[غيوم ممطره]

مشتاق للجنة وخايف من النار

مشتاق للجنه وخايف من النار
بين الرجا والخوف بقضي حياتي

أحيان يزيد الخوف عندي بمقدار
لأني كثير ذنوب ومن العصاتي

ولأني أتوب من الخطايا والأوزار
وأرجع أطيع النفس في المعصياتي

يالله أنا من نفسي اليوم محتار
أتعب وأنجيها وتبغي مماتي

يانفسي اللي تأمر بسوء واشرار
أريد بك خيرٍ وهذا جزاتي

يانفس يوم الحشر ماتقبل أعذار
وفي الجنة الفردوس نبغى المباتي

لكن عندي لك سؤالٍ له أسرار
وشلون ناصلها وهذي سواتي!؟

حملي ثقيل ومنه جسمي قد انهار
وحتى الخشوع مضيعه في صلاتي

فيارب كيف أدعوك في وقت الأسحار
وكلي ذنوبٍ في العلن والخفاتي

وياكيف أنا ما أدعوك والاسم غفار
تغفر ولو مثل البحر سيئاتي

أنا أدري ان الله عظيمٍ وجبار
وأنه رحيم وكلنا له بناتي

وإنه على خلقه حليمٍ وستار
وإنه رقيب وكاملٍ في الصفاتي

فيا الله يامنزل من الغيم الأمطار
يامنبت من الارض خضر النباتي

يامجري من القطر وديان وأنهار
ومن الحصى منشي جبال السراتي

يامقلب قلوب الخلايق والأبصار
ياحاشر خلقك حفاةٍ عراتي

أسألك أنا خشيتك في سر وجهار
وعلى الهدى طالبك ربي الثباتي

أسألك حسن الخاتمه بآخر الدار
وتوبة نصوح وعفو قبل الوفاتي

وأسألك أنا الجنه مع وفد الآبرار
مع النبي يارب هذي مناتي

(الأمير الشاعر المميز خالد بن سعود الكبير)