[الهمة العالية]

الجزء السابع عشر:
::::::::::::::::::::::::::::
فيصل تغيرت معالم وجهه من الحنيه الى العصبيه : اطلقك؟ من وين جتك فكرة الطلاق؟؟؟؟
مها تبكي: خلاص.. انا مابيك.. وماعدت احبك.. صرت اكرهك.. مليت من حياتي معاك ومع امك وزوجتك.. فيصل انت قهرتني وصدمتني ..
فيصل يصرخ: خلاص اسكتي لاتكلمين اكثر من كذا... انتي اللي جبتي لنفسك القهر والصدمات... ليه يامها تحمليني ذنوبك وخطاياك.. واذا انتي كرهتيني مره فأنا اكرهك الف مليون مره
ويطلع فيصل عنها... مها كانت توقع ان فيصل يحبها ومهما سوالها يظل يحبها.. اهي قالت كلامها هذا ظناً منها انه بيقربها من فيصل اكثر... لكنها انصدمت بالحقيقه المره: فيصل يكرهني؟؟؟؟؟
ولما طلع فيصل منها لقا امه وسلوى يسولفون بالصاله
فيصل: سلوى قومي خلينا نطلع نتمشى... زهقان من البيت
ام فيصل: اكيد مطفشتك شينة الحلايا
فيصل: يالله ياسلوى انا انتظرك بالسياره
سلوى: دقايق بس اجيب عباتي ....
وطلعوا يتمشون ... اما ام فيصل دخلت على مها ..
ام فيصل: ممكن اعرف شفيه فيصل طلع من عندك متضايق؟
مها بضيقة خلق: وليش ما سألتيه ؟
ام فيصل: ياويلي على اقص لسانك الطويل ... انتي متى بتعقلين ؟
مها : الحين شبغيتي؟
وطلعت ام فيصل من عند مها وهي في قمة غضبها وحلفت انها ماتخليها بحالها ....
::::::::::::::::


وبعد مرور شهرين من زواج فيصل وكان فيصل ينام عند مها يومين وعند سلوى يومين.. وعلاقة مع مها سطحيه حيييييييل
فيصل وسلوى بالسياره.. رادين من المستوصف:
فيصل: عاد مااوصيك على نفسك... لاتعبين عمرك .. الزم ماعليك راحتك
سلوى: أي راحه الله يخليك ؟ اذا امك مو راضيه تجيب خادمه
فيصل: أي والله مشكله... امي مو بس رافضه الا حالفه
سلوى: الصراحه ماعندها سالفه ... في بيت الحين مافيه خادمه؟
فيصل: بس سلوى عيب عليك.. مهما كان هذي رغبتها ولازم نحترمها
سلوى: طيب منو يغسل ملابسنا ويكويهم؟ وينظف الشقه؟ ويسوي شغل البيت؟
فيصل: مافيه غيرها... اذا مانفعت الحين متى بتنفع؟
سلوى بمكر: انت تقصد.... مها ؟
فيصل: مها... مسكينه مها شغل البيت كله على راسها.. ما تلاحظين انها ضعفت؟
سلوى: لا والله وانا مو مسكينه؟ خلها تضعف احسن.. بروحها دبه... بس اسمع انت اللي تقولها انا اذا قلتلها ماترد علي دايم تحقرني
فيصل يضحك: يحليلها مها تعرف تحقر
سلوى: إي اضحك شعليك مو انت اللي تنحقر
فيصل: ماتدرين ؟؟؟
وصلوا البيت ...
فيصل : مها .... مها ..
مها: نعم ؟
فيصل: تعالي عندي بسولف معك
قربت مها منه شوي: بغيت شي؟
فيصل: طيب اقعدي ليه واقفه على راسي؟
مها وهي تقعد: يالله قعدت قول شعندك؟
سلوى: هيه انتي تكلمين اصغر عيالك..هذا زوجك تكلمي معه عدل
مها طالعتها من فوق لي تحت وكالعاده ماردت عليها
فيصل: سلوى حبيبتي روحي انتي غرفتك.. وتحملي على عمرك..
راحت سلوى وتحرسها نظرات فيصل وهي تركب على الدرج
مها: فيصل ؟
فيصل: هلا هلا مها ...
مها: ممكن اعرف ليش ناديتني؟ العاده ماتسأل علي لما تدخل البيت دايم تنادي سلوى
فيصل وهو يطالع مها: سلوى حامل
مها: لا مبروك وانت حضرتك جاي تبشرني ؟
فيصل: انا بغيت خدمه منك
مها: خير؟
فيصل: الخير بوجهك ... بس انا بغيت .. انا ابيك تنسين المشاكل اللي بينك وبين سلوى ترى انتو خوات و..
تقاطعه مها: انا ماعندي خوات
فيصل: طيب اعتبريها اختك
مها: مابي
فيصل بنفاذ صبر: هذا مو موضوعنا... انا بغيت انك تشوفي طلباتها واحتياجاتها.. بغيتك تساعديها
مها: اهاا ..قول بمعنى اصح: اخدميها
فيصل: لا يابنت الحلال ... انا قصدي ساعديها
مها: فيصل بغيتك بموضوع
فيصل: إي تفضلي قولي وش موضوعك وانا كلي اذان صاغيه؟
مها: مااحب جو البيت
فيصل: هذا موضوعك... طبيعي اذا ماتحبين جو البيت بطلي الدرايش او..
تقاطعه مها: مو هذا موضوعي انا قصدي مابي اكلمك هني مالي خلق على زوجتك الحين تلقاها تسمع لنا
فيصل: طيب قومي البسي عباتك
وفي هاللحظه تطلع له سلوى: فيـــــــــــــــــــــــــــــــصل
فيصل: بسم الله الرحمن الرحيم انتي منين طلعتي؟
سلوى: وين بتروح وتخليني؟
مها: مو قلت لك انها تصنت علينا
فيصل: ماني متأخر ..
سلوى: طيب وين بتروح مع هالنسره
مها: انا بروح البس عباتي
فيصل: وانا استناك بالسياره ..... سلوى حبيبتي دقايق بس وراجع

في السياره:
فيصل: ها يامها وين بغيتي نروح؟ صارلك دهر حابسه نفسك
مها: مو مهم بس أي مكان هادي يبعدنا عن الناس
فيصل: يعني بالضبط وين؟
مها وهي تفكر: عادي نروح البحر؟
فيصل: الله خووووووش مكان..... وليه مو عادي؟ ... عادي ونص بعد
وفي البحر كانت مها قاعده وبجنبها فيصل... وطبعا سلوى ازعجتهم بالاتصالات ..
فيصل: ياسلوى دوختيني خلاص قلت لك شوي وراجعين
فيصل: طيب .. وشو؟؟؟ فراوله؟؟؟ اذا لقيت بجيب لك .. خلاص مع السلامه
ولما خلص فيصل مكالمته شاف الانزعاج على وجه مها: وهذا الجوال واغلقناه ... ها وش موضوعك ؟
مها: مافي موضوع ... بس حبيت اقعد معاك
فيصل كان وده يعصب عليها.. بس حن عليها وسكت: أي صح احنا من زمان ماقعدنا مع بعض واذا قعدنا كله هواش وعوار راس
مها كانت سرحانه بالبحر والظاهر انها مالاحظت كلامه : فيصل...
فيصل: سمي
مها: انت... تكرهني؟
فيصل: ومن قال هالكلام؟
مها وهي تحط عينها بعينه: انت قلت ....قلت انك تكرهني الف مليون مره .. في احد يكره هالكثر؟
فيصل: ههههههههههه ...طيب وانا ممكن اسألك سؤال ؟
مها:......
فيصل: انتي قلتي انك تكرهيني صح ؟
مها: انا كنت متضايقه وماكنت ادري شقول
فيصل: وانا كنت معصب من كلامك وماكنت ادري وش اقول
مها: يعني انت ماتكرهني؟
فيصل: لا مها انا حبي لك كبر البحر
مها: ومدام انك تحبني ليش ماتطلقني؟
فيصل: ردينا على هالكلام الفاضي واللي ماله معنى.. واللي يحب زوجته ليه يطلقها؟
مها: لاني مو مرتاحه معاك
فيصل بإنكسار: ليه يامها... انا عمري قصرت عليك بشي؟
مها:مدري ... بس احس ان وجودي ماله أي معنى بينكم... فيصل انت مو ملزوم فيني .. انا لي اهل ولازم ارجع لهم
فيصل: وين تروحين؟ مو انتي قلتي لي ان خالك باع بيته
مها: اروح عن جدتي وجدي... هم المسئولين عني
فيصل: ياحبيبتي انا مستحيل اتخلى عنك ... خلي عنك الكلام الفاضي لا ارميك بالبحر الحين ويالله قومي خلينا نروح البيت الجو بارد...

::::::::::::

[الهمة العالية]

