[محبة خالقها]

اخوي ترى كثرت التفكير في الموضوع ماراح تجيب لك الا التعب
خلاص لاتفكر انها سوت جذي واشحقه ومتى فكر بصحتك لا تدهور
اذا تحس نفسك ماتقدر تواصل معاها بعد حرام تعذب روحك اذا تشوف انه راحتك راح تيي من الزواج من غيرها
تزوج بس اهم شي انك ماتكون فقدت الثقه بكل الحريم لانه اهني راح تكون مشكله اكبر وراح تحتاج متابعه من ناحية نفسيه وعلاج نفسي فانت لاتقدم على خطوة ثانيه الا اذا كنت واثق من نتايجها عشان ماتكرر نفس الغلط وتصير لك بدل المشكله ثنتين

[عذووبه]

عسى ان تكرهوا شيئا وهو خير لكم ,,سبحان الله يمكن الله اختار ان تكون توبتها على يدك سبحان الله وذا مو مرتاح معاها لا تتركها ترجع لماضيها تبي تتزوج عليها براحتك بس تأكد اذا تركتها ممكن ترجع للضلاال حاول تتعوذ من ابليس واستخر الله فيما تريد

[عذووبه]

تذكر اخوي انا ماادافع عنها لكن من ستر مؤمنا بالدنيا ستره الله بالاخره استر عليها والله بتلاقي اجرها وبتشوف

[عذووبه]

إكرام النفس هواها ,,,,,,فأكرم نفسك بما تحب

[شايل همي لحالي]

المشاركة الأصلية كتبت بواسطة ام عبودولمو ماأقول غير الله يلوم اللي يلومك وعزالله انك ولد اجاويد متعرف الاصول وكل اللي قلته ماتنلام فيه والله يكتب لكم الله فيه الخير

الله يجزاك ِ الخير ام عبودولمو ويعطيك على قد نيتك الطيبة

[شايل همي لحالي]

المشاركة الأصلية كتبت بواسطة محبة خالقها اخوي ترى كثرت التفكير في الموضوع ماراح تجيب لك الا التعب خلاص لاتفكر انها سوت جذي واشحقه ومتى فكر بصحتك لا تدهور اذا تحس نفسك ماتقدر تواصل معاها بعد حرام تعذب روحك اذا تشوف انه راحتك راح تيي من الزواج من غيرها تزوج بس اهم شي انك ماتكون فقدت الثقه بكل الحريم لانه اهني راح تكون مشكله اكبر وراح تحتاج متابعه من ناحية نفسيه وعلاج نفسي فانت لاتقدم على خطوة ثانيه الا اذا كنت واثق من نتايجها عشان ماتكرر نفس الغلط وتصير لك بدل المشكله ثنتين

صدقيني التفكير مو بيدي وبالذات لما يكون هذا الشخص يعني لي الكثير ..
أما الثقه في الحريم فأكيد لو ما عندي ثقة فيهم ما فكرت أتزوج بغيرها ومو كل البنات مثلها ومشكلتي إني وثقت فيها ثقة عمياء ولما صار اللي صار أنصدمت وتحطمت وصار اللي صار وحتى أذكر والله إني صدمت سيارة واحد بسيارتي وهو واقف بس ما كنت بوعيي ولا حسيت إلا لما صدمته هذا غير إني رحت أكشف على قلبي وما صرت أنام واشياء غيرها كثير وهذا كله من صدمة الموضوع ..

[شايل همي لحالي]

المشاركة الأصلية كتبت بواسطة wlah55 عسى ان تكرهوا شيئا وهو خير لكم ,,سبحان الله يمكن الله اختار ان تكون توبتها على يدك سبحان الله وذا مو مرتاح معاها لا تتركها ترجع لماضيها تبي تتزوج عليها براحتك بس تأكد اذا تركتها ممكن ترجع للضلاال حاول تتعوذ من ابليس واستخر الله فيما تريد

في أشياء هي اللي خلتني أصبر للحين ..
يعني أدور عذر للي سوته وأقول وضع أهلها المادي كان صعب وكانت تحتاج فلوس وسوت كذا بس بعد هذا مو طريق للي حالتهم صعبه والمفروض كانت ترجع لله سواء حالتهم صعبه أو مرتاحين ..
وأحيانا أقول يمكن أكسب أجرها والله يستر علي ما دام أنا سترت عليها ويوفقني في حياتي وفي الآخره بس ويش أقول والنفس تعبانه وما أقدر أعيش مثل أي متزوجين وأقول لها كلمة حلوة طالعه من قلبي لأني فعلا مو حاس بالحب ولا غيره وكل اللي أحس فيه رحمه لها بالذات بعد ما تابت وأثبتت لي كذا ..

