام سالم: ايا يال....تبخلين على خالج؟ مها: الالف مستحيل اعطيك انا مو مغفله ولا مسكينه علشان اعطيك اللي تبيه وعطت مها ظهرها لخالها ومشت سالم: مهااااااااااااا ::::::::::::::::::::::::::
التعديل الأخير تم بواسطة الهمة العالية ; 2009-01-30 الساعة 8:48 PM.
|
|
|
شكرا .. ع القصه
"" ولم استطع قراتهاااااا ... كلهااا .. لى رجعه .. باذن الله "" ربي يعطيك العااااااااااااااااااااااااااافيه ..
|
""
|
الجزء الثالث:
مها:........... سالم: تعالي مها تكمل طريقها ولاكأن احد ناداها ...وعلي كان بجنب ابوه وقاله: يبه طقها يبه تعلي صوتها عليك وانت ساكتلها هذا بيتك ...طقها اغتاظ سالم لما سمع كلام ولده وراح يركظ صوبها ...وهي لفت عليه لما سمعت كلام ولده اللي كان نسخه من ابوه .......... ولما لفت عليه عطاها ذاك الكف اللي طيحها على الارض سالم: يمكن هالكف يسنعج يابنت امج .....ماينفع معاج الا العين الحمرا......وخلي فلوسج لج يا....يالبخيله ويطلع سالم من البيت مع ولده.... تبكي مها بصمت وحرقه وتنتحب تمسح دموعها وتمرر ايدها صوب حلقها اللي نزل منه قطرات دم .... مها وهي تشيل عمرها: الله يسامحك ياخالي والله لو ولدك كان مكاني والله ان اهلي يعاملونه احسن من عيالهم ....طلعت لغرفتها وهي في قمة يأسها وحزنها وتقول بنفسها: اليوم يطقني وباجر الله اعلم شيسويلي؟؟ وفي غرفتها تتذكر ايام قبل اللي مافارقتها دقيقه......: مها: عيدج مبارك يااحلى ام بالدنيا الام: عساج من العايدين والفايزين تو الناس يمه جان نمتي بعد مها: هههههههه يمه وين ابوي بعيد عليه ؟ الام: اكيد بالدوانيه واللحين يجي روحي ياقلبي لبسي اخوانج مها: وانا هذا حالي كل عيد البسهم؟ الام: خلاص مشكوره مانبيج تلبسيهم اذا بتمننين؟ مها وهي تقلد المصريين: وانا أأدر يامَه؟ افا عليج اللحين البسهم واكشخهم ........ويدخل ابوها مها وهي تسلم على ابوها وتحب راسه: عيدك مبارك يبه الاب: هلا وغلا ببنتي والله عيدي مايتبارك غير بشوفتج مها: الله يخليك لي يبه ولايحرمني منك...........ماقلتي جم بتعطيني عيديه؟ الام: ياابو ناصر ترى الكلام اللي ينقط عسل مو لله البنت تبيلها فليسات الاب: حق والله ياام ناصر هذي مهاوي الغاليه تستاهل كنوز الدنيا.....بس وانا ابوج مايصير تقولين لاحد عطني عيديه لين يعطيج مها: اولا انت مو أي احد انت ابوي –وثانيا: انا كنت اتدلع عليك ولابي غير سلامتك يالغالي الاب: ههههههه ادري فيج اصيله ومن قال اني مااعطيج .....وهذي عشرة دنانير عيديه لج بس ها لاتعلمين اخوانج اني عطيتج عشره انا بعطيهم على دينار دينار وسامحيني يامها والله لو عندي ماابخل عليج بس انتي ادرى بالحال مها تدمع عيونها: والله والله مابي غير سلامتك وتحب راس ابوها وتروح تقعد اخوانها وتلبسهم "وينج ياايام قبل والله محد يقدر يسترجي يمد ايده علي" كانت مها على سريرها مجفسه رجولها ومقربتهم من صدرها وراسها على رجولها :::::::::::::::::::: وبعد مرور اسبوع من اللي صار تزور بنت بيت خال مها: ساره: اقولج انا ساره رفيجتها وسمعت انها عايشه هني ببيت خالها ممكن تنادينها بسلم عليها صارلي زمن مو شايفتها نوره مرة خال مها: لو سمحتي تكلمي بأدب داخله بيت الناس وتهاوشين ساره: انتي اللي لو سمحتي صارلي ساعه موقفيني على الباب وبعدين دخلتوني بالغصب واللحين مستلميني تحقيق وفي هاللحظات دخل ابو علي خال مها ويشوف ساره اللي كانت قمه في الجمال .... وسالم عينه كانت زايغه ويموت في شي اسمه الحريم وهذا الشي كان مضايق زوجته اللي كان يغيظها دايما لما يشوف مسابقات ملكات الجمال ...