[صانعة في الحياة]

رجو من الاخوة والاخوات الاعضاء من مساعدتي في نشر الموضوع ولكم ان شاء الله كل الاجر والثواب في نهوض بلادنا العربية وكل هذه الامة

[محمد عبد الله زينو]

السلام عليكم ورحمة الله وبركاته

حقيقة أختي مجهودات رائعه ... خاصة مليون كيس ملابس ماشا ءالله تبارك الله ...

وان شاء الله نرجو للأستاذ عمر خالد التوفيق في مشواره ... وأن ييسر له من المعاونين من ألو العلم الذين يعينونه على مشواره كما يحب الله ويرضى ...

[صانعة في الحياة]

بارك الله فيك اخي الكريم محمد وجعل الله ذلك في ميزان حسناتك وجزاك الله خيرا على هذا الرد اخي الكريم ما نطلبة منك هو مشاهدة الحلقة ونشر المشروع بين الناس لتقبلة بارك الله فيكم وجمعنا بكم في جناته جنات النعيم

شكرا لك اخي الفاضل ..

[أمل حزين]

بارك الله فيكم اخيتىا لفاضله صناع الحياه
وفقك الله لكل خير
ونفع الله بمجهوداتكم
وانا اناشد الجميع بان يتبنو هذا النهج وان اختلفت مقاييسه وطرقه واساليبه
ولو نهضت لوحدك

انت فقط تقدم خطوه....وستجد بان الخطوات هي التى تقدم اليك
أقولها عن تجربه

[صانعة في الحياة]

شكرا لك اختي الغالية امل وبارك الله فيك ووفقك معا يدا بيد نصنع الحياة ..

[صانعة في الحياة]

نرجو أن تتابع المرحلة الثالثة للبرنامج على قناة اقرأ
الثلاثاء الساعة 9مساء بتوقيت مكة المكرمة
ويعاد الأربعاء الساعة 4 مساء بتوقيت مكة المكرمة
وأيضاً الجمعة الساعة 12 بتوقيت مكة المكرمة
نعرف أن وقت ثمين لكننا في أمس الحاجة إلى ساعة
واحدة فقط من وقتك هي مدة البرنامج

[صانعة في الحياة]

المرحلة الثالثة من صناع الحياة

الحلقة الرابعة
الحلقة الماضية تكلمنا على الصناعة وقلنا ان مفيش نهضة إلا بالصناعة .... والنهاردة تكملة الكلام .....حلقة اليوم استكمال لحلقة الصناعة ..حلقة اليوم عن العمل الحرفي (فاكرين ال puzzule )



الموضوع صعب يا جماعة لأن الناس الآن للآسف في بلادنا تحتقر(تتعالى) على العمل الحرفي ولا ترى له أي قيمة في بناء نهضة بلادنا يعني أصلا ... محتقر (ينظر له نظرة دونية) وما حدش شايف له قيمة وإحنا في الحلقة ديه ..كل هدفنا نعمل حاجتين ... (قناعتين نغيرهما في عقولنا وحاجة ننفذها) حاجيتين في دماغنا .. هنغير قناعتين في الحلقة ديه

1- احترام العمل الحرفي

2- أن العمل الحرفي أساسي لتحقيق النهضة وهنفذ حاجة أن كل طفل وطالب فب بلادنا يتعلم حرفة ويتقنها ..هذا هو هدف الحلقة ...تغير قناعتين ...وتنفيذ مشروع



بصراحة الحلقة ديه مخاطب بيها المجتمع ككل ،كل أم وأب ولادهما في ابتدائي وكل شاب وشابة، مخاطب بها المسئولين عن التعليم ..المسئولين عن الإعلام..العلماء والواعظ وخطباء المساجد ..

هدف الحلقة أقول لهم لازم تتعلم حرفة..لازم تتعلم صنعة ..إسلامنا بي..قول كده وتاريخنا بيقول كده ، نبينا علمنا كده .. من النهاردة هنربي ولادنا ..أن الحرفة ديه مش عيب ديه شرف وإن أحنا ولادنا هيكون كل واحد فيهم صاحب حرفة يتقنها جنب دراسته



أول قناعة عايزين نغيرها النهاردة ..مفيش نهضة بدون عمل حرفي ...



الأول نقول يعني ايه العمل الحرفي .... ايه تعريف الحرفة ...

الحرفة هي عمل فني يتم باستخدام اليدين مع تشغيل العقل ...وتحتاج لمهارات خاصة لا يمكن إكتسابها إلا بالتدريب العملي

الحرفي هو الفرد اللي بيعتمد أساسا على التدريب اليدوي بإتقان عمل معين دون تعام الأسس العلمية لهذا العمل ودون إحتياج لاستخدام آلات معقدة فقط مهارة في اليد وتشغيل العقل



الحرف ديه زي ايه...

