[نوفا]

بسم الله الرحمن الرحيم

السلام عليكم ورحمة الله وبركاته\

اخواني حياكم الله يامن خصصتم جزءا من وقتكم لقراءة موضوعي..

منذ صغري كنت كثيرا ما احس بقرب وقوع خطر قبل وقوعه بايام..يمكن تقولون وشلون؟؟

اقصد هذا الاحساس يجيني من اكثر من جهه يعني احس بضيقه اشوف احلام متكرره..بصراحه هو شعور غريب بس

فعلا اتعبني لدرجة ان اهلي بعد ان استخفو بي اكثر من مره صارو اذا شافوني انقلب مزاجي يعرفون ان

بداخلي خوف من شيء..يمكن البعض بيقول لاتحطين في بالك وتفكرين كثير بس صدقوني انا انسانه كثر ماعانيت الحمد

لله متفائله ودائمة الابتسامه وعندي ايمان قوي ان اليوم اجمل من امس وبكرا اجمل من اليوم..

عموما بعد ما كبرت وتعلمت وقرأت فهمت ان هذا الشعور هو ما يسمى بالحاسه السادسه..

بقولكم احدى القصص اللي صارت معي مره كنا مسافرين كالعاده في الاجازه الصيفيه وبعد ما انتهت الاجازه وحان

موعد السفر والعوده للرياض (وانا عادة ما اتحمل فراقها اكثر من شهر) قبل السفر بيوم قلت لامي مارح نرجع قالت ليش

يابنيتي وش صار قلت يايمه بلاش نرجع تكفين انا حاسه ان في مصيبه تنتظرنا تكفين يمه مابي اروح امي فهمتني

وقالت لي خلاص مافي رجعه وبدل ماتصير سفرتنا على الرياض رحنا لمكه واعتمرنا وارتاحت نفسيتي شوي ثم رجعنا

للرياض وفعلا مثل ماكنت حاسه بالضبط كان في مشكله كبيره الوالد الله يهداه ويخليه لنا منتظرنا فيها..

هذا بالنسبه للحاسه السادسه..اما العقل الباطن فما هو؟؟

ما ادري يمكن البعض منكم ما مر عليه هذا الوضع..وهو مثلا انا في البيت قاعده واهلي يسولفون شوي جونا ناس..

تجيني بيني وبين نفسي لحظات صمت واقول في داخلي كان اللي قاعد يصير شريط ينعاد يعني كل هذا انا شفته

بس ياربي وشلون؟؟

اخواني انا حبيت اطرح هذا الموضوع باسلوب الامثله حتى توصل الفكره للجميع ولافتقاري للاسلوب العلمي في طرح

هذين الموضوعين..وعندما كنت اضرب الامثله عن نفسي لا اقصد بذلك اني انسانه غريبة الاطوار..

بل انني متاكده من ان الجميع مر بذلك ولكن اردت ان اتحدث عن الموضوع من تجارب شخصيه مررت بها واتمنى من

الجميع ان يشاركني في طرح تجاربهم في هذا الموضوع واذا كان احد يمتلك معلومات دينيه اوعلميه عن هذا الموضوع

اتمنى ان لايبخل بها علينا واذا كان احد يعرف مواقع جيده للاستشارات النفسيه يساعدنا حتى نحاول قدر المستطاع

ان نعرف ماهي الاسباب وراء ذلك وما الحلول والنصائح التي تفيدنا جميعا..

وكل الشكر مقدما لمن يفيدنا برأيه ونصحه وتجاربه..

والله الهادي الى سواء السبيل..

اختكم\نوفا

[جاردينيا]

السلام عليكم اختي الفاضلة انا واحيانا خواتي مثلك تماما احيانا نجلس نسولف اقول لخواتي احس انا هالاسبوع ولاهالايام القليلة بيصير كذا وفعلا يصير التوقع سواء خير او لاقدر الله شر . واللي قلتيه عن كان الحوار او الموقف معاد هذا شيء معروف حتى دايما اذا تكلمت مع اهلي اوصديقاتي اقول او يقولون كاننا مرينا اوشفنا هل الموقف من قبل . بعدين احيانا اذا في شيء راح يصير احس (بقشعريرة في جسمي) مثلا صرصور موجود في الغرفة اواي شي موجود .اختي تقول هذه ملائكة الانسان تنبهه عاد ماادري صحيح ولا لأ.مره امي وابوي مسافرين عاد اختي طالعةالفجر للحوش تمشي فحست بقشعريرة بجسمها فدخلت بسرعة وقفلت الباب اشوي ولا مقبض الباب يتحرك احد يحاول يفتحه بس الحمدلله كان مقفول فتخرعو خواتي ,اشوىاني كنت نايمة كان انجلطت ذاك اليوم . طبعا اخواني نايمين ولاعلى بالهم يوم طلع الصبح طلعوا لقو باب الشارع مفتوح مع اننا مانخلي الباب مفتوح ابد .

[نوفا]

شكرا اختي جاردينيا على مرورك..

بصراحه لفتت نظري عبارة ملائكة الانسان فعلا اختي ربما والله اعلم هي اللي تنبهنا بأمر من الله طبعا..

سبحانك يا الله سبحانك ربي ماأعظمك..

[اناسيم]

فعلا اختي انا يجيني نفس الشي وهي صراحه نعمه من رب العالمين تحتاج الي تنميه

مثلا افكر في احد فيدق علي على طول او احس انه بيجي شي مهم في التلفزيون انا متابعته وفعلا يجي

وكثير احس بصديقتي وتاوم روحي اذا كانت متضايقه ادق عليها واقول وش فيك تقول وش دراك ومره كان اخوي الصغير

راقد تحت التلفزيون مادرى سبحان الله حسيت ان التلفزيون راح يطيح رحت شلته والله والله اني شلته وفي نفس الحظه طاح

مع انه مافيه اي سبب يخليه يطيح ،،، وهذا الي اتذكر الحين


ومشكوره مره ثانيه على الموضوع الرائع

[سنا]

نوفا صح في اشياء تحسي فيها وتطلع صح واشياء لا.
يعني احيانا لما نتكلم مع اهلي في موضوع بعدين نجتمع ونتحاور في الحلول تكون الحلول اللي قالوها اكون قيلتها انا قبلهم.

احس في نظره او عباره او حركه يقولها اي انسان احس فيها على طول.

بس احيانا تصيب واحيانا تخيب وقلب المؤمن دليلو.

الله معاكي ياعيني ويحفظك من كل مكروه.

[نوفا]

مشكورين خواتي اناسيم وسنا على مروركم فعلا اسعدتوني

الله يجازكم كل خير ويحفظكم من كل مكروه والمسلمين اجمعين

[SEREN]

انا احيانا ا حس شيء واتضايق منه حييييييل وبعدين اعرف انه مجرد وهم بس ماادري ليش احس كذا

الله الهادي الى سواء السبيل