[عسـاف]

يقول من هاوي يتبع القاف = طارِ عليه يصرف الشعر تصريف
ماعن في قلبه هوى سمر الاغداف = نجل العيون مخضبات الاطاريف
قلته وانا من بين وديان الاشراف = بالمرتفع بين الجبال المقانيف
جسمي بها كنَه على جال ميهاف = وهاجوس قلبي ناحرٍ يمه السيف
البارحه جفني لحلو الكرى عاف =يوم النعايم فوق راسي مشاريف
تسابقن قلبي هواجيسٍ ارداف = الليل طال وحن قلبي على الكيف
وناديت من حولي يعجل بالأسعاف = يشب نار ادلال بيض مزاهيف
ياحسين شب النارواسرف بها اسراف = حتى يصير الجمر فيها مشانيف
ومن حب خولان الخضرهاته اجزاف = واحمس ونسفها على الجمر تنسيف
ودقه بنجر تالي الليل رجاف = وياحسين لقمها ببيضٍ مهاديف
ومن هيل دار الهند زود لها سناف = وزله وخل الكيف يذرف مع الليف
كنه بوسط الصين مرجان وارعاف = وادوم جوف اللي تقود المخاشيف
وعطنيه يا تابع هوا كل غراف = لوأن حره فوق قلبي مراضيف
اغدى هموم القلب تنوى بالانكاف = ويقفن عن قلبي خفافٍ محاريف
جاني بيوت مابها عيب وانضاف = فيهن من الطيب بلاغه وتعريف
يذكر علوم جابها كل خفخاف = بالكذب زادو هرجهم بالغطاريف
مجمعين الكذب بالهرج زهاف = مثل الرقيعيات دايم خواطيف
اثر علوم ضعاف وعلومها ضعاف = وافواههم للشين دايم غواريف
احدٍعلى درب الردا يهرف اهراف = واجدٍ على العليا يعد المشاريف
واحدٍ عليه السور يامرشد لحاف = وجهك عليه البيض توضى مكاشيف
انا بفصل منزل ايات الاحقاف = لاج بضله عن هبوب العواصيف
ايضا وانا من قول من كان ماخاف = ارقد بامان الله ولو مامعي سيف
الناس يا مرشد بالايام بخلاف = وانا ومثلك للفضيله مواليف

[ورد الريـاض]

الله يعطيك العافيه اخوي عساف

قصيده رائعه واختيار موفق

بارك الله فيك

[عسـاف]

شرفتنا زيارتكم يا اختي قمر

وحياك الله

السلام عليكم ورحمة الله وبركاته

احيي فيك حسن اختيارك لهذه القصيدة وهذا الشاعر بالذات اخي عساف
الذي أسرنا بقصائده التي تتضمن كثير من الحكم والحث على التحلي بأخلاق الكرام الشجعان

ولتسمح لي ( أخي عساف ) أن أضيف شيئا من شِعره الذي يفخر فيه بتمسكه
بشيم العرب الأصيلة من نخوة وكرم والتي ضمّـنها في هذه القصيدة حيث يقول :

إن صار زود المال في يدين الأنذال = حنا من المعروف تندى يدينا
وإن كانهم شرهوا على طيب الأفعال = حنا وردنا جمامها وارتوينا
وإن فكروا للجود يمشون رحـّال = حنا قبل يمشون يـَـمـّـه خطينا
يا ما لبسنا للشرف كل سربال = وعلى البسيطة للفضيلة مشينا
في دوحة العُـربا لنا مجد وظلال = وحنا على درّ المكارم غذينا
لو نجمع اللي فات منا من المال = ان كان شيدنا قصور وبنينا
نعطي ولا نتبع عطانا بالأقوال = ونبذل ونسكت كننا ما عطينا
وإن باعوا الشيمة بدينار وريال = حنا دخلنا سوقها واشترينا
نطلع لها لو هي على روس الأقذال = لو هو عسير دربها ما انثنينا
بأفعالنا نرسم دروب للأجيال = الين نساها غيرنا ما نسينا
أسُود ساداتٍ تسجل للأشبال = فضايلٍ شمنا لها واهتدينا
بيْض ٍ نسجلهن جديدات وسمال = حفايظ ٍ لأحفادٍ لاحقينا
نصبر على الشــدات لو شيلنا مال = لو سال دم كفوفنا ما شكينا
نخاف يلقى سدّنا كل ختـّـال = ويبني هزيلات المعاني علينا
الليل يا خالد على والدك طال = وهنّـيـت ناس ٍ بالكرى نايمين َ
يا عزّ راسي شفت ما خـبـّـت البال = شي ٍّ يهوّل شيّب الجاهلين َ
شي ٍّ من أسبابه يشيّب الأطفال = فطـّر خشوم ٍ مهجرعات الحنين َ
أدير قالات ٍ عريضات وطوال = قالات خلـّـن المقفي يبين َ
منهم رزين العقل بالوقت يهتال = بوقت ٍ عبوس ٍ فطّن الغافلين َ
وقت ٍ من أسبابه شكى كل ريبال = نصبر ونسكت كننا غايبين َ
الناس بالأيام راحل ونزّال = وتفجعهم الدنيا وهم دالهين َ
وحياة رب ٍ نزّل آيات الأنفال = عالم خفايا نيّة الحاقدين َ
ما اترك طريق العدل في كل الأحوال = لو يرحل المريخ للفرقدين َ