المشاركة الأصلية كتبت بواسطة wlah55 تذكر اخوي انا ماادافع عنها لكن من ستر مؤمنا بالدنيا ستره الله بالاخره استر عليها والله بتلاقي اجرها وبتشوف

الله يسمع منك والله أوقات أتمنى هذا الأجر والثواب وأقول بصبر بس أوقات الشيطان يغلبني وأذكر كل شي وبالتفصيل وفوق كذا أخاف في أشياء أنا ما أعرفها سوتها في الماضي ..

المشاركة الأصلية كتبت بواسطة wlah55 إكرام النفس هواها ,,,,,,فأكرم نفسك بما تحب

لو أدري ويش أحب كان تصرفت بس كل طريق أختاره ألقى عقبات ..
لو فكرت أتزوج أدري كيف بتصير نفسيتها وفوق كذا هي حامل يعني بيضيع طفل بسبب هذا الزواج ..
ولو فكرت أكمل معاها أحس نفسيا تعبان ومو قادر أتصرف مثل باقي المتزوجين بالحب وباقي الأمور ..

[اقحوان]

لا حول ولا قوة الا بالله العلي العظيم ... أخوي شايل همك لحالك .. الحين كل اللي قروا مشكلتك شالوا همك معاك وهذا اللي بيريحك بإذن الله ..
اللي تتطوع تفضح نفسها قدامك لا تخاف انها للحين خاشه عنك شي من ماضيها و ماقالت لك عنه .. يعني تطمن ... و سالفة انك للحين مخليها عندك لأنك راحمها فاسمح لي انت قاعد تخبي مشاعرك عن نفسك .. لو ما تحس ناحيتها بعاطفه اكثر من الرحمة ما خليتها عندك ... يعني أبيك تعترف لنفسك انك خلاص ماتقدر اتخيل حياتك بدونها وحياة الراحه اللي موفرتها لك ماتقدر تستغنى عنها ولا تعوضها عند وحده ثانيه
انت سامحتها من زمان والدليل خوفك انك تفقدها والا ما قررت تكتب مشكلتك
انا تابعت ردودك على كل اللي جزاهم الله خير ماقصروا باللي عندهم ... لاحظت انك مثل اللي يتكلم وهو ماهو مرتاح بقعدته ولو عدل وضعه و تسند كان حس بالراحه ... انت كنت محتاج تفضفض مثل مايقولون لانك تكلمت وصارحت اهلها وما انصفوك وهذا اللي تعبك اكثر والحين لما شفت اكثر من وحده وقفت معاك ووافقتك باللي تفكر تسويه أظن ارتحت شوي
وانت بعد ماقصرت جبت أولها وتاليها ... و دامك حجيت عن كل ماضيها هذا يعني انك بإذن الله سهل انك اتخلص منه ...
انا ما اقول ان خطاها هين .. وهي بعد لو ما اذنبت هالذنب وعرفت عن ماضيك مهما حاولت انك تقلل من بشاعته بتعطي لنفسها الحق انها تشك فيك ويمكن تتخلى عنك
الحين بعد ما سمعت اكثر من راي اسأل نفسك وبصراحه وبعيد عن تعب نفسيتك وتأثيرها على مرض قلبك ... تقدر تتخيل نفسك مع وحده غيرها ؟؟
واذا تزوجت عليهابتلقى اهتمام مثل اللي موفرته هاللي بتصير ان شاء الله ام ولدك او بنتك ؟؟
اخوي(( منت شايل همك لحالك )) دوام الحال من المحال واذا شايف تعبك اللي انت فيه بيستمر الى ما لا نهايه فهذا من اختيارك انت ورغبتك والا البنت بشهادتك مافي احسن منها الحين وتقدر تعتمد عليها في غيابك يعني بتصون بيتك وسمعتك وعيالك ... وش تبي اكثر
ياختك ترى النعمه زواله واقنع باللي بين ايدك واحمد ربنا اللي خلى توبتها على ايدك
صدقني .. لما تغير كلامك لنفسك عن تعبك و انك صعب تنسى بتفاجا ان كل اللي كنت تعاني منه وسواس تقدر تدحره باستغفارك واهتمامك بزوجتك مثل ماهي مهتمه فيك
ابتسم لها اليوم وشوف ردة الفعل بينك وبينها ... لا تستعجل .. لا تقول لها احبك .. لكن ابتسامتك لها صدقني بتسوي العجب لك ولها
موفق اخوي .. وطمني عليكم