عامر بحزن وضيقة نفس: السلام عليكم
فيصل: هلا ومرحبا وعليكم السلام… وش هالزياره المفاجئه؟
عامر: كيف حالك؟
فيصل: بخير ولله الحمد …هذي الساعه المباركه اللي جيتنا فيها
عامر: ساعتك ابرك..
فيصل: عامر…. وش فيك ياخوي منت على بعضك ؟
عامر: لالا مافيني شي
فيصل: وشلون ما فيك شي وانت الهم راكبك من راسك لي ساسك
عامر:…….
فيصل: عامر…انت تعبان؟
عامر: إي
فيصل: افاااا… وش اللي متعبك؟
عامر: قلبي يافيصل يعورني حيل
فيصل: ههههههههه اكيد انك تحب
عامر : اي حب واي خرابيط… يافيصل انا تعبان وجيت اشكي لك مو تمصخر علي
فيصل: ماتمصخرنا ياابو الشباب… قول وش اللي مكدر خاطرك
عامر: اخوي حسين…
فيصل: الله يرحمه … وش فيه؟
عامر: قصدي زوجته…. امي وابوي يقولون لازم تزوجها…
فيصل: وشمعنا انت ؟
عامر: انت تدري اخواني كلهم متزوجين… ومابقى غيري من قرادة حظي..
فيصل: وليه مايخلونها تشوف نصيبها مع غيرك ؟
عامر: حرمة اخوي حسين … عندها بنت منه اللي هي سمر.. والوالد مايبغاها تربى بحضن واحد ثاني غير عمامها… ودبسوني انا فيها
فيصل: طيب… وانت وش قلت؟
عامر: انا.....انا مالي راي صرت مثل البنت اللي زوجوها اهلها غصبن عليها
فيصل: يعني وافقت؟
عامر: ابوي ويطلبني… وش تبغاني اقول له؟…اقول له لا… اكيد ابوافق
فيصل: اشهد انك رجال ونشمي بعد... اللي سويته عين الصواب ياعامر
عامر: ومن قال لك اني مرتاح؟ .. فيصل انا مااقدر اخذ حرمة اخوي
فيصل: وليه ماتاخذها؟
عامر: مدري؟ احس اني كل مااشوفها تطلع بوجهي صورة اخوي... اتخيل حسين وهو قاعد جنبها ويسولف ويضحك معاها.... لالامستحيل اخذ مكان اخوي حسين
فيصل: ياابن الحلال .. حسين مات والله يرحمه والحي ابقى من الميت... وسمر بنت اخوك صارلها سنه عايشه بعيد عنكم .. ماتخاف عليها تعيش سنين ثانيه وهي ماتعرفكم ؟
عامر: وانا!! وش ذنبي؟
فيصل: مالك ذنب... بس هذي الدنيا ولازم تضحي فيها
عامر:.......
فيصل: مدام انها رغبة الوالد ملزوم انك تنفذها....
عامر يرجع البيت حزين ومهموم ... هو كان يبي يتزوج سميره بنت خالته وقال لأمه هالكلام من قبل يموت حسين وامه كانت موافقه ....
يدخل عامر بيتهم .. ويلقى سعيد(25سنه) اخوه كالعاده قاعد يطالع التلفزيون وسمراخته(16سنه)تكلم التلفون:
عامر: سمر... يالله سكري التلفون... من طلعت وانتي تكلمين
سمر تكلم التلفون: لحظه فجر شوي....... خير عامر وشتبغى ؟
عامر: من تكلمين؟
سمر: صديقتي .. ليه السؤال؟
عامر: ومن هي صديقتك؟
سمر: تحقيق اهو ... صديقتي وخلاص
عامر: لاخلصتي سوالف وخرابيط تعالي غرفتي ابيك ..
سمر: طيب .. خلني اخلص مكالمتي الحين
وفي غرفة عامر:
عامر: ممكن اعرف الحين من هي فجر هذي اللي توك طايحه فيها؟
سمر وهي تقعد على السرير: عامر وشفيك انت؟ صديقه جديده شفيها يعني ترى مو اول مره اتعرف على بنات غير ؟؟؟
عامر: مدري؟ بس انا مو مرتاح لها... كلامها بالتلفون لما تسأل عنك يغثني
سمر: انت شفتها عشان تحكم عليها؟
عامر: ماعلينا ... وشلونك مع الدراسه ؟
سمر: بسم الله... تونا بادين هذا ثاني اسبوع
عامر: أي بس هذي 2 ثنوي يسمونها الحفره... شدي حيلك ترى انتي بالموت نجحتي السنه اللي طافت
سمر: الحين معطلني عن اشغالي ومكالماتي المهمه وتقولي ادرسي عدل... ادري بدرس والا تبغاني انتظرك
عامر: اقول سمر... اطلعي وسكري الباب وراك... انتي مو كفو اللي ينصحك ...لكن تحملي تسقطين
سمر: ودي اعرف ليه شايل همي؟
عامر: لان انتي وحده مدلعه وماعندك احد يوقفك عند حدك ... عرفتي الحين؟
سمر بنبرة مهدده: طيب ياعامر الحين انا صرت مدلعه ومتمرده ..
عامر: بلا عوار راس... ويلا تقلعي من غير مطرود
وتطلع سمر من غرفته وهي تحلطم .... اما عامر حط راسه على المخده وقعد يفكر باللي صار معاه
::::::::::::::::::::::::::::::::::::::
جراح: ساره... .وينج يالظالمه اسبوع كامل مازرتيني... ليش كل هالقطاعه؟
ساره: شسوي؟ والله لهيت مع الدراسه
جراح: شدعوه عاد؟... الدراسه توها تبدي...ماامداج لهيتي
ساره:المهم... انت شلونك؟
جراح: انا...الحمدلله بخير
ساره: جراح شفيك؟ احس انك مو مرتاح
جراح: واللي يكون بنفس هالمكان تبين يرتاح؟
ساره: الله يعينك ... جراح انا كل يوم ضميري يأنبني وانا ادري انك شايل بخاطرك علي لاني السبب في مصيرك هذ1ودخولك للسجن
جراح: لاتقولين جذي... انا مستعد اذبح الناس كلهم بس عشانج ..انتي تدرين شكثر معزتج عندي...ولولا غلاتج ماصار اللي صار
ساره : انا الحين لازم امشي عندي محاضره بعد نص ساعه ويادوب الحق عليها.. دير بالك على عمرك
جراح: ساره..... لا تأخرين علي مره ثانيه...
ساره تبتسم: اوعدك مااتأخر عليك.. كل ماشفت عندي وقت فراغ بجيك ..
::::::::::::::::::::::::

ام فيصل: هيه انتي ..اكلم من انا؟
مها: هلا خالتي .. والله ماسمعتك
ام فيصل : وبعدين معك على طول سرحانه ...وش عندك ؟
سلوى: وش عندها بعد؟ اكيد تفكر بماضيها الاسود
مها تطالع سلوى بنظرات احتقار ..
سلوى: وشفيك تطالعيني كذا ياعل عيونك للبط
مها: انا اقوم غرفتي احسن من مجابل وجهج ياسلوو
ام فيصل وهي تحذف مها بالنعل: امشي ياطويلة اللسان... تعرفين تعايرين عمتك سلوى... يالله تقلعي لغرفتك
ولما راحت مها لغرفتها :
سلوى: خالتي الحين فيصل بيوصل ... ومافي عشا.. انا تعبانه وماسويت
ام فيصل: وليه ماسوت طويلة اللسان والا فالحه ترادد بس؟
سلوى: تصدقين ياخالتي انها طول اليوم تسبني وتعايرني وانا مااقدر ارد عليها اخاف تضربني مع بطني ويصير في الجنين شي لاسمح الله ... انا اقول لها ليه تسوين فيني كذا؟ عشان خالتي مش هنا توحدين فيني و..
ام فيصل: كملي وشقالت بعد طويلة اللسان؟
سلوى: لالالا خالتي اعفيني مااقدر اقول
ام فيصل: لا قولي انتي خايفه منها ؟
سلوى: انا مو خايفه منها بس خايفه على مشاعرك تنجرح ياخالتي
ام فيصل: هي قايله كلام عني؟
سلوى: وأي كلام؟.... الله يسامحك يامها هذا كلام تقولينه عن خالتي... خالتي الحرمه الطيبه ..تقولين عنها كذا
ام فيصل بنفاذ صبر: سلوى... تكلمي .. .وش قالت؟
سلوى: انا بقولك وامري لله..... بس كلمتها كبيره ياخالتي ومااقدر اقولها
ام فيصل: يابنت الحلال تكلمي انطقي ...
سلوى: تقول انك ... انك.. انك ساحره .. وتروحين للمشعوذين وانك ساحره فيصل ومغيرته عليها .. وتقول بعد انك كريهه ومحد يحبك من الجيران ومجنونه بعد.. وانك... انك منتي بصاحيه
ام فيصل جنت جنونها وصارت عيونها حمر من الغضب : انتي متأكده ياسلوى
سلوى: إي ياخالتي... بس لاتاخذين على كلامها... هذي توها جاهل وماتدري وشتقول ..
ام فيصل : انا اوريك فيها ..
تروح ام فيصل لغرفة مها... بينما سلوى ترقص من الفرح ...
ام فيصل تطق الباب بقوه على مها: افتحي الباب ..
مها: خير خالتي في شي؟
ام فيصل: الحين انا ياطويلة اللسان صرت ساحره.. ومانيب صاحيه... انتي وبعدين معك يابنت الشوارع؟
مها وهي تفتح الباب: شهالكلام خالتي ؟
ام فيصل وهي تمسك مها مع رقبتها : انتي ماينفع معك غير الضرب... امشي معي
مها وهي تحاول تفك ايد خالتها: خالتي والله انتي تعوريني ..شيلي ايدج عني.. انا والله ماقلت عنج شي
ام فيصل وهي ترمي مها على الارض بقوه : مها... انا اكرهك من كل قلبي...
وعشان ابعدك عن طريقي وطريق ولدي .. انا مستعده اروح للسحارين والدجالين ... واصير ماني بصاحيه بس عشان ابعدك
وتترك ام فيصل مها تجمع بقايا جروحها وتنثر مابقى من دموعها ... الحياه قاسيه معاها وفرصتها مع الفرحه ضايعه ....فيصل.. اهملها ..
وبعد ساعتين كانت تسمعه يضحك مع زوجته وامه.. وهي حتى ماسأل عنها .. ولا درى بحزنها الكبير
::::::::::::

[الهمة العالية]

الجزء الثامن عشر:
::::::::::::::::::::
سمر: يمه اليوم فجر صديقتي بتزورني..
ام سلمان: حياها الله يابنيتي ... البيت بيتها
سمر: إي بس سعيد يمه
ام سلمان: شفيه سعيد بعد؟
سمر: خليه يطلع...او يروح عند زوجته
ام سلمان: مااقدر اطرده ... لاتنسين ان هذا بيته مثل ماهو بيتك
سمر: انا ماقلت لك اطرديه... انا قلت صرفيه... يمه والله صديقتي انحرجت منه... المره اللي طافت يوم تجيني.. كان قاعد بالصاله واول ماشافها قعد يحقق معها: شسمك؟ وبنت من؟ومنو اخوانك؟ وجايه مع منو؟
فضحني يمه.. صرت انحرج لما اعزمها مره ثانيه
ام سلمان : خلاص انا بروح اكلمه اللحين والله يهديه ..
سمر: الله يخليك لي يااحلى ام بالدنيا ..
وبعد نص ساعه توصل فجر صديقة سمر..... فجر هذي امها اجنبيه وطلقها ابو فجر من كان عمر فجر سنه وتزوج وحده ثانيه كانت زوجته الثانيه حنونه مع فجر وتحبها وكانت متدينه ودايم تنصح فجر لكنها ماتقدر تسيطر عليها خصوصا ان ابوفجر على طول مسافر لظروف شغله ومخلي مسئولية العيال كلهم على راسها
فجر كانت متمرده ,,في ظاهره جديده غزت العالم الاسلامي وعلى وجه الخصوص " الخليج العربي" وهي ظاهرة" الصبيك" والعياذ بالله .. ومعنى هذي الظاهره ان البنت تشبه بالرجال وتقلدهم ... هذي الظاهره كانت مسيطره على فجر .. شعرها كان بوي.. وكانت تحط عطر رجالي.. وكانت تمشي مشيه مو طبيعيه.. والامر من هذا كله انها كانت تشرب زقاير.. فجر كانت تحاول تقرب من سمر من زمان بس سمر ماكانت تعطي فجر وجه سمر: خلينا من الذكريات اللحين ... انا ادري اني كنت قاسيه معك .. بس والله ماعرفت قدرك الا اللحين
:::::::::::::::::::::::


كان تعبان حيل واثار الطق واضحه على كل معالم جسمه ويالله واقف على رجوله عشان يكلمها:
ساره انصدمت لما شافته: جراح.... شفيك ؟
جراح وهو يتلعثم بالكلام: ها... لا مافيني شي هوشه بسيطه
وقفت ساره من مكانها وهي تطالعه بنظرات بارده .... لفت ورى وطلعت من الغرفه ..
جراح: ساره.... ساره
ماردت عليه وكملت مشوارها ....
وفي البيت:
ام ساره: ليش ياساره؟... ليش تخلين عنه ؟
ساره: انا ماتخليت عنه ... ابي ازعل عليه شوي .. ابيه يحس
ام ساره: من تغلى تخلى
ساره: يمه هذي مو اول مره يطقونه فيها .. وانا كذا مره انصحه واعلمه شلون يتصرف معاهم .. بس هو خواف يمه .. انا ابيه يقوم على رجله من جديد.. ماابيه جراح الضعيف اللي يخاف من كل شي .. ابيه يصير قوي وشجاع ومايخاف من احد... يمه جراح حتى الجهال صار يخاف منهم
ام ساره: والله ماعرفنالج ياساره.. شوفيه شسوى يوم صار قوي وشجاع على قولتج... عشانج انتي ياساره ذبح الرجال ودخل بقضيه طويله عريضه.. بس عشان يرضيج ويرضي غرورج... شجاعته اللي تكلمين عنها دخلته السجن بسبتج... والحين تبين منه شجاعه ثانيه.. يمكن توديه القبر وبسبتج بعد ..
ساره بحزن: صح كلامج يمه ... انا الغلطانه وانا السبب في كل اللي يصيرله... بس هذا مايعني ان الحياة انتهت يمه.. الحياة تمشي سواء بغلطنا والا بدونه وهذا مايمنع انا نبنيها من جديد
ام ساره: والله كلام المدارس هذا انا مااعرفه... مااقول غير الله يصلحج يابنتي...
ساره سرحت وقعدت تفكر بموقفها اللي صار مع جراح .. كانت مقتنعه باللي سوته بس امها قلبت موازينها؟..
ام ساره: ساره ...وين رحتي صارلي ساعه اكلمج ؟
ساره: هلا يمه انا وياج ... وش كنتي تقولين؟
ام ساره: ابوج مسوي عمليه بعينه والحين هو طلع من الطبيب شرايج نزوره؟
ساره: بس...
ام ساره تقاطعها: عارفه شنو بتقولين.... بس هذا ابوج مهما سوى هذا ابوج وله حق عليج
ساره: انتي بتروحين؟
ام ساره: اكيد بروح معاج.. اذا بتروحين
ساره : خلاص يمه نروح لابوي والله يستر
::::::::::::::::::::::::::::::