الخارط والبراد واللحام اللي بيعملوا الاسطنبات والتروس ..والفنيين اللي بتقوم عليهم الصناعات كلها والديكور اللي احنا فيه ده صمم فكرته ورسمه مهندس ديكور لكن ما يعرفش ينفذه ..ينفذه الفنيين والحرفيين ..كل الصناعات قيامة على الحرفيين أو المهنيين ..وحتى حياتنا الشخصية مرتبطة بالحرفيين والمهنيين ،الخباز.. الحلواني.. النجار.. الحداد.. النقاش .. الحلاق .. الميكانيكي....السباكة.

أنا عارف أن نوعية اللي بيشوفونا دولوقني مش ممكن يتخيلوا نفسهم أو ولادهم ممكن يشتغلوا الشغلانات ديه ...

[صانعة في الحياة]

خلينا نقولكم ... قيمة العمل الحرفي في النهضة مهم قد ايه ؟؟

كل حضارة وراها عمل حرفي...

- الحضاره الفرعونيه والاتقان العجيب فى كل ما تركته من اثار كان وراه عمل حرفى.

- الحضاره الاسلاميه بكل ما تركته فى بلاد الرافدين وفارس ومصر والشام واسبانيا كان وراها عمل حرفى متقن.

- حضاره عصر النهضه فى اوربا و المبانى الرائعه والمتاحف وراها عمل حرفى متقن.

والغريب ان هذا العمل الحرفى اللى اتعمل من آلاف السنين أو مئات السنين,احنا وغيرنا بناكل من خيره دلوقتى ، إزاى؟

فيه صناعه ضخمه جدا فى العالم اسمها صناعه السياحة دخلها بالمليارات وبيشتغل فيها مئات الملايين من الناس جزء كبير منها قائم على ان الناس تسافر من بلد لبلد علشان تشوف اثار هذه الحضارات العظيمة اللى بناها الحرفيين (خان الخليلي في مصر دليل على كده).

لا ده أنا أقول لكم أكثر من كده ....

كلنا درسنا في التاريخ عن الاحتلال العثماني ....أخذوا العمال المهرة من مصر وسوريا للاستانة - السلطان سليم الأول بعد أخذهم لمصر وسوريا- ... أولا ..هل هو إحتلال عثماني ام لا ... ده مش موضوعنا .. لأننا لا نتكلم في التاريخ .إنما في النهضة ...

لكن مكتوب في كتب التاريخ أن سبب تعطل النهضة في مصر وسوريا .أخذ العمال المهرة

وإذا ذهبنا للأسِتانة اليوم ...سنجد أثر العمال المهرة هناك ...كيف فعلوا ...


ويقولون هناك لك ... هذا فعل المصريين ... هذا فعل السوريين .. وسياحة تركيا الآن قائمة على هؤلاء .. هؤلاء العمال لما ذهبوا لتركيا ...بنيت نهضة



شفتم أن النهضة في العالم كله والحضارة مرتبطة بالعمل الحرفي ...

إحنا محتاجينهم على مستوى بلادنا ككل , محتاجينهم للصناعه ومحتاجينهم للزراعه ومحتاجينهم للدفاع.

- إللى بيعمل كل أدوات الزراعه- حرفيين .

- السيارات الفخمه إللى بتنبهر بشكلها, بعد المصمم ما يعمل تصميم شكلها, لازم السياره تتعمل يدوى من الصاج يعملها واحد سمكرى فنان ويفضل يدق على الصاج بحرفيه وإتقان لغايه ما يشكله حسب التصميم, بعد كده ييجى المصمم و المهندسين الميكانيكيين يشوفوها ويبدأوا يعدلوا كلهم مع بعض وبمعاونه هذا الحرفى لغايه ما تخرج السياره فى شكلها النهائ الجميل.



- حاجه تانيه, أو طياره إتعملت فى مصر بالكامل سنه 63 و كانت طائره تدريب إسمها القاهره 300 صمموها مهندسين الطيران فى مصر لكن إللى نفذ النموذج الاول منها الحرفيين الحدادين والبرادين والخراطين, وطارت الطياره وأدت غرضها وكانت أول طياره تصنع بالكامل محلياً فى بلد عربى , وجت نكسة 67 وتوقف المشروع الحلم, والله أعلم لو كان إستمر كان زماننا فين ؟ ولكن قدر الله وما شاء فعل .



لأ اخطر من هذا , قبل حرب 73 كانت سينا كلها محتله وكان فيه مانع مائى كبير( هوه قناه السويس) لازم القوات المسلحه المصريه تعديه علشان توصل سينا وتبدا تحريرها واجتمعوا المهندسين العسكريين علشان يصمموا كبارى لازم يتم تركيبها فى دقائق علشان تعدى عليها القوات المصريه ويتم مفاجأة العدو, وجابوا معاهم المهندسين البحريين وحسبوا المد والجