[الأمل بالله]

السلاام عليكم ورحمة الله وبركاته
أخوان انا جيت استشيركم بأمر ضروري بحياتي أنا مطلقة والحمدلله جميلة وعائلتي مقتدرة وانخطب من فترة لفترة وانا تطلقت ظلم من زوجي السابق وكنت احبه كثير وطلقني بسبب سحر تفرقة بينا من زوجته الأولى وما تهنينا ببعض وتعبت مرررة وكنت دائما ادعي ربي يعوضني بزوج مثله بكل مواصفاته واحسن منه كان طليقي جاي بدعوة مني دعيتها لرب العالمين كان فيه كل المواصفات اللي اتمناها كان مشاء الله شاب ووسيم ومنصب يعني كل اتمنى فيه لكن قدر الله وتطلقنا لي سنتين الآن وما زلت متعلقة بأمل ربي يرزقني بزوج مثله وتقدم لي كثير مشاء الله تبارك الله لكن سبحان الله ما تتم خطوباتب يا من جهتي او جهتهم والأن تقدم لي رجل الباين عليه صالح واهلي مرة مبسوطين منه وشاريني وشاري أهلي لكن مشكلته انه مافيه الصفات اللي ابغى يعني كنت اتمنى شاب او حتى اكبر مني ب15 سنه اقصى حد وطلع عمره في الستين 60 ومزوج اغلب عيالة وكنت اتمنى وسيم مثل زوجي لكن للأسف طلع عكس ولا تقولون اهم شي في الرجال صلاحة طبعا ابغى رجل صالح بس ابغى واحد نفسي تقبله و انا استخرت ربي قبلها 3 مرات لما صارت النظرة كنت رافضة عشان مسألت العمروالشكل وتعرفون متطلبات الشباب والشابات عكس تفكير الكبار بالسن لكن لما شفته نزل علي شي من ربي ريحني فجأة شعور غريب كنت كازة من شكلة بس سمعت كلامه كان رزين وعاقل وباين عليه مثقف وانا عمري 33 سنة وما عندي اولاد يعني اللي معيقني اوافق عليه بس عمرة وشكله هل ممكن ارتاح معاه او عشان هو كبير ماراح يبسطني ويريحني وصرت احسب المستقبل يعني ما راح اتهنى معاه الا شوي ويصير بعدها هرم وما راح ارتاح معاه وانا لساتني بعز شبابي وهو عجز مرة إش رايكم اوافق أو أرفض واستنى ربي يرزقني بالمواصفات اللي ابغى اواتمم الموضوع لأنه مستني الرد بعد 3 ايام افكر واستخير فيها وانا معتبرته قرار مصيري والله محتارة مدري اش اسوي رغم اني تعذبت بحياتي كثير من ناحية الزواج والإنفصال خصوصا اني محتارة اخاف ارفضة واتندم بعدين او اخذه والوم حالي بعدها ...أشيروووووووني بكل امانة وكل احد يجاوبني يحط نفسه بمكاني محتارة

[الأمل بالله]

تعقيب ولأني كنت ادعي ربي ان يرزقني بزوج يعوضني وينسيني زوجي السابق لكن هذا مدري مو مثل ما كنت اتمنى

[strange]

أختي الأمل بالله والله من يوم عرفت قصتك وأنا شايل همك

بصراحة ما أدري بإيش أجاوبك الحين

إنت إستخيري ربك ولو فيه خير أسأل الله إنه يتمم الأمر لك

وإن مافيه خير فربي يصرفه عنك ويكرمك بمن ترضين

أسأل الله أن يفرج لك همك وتفرحينا بذلك قريب

ولاتنسينا من دعواتك

بارك الله فيك

[الأمل بالله]

اهلا بك اخي العزيز وانت عارف مشكلتي من الأساس يمكن انقطعت فترة طويلة لكن منتداية العزيز لساته بقلبي واخواني واخواتي اللي وقفو معاية من بداية مصيبتي وفي عز ها ما انساهم ابدا ودايم ادعيلكم وخصوصا انت اخوي الغالي والعزيز استرنج الله يوفقك وينور دربك ويفرج همك والله انا استخرت وربي يختارلي اللي فيه الخير واشكرك على اهتمامك ومشورتك مقبولة والله يكتبلي الخير آآآآمين يارب

[بأستغفاري احقق احلامي]

مدري ودي اقولك لا واخاف اظلمك ورفضي لانه كبير وصدقيني الله كريم بيرزقك انتي توك صغيره تبين واحد يدلعك مو كبير بالسن اخاف يصير مثل ابوك فهمتيني طيب اذا رفضتي ليش ماتبدأين تستغفرين 1000 مره باليوم وربي بيعوضك بأحسن ان شاء الله واذا انتي مرتاحه له خلاص توكلي ع الحي الذي لايموت...ادعي لي ربي يحقق لي امنيتي عاجل غير اجل الله يفرج لك كل هم

[الأمل بالله]

بس مثل ما قلت لكم لي سنتين بعد طلاقي وتقدم ليشباب بس قهروني يكونون مو قد المسؤلية او ينسحبون مو قد الزواج او طمعانين يبغاني بس ياموظفة او لا ما يتقدم اش رايكم بهذا الشباب او يحط موصفات في الجسم خيالية هذا اللي قهرني يعني الشباب خيبو املي محتاجين بس موظفة أو راعية جسم خيالي وتقدم كثير شباب بسمثل ما قلت لكم يا يكون داخل على طمع والمتزوج يبغا نزوة او يعد زوجته والصراحة هذا رجل عاقل ومتزن واستخرت ويارب خير اشكركم على مشورتكم وجزاكم الله خير