فيصل: مها... ردي علي لما اكلمك
مها: خير فيصل .. شتبي انت بعد؟
فيصل يحاول يتمالك اعصابه: كلميني بأدب.. كم مره افهمك انا ؟كم مره اقولك لاتقلين ادبك علي ؟
مها: اسفه
فيصل: سمعت هالكلمه مليون مره منك
مها :......
فيصل: حالتك مو عاجبتني ولازم اوديك الطبيب
مها: أي قول انك بتخلص مني وماتدري شلون... كذا مره قلت لك طلقني وارتاح مني
فيصل: مها ... ارمي افكارك الخايسه هذي... والطلاق انسيه لاني ماافكر فيه
مها: الله يعيني عليك
فيصل: والله يعيني انا بعد
مها: فيصل.. انت اللحين جايني عشان تغثني...
فيصل: لا والله بس عشان اونسك... اشوفك هاليومين مو على بعضك
مها: .......
فيصل: انتي ماتنامين عدل؟
مها:.....
فيصل وهو يسحب ايدها ويشوف اظافرها اللي كانت ماكله نصهم من القهر والحره اللي فيها : انا كنت عارف ان فيك شي... واقول البنت ليه مو طبيعيه؟
مها تسحب ايدها منه: طبيعيه ونص بعد... شقصدك يعني انا مجنونه؟
فيصل: ماقلنا شي بس لازم يشوفك الدكتور... يمكن فيك عقده ويقدر يحلها الدكتور
فيصل استفزها بكلامه وصارت تصرخ عليه ... لين ماطلع عنها وراح لسلوى وهو يضحك
سلوى: ماشالله... شعندك تضحك؟ ضحكنا معك
فيصل: اضحك على هالخبله اللي تحت... تصدقين انها تصرخ علي وتضربني بالمخده وانا مااقدر اسويلها شي
سلوى: بلاك منت برجال
اختفت الابتسامه على وجه فيصل وعصب لما سمع كلمتها ؟؟؟
سلوى تداركت كلامها: انا مو قصدي انت... انا قصدي يعني.. مايصير تسكت لها يافيصل هذي بعدين تمادى و..
فيصل: يعني وش تبغيني اسويلها؟
سلوى: يأخي وقفها عند حدها... اضربها مثلا
انزعج فيصل من كلامها: لا.. ضرب لا
سلوى: ليه خايف على مشاعرها تنجرح؟
فيصل: لا ياسلوى بس انا قطعت عهد على نفسي وعلى ربي اني ماامد يدي عليها.. هذي مسكينه ياسلوى.. يتيمه ومالها احد غير الله ثم انا حرام اعذبها .. كافيها اللي فيها
سلوى: ممكن سؤال بس تجاوبني بكل صراحه ؟
فيصل: أي تفضلي ..
سلوى: كنت تحبها؟
فيصل:......
سلوى: قول يافيصل عادي... الله يسلم خالتي ماخلت احد ماقالتله
فيصل: الصراحه إي كنت احبها...... ولازلت
تضايقت سلوى من كلامه: اقول فيصل.... انت شلون تثق فيها ؟
فيصل: وش قصدك؟
سلوى: يافيصل ياحبيبي ..انا قصدي انت شلون تضمن انها ماتكلم غيرك مثل ماتكلمك
عصب فيصل من كلامها وقام من مكانه وطلع لعامر ..
سلوى: هين يافيصل.. اذا ماخليتك تشك حتى بنفسك مااكون انا سلوى بنت راشد
:::::::::::::::::::::::::::
فيصل: مبروك ياعامر واخيرا تدخل قفص الزوجيه
عامر : والله يافيصل حاس اني بظلم هالبنت معاي .. والله اني مااشوفها اكثر من اخت
فيصل: ماعليك من هالحكي... بكره لماتزوج ان شاء الله ...مانقدر حتى نشوفك
عامر: ياعمي روح.. اقول لك اختي تقول مانشوفك
فيصل: المهم متى العرس ان شاء الله؟
عامر: الشهر الجاي.. واللي قاهرني انهم بيحطون عرسي بفندق وناس وطقطقه وخرابيط على غير معنى
فيصل: يارجال هذا عرس افرح وخل العالم تفرح بعد...
عامر: ...........
فيصل: عامر... احنا اصدقاء من الطفوله وماعمرك غبيت علي شي بس حاس انك هالمره ان فيك شي مضايقك ومنت راضي تقولي ...
عامر: مثل وشو يعني؟
فيصل: طبعا مالي حق اسأل.... عامر انت حاط وحده ببالك؟...
عامر بعد تفكير: لا ............
فيصل: على راحتك اذا ماتبغى تقول فهذا شي راجع لك..
عامر: صدقني ماعندي شي اقوله... غير انك تقوم معي .. تراني مليت قعدة البيت
فيصل: وين بنروح؟
عامر: أي مكان ... المهم نطلع
فيصل : على راحتك
::::::::::::::::::

في المدرسه:
:::::::::::
فجر: يالله سماره قبل تجي الابله... خلينا نروح على الساحه الخلفيه مافيها احد
سمر: إي لحظه بس خليني اربط خيط الجوتي ... ماانفلت الا الحين
فجر: خلصينا .. عاد اليوم عربي حصتين.... واو بنفتك منها
سمر: يالله امشي ...
وفي الساحه الخلفيه.. كانت الحركه شبه معدومه.. اشجار بلا غصون وملعب قديم ومخزن للكراسي ..
سمر: انا ماادري ليه خايفه؟ مع ان هذي مو اول مره اهرب فيها من الحصه ... بس اول مره اجي المكان هذا
فجر: معي انا لاتخافين ولاتحاتين ..
سمر: طيب الحين بنقعد حصتين ...شنسوي؟نجابل وجه بعض؟
فجر: جايبتلك مفاجئه معي... نقدر نقطع الوقت فيها ونستانس للاخر
المفاجأه اللي مع فجر كانت بدايه لنهاية سمر.....
سمر بإندهاش: جواااااااال؟؟؟؟
فجر: ولك انتي
سمر: مااصدق... تدرين خلاص انا ماابغاه
فجر: هو على كيفك ترفضين هديتي ...كذا تخليني ازعل منك
سمر: لا خلاص كلش ولا زعلك...
فجر : ..............
سمر:..يلا علميني شلون استعمله ؟
فجر علمتها كل شي ...
فجر: والحين خلينا نستانس شوي.... هذا الجوال بيدك وماعليك غير انك تشيرين بالارقام .. واذا طلع لك شاب..تميعي بالكلام وتدلعي عليهم .. يلا جربي
سمر: نعم؟؟؟ لا حبيبتي مستحيل... مالك امل اسويها
فجر: انتي ليه هبله؟ صدقيني مراح تخسرين شي... ومحد بيدري عنك ... " والله ما بيدري عنكم؟؟؟؟ "
سمر: فجر الله يخليك
خلينا نقوم هذا الجرس طق واذا سألتنا الابله وين كنتم بنقول أي عذر... انا صراحه خايفه من المكان وحاسه ان اللي نسويه غلط
فجر: طيب انتي جربي والله مراح تخسرين شي .. وبعدين انا ضامنه المكان .. صدقيني محد راح يجي
سمر بعد تفكير: طيب راح نقعد هنا... بس شيلي الجوال ..احس انه مو وقته
فجر: خلاص اللي يريحك ... ممكن تقوليلي اللحين متى بتزوريني لاحظي انك وعدتيني كذا مره واخلفتي بوعدك ... وهذي الصفه مو حلوه .. توعدين وتخلفين هذا شي كلش مايمشي معي
سمر: طيب انا اسفه ... ممكن تقبلين اسفي؟
فجر: يلا هالمره سامحناك

::::::::::::::::::::::::::

[الهمة العالية]

اليوم جدول اعمالها مزدحم والشغل كله متكدس عليها.. صار لها يومين مااشتغلت بسبب حالتها النفسيه الصعبه
كانت تنشر الغسيل فوق السطح .... وسمعت صوت تصفير وراها..
مها: هذا انتي.. ماتجوزين عن سوالفج.. حسبي الله عليج خرعتيني..
مروه (17سنه) اخت سلوى بنت حبوبه حيل وبالفتره الاخيره تعرفت على مها.. وكانت الانسانه الوحيده اللي تخفف عن مها ولو بعض احزانها... ولما وصلت اخر سنه بالدراسه طلعت من المدرسه بسبب اخوانها ..
مروه: اسم الله على قلبك... انتي تعرفين تخرعين ؟
مها: ليش؟ مالي قلب
مروه: يبا اسفين لك قلب وقلبين بعد.... ها اشوف اليوم عندك غسيل ملابس تحبين اساعدك؟
مها: والله اذا تحبين تخففين علي من العذاب... فحياج الله
مروه وهي تنقز من سطحهم الى سطح ام فيصل اللي كان عباره عن طوفه مشتركه بينهم : اذا تبين اموت فدى هالعيون انا حاضره..
مها وهي تضحك: شوي شوي لا تطيحين.... ماادري متى بتعقلين ؟
مروه: لا ماعليك اعجبك ... انا لما كنت صغيره مع عيال خالتي كنا دائما نلعب هنا وماكان احد يجي هالمكان غير الخدامه ..
مها بإستغراب: تلعبون هني؟.. مااشوف في شي يونس ؟؟
مروه: كان في قطع خشب كنا نسوي فيهم بيوت وخرابيط بزران ...
كانت مروه تنشر الغسيل وتساعد مها بكل جد واجتهاد ...
مها: مروه... على الرغم من انج اخت سلوى الوحيده .. الا ان الاختلاف بينكم كبير حيل
مروه: صدقيني يامها ان سلوى اختي طيبه حيل بس انا مدري ليه تغيرت مره وحده؟
مها: معقوله ماتدرين؟
مروه: امممم يمكن غيرة حريم.... الا خلينا من سالفة سلوى وخبالها... وقولي لي شخبار فلفله؟
مها: ومنو فلفله بعد؟
مروه: فصول زوجك منو غيره؟
مها: مروه ووجع ...طايح من عينك..فصول
مروه: ماقلتي لي وش اخباره؟
مها:عادي.. مافي شي جديد ....انتي قولي لي ليش ماتكلمين عن دراستج؟
مروه: مدام اني عرفت اقرى واكتب ..وشوله اعور راسي بعد؟
مها: أي بس هذا مستقبلج ... وترى مانافعج الا شهادتج
مروه: اسكتي بس انا ماصدقت اطلع وافتك... ومستقبلي عند زوجي وعيالي
:::::::::::::::::::::::