ونوره زوجته ماكانت على قدر من الجمال يعني عاديه واللي مصبر سالم عليها شيئين: العيال والشي الثاني انها من عائله غنيه ...زوجته كانت اكبر منه بسنتين وعيوبها واجد اما سالم فكان يقاله"مزيون" كان طويل وابيض وشواربه بنيه غامجه بدون لحيه ومن هالمواصفات الجماليه وفوق هذا كانت شهادته جامعيه بعكس زوجته اللي عادتها 100مره بثانيه ثنوي ....على فكره سالم كان بعده شباب وعمره 34سنه ولما شافت نوره زوجها منبهر من اللي يشوفه سحبت ساره ودخلتها الصاله الثانيه وقالت للخادمه تنادي مها ... نوره: شوفي هذي اخر مره تجين هني فاهمه .. ساره: وليش انشالله؟ نوره: هذا مو بيت مها هذا بيتي انا ...وانا كيفي من حقي ادخل اللي ابيه سالم يدخل الصاله الثانيه: السلام عليكم نوره ماتقدر تقول شي لانها ماتبي تبين للبنت انها تخاف على زوجها منها ساره كانت بنت جريئه : وعليكم السلام والرحمه انت اكييييد خال مها سالم وهو يقعد: أي نعم انا خالها اصلا اول ماسمعت بالخبر مارضيت على بنت اختي ورحتلها للسعوديه وهديت كل اشغالي عشانها تصدقين يا.....الا على فكره شسمج؟ ساره وهي تطالع نوره: اسمي ساره سالم : عاشت الاسامي وانا سالم فرصه سعيده هههههههه تصدقين عاد رغم خلافاتنا الكبيره معاهم نسيت كل شي لما عرفت الخبر "فيك الخير ياخالي ماقصرت "وتدخل مها وتسلم علىساره ....."ومن قبل كان بينهم اتصال" طلعت نوره معصبه من الغرفه ولحقها سالم على طول وهو يقول بنفسه :هذي زعلها يودينا بدواهي عجوز النار نلحقها ونشوف اخرتها مها: واخيرا ياساره مابغينا نشوفج ساره: والله انشغلنا بالدنيا ...الا تعالي هذي مرة خالج والا جدتج مها:ههههههه لا هذي مرة خالي ساره: حرام مايستاهل مها: ياساره هذا النصيب ...المهم كلميني على الجامعه شسوي ووين اروح اول يوم ساره: تدرين انا بمرج كل يوم وبنروح مع بعض مها: لاياحياتي مابي اتعبج بس جان اول يوم ساره:الا كل يوم بعد انا صرت اسوق سياره مها: صج مبرووووووووك ::::::::::::::::::::::::::::::::: "يابنت الناس والله طلعت مني عفويه شفيج انتي صايره جبريت" نوره: ترى انا سكتلك واجد وانت تماديت وهذي مو اول مره ياسالم سالم: خلاص والله مااقصد اني اضايقج نوره تبكي: سالم حرام عليك انا زوجتك وحال حال أي مره بالعالم ودها ان زوجها يقولها كلام حلو ويشوفها بس هي .......ليش تحسسني بالنقص ؟ سالم: خلاص خلاص كافي يانوره ادري اني مقصر معاج بس مو للهدرجه نوره:.................... سالم: نوره انتي زوجتي وحبيبتي وام عيالي لاتخلين أي شي يأثر فيج واللحين يالله قومي بدلي ثيابج نوره: ليش ؟ سالم: عشان تحسين ان حالج حال الحريم نوره:......... سالم: شفيج صنمتي يالله قومي بوديج نتعشى بمطعم......عشا رومانسي نوره: تكلم جد ياسالم تصدق صارلي سنين ماطلعت معاك ويطلعون يتعشون بس سالم كان كل تفكيره بساره ويحس بالقرف لما يتذكرها ويشوف زوجته
|
|
السعوديه:
فيصل: أي يمه خذيت اجازه الام: واخيرا مابغيت فيصل: والله بس عشانك يالغاليه الام: الا قول اشتقت للبر والكشتات بس هالمره ابيك تكشتني مع قوم لافي بيت جيرانا فيصل: ايه يحليله ابو غانم بيكشتون هالسنه ...خلاص انا بسأل العيال متى يطلعون الام: لاتسألهم ولاتتعب عمرك يوم الاثنين الجاي بيطلعون فيصل: خلاص بس بروحلهم اول الام: مايحتاج انا قلتلهم اني بظهر معهم فيصل: بس انا ماقلتلهم يمه ويالله انا طالع اللحين تجهزي يوم الاثنين امرك الام: فيصل والخيمه ؟ فيصل: بمرك الاحد انزل الخيمه واخذ الاغراض واروح لمنزالهم واسوي الاغراض انا وفاطمه قبل تجين الام: وفاطمه ظنك تروح؟ فيصل وهو طالع: مدري ابسألها وعقب ماطلع من عند ابو غانم وسلم عليه وعلى عياله وقال انه بيخاويهم واتفق معهم ....رجع للبيت عند اخته وقالها عن البر وسوالفه وطلب منها تقنع زوجه ....على فكره فيصل وفاطمه تراضوا لان مالهم غير بعض وفهم فيصل وجهة نظر اخته وارتاح انها تبي مصلحته اما فاطمه فعرفت ان حبه لمها كان اكبر من أي شي بالدنيا...... :::::::::::::::::::::::::::::::::::: وبعد 4 ايام فيصل يمر امه علشان يروحون يخيمون بالبر: فيصل: يالله يمه ساعه انطرك بالسياره انا الام: لحظه يافصيل اباخذ الكباريت اللي فالمطبخ فيصل: يمــــــــــــه خليهم نمر الدكان وناخذ اللي نبغاه الام: لا الا باخذهم انا مدري وين حاطتهم......ياحبك للخساير فيصل: يمه حرام عليكي متى بتتركين عنادك فاطمه صارلها ساعه بالخيام بروحها ماتت من البرد واحنا الدوه معانا الام: وفاطمه وراها ماتاخذ دوتها؟ فيصل يبي يمازح امه : مدري عنها وانا انتظرك بالسياره 5دقايق ترى اذا ماجيتي بمشي الام: رووووووووح زين تنتظر غصبن عليك فيصل: نشوف ياام فيصل يال....يالعوبه......) ويطلع فيصل بسرعه قبل تحذفه امه بالقلاس اللي عندها وراح يتفقد الاغراض ....طوطوط طوطوط. فيصل : ا ...وهو يفكر ومشغوووووووول بمها الا امه دخلت السياره الام: فصول يامال العافيه صارلي ساعه قاعده بالسياره وانت سرحااان فيصل: هلا وغلا بالغاليه ها خلصتي الام: أيه خلصت يالله ....ياهوين فاطمه تصدق 9 مكالمات لم يرد عليها فيصل: ههههههههههههههههه يمه انتي تعرفين للجوال الام: اجل ها؟ بس انتم الي تعرفون لا وازيدك من الشعر بيت اعرف ارسل رسايل فيصل وهو يحرك السياره: والله ؟ يالله اللحين ابيك ترسليلي مسج الام: مسج مااعرف اعرف رساله فيصل:هههههههه الاثنين واحد يمه الام: يالله استعد وانتظر5دقايق لين وصله المسج :يمه مسرع وشو انتي ياباني الام: بسم الله الرحمن الرحيم انا ماكتبت شي للحين اصبر علي المسج كان من مها تقول فيه: (ان غاب مرسولي...ترى القلب ماغاب....يبقى معك....لو الظروف ابعدتني) وبنفس الوقت وصلت رسالة امه" فصيل انتبه للدرب" ....حس فيصل بشي غريب شاف امه وهي تقفل جهازها , وتذكر مسج مها , وقال ماني براد عليها ::::::::::::::::::::::::::: الكويت الساعه 8بالليل: :::::::::::::::::::::::::: مها جالسه في غرفتها وفكرها مشغول , ياربي ليش مارد علي , يمكن تماديت بالرساله , تسمع صوت تلفونها و يقطع تفكيرها ساره: قوه مها مها ببرود: هلا ساره ساره: شلونج؟ مها بنفس البرود: بخير ساره: مها شفيج عسى ماشر؟ مها: مافيني شي ساره: شهالاجابات المختصره مها:عادي ساره: شنو عادي انتي تعبانه؟ مها:لا ساره: مها تكلمي.. ترى محد فاهمج كثري علميني شصاير مها: ............ ساره: مها ليش ساكته مها: السالفه طويله وانشالله اقولج بالجامعه واللحين ابي منج شي ساره: انتي تامرين مو تطلبين مها: تسلمين ياقلبي بس بغيت منج مسج عتاب ساره: غريبه وشتبين بالعتاب انتي؟... ومنو بترسليله بالاساس؟... مو تقولين كل رفيجاتج قطعتي علاقتج فيهم؟ مها: ساره ليش تطولينها وهي قصيره قلتلج بالجامعه بقولج كل شي اللحين بتعطيني اللي قلتلج ولا لا؟ ساره: اكيد بعطيج من عندي اغلا منج .....مها لحظه شوي ...هلا يمه ....اوكيه اللحين جايه....اقول مها امي تبيني اتعشى معاها يالله اللحين اطرشلج المسج مع السلامه.... مها: مع السلامه......ساره ....سلميلي على امج ساره: يوصل انشالله يالله تبين شي؟ مها: سلامتج سكرت مها من عند ساره وتمت تفكر بأمها شوي عقب وصلها مسج ساره : " ماترحم اللي مات قبل انتحاره...اجرم بنفسه وانت في قلبه اجرمت ...اثر التجاره والمحبه شطاره....وانا من انصار الهوى ماتعلمت ....يفزلك جسم براه انتظاره ....ويقوم لك قلبي وانا بعد ماقمت" مافكرت مها سيدا ارسلتها لفيصل......بس بعدها بدقيقه ندمت على اللي سوته ليش انا ذليت نفسي جذي اللحين شستفيد يمكن الرجال عنده ظروف يمكن فيه شي والله اني غثيثه" فيصل كان عند النار لما وصله المسج كان يسوي قهوه ويقلب الحطب يمين وشمال واول ماقرى المسج قلبه عوره وهو يقول بنفسه : ليه انا قاسي للهدرجه واضح البنت تحبني وانا احبها ليه مااعيش حياتي؟ وارسلها على طول: "وتلومني فيك يوم اغليك يااغلى من جروحي ومشقيها....ابيع كل البشر واشتريك حاضر سنيني وماضيها.....ياغايب صرت افكر فيك بأول همومي وتاليها....اطلب حياتي وانا بعطيك تستاهل الروح ومهديها" ووراها ارسل رساله ثانيه : مها تسمحيلي أبي أقول لك شي! ترى انا مو قصدي اتهرب منك بس انا ابيك تأكدين من شعورك تجاهي وتحددين موقفك" مها:" شعوري تجاهك لايمكن يتغير ....اخ عزيز لايمكن انسى فضله انصدم فيصل لما قرى رسالتها :ياقساوتها اخ عزيز ... ليه يامها ليه ؟ ليه تقتلين الامل وليه يتحول الحلم الجميل اللي كنت اعيشه الى كابوس ؟ ليه ياربي يصير فيني كذا؟؟؟؟؟؟ وقام فيصل وطلع من بيت الشعر اللي كان مليان رجال ...اغلق جواله وراح يم خيمته اللي فيها امه واخته بس ماكان موجود احد غير بنت فاطمه كانت نايمه والخادمه عندها .... فيصل يمزح مع الخادمه مع ان همه كان كبير: كوماري روحي سوي قرقر مع سيلاني ثاني انا يبي يقعد مع اموره شوي ...... كوماري: كلاص انا يبي يروح بابا بس انت شوف اميره كويس فيصل: زين جب وقومي انقلعي مابقى الا انتي تامريني تم فيصل يتأمل اميره وهي نايمه ويتذكر مها وكلامها له ....اخ عزيز.....عزي لحالي , وتقول اخ عزيز ....هي وين وانا وين بس فيصل لازال يحب مها ولايمكن ينساها وقعد يحطلها الاعذار ...........
|
«
الموضوع السابق
|
الموضوع التالي
»
| أدوات الموضوع | |
| انواع عرض الموضوع | |
العرض العادي
|
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| الخاطرة التي أبكت الشارع السعودي؟؟؟ | ɧαறS | منتدى النثر والخواطر | 5 | 2010-11-17 12:36 AM |
| فُقد أبو فيصل.. | أيها الأمل أبقى | منتدى النثر والخواطر | 6 | 2005-08-05 1:47 PM |
| أسد وقرد ومها | sayed | ⚪️ منتدى الرؤى المفسرة لغيرالداعـمين،أو المفسرة في المنتدى ∞ | 5 | 2005-07-04 12:59 PM |
| حامل تلد ولها اربعة اثداء | khalid_barzaq | ⚪️ منتدى الرؤى المفسرة لغيرالداعـمين،أو المفسرة في المنتدى ∞ | 2 | 2005-02-13 12:14 PM |