[ضاعت أحلامي]

بسم الله الرحمن الرحيم


اختي في الله ... والله من باب تجربه اقول هذا الكلام ... خالتي متزوجه رجل اكبر منها والان هو في مرحلة ( الخرف ) اسال الله ان يحسن خاتمتنا .... وجابت منه 3 اطفال فقط ... ومسالة التربية اووووف تعبت كثير تخيلي هي شابه وهو شايب ويوم كبروا عياله الان اغلبهم في سن المراهقع اصبح خرف ومريض وحالته حاله اسال الله ان يرزقه الخاتمه لحسنه ....يعني خالتي تقريبا هي اللي مربيه عيالها لوحدها الزوج ايام صحته كان اهم شي عنده شغله وهي مدلعه عيالها واذا شدت معهم راحوا لابوهم الشايب ورخا الحبل واعطاهم اللي يبون وهكذا صراعات هذي تشد وهذا يرخي .. والان بصراحه على الرغم من انهم عيال خالتي ولكن تربيه دلع في دلع والله يهديهم الولد ماعنده مسؤوليات كل همه يطلع الاستراحات مع انه رجال ولاهوب قد المسؤوليه ابد تخيولي حتى العمال اذا احتاج البيت تصليحات او شيء من هذا القبيل خالتي والسواق هم من يوف على راسهم الزوج الشايب مريض الله يرحم حاله .. والولد يقووول اووه انا لساتني صغير على هذه الاعمال !!!! >>>> شوفوا الدلع وين وداه ويهرب ويترك المسؤوليه على عاتق امه اللي هي خالتي


يعني باختصار خالتي صايره هي الام والزوج ...قائمه بدور زوجها من سنين لانه حكم السن الزوج اصبح لايعمل ولايخرج ولايقود سياره حتى .. واتعبها كثير لانه بدا يخرررف ( الله يرحم حاله وحال اهل بيته )

بس حبيت ابين لك كيف راح تكون حياتك لو تزوجتي كبير بالسن .....


وانا من وجهة نظري ارى انه كبييير جدا 60 سنه يعني حياتك معه 20 سنه بالكثير وتكوني ارمله وممكن يتركك في هذه الدنيا لوحدك واذا الله رزقك منه عيال هذه مصيبه صعب جدا تربيتهم لوحدك !!!!!


وبعدين انتي تعتبرين شابه 33 سنه يعني ان شاء الله العمر قدامك ادعي الله بان يرزقك الزوج الصالح واتركي هذا الرجل الهرم ( يالله حسن الخاتمه ويش له بالزواج هذا اصلا ).........

وعلى كلامك انك لكي سنتين مطلقه طيب عادي انا لي سنه مطلقه وممكن اجلس اكثر الله اعلم الى الان لم ياتي لي النصيب .... مافيها شي انخطبت مرتين ورفضت لانهم غير مناسبين ابدا ....

اسال الله ان يعوضك ويعوضني خيرا ان شاء الله ......

تحياتي لك

[رباه أعني]

ما أقول الا الله يكتب لك الخير وين ماكان، ويرزقك يارب ياكريم بمن يسعدك وتقر عينك بشوفته ..
و طمنينا عنك ....

[بنت الجوهرة]

في حديث للرسول صلى الله عليه وسلم في مامعناه انو اعمار امتي بين الستين والسبيعين

والاعمار بيد الله فيه من يموت بعز شبابوا الموت مالوا عمر محدد لكن ان امد الله بعمروا نهايتوا للستين والسبيعين زي

ماقال رسول الله صلى الله عليه وسلم

وبعدين ماخاب من استخار

واذا انتي تحبي طليقك وعاجبك ادعي الله ان يرد لك طليقك ويشفية

لأن في بنات كثير لما اتطلقوا دعوا الله وصبروا واستغفروا ورجعوا لبعض لاتستعجلي

وبعدين في هذا الزمن بنات بعمر 18 والـ 20 تزوجوا من شيبات عندهم احفاد

والله بنت خال امي بكرعمرها 26 متزوجة من شيبة عمرو 68

لان الشباب زي ماقلتي عاطلين عديمين المسؤلية يبغوا الموظفة اللي تصرف عليهم

يعني البنت ياتتزوج من عاطل او من متزوج وعندوا اطفال يعني تكون زوجة ثانية أو تتزوج من شيبة

صراحة زمن يخوف

حبيبتي داومي عالاستخارة وبشرينا

الله يوفقك ويسعدك

[ـ’اللولو’ـ]

حبيبتي أنت نفس عمري عشان كذا أقولك بعدك شابة بل في عز الشباب منتي منحده عليه صدق مواصفاته الرجولية
زينة بس تخيلي وأنت تجلسين مع عياله وتحسين أنه ما فيه بينكم فرق بالعمر بتنقهررين وترى 60سنة فرق قوووي
بينكم وأحنابشر نصيب ونخطي ولاندري وين الخيرة فالجأي إلى الله واطلبيه والله يوفقك إلى مافيه سعادتك
بس هاه خبرينا وش يصير معك والله حاسة فيك