في المدرسه:
سمر: فجر قومي... الابله صاحبة الظل الطويل ..جايه صوبنا..
فجر: يلا قومي بسرعه .... عاد هذي الابله مليغه وماتنتفاهم
وتنحاش سمر مع فجر.. من الصوب الثاني... والابله لما شافتهم يركضون ركضت وراهم .. بس للاسف مالحقت عليهم لانها تعثرت بجلبابها الطويل...
فجر وسمر وصلوا الصف وكان الوقت فسحه وهم ميتين ضحك على شكل الابله.. وارتاحوا لما تأكدوا من البنات ان ابلتهم العربي مالاحظت غيابهم عن الحصه...
::::::::::::::::::::::::


على الغدا فيصل ومها لحالهم:
فيصل: ما شاء الله شايف النفسيه مرتاحه اليوم..
مها وهي تبتسم: الحمدلله اليوم احس اني نشيطه ومتفائله الى حد ما
فيصل: حد ما؟ مافهمت؟ ممكن توضحي لي ياام النفسيه المرتاحه
مها: مرتاحه لاني ماشفتهم ... ولاكلمتهم
فيصل: اهااا... تقصدين سلوى وامي؟
مها: اسفه فيصل بس ابتعادهم عني يحسسني بالامان نوعا ما ..
فيصل: وشفيك اليوم ماسكه علينا حد ما ونوعا ما؟
مها تضحك: فيصل... عندي طلب
فيصل: خير وشهي طلباتك؟
مها: ودي... ودي اروح الكويت
فيصل تغيرت نظرته لها: وانتي وش عندك بالكويت ها؟
مها: فيصل والله حاسه اني مخنوقه وودي اغيرجو
فيصل وهو يقوم من الاكل: الا قولي بتقابلين حبيبك مليتي مني
مها انصدمت من كلامه: فيصل ليش تقول جذي؟ هذا مو كلامك؟ أي حبيب واي بطيخ
فيصل: علينا هالسوالف... لكن عناد فيك وفيه... احلمي اوديك الكويت ... غوري عن وجهي
الظاهر ان مها مو مكتوب لها يوم واحد مع السعاده... "معقوله فيصل يتهمني بشرفي هذا اخر شي اتوقعه منه"
:::::::::::::::::::::


ساره: لو سمحت ممكن تناديلي جراح بدر ؟.
......: اختي كم مره اقولج ناديته بس مو راضي يشوف احد
ساره: زين...قول له ساره ..
.......:لحظه شوي
بعد مرور10 دقايق
.......:اسف اختي مايبي يشوف احد
ساره: انت قلت له ساره؟
......: أي قلت له وقال مابي اشوف لاساره ولاغيرها
ساره: ليش شفيه؟ اهو مريض؟
......: لا يااختي مو مريض بس مايبي يشوف احد
طلعت ساره من عند العسكري وهي تفكر بحركة جراح.... "ليش مايبي يشوفني؟"
وفي السجن... جراح وصديقه اللي تعرف عليه بالسجن ناصر:
ناصر: جراح ترى انت غلطان حركتك هذي مالها معنى...
جراح: وشتسمي حركتها؟ يوم مشت وخلتني
ناصر: حركه لا اراديه ويمكن تكون عفويه بعد
جراح: اسكت بس ... ساره طول عمرها مغروره.... ولايمكن اكسب قلبها ابد ... هي تشوف الناس من فوق
ناصر: مااعتقد... عقب كل اللي سمعته منك عنها اقول لايمكن تكون بقلبها ذرة غرور
جراح: ياخوي انت ماتعرفها.... انا اللي عشت كل عمري وضيعت كل سنيني برجواها ... تشوفني بالسجن الحين ترى بسبتها ... ضيعت سنيني وشبابي وسمعتي بس عشانها
ناصر: جراح ترى محد طقك على ايدك ... انت اللي بغيت الشقا لنفسك
جراح: صح انا الغلطان.. وانا اللي اتحمل... بس شتقول بالقلب اللي مابغى غيرها؟
ناصر: مااقول غير الله يعينك ويصبرك.....



في بيت فجر صديقة سمر:
فجر: واخيرا.... مابغيتي تيجي؟
سمر: حبينا نتغلى
فجر : ههههههه ..... والله غالين
سمر: طيب وش عندك من جديد ؟
فجر: شريط رقص شرقي جديد.... خابرتك فنانه بالشرقي
سمر: اسم الله علي لاتحسديني... طول عمري فنانه
فجر وهي تحط الشريط بالمسجل : طيب ورينا شطارتك
سمر: احد من اهلك بالبيت؟ لاني بفصخ عباتي زهقت منها
فجر: اخذي راحتك .... الجو صافي اليوم..



فجر: يالله سماره قومي ورينا الرقص اللي
سمر: لا مالي نفس ارقص
فجر: يالله عاد... والا لك نفس ترقصين بس بالمدرسه ؟
سمر: خلاص ارقص بس على شرط ترقصين معاي...
فجر: حااااااااااااااااااااااضر
وبعد الرقصه القصيره نسبيا...
فجر: ماشالله...من وين تعلمتي ترقصين كذا؟
سمر: الصراحه من بنات خالتي ... وتعلمت اكثر لما رحت مع امي لندن وتعرفت على بنات خليجيات وتعلمت منهم ...
فجر: سمر حبيبتي ممكن طلب؟
سمر: والله اذا قدرت عليه مراح اقصر معاك
فجر: ابغى... يعني ودي اصورك وانتي ترقصين بجوالي ..... "وهنا كانت الكارثه"
سمر: نعم؟ لا حبيبتي اسفه....
فجر: سماره الله يخليك والله انا مااستغنى عن شوفتك دقيقه...
سمر: طيب اعطيكي صورتي... شرط يعني بالجوال؟
فجر: بس بالجوال غير...احس بحركتك... بصوتك...
سمر: وانا مااشوف ان لها أي معنى
فجر: قولي انك مو واثقه فيني وخلاص
سمر: لاوالله مو عن... بس اخاف يضيع الجوال والا شي... وبعدين انا اللي انذبح
فجر: يضيع وانتي فيه؟.... مستحيل
سمر بتردد: خلاص.... بس يكون بيني وبينك وماتخلين احد يشوفه
فجر: يكون بعيوني واسكر عليه...
قدرت فجر تفر عقل سمر الصغير وتوهمها بأشياء مالها وجود.... للعلم فجر كانت اكبر من سمر بسنتين ولكن لكثرة رسوبها ولحظ سمر السيء القاها القدر بين يديها.......... وصورتها بالجوال وهي ترقص شرقي
:::::::::::::::::::::::::::::::


فيصل ندم على كلامه اللي قاله لمها .......
" مها..حبيبتي انا...اشك فيها؟ واصدق كلام سلوى اللي ممكن انها تتبلى عليها... هذي سوالف الحريم اذا حاشهم مرض الغيره مستعدين يقتلون اللي قدامهم مو بس يتبلون عليه "
طرد الشكوك والهواجيس المتعبه من راسه وقرر يروح لمها ويعتذر منها .... وين راحت ماهي بغرفتها؟.
لقاها.... بس بأي حاله لقاها... شافها ...وتمنى عيونه انعمت قبل يشوفها بهالحاله... كان يدري انها تعيش بذل بس مو بهالطريقه........
صعب انك تشوف انسان عزيز على قلبك... يمسح ارضية الحمام(الله يعزكم)... وصعب اوصف لكم شعور فيصل وهو يشوفها تمسح اقذر مكان بالدنيا....

[الهمة العالية]

الجزء التاسع عشر:
:::::::::::::::::
فيصل: اسألك برب البيت ... انك تهدين اللي بايدك
مها:...........
فيصل: مها... كافي وقفي خلاص انا ماعاد اخليك تشتغلي
مها:.........
فيصل : مها اطلعي بغيت اكلمك
مها: شبغيت؟
فيصل: بغيت .... اوديك الكويت الاسبوع الجاي
مها: ومن قال لك اني بروح؟
فيصل: انتي اللي قلتي لي..
مها: قلت وندمت..
فيصل: وانا بعد قلت كلام وندمت عليه... والحين انا جاي اعتذر منك... ها وش رايك تسامحيني؟
مها تركت اللي بإيدها ووقفت تطالعه وبعصبيه قالت : كم مره يافيصل تغلط وكم مره تبيني اسامحك؟
ممكن اسامحك على اي شي لكن انك تتهمني بشرفي وبأخلاقي ترى هذا شي ماينسكت عليه…
وجرح صعب انك تداويه…
يعني انا عشان حبيتك في يوم من الايام…. صار كل يوم لي حبيب؟
فيصل وهو يمسكها مع ايدها ويطلعها برى الحمام: مها خلاص اعذريني ترى كل انسان يغلط ومحد معصوم من الخطأ وانا ندمت على اللي قلته لك وجاي اصحح غلطتي واراضيك …
مها: تراضيني بشنو؟
فيصل: قلت لك بنسافر الاسبوع الجاي .. للكويت
مها: تظن اني بفرح؟…. انا من لي بالكويت ؟ عشان افرح اذا رحت لها
فيصل: طيب ليه قلتي لي ودني؟
مها:……
فيصل: خلاص انا قلت الاسبوع الجاي يعني الاسبوع الجاي …وبنروح لوحدنا
مها: انا وياك بس؟
فيصل : إي بس انا وياك وننسى كل مشاكلنا وهمومنا ونرجع مثل اول واكثر…
يامها انا على الرغم من اني تزوجت سلوى واهملتك بالفتره اللي طافت ترى مو معنى هذا ان قل مقدارك عندي بالعكس….
انا مازلت احبك وبظل احبك للابد وياريتك توثقي فيني…
مها: انك تطلب شخص ويحرمك… انك تعلق اخر آمالك بشخص ويخذلك... انك تحب انسان ويكرهك… شعور يستحال بعده انك تثق بأي انسان!!!
فيصل: على الرغم من اني مافهمت معنى كلامك بس اقول لك ان عمري مابخذلك وعمري مابحرمك وعمري مابكرهك ….انتي مني وفيني…. والحين ممكن تقولي لي وش ينقصك للسفر..؟
:::::::::::::::::::::::::::


اليوم الخميس الظهر سمر قاعده بالصاله وسعيد بالمطبخ يشوف العيش"الاخ نسواني"….
ويقول للخادمه: زيدي المويه ماتشوفي العيش كيف ناشف
سمر وهي داخله المطبخ عقب ماشبعت مكالمات: بعد تطورنا صرنا ندخل مطابخ ونسوي عيوش… ماشاء الله اللهم زد وبارك… ربة المنزل سعيده اليوم عندها طبخه
سعيد: تقلعي انتي محد كلمك…
ويطلع سعيد من المطبخ.. اما سمر فشربت ماي وطلعت للصاله ولقت سعيد منسدح يطالع التلفزيزن .. حطت ايدها على راسها وهي تقول: لحوووووووووووووووول حتى هنا لاحقني؟
سعيد: انا اللي لاحقك والا انتي وين مارحت وراي كنك عصعصي
سمر: والله لأقول لابوي يشوف له صرفه معك ..
في هاللحظه دخل عامر:
عامر: السلام عليكم
سمر: وعليكم السلام والرحمه جيت بوقتك
عامر: خير وش صاير؟
سمر: الحقني ياعامر… والله بموت من هالسعيد … بعرف ليه مايطلع من البيت ؟
عامر: سعيد وش فيك عليها؟
سعيد: هذي ام لسانين وين مارحت تلحقني …
سمر تقاطعه: قوم اطلع ترى برجع من كثر مااشوفك
وتدخل عليهم الخادمه:
الخادمه: بابا عامر… شوف سعيد هذا.. خرب عيش مال انا.. انا سوي عيش نثري هو يزيد مويه.. اللهين عيش خلاص خربانه… احترق عيش.. انا مخ خراب
ويضحك عامر مع سمر
سعيد وهو معصب: انا اروح غرفتي اشرف لي من مقابلكم
سمر: مااقول الا الله يعين عنود عليك
وعقب ماراح يقعد عامر وتقعد عنده سمر:
عامر: خليه يبا يروح عند زوجته .. هي اولى بمقابله منا
سمر: عامر ترى مو حاله هذي… على طول قاعد بالبيت .. ترى صديقاتي مايزوروني والسبب هو
عامر: اتركيه عنك الحين وعلميني عن دراستك
سمر: الحمدلله ماشي… بس عامر في درس بالرياضيات ماني فاهمته.. انا خابرتك علمي وتحب الرياضيات ممكن تفهني ولو ماعليك امر
عامر: افا عليك هو درس واحد…. الا جيبي المنهج كله افهمك اياه
سمر: تسلملي يااحلى اخ … واحلى من سعيد بعد
:::::::::::::::::::::::::::