وكتب أيضا قصيدة حين اعتزل حياة المدن وآثر العيش في الصحراء لارتباطه وولعه بالطبيعة وحبه لكرم البداوة وصفات الفرسان فكتب هذه الأبيات التي يظهر فيها سبب نبذه لحياة المدن وحثه على التمسك بصفة الكرم ونبذ كل ما هو مخالف لهذه الصفة .. واخترت لكم بعضا من ابيات قصيدته التي يقول فيها :

حملي ثقيل ٍ وشايله باحتمال ِ = واصبر على مر الليالي والاتعاس
وارسي كما ترسي رواسي الجبال ِ = ولا يشتكي ضلع ٍ عليه القدم داس
يا بجاد شب النار وادن ِ الدلال ِ = واكسر لنا يا بجاد ما يقعد الراس
ودقـّه بنجر ٍ يا ظريف العيال ِ = يجذب لنا ربع ٍ على كوار جلاس
و زلـّـه لي منه رقد كل سال ِ = وخلـّـه يفوح وقلل الهيل بقياس
وصبـّـه ومدّه يا كريم السبال ِ = يبعد همومي يوم اشمـّـه بالأنفاس
فنجال يغدي ما تصور ببالي = روابع اضرب بها اخماس واسداس
لا خاب ظنّي بالرفيق الموالي = ما لي مشاريه على نايد الناس
يا عل ّ قصر ٍ ما يجي له ظلال ِ = ينهار من عالي مبانيه للساس
لا صار ما هو مَذهَـل ٍ للرجال ِ = وملجأ لمن هو يشكي الظيم والبأس
بحسناك يا منشيء حقوق الخيال ِ = يا خالق أجناس ٍ ومفني أجناس
تجعل مقرّه دارس العهد بال ِ = صحصاح دوّن دارس ما به وناس
البوم في تالي هدامه لي يلالي = جزاك يا وكر الخنا وكر الأدناس
ومتى تربّع دارنا والمفالي = وتخضر فياض ٍ عقب ماهيب يبّاس
ونشوف فيها الديدحان متوالي = مثل الرعاف بخصر مدقوق الألعاس
وتنثر على البيدا سوات الزوالي = وتشرق حَمَاره شرقة الصبغ بالكاس
وتكبر تفوف معبسات الشمالي = ويبني عليه من الشحم مثل الأطعاس

رحم الله الأمير الشاعر محمد الأحمد السديري الذي مات جسدا وأحيته هذه الحكم والنصائح
التي يتجلى فيها حبه للخير والكرم والجود والزهد أيضا

وأشكر لك هذا الموضوع أخي عساف وتسلم يمينك

[عسـاف]

يا هلا وغلا اختي ميسون

وشرفتنا زيارتك

وشكراا على هذه القصائد الجميله

وارد واكمل روائع السديري لا تنتهي.....

[هوى بالي]

من جد روائع
لا خــاب ظـنّـي بالرفـيـق الـمـوالـي
مـا لـي مشاريـه عـلـى نـايـد الـنـاس
مشكوووووووووووورين

[يمامة الوادي]

صح لسان الناقل وجزاك الله خيرا

[عسـاف]

حياكم الله وزيارتكم لنا شرف

شكراا لكم

[الابتسام]

بسم الله الرحمن الرحيم

ما شاء الله قصيدة طيبة و اختيار موفق.