[اللهم سهل امري]

موقفك حلو انك سترت عليها
اول شي حابة اقلك أرجو انك تتقبل كلامي لانه راح يكون فيه شي من القسوة
لاحظت في كلامك انك كنت مخطئ في بدايات حياتك قبل لا تتزوج انت كمان .. وتتوقع انه الله راح يبتلي بنت بريئة بواحد كلم غيرها وهيه مالها ذنب .. وقتها ما كنت انت راح تحس بذنب بنت كمان ولا كنت راح تحس انك راحمها ؟؟؟!!
اتمنيت لنفسك احسن شي ... وتبغا تروح تاخذ وحدة بريئة ؟؟
حتى لو انك ما وصلت للي هي سوته بس انه في حق بنت بريئة شي كبير
وغير هذا كله بصراحة هذا دين عليك وانرد لك
اتمنى ما اكون ضيقت عليك بكلامي زيادة على انك انت مضايق
والحل في وضعك انك تمسكها مدام انها تابت وانك تعاملها معاملة زوجة واتجاهل الي صار وكانه ما صار
هذااا ماضي وانتهىىىىى وقرار الحاضر ماراح يحل الي فات ومات
على قولهم ما تحفر في قبور الاموات
عيش اللحظات الحاضرة معاها
وحاول تبدأ من جديد ... ولا تنسى انه بينكم ولد
ما اعتقد انه حل مناسب انه عشان شي ماضي لازم انهي الحاضر والمستقبل
سافرو .. اخرجو اتمشو اي شي سووه مع بعض .. مو تقعد تفكر لا هيه سوت وسوت
واذا هيه حابتك ... لا تخسر حب صادق ... ويكفي انها اعترفت قدامك وهذا دليل انها مو بذيك القوة او الخبرة الي تقدر تنكر او تكذب عليك .. وصدقها يخليك تثق فيها على الاقل انها ما تكذب عليك

[شايل همي لحالي]

اقحوان الله يعطيك العافية وتسلم يالغالي
أنا ما أحب أظلمها وحتى اني قلت لأهلها الحق إنها مو مقصره بحقي وتسوي الواجب عليها وأكثر ..
لكن اللي كان يرجعني للماضي بعض تصرفات أهلها ( وإن كان مالها ذنب ) يعني مثلاً أمها مرة تقولي محد ضربك على يدك وقال تزوج من عندنا !
يعني أسلوب فعلاً يخليني أحياناً أطلقها وأتركها لأمها وأعلمها كيف تفكر وتتعامل مع الغير مع العلم إني والله ما أشتكي لأمها عن اللي سوته أو عن أي شي يعني ما أحب أذلهم وكل شوي أذكرهم بالسالفة وبنفس الوقت أبو زوجتي عنده ظرف مادي جداً صعب وأنا قاعد أسعى فيه عشان أطلعه من هذي المشكلة وكل هذا لوجه الله لكن أواجه أحياناً ردت فعل منهم تخليني فعلاً ما أبغى دقيقة وحده تقعد عندي لكن أتعوذ من الشيطان وأحاول أهدي نفسي ..
وما بظلمها بصراحه ما أعتقد ممكن ألقى زوجه مهتمه فيني وتسوي كل شي أتمناه مثلها ، لكن أوقات لما أحس إنها تسوي كل شي وأنا مو قادر أقول لها حتى كلمة حلوة أحس إني قاعد أظلمها لأنها تسوي المستحيل معي وأنا نفسيا ً خلاص مو قادر أحبها وقاعد أتعامل معها معاملة عادية جداً ..
في حل بحاول أجربه خلال الأسبوعين الجايه ( طبعاً بعد ما أخذ عمره ) إني أعرض نفسي لدكتور نفسي وإن شاء الله خير
مشكور يالغالي وتسلم على نصيحتك الغالية