مها: ادخلي والله خالتي مو هني..
مروه: وسلوى وين؟
مها: عندها مراجعه بالطبيب
مروه وهي تقعد بالصاله: اليوم هدوء.يعني ناخذ راحتنا بالسوالف
مها: وشعندج من سوالف؟
مروه: مها والله ماني مرتاحه بصالة هالعجوز الشمطا… خلينا نروح غرفتك
وتروح مروه مع مها للغرفه ويسكرون الباب ويقعدون يسولفون …
وبعد ساعه الا ربع يدخل فيصل مع سلوى للصاله….
سلوى قعدت بالصاله وفيصل توجه لغرفة مها عشان ياخذ جوازها يجدده…. اول مافتح الباب حس بمقاومة مها للباب تمنع فتحه..
فيصل : مها وش فيك مغير انا فيصل ؟
مها بإرتباك: فيصل روح الحين بعدين تعال
فيصل: ليه عاد؟ انا جاي عشان............
مها تقاطعه : فيصل بعدين بعدين
يدخل فيصل الصاله وهو مبتسم: الظاهر مها مشغوله وماتبغاني ادخل عليها
سلوى وهي تصرخ: فيصل الحق في رجال غريب ببيتنا
فيصل بإنفعال: وينه؟
سلوى: اكيد بغرفة مها
فيصل بعصبيه: وش تقولين انتي؟
سلوى: وش تفسر وجود هالعباة الغريبه بالصاله؟ (عباة مروه كانت ناسيتها بالصاله لكن الظاهر ان سلوى ماميزت عباة اختها .........
فيصل:……
سلوى : وش تفسر منع مها لدخولك لغرفتها…. اكيد الرجال عندها
فيصل يتوجه لغرفة مها وبكل مااوتي من قوه يدفع الباب دفعه وحده… وفي قمة عصبيته… كان وده يذبح مها واللي معاها…. لكن اللي معاها طلع مخلوق ضعيف حاله حال مها..
انحرج فيصل من موقفه وحاول انه يبرر اللي صار لما شاف مروه… لكنه مانطق بأي كلمه وطلع لسلوى
سلوى تبكي عقب الطراق اللي اكلته من فيصل : حرام عليك انا وش ذنبي تضربني؟
فيصل وهو يصرخ عليها: اختك يالظالمه خليتيها رجال؟… اعماك الكره حتى انك تشوفي اختك رجل والا حرمه
وصوتهم كان واصل لي تحت..
مروه: انا بطلع الحين الصراحه موقفي سخيف
مها: شلون تطلعين واختج بهالحاله؟ مروه فيصل عصبي واخاف يصير فيها شي.. لاتنسين انها حامل
مروه وهي تلبس عباتها: وان شاء الله تبيني اطلع عندها… بكيفهم
مها: انا اسفه مروه على تصرف فيصل اللي ما اقدر حتى اعرف له اي معنى
مروه: تأسفي لغيري… انا عاذرتك بكل الاحوال.. لاني ادري ان مالك ذنب الذنب ذنبي..
ولما طلعت مروه.... كانت مها تفكر انها تروح لسلوى وفيصل فوق ....
دخلت الشقه... ولقت باب الغرفه مفتوح... فيصل كان قاعد على الكرسي اللي عند السرير وكان يتكلم بالجوال.. اما سلوى كانت بالغرفه الثانيه تبكي....
مها دخلت بالغرفه اللي كانت فيها سلوى ...
مها بتردد: سلوى...
سلوى رفعت راسها تطالع مها ورجعت راسها بين كفوفها...
مها وهي تقرب من سلوى: سلوى ترى اللي صار مايستاهل
سلوى:......
مها: انا مااعرف السالفه بالضبط .. بس اتمنى انج ماتسوين في عمرج جذي..
سلوى وهي تصرخ: ومادام انك ماتعرفين السالفه وش له تدخلين عمرك؟ انتي السبب في كل اللي حصل لي.. وبعدين ليه جايه هنا ها؟ عشان تورين فيصل انك طيبه ومسكينه... اطلعي برى انا ماابغى اشوفك ..
وعلى صوت صراخ سلوى دخل فيصل عليهم وشاف سلوى تصارخ على مها بينما مها واقفه بذهول تطالعها
فيصل: مها خلاص خليها بحالها...
مها: وانا شقلت لها؟... انا بس جيت اواسيها و..
تقاطعها سلوى: ومن قالك اني ابغى حد يواسيني ؟
فيصل: مها خليها وتعالي ابغى اتكلم معك شويه.....
سلوى: أي روح وتكلم مع حبيبة قلبك على راحتك واتركني انا للضرب ..
فيصل كان بيرد عليها.. ولما شافتها مها حرب كلاميه مستحيل تنتهي بسهوله قالت: فيصل انا انطرك تحت..
وفي غرفة مها:
مها: ممكن اعرف شنو اللي صار بالضبط؟...
فيصل: ماصار الا الخير!!
مها: أي خير اللي يخليك تفتح الباب علي بكل هالقوه ؟ واي خير اللي يخليك تطق سلوى ؟ هذا وهي حامل
فيصل: ماعلينا الحين من سلوى ولا من غيرها.. سلوى غلطت وكل من غلط ياخذ جزاه
لما شافته مها يتهرب من الاجابه قالت: انزين شنو السالفه اللي تبيني فيها؟
فيصل: ابيك... تأجلين سالفة السفره
مها: وليش؟
فيصل: عشان عرس عامر صديقي
مها: ومتى عرسه؟
فيصل: بعد اسبوعين ان شاء الله !!
مها: بعد اسبوعين!! بس انت وعدتني انك توديني الاسبوع الجاي يعني تو الناس على العرس
فيصل: إي بس انا الاسبوع الجاي بسافر مع عامر للمنطقه الشرقيه...
مها بإنكسار: صار عامر اهم مني؟؟
فيصل : لا ياحبيبتي لا تاخذين الامور بحساسيه زايده... انتي تدرين هذا عامر ماهو أي واحد... هو اللي وقف معي وساعدني بأمور كثيره منها اني ارتبطت بأحلى انسانه ... اللي هي انتي
مها: إي سكتني بهالكلام الحلو
فيصل: هههههههه ... ما ينقدر عليك
مها: فيصل بس عاد ...
فيصل: يعني منتي بزعلانه عشان اجلنا السفر
مها: لا عادي مدامك بتوديني بعد العرس ان شاء الله ...
فيصل وهو ينام على السرير: الله يجازيك ياسلوى.... تدرين اني لما اقعد معاها احس بالفرق الكبير بينك وبينها
مها: اكيد بتحس بالفرق.... بعد هذي الغاليه ام عيالك
فيصل بعد تفكير: الغلا مايجي من العيال يامها... متى بتفهمين ان الغلا مكانه القلب....
::::::::::::::::::


في الكويت وتحديدا في بيت ام ساره:
:::::::::::::::::::::
ساره: يمه شفيه هذا؟؟؟ تصدقين رافض يشوفني نهائيا..
الام: اخاف انه زعلان عليج؟
ساره: وشنو اللي يزعله؟ مافي شي يستاهل الزعل
الام: او يمكن مريض؟
ساره: مافيه الا العافيه.... بس مايبي يشوفني انا متأكده من هالشي
الام: والله ياساره ماادري عنه.. يمكن متضايق من شي ؟ المهم بروح مكتب الخدم اقدم لي خادمه تروحين معاي؟
ساره: لاوالله يمه مالي خلق ... وراي بحث بروح اكمله
الظاهر ان البحث اللي تكلم عنه ساره هو موقف جراح ..لانها طول الفتره اللي كانت تكتب فيها البحث كان كل تفكيرها مع جراح لذلك قررت انها تكتبله رساله....
( بسم الله الرحمن الرحيم )
الى الغالي.. جراح
الصراحه انا مااعرف شكتبلك او بشنو ابدي.. انا عمري ماكتبت رساله.. بس حبيت اتبع نفس اسلوبك وانا متأكده انك راح تقراها حتى ولو مابغيت تشوفني.....
ممكن اعرف ليش ماتبي تشوفني؟ جراح ارجوك فهمني ترى انا محتاره... انا متأكده اني ماغلطت بحقك... انت بالذات لا يمكن اغلط بحقك... انا اعترف لك ويمكن اعترفت لك مية مره اني كنت انانيه ومغروره لكن الحين تغيرت والله يشهد على كلامي.. انا مابيك تتبع مثل اسلوبي اللي كنت اعاملك فيه معاي .... خلاص جراح كافي والله مااعرف اعبر اكثر ..احس بقلبي كلام واجد بس ماني عارفه شلون اكتبه... لاتذلني اكثر كافيني اللي فيني...
ساره
::::::::::::

[الهمة العالية]

جراح عقب ماقرى الرساله قرر انه يطلع لها مره ثانيه لو زارته...
ناصر: يالاخو..... وين وصلت؟
جراح: هلا ناصر معاك
ناصر: أي معاي الله يخليك؟.. الا قول وش سالفة هالرساله؟ ... من منو؟
جراح: ماعليك من الرساله وقول لي شخبار اخوك للحين زعلان عليك؟
ناصر: بكيفه ياجراح انا تعبت معاه.. تدري ليش هو زعلان؟
جراح : ليش؟
ناصر: انت مثل ماتعرف اخوي حامد شخصيه معروفه بالبلاد لكن اللي ماتعرفه انت واللي مايعرفه الناس انه بخيييييييل بالحيل
جراح: معقوله؟ زين شدخل هذا بزعله منك ؟
ناصر: اخوي حامد يسوي روحه زعلان مني ويعصب اذا احد جاب طاريي عنده وكل هذا تمثيل منه عشان محد يقوله وكل محامي لأخوك..شفت البخل وحبه للفلوس وين وداه؟
جراح: واهلك؟ واخوانك الثانين ؟
ناصر: جراح... انا اذنبت.. نعم اذنبت. .وتماديت.. غلطت بحق نفسي وبحق غيري وبحق ربي وبحق اهلي.. كنت شاب ضايع وصايع ومحد يسأل عني معطيني الخيط والمخيط..
تعرفت على شله فاسده وقدروا يأثرون فيني وحببوا لي الحرام وزينه الشيطان في عيني وفوق كل هذا كنت ضعيف ايمان ومافي وازع ديني بقلبي يوقفني عند حدي..
تعلمت شرب الخمر وادمنت عليه ...
تعلمت لعب القمار وهما ادمنت عليه وهو اللي كان فيه ضياعي...
حصلت مشكله بيني وبين احد العاصين وكانت مشكلة فلوس .. مابي اذكر التفاصيل واعور راسك معاي.. لكن اللي حصل اني ترصدت له انا وواحد من ربعي وبعد هوشه بسيطه معاه ذبحناه....
وهذا انا اواجه الموت هني... حكموا علي مؤبد اما رفيجي اللي كان معاي حكموا عليه عشر سنين ومات في السجن... تصدق صارلي 12سنه بالسجن في كل يوم منهم في كل دقيقه وفي كل ثانيه اتندم الف مره واستغفر ربي الف مره.. ضاع شبابي ومستقبلي ,,,اللي مثلي الحين متزوج وعياله طوله... لكن الله كريم وعساه يغفرلي ان شاء الله
جراح حس بعمق المأساة اللي يعيشها غيره.. واللي يشوف بلاوي الناس تهون عليه بلاويه....
:::::::::::::::::::


الخميس الصبح... عرس عامر..
.وفي البيت
سمر: وش عليك معرس جديد ..
عامر: واللي يعافيك لا تذكريني
سمر: وشلون ما اذكرك وعرسك بعد ساعات؟
عامر: بعرف انتي كل خميس.. ماتقعدين الا الظهر.. اشمعنا؟ هاليوم بالذات صاحيه من فجر الله؟
سمر: تدري عاد انا ماودي انك تاخذ منيره حرمة حسين
عامر: صحيح والله؟؟ واخيرا لقيت احد يفهمني بهالبيت
سمر: انا ادري انك ماتبغاها... والصراحه ماالومك.. بس احب اقول لك معلومه.. ترى الحب يجي بعد الزواج وكثير من الخبراء والمحللين اكدوا هالنظريه
عامر: ماشاء الله... وانتي حضرتك مستمعه جيده لمثل هالشغلات... ودروسك ساحبه عليهم السيفون؟؟
سمر وهي طالعه: ياربييييي في احد بيوم عرسه يفكر بالنصايح والدروس... بروح اتسبح عشان عزيزه وغيداء بيمروني بعد شوي بنروح للصالون
عامر: وانتي ماتعرفين تضبطين امورك بنفسك ؟
سمر: خواتي وملزومات فيني...
طلعت سمر من عند عامر اللي تم يفكر بأسوء يوم في حياته...
::::::::::::::::::::

الخميس المغرب:
فيصل: يالله ياسلوى لانتأخر عن العرس
سلوى: مانيب رايحه
فيصل وهو يقعد بجنبها: ليه ياسلوى؟
سلوى: كذا... ابغى افشلك مثل ما فشلتني
فيصل يضحك: خلاص احنا مو تراضينا... يعني طاح الحطب
سلوى: طيب انا كنت امزح معك ..
فيصل : يالله قومي تلبسي وتزيني وانا بمرك عقب صلاة العشا
سلوى: خالتي بتروح؟
فيصل: إيه اكيد الوالده تروح
سلوى: و.... مها بتروح؟
فيصل: إي والله ذكرتيني... انا مدري ليه حاط هالانسانه على هامش التفكير مع انها ماخذه كل تفكيري ؟
عصبت سلوى لما سمعت كلماته الاخيره لكن فيصل ماعطاها فرصه ترد عليه لانه نزل تحت ..
وفي غرفة مها اللي كانت نايمه ............... " اليوم درجة حرارتها مرتفعه"..
فيصل يقعد بجنب مها على السرير ويمسح على راسها وحس بحروره : مها ..
مها:....
فيصل وهو يرفع صوته شوي عشان تصحى: مــــهــــا
مها وهي تقلب على السرير: فيصل والله مافيني حيل على الشغل اليوم خله باجر... تكفى قول لخالتي والله تعبانه
فيصل: ومن قال لك اني بخليك تشتغلي... حرارتك مرتفعه قومي اوديك الطبيب قبل اروح العرس بعد شوي وانشغل
مها: لا لا مابي اروح الطبيب والله مليت منه.. انا بخير.. والحراره مهما ارتفعت مردها تنزل روح انت ولاتحاتي
ويطلع فيصل من دار مها وهو متردد وخايف عليها ....
::::::::::::::::::::::::::::::::

في الكويت...في السجن ...:
ساره: ممكن تعطيني سبب واضح يخليك ماتشوفني كل هالايام اللي طافت؟
جراح بسخريه: وانتي؟... ممكن تعطيني سبب واضح ..
تقاطعه ساره بعصبيه: جراح انت شفيك؟ ليش تغيرت؟ الصراحه السالفه ماتسوى..ليش مكبرها ؟
جراح: لانج تخليتي عني في الوقت اللي كنت فيه محتاجج..
ساره:.....
جراح: اكيد بتسكتين ماعندج شي تقولينه..
ساره: انا ماتخليت عنك وعمري مابتخلى عنك
جراح:انزين ممكن تفسيريلي الموقف السخيف اللي حصل منج؟
ساره: لحظة ضعف...انا ماتحملت اشوفك بهذاك الوضع
جراح : وتحملتي تشوفيني مجرم... تحملتي تشوفيني وحش.. ها؟
ساره خافت من طريقته بالكلام: الظاهر اني غلطت بحقك.. بس مهما كان المفروض انك تسامحني وتاخذ بالاسباب..
جراح بضيق: اسكتي الله يخليج.. الصراحه انا مليت من هالعيشه
ساره: انا بعد مليت
جراح: شنو مليتي منه؟ مليتي من الحريه!!؟ مليتي من النوم المريح؟؟ مليتي من الاكل السنع؟؟ مليتي من الراحه ..
ساره وهي تحاول تخفي دموعها: مليت اعيش بعيده عنك.... والله مليت
تم جراح يطالعها بنظرات وجنه مو مصدق...
ساره وهي توقف بتروح: لاتكرهني مدام اني بديت احبك ....ارجوك لا تكرهني ..
تطلع ساره منه وهو مبتسم بين مصدق وغير مصدق ومن شدة تفاجئه ماقدر ينطق بكلمه ؟؟
:::::::::::::::::::

وصار عرس عامر من احلى العروس بعايلتهم... كل الناس سعيده وفرحانه.. والكل عاش سعادته على طريقته... فجر حضرت العرس وطبعا مابقى رقصه الاورقصتها ...... "عرس عادي"...
وسلوى وخالتها حضروا العرس ...
اما عامر كان يحاول يفتعل الفرحه.. لكن وينه ووين الفرح اللي هجر قلبه... كان كل تفكيره بمستقبله اللي كان يحلم يكونه مع اللي هو اختارها.. في مثل يقول(ليس كل مايتمناه المرء يدركه)..
فيصل... كان يفكر بمها ويتصل عليها بين كل فتره عشان يطمئن عليها
:::::::::::::::::::::::::::::::

في بيت فيصل وبعد مارجعوا من العرس.... فيصل يدخل على مها اللي كانت على السرير نايمه وشكلها ماقامت من يوم راحوا للعرس...
فيصل: مها... فيك شي؟ احس انك مو على بعضك
مها : هلا فيصل.. متى رجعتوا؟
فيصل: شكلك تعبانه حيل..
مها: احس اني مخدره
فيصل بشفقه: الجو بارد حيل... ليه ماتكثرين من اللبس؟
مها تتكلم بصعوبه: فيصل واللي يعافيك ممكن تعطيني الحبوب على الدرج اللي وراك؟؟.
فيصل: ياحياتي هذي المهدئات لا تنفع ولاتفيد خليني اوديك للمستشفى
مها : بس فيصل والله لاعت جبدي من طاري المستشفيات.. مامليت منها؟
فيصل: بس انتي تعبانه مافيها شي لوكشف الدكتور عليك... خليني اتطمن
مها: للهدرجه اهمك ؟
فيصل: ماهو وقته هالحكي يالله قومي البسي عباتك..
قامت مها معاه وهي كارهه انها تروح بس هي فعلا تعبانه ومحتاجه تروح..
فيصل يطلع مع مها من الغرفه وهي متسنده على ايده.. بينما كانت امه تصلي الوتر بالصاله واول ماسلمت..
ام فيصل: على وين؟ على وين؟ ترى الساعه اللحين 2 بالليل اذا ماتدرون
فيصل: يمه... مها تعبانه وابغى اوديها المستشفى
ام فيصل بإستنكار: وشوووو؟؟؟ وطويلة اللسان ذي ماجاها تعبها الاالحين يوم شافتك تعبان وتبغى تنام؟
فيصل: انا اللي اصريت انها تروح.. ماتشوفي حالتها كيف تعبانه؟
ام فيصل بإستهزاء : ياحرام.... لا لا مسكينه
ويطلع فيصل مع مها عنها لانه يدري انها مابتنتهي من كلامها اللي يغث الواحد...
::::::::::::

كانت قاعده على السرير.. مستحيه ومنزله راسها تحت ...كانت تظن ان عامر رجال قبل انه يكون اخو زوجها القديم...
عامر: انا خذيت بطانيه ومخده وراح انام بالغرفه الثانيه... تقدرين تنامين على راحتك..
استغربت منيره من حركته... مهما كان صح انا زوجة اخوه المتوفي بس قبل اكون زوجته انا انثى بطبيعة الحال... معقوله عامر غاصبينه على الزواج مني... لالامااظن عامر رجال ولايمكن يكون مغصوب علي.....
خل انام احسنلي..
عامر كان يتقلب على المسند الضيق وهو حاس ان روحه بتطلع منه: ياربي غصب يعني... مااقدر اتقبلها.. مااحس بشي صوبها... انا بعد انسان قبل كل شي.. وهذي المشاعر مو بيدي.. الله سبحانه يزرعها بقلب كل انسان... طيب انا وش ذنبي مكتوب علي الشقا.. والله حرام اعيش باقي حياتي مع وحده مااشوفها اكثر من اخت.. الله يسامحك يبا... الله يسامحك يمه ..
::::::::::::::::::::::::::::::

الساعه خمس ونص الفجر...
فيصل يحذف روحه على السرير بغرفة مها وهو تعبان حده مع ان الليله كانت ليلة سلوى وهذا اللي خلاها تشب ضو...
مها تنام بجنبه وهي حاسه بتعب مثله: مو قلت لك مالها معنى هالروحه بس انت اصريت
فيصل وهو يفتح نص عين: اهم شي تطمنت عليك وخذيتي علاج سنع.. لو تأخرت عليك شوي كان ضعتي من ايدي ..
مها بعد تفكير طويل: ضعت من ايدك..... يعني شلون؟؟؟
مالقت مها لسؤالها اجابه لان الحبيب راح بسابع نومه..."نوم العوافي"

[الهمة العالية]

الجزء العشرون:

فجر: حمووووووووووود من قالك تشوف جوالي ترى فيه خصوصيات ماارضى احد يشوفها
محمد ولدعمة فجر(19سنه): وشفيها يعني اذا شفت جوال بنت خالي؟
فجر: مثل ماقلتلك خصوصيات ومااحب احد يشوفها..
محمد: بس والله خوووووش رقصه.... من هالبنت الحلوه؟
فجر متفاجئه: وانت لحقت تشوفها؟
محمد: والله ملكة جمال.... منو هذي؟
فجر: مالك خص..
محمد: افاا والله انا مالي خص ؟؟ علميني منو؟
فجر: وحده من صديقاتي...
محمد: شسمها؟
فجر:اسمها سمر ارتحت اللحين... يالله عاد اقلب وجهك...
محمد: طيب هي معك بالمدرسه؟..
فجر: اكيد بالمدرسه... يعني منوين عرفتها؟
وطلعت فجر من عند محمد اللي تم يفكر بسمر وكيف يوصلها.... وقرر انه يروح لها المدرسه ويشوفها

::::::::::::::::::::::::

في بيت ام فيصل الكل متجمعين... حتى مها:
ام فيصل: ها وش قلت؟؟؟
فيصل: والله يمه مدري وش تكلمين عنه؟
ام فيصل: اتكلم عن روحتنا يم الدمام ما امداك نسيت
فيصل: إيه الحين ذكرت... انا اقول خلوها الاسبوع مو الجاي اللي وراه
ام فيصل : ليه ؟؟ وش عندك الاسبوع الجاي؟؟
فيصل وهو يطالع مها: بسافر انا ومها للكويت
ام فيصل وسلوى بإستغراب : نــــــــــــــــــــــعم ؟؟
فيصل: ماسمعتن؟؟؟ قلت بودي مها للكويت... ووحدنا
سلوى: وتخليني وحدي وانا بهالحاله؟
فيصل: مافيك الا العافيه ...وبعدين انتي اخر الشهر بتولدين..
ام فيصل بإصرار: ماتروحون !!
فيصل: ليه يمه؟
ام فيصل: ماله معنى مراحكم... وبعدين انتي يامقصوفة الرقبه وشوله تتعبين زوجك وتحملينه عنا السفر، وانتي مالك حد هناك ها؟ اكيد انك تحنين عليه بالليل والنهار
فيصل: يمه كافي انا قلت بنسافر يعني بنسافر خلاص
ام فيصل: عجل ماتروح الا ورجلي على رجلك
فيصل: وشووووووو ؟؟ يعني تسافرين معنا؟
ام فيصل: إيه والا ماتبغاني اسافر بعد؟
فيصل: لاموقصدي بس انا ماابغى اتعبك يمه
ام فيصل: مافيها تعب..
سلوى: وانا بعد ابغى اسافر معكم
مها بصوت واطي: ياحبيبي …كملت هذا اللي كان ناقصني
سلوى: وش تقولين انتي ها؟ فيصل خلها تسكت احسن لها والاترى ماراح يحصل خير.. انا قلت مسافره معكم
فيصل بضيق: وين بتسافرين انتي بعد ؟؟؟ خلاص انتي تقعدين عند اهلك وانا وامي ومها بنسافر..
سلوى كانت بترد بس شافت اشاره من ايد خالتها يعني اسكتي… اما مها فحست بضيق وقهر.. وتمنت لو ان سلوى هي اللي تسافر معها مو النسره ام فيصل….

:::::::::::::::::::::::


في بيت عامر:
منيره زوجة عامر: عامر فيك شي؟انت مريض؟
عامر بدون نفس: لامافيني شي..
منيره: احس انك موطبيعي… عامر انا اعرفكم زين وعايشه معاكم سنين يعني انا موغريبه.. ابيك تصارحني بشي.. ممكن.؟
عامر: وش تبين؟
منيره بتردد: انت مجبور علي؟؟؟ يعني اهلك غاصبينك علي؟
هني ثار عامر وعصب حيل لما سمع كلامها: نعم؟ وش تقولين؟ شايفتني حرمه يغصبوني؟؟ انا رجال ورايي بيدي ومحد يغصبني انتي فاهمه محد يقدر يغصبني…
ويطلع من الشقه… وينزل تحت…
لقى سمر تسوي سلطه بالصاله…
سمر: عامر وين رايح؟؟؟وقف ذوق سلطتي اول مره اسويها وابغى رايك فيها..
عامر مارد عليها وطلع برى…
سمر تكلم نفسها : شفيه هذا؟؟؟ الحمدلله والشكر من تزوج وهو ماله خلق لشي؟
:::::::::::::::::::
فيصل: يالله يمه… هذي عادتك ماتخلينها… صارلنا ساعه واحنا ننتظرك بالسياره
ام فيصل: يالله خلصت ..
وتقعد ام فيصل بالمقعد الامامي بينما مها بالوراني…. اما سلوى راحت عند بيت اهلها بعد مااقنعتها ام فيصل وطمنتها بأنها راح تضيق على مها وتكون تحت برج المراقبه24ساعه ….
وطول الطريق وام فيصل ماتركت وصيتها لسلوى وتمت تضايقها ….
وبعد ثلاث ساعات متواصله:
فيصل: ها مها تبغين شي من البقاله؟
ام فيصل :وانا ماتسأل عني ابغى شي والا ماابغى والا بس بنات الناس؟
فيصل يضحك: يمه الله يهداك توك ماكله ...
ام فيصل: وش كليت؟ اعوذ بالله مغير خبزه وحليب ...
فيصل: طيب طيب الحين بشتريلكم كلكم ...
ويشتري فيصل 3عصير3صمون جبن....
ولما مد فيصل ايده بيعطي مها حصتها من الاكل.. مدت درعا ايدها وخطفت الاكل..
ام فيصل: صمونه وحده ماتكفيني ياوليدي تراني جويعانه
فيصل بعصبيه: وليه ماقلتيتي اشتريلك يوم كنا واقفين عند الدكان .. والا حلالك اكل مها
ام فيصل: مستكثر علي ؟؟
مها: فيصل خلاص انا موجوعانه... عليها بالعافيه
ام فيصل : غصبن عليك ماهو رضى منك...
فيصل: كيف مو جوعانه وانتي مااكلتي شي من الصبح؟... بس تدرين شلون:.. خذي صمونتي وعصيري...
رفضت مها لكن مع اصرار فيصل وافقت بالغصب....... ونظرات ام فيصل لها تحرق كيانها ...

:::::::::::::::::::::::::

في بيت عامر...:
سعيد يطق باب غرفة سمر: ممكن تفتحين الباب؟
سمر وهي تفتح الباب: ماشاء الله وش هالادب اللي نازل عليك من السما؟.... خير شبغيت؟
سعيد: ابغى مسجل!!!
سمر بإستغراب: نعم؟
سعيد: ماتسمعين؟ قلت لك ابغى مسجله
سمر: وش تبغى فيها؟؟؟ ومن متى وانت تسمع اغاني؟
سعيد: اذا عندك عطيني واذا ماعندك خليني امشي...
سمر: ممكن اعرف زوجتك وينهي؟
سعيد: وديتها لأهلها... والحين ممكن تعطيني المسجله ؟
سمر: اسفه ماعندي
سعيد: مالت عليك وعلى اللي يطلب منك... اروح ادور بأغراض غيداء ابرك من مقابلك..
سمر: انت ماتستحي؟ تفتش بأغراض الحريم ... موعشان البنت تزوجت تستحل اغراضها... اصبر شوي وانا بدور لك ..
وتعطيه سمر مسجله مو كرم منها... بس تبي تعرف شيبي منها؟ لان سعيد مو راعي موسيقى ولا اغاني..
راح سعيد لغرفته وتبعته سمر تسمعله وهو مايدري...
في الجانب الثاني من البيت.. كان عامر وزوجته يطالعون التلفزيون وهو ماله نفس..
منيره: ترى صارلنا اسبوع من تزوجنا!!
عامر: ادري ... قايله شي جديد؟
منيره: عامر انت وش فيك؟وش صاير لك؟
عامر: قلتي هالكلام مية مره وقلت لك ميتين مره ان مافيني شي... لاتزهقيني خلاص كافي عاد
منيره: انا ماخبرتك عصبي للهدرجه قبل الزواج؟
عامر: منيره الله يخليك مالي خلق عوار راس.. بروحي كاره عمري وكاره الدنيا كلها.. لاتغثيني ..
منيره خانقتها العبره: ادري انك كارهها بسبتي ... بس انا وش ذبي؟ انا لو بيدي ماتزوجتك تدري... واذا ماعندك علم ان اهلي زوجوني بدون حتى يشاوروني والا انا اذا رجعلي الراي فلا يمكن اخذ واحد بعد حسين..انا بيدي اربي بنتي احسن تربيه وماراح اقطعها عن اهلها وعمامها... انا اسفه عامر اذا كان كلامي ثقيل شوي عليك بس صراحه انت قهرتني وغثيتني... يعني مافي وحده اول سبوع في عرسها تنزف وتنهان من زوجها مثل ماانت تهينني ....
وسكتت منيره وهي تمسح الدموع اللي على خدها ...
عامر كسرت خاطره منيره ولما جا بيرد عليها سمع صوت صراخ برى... وطلع لمصدر الصوت...
سمر كانت تسمع لسعيد عند باب شقته... وسمعت صوت امها مع خالتها يتكلمون.... هني عرفت ان سعيد يسجل مكالمات التلفون ويسمعها من فراغته الزايده...
سمر تطق الباب: ســــــعيد افتح الباب احسن لك؟؟
سعيد: اذلفي انتي.... وش تبغين ؟؟؟
سمر: يالخايس ياللي ماتستحي.... تجسس على مكالماتنا؟
سعيد وهو يفتح الباب معصب: ومن قالك هالحكي؟
سمر: انا سمعت بأذني ...خلني ادخل غرفتك وافتشها... وخر عن الباب..
تحاول سمر انها تدفع سعيد عشان تدخل داخل غرفته لكن سعيد قاومها ....
وعلى صوت صراخهم... يجي عامر.. ومنيره
عامر: خير سعيد وش اللي حصل؟
سمر: انا اللي بقولك اللي حصل لان هو كذاب وماراح يقولك الحقيقه..
سعيد بنظره مهدده وبصوت مرتفع: ســــــــــــــمر والله ياويلك
عامر: سمر احكي معي انا ...وش سبب هالصراخ؟
سمر: الحبيب يسجل مكالماتنا ويتسمع... تصور وصلت فيه الوقاحه ان يسجل مكالمات امي ويتسمع لها يعني شقصده؟ امي تغازل؟؟؟ امي تغازل ياسعيد تسمع لها؟؟ لاعاد انطوائي وماعندك اصدقاء وفوق كل هذا تسمع سوالف الحريم؟؟؟
سعيد ماقدر يتحمل وعطى سمر كف قوي على وجهها خلاها تطيح على الارض وهو يقول: مالكم شغل فيني انا كيفي اسوي اللي ابغاه.. انا حر فاهمين
كان سعيد يحاول انه يضرب سمر زياده لكن عامر مسك ايدينه بطريقه تشل حركته: سعيد استح على وجهك وصير رجال.. تضرب بنت عمرها 16سنه مالها ذنب... مالك حق تضربها وانا واقف.. وبعدين انت ماسمعت قول الله سبحانه وتعالى... "ولا تجسسوا ولايغتب بعضكم بعضا"؟
سعيد: إيه معذور تدافع عنها مو هذي سمر الصغيره المدلله اللي ماجربت تنضرب ولااحد يوقفها عند حدها.. الوالد الله يسلمه 24ساعه مجابل الحلال والوالده الله يطول بعمرها تنقل من حرمه لي حرمه ومن بيت لي بيت وبيتها اللي هو بيتها مهملته... عندك علم ان اختك هذي عندها صديقه تكلمها بالتلفون وكل سوالفها حب ومغازل... تدري والا ماتدري؟
عامر التفت لصوب سمر بس مالقاها لان منيره اخذتها لغرفتها ورد يكلم سعيد بإستغراب: وش تقصد؟ يعني... يعني سمر تكلم شباب؟؟؟؟
سعيد: لا مو شباب... لكنها تكلم بنت الظاهر انها تلعب دور الصبي وطايحتها مغازل بأختك
عامر بهدوء: وانت؟؟ ماعرفت من مصادرك الخاصه. .شسم البنت؟
سعيد وهو منحرج: امبلا .. اسمها ... فجر..
عامر: عدل.. انا من البدايه محذرها منها لكن هي ماطاعتني.. بس هذا الشي مو حجه بأنك تعاود شغلك القديم.. انا قصدي التجسس والتصنت... عيب ياسعيد عيب عليك ترى هذا مو من شيم الرجال..
سعيد: انا اشوف ان مافيها شي... اذا حبيت احافظ على شرفي وشرف اهلي اصير غلطان؟
عامر: في مليون طريقه غير هالطريقه... وبعدين انت متى تسنع وتروح تجيب حرمتك اللي صارلها اسبوع حاذفها عند اهلها .. انا من تزوجت وانا مااشوفها
سعيد وهو يدخل غرفته: اوووووووه بعدين بعدين

[الهمة العالية]

يروح عامر لغرفة سمر وهو في طريقه يمر عند غرفة جدته... حرمه كبيره بالسن عمرها(84) ومخرفه... سمعها تقول.... "الحلال... الحقوا عليه يالنشامى... الحلال راح... ياويلي على حلالي..."
ابتسم عامر وهو يفكر شلون بيكلم سمر وهو بهالحاله... دخل عليها ولقاها منسدحه على السرير تبكي ومنيره عندها تواسيها...
عامر: منيره ممكن تخليني انا وسمر شوي؟
منيره: أي اكيد ... سمر انا طالعه الحين .. لاتسوين بروحك كذا.. ترى السالفه ماتسوى...
وتطلع منيره ويقفل عامر الباب وراها ...
عامر يقعد بجنب سمر وهو يطالعها : يعور الكف اللي عطاك سعيد؟
سمر وهي تنفجر بالبكاء: شفته ياعامر شلون تجرأ ومد ايده علي؟؟ ابوي ماسواها يسويها هو؟؟
عامر: ترى صفعات الزمن اقوى...
سمر رفعت راسها وهي تطالعه وكأنها مو فاهمه اللي قاعد يقوله..
عامر: كم مره حذرتك من فجر؟
سمر: كثير... بس ليه تسأل ؟
عامر: احاول قد مااقدر اني اتمالك اعصابي معك ...
سمر: عامر شسالفه؟
عامر: ابغى اعرف علاقتك مع فجر بالتفصيل
سمر: صداقه... مجرد صداقه
عامر: طيب... وش دخل كلام الحب بالصداقه
سمر بإرتباك: أي كلام حب واي خرابيط؟؟.. انا احب فجر على انها صديقتي وبس
عامر: شوفي ياسمر اذا احنا قسينا عليك وضربناك ترى هذا من حقنا لان احنا اخوانك ولنا حق عليك... وانا ابغى مصلحتك لانك تهميني ... ولاني خايف عليك ترى ذا الزمن مايرحم والكل يبغا منك شي الا اخوانك واهلك لانهم يحبونك ويخافون عليك ...
سمر: والمطلوب مني؟
عامر: تطيعيني؟
سمر:....
عامر: ماابغاك تكلمين فجر ولاحتى تزورينها ولاتمشين معاها..
سمر : لــــــــــــــــــــيه؟
عامر: لاني شايف انها بنت مو زينه وماتصلح لك
سمر: عامر انت ترضى احد يمنعك من اصدقائك اللي ترتاح لهم ؟
عامر: اذا مااحسنت الاختيار.. طبعا ارضى
سمر: واذا رفضت اني اقاطعها؟
عامر: راح تكون معاملتي لك ثانيه... وما راح يكون فيه مدرسه ولاتلفون ولا طلعات ولا ..
تقاطعه سمر: خلاص ... خلاص موافقه ... والله يسامحكم

تنزل سمر راسها وهي تبكي... ويرفع عامر راسها ويمسح دموعها ....وهو يقول: اختاري الصديقه الزينه واوعدك ياسمر اني مراح احرمك منها ولا اخلي احد يتدخل بحياتك... لكن اذا كذبتي علي وظليتي تكلمين هالبنت ترى لا تلومين الا نفسك....
ويطلع عامر من البيت بكبره وهو متضايق ومنغث من المشاكل اللي ماتبغى تنتهي...

::::::::::::::::::::::::::

بالطريق:
فيصل: مها.. يمه ...كافي خلاص عاد والله صدعتوا راسي..
ام فيصل: ماتسكتها هي.. شوف لسانها شطوله مع امك..
مها: انا ماقلتلج شي انتي اللي حاطه دوبج من دوبي
فيصل: بس مها خلاص.. ابي هدوء ارجوكم
ام فيصل: تسمعين الرجال شيقول؟؟؟ يبغى هدوء... سمعتي
مها: انا كيفي ... بعدين انتي مصدر الازعاج مو انا
فيصل بعصبيه: مها... بس عاد.. كافي
ام فيصل: ايه بلا مالها اهل يربونها ويعلمونها تحترم الكبير..
مها: لي اهل الله يرحمهم... ربوني احسن من تربية اهلج لج..
زادت عصبية فيصل لما سمع كلامها وبطريقه لا اراديه منه حاول انه يمد ايده عليها... يعني ايد على السكان وايد الثانيه ضرب مها فيها....
اما ام فيصل ماحاولت تهدي الوضع ..مع ان حركة فيصل هذي كانت ممكن تكون سبب في حادث مأساوي لهم ....
مها... شقول عن مها؟؟؟... انتم حطوا نفسكم مكانها.. اذا أي احد تعدى وسب اهلكم شنو يكون شعوركم؟ وشلون تصرفون؟؟ هذا وهم على وجه الارض... فما بالكم اذا كانوا تحت الارض وغيبهم التراب؟؟؟...
وشنو يكون انطباعكم لما يوعدكم احد بشغله ويخلف بوعده... ".امانه ماتكرهونه"؟؟؟؟

بالنسبه لمها... كانت المشاعر متضاربه بكيانها لكن نقدر نقول ان الحزن شعور قاسي واثره عميق.... دموعها تجمدت بمحاجر عيونها ... وراسها صدع من كثر التفكير ... وقلبها ضعفت نبضاته بداخلها... اما جسمها فقد اثقلته الهموم وتعب ..وماعادت تقدر تحتمل .. وانسدحت على المقعد الخلفي وهي تبكي بصمت اليم....
ام فيصل: تستاهلين... الرجال يقول لك...
يقاطعها فيصل بحده: بس خلاص يمه كافي... اظنك ارتحتي الحين؟

::::::::::::::::::::::::

وعند جوازات السعوديه... بين السعوديه والكويت... وبالتحديد عند المطبقه.. "الحرمه اللي تكشف على وجوه الحريم" ...
فيصل يوقف سيارته عند ملحق المطبقه... كان ساكت طول الطريق يفكر في موقفه مع مها ... كان حاس بتأنيب الضمير.. وبنفس الوقت كان يعتقد انه على حق ...
فيصل : يالله يمه.. انزلي انتي ومها عند المطبقه.. وانا بروح اختم على الجوازات... بخلي السياره مفتوحه.. اذا خلصتوا اقعدوا فيها ...
ام فيصل وهي تلتفت على مها اللي كانت غرقانه في صمتها وحزنها: يالله ياحجيه ترانا وصلنا.. والا تبغيني افتح لك الباب وافرش لك البساط الاحمر تمشين عليه؟
فيصل: خلاص يمه.. لاتكثرين بالكلام.. مها بتنزل الحين... يالله يامها
مها ماردت عليه ولا على امه ونزلت من السياره....
وعند المطبقه اللي كانت تنادي اسم مها...
ام فيصل : وش تشوفون؟؟؟ وجهن قبيح وحاوين كل شين ؟؟
المطبقه: انتي مها؟؟؟
ام فيصل: لاان شاء الله إسم الله علي..
مها وهي تنزل غشوتها: انا مها ..
المطبقه: ماشاء الله ...الا قولي حاوين كل زين... "توجه كلامها لام فيصل"
مها: ماعليج منها هذي محتره مني ومنقهره لاني احلى منها ..... (((((استغلت عدم وجود فيصل وحبت تقهرها شوي)))))
ام فيصل فعلا انقهرت: ياللي ماتستحين... والله لاعلمك منهو المقهور الحين يال...
تقاطعها المطبقه: لو سمحتي اختي.... كملوا كلامكم في الخارج
وطلعت مها للسياره ... اما ام فيصل راحت للحمام ...
يرجع فيصل ويلقى مها بروحها بالسياره... ركب عندها بالمقعد الخلفي..
فيصل: وين امي؟
مها:....
فيصل: ممكن تجاوبيني ..؟
مها بدون نفس : بالحمام..
فيصل: اكيد انتي زعلانه ؟
مها:....
فيصل: بس لازم تعذريني
مها: عادي
فيصل: شنو اللي عادي؟ كل ماصار بينا شي قلتي عادي؟
مها تحاول قدر الامكان انها ماتبكي: فيصل.. انا خلاص ماعاد يهمني شي ولايأثرعلي انا مات الاحساس فيني
فيصل يمسك ايدها: ممكن تسامحيني؟
مها: ياكثر ماسمعتها يافيصل ...
في هاللحظه تفتح ام فيصل الباب : ياسلام قاعد عندها... وماسك ايدها بعد ترضاها... بلاك ماتدري شصار؟
انحرج فيصل ورد مكانه : خلصتي يمه... نمشي؟
ام فيصل: انا خالصه ...ماسألتني وش صار؟
فيصل وهو يحرك السياره: وش صار بعد؟
ام فيصل: زوجتك ...قصدي اللي محسوبه عليك زوجه
فيصل: يمه خلاص ماابغى اسمع... مشاكلكم حلوها بينكم
ام فيصل بعصبيه: تدري وش تقول عني؟؟.. تقول اني محتره منها ومنقهره... من زينها ؟؟؟ انتي ماتشوفين نفسك بالمرايه... ترى مافيه فرق بينك وبين قرود الطايف
ينفجر فيصل بالضحك... اما مها ماقدرت هالمره تمسك دمعتها الاخيره اللي غسلت ايدها نهاءيا من فيصل ..
مها: حضرتك مستانس على تشبيهات امك ؟
فيصل مبتسم : لاوالله ماني مستانس... بس يمه وشلون جبتيها؟؟؟ مره وحده قرود الطايف؟
ام فيصل بسخريه: لاوقرود الطايف احلى بعد..
فيصل بجديه: لا عاد يمه.... شجاب السما للارض؟؟.ترى مها مزيونه ..
ام فيصل: إي واضح.... القرد بعين امه غزال...

::::::::::::::::::::::::::

في بيت اهل سلوى...:
سلوى : والله يامروه اني منقهره... تصوري ولااتصل علي ولامره ..
مروه: بسم الله توهم ماشين مامداهم يوصلون الكويت ... انتي ليه مستعجله؟
سلوى بقهر: إيه شيبغى فيني...؟؟ معاه حبيبة قلبه .. وشلون اطري على باله؟
مروه: حبيبة قلبه مسكينه
سلوى بإستهجان: مها... مسكينه؟؟؟
مره: ايه مسكينه... ولا عندك اعتراض؟
سلوى: انتي ماعرفتيها زين... هذي عقرب رمل تلدغ بسكات
مروه: انتي اللي ماعرفتيها ياسلوى.... حرام عليك خفي عليها انتي وخالتك.. البنت يتيمه ومسكينه كافيها اللي فيها لاتعذبونها زياده
سلوى: اشوفك متعاطفه معها؟؟
مروه: الصراحه انا ارتاح لمها واحبها واحس ان مايطلع منها الشر..
سلوى: يعني انا اللي يطلع مني الشر؟؟
مروه: مو قصدي ... خلينا من هالسالفه وقولي لي ليه ماتروحين لعزيمة مرزوقه؟
سلوى: هذا اللي ناقص اروح لعزيمة مرزوقه!!
مروه: وليه ماتروحين ...ماكنها هي اللي كانت من اعز صديقاتك؟
سلوى: وليه ماجت عرسي..... انا من باعني برخيص ببلاش ينباع

[strange]

باين عليها القصة طويلة

حاسس كأنها مسلسل

وبعدين كل هذه التفاصيل من وين جايبينها

بس والله تشكرين على الجهد مدري وش مخليني أتابع ذي القصة

حابب أشوف وش نهايتها

الله يكون في العون

[متبع الحق]

أختي الكريمة جزاك الله خيرا على القصة ولكن هل هي حقيقية ؟

وهل يوجد فائدة من ذكرها ؟أم يدخل في باب تضيع الوقت ؟

بارك الله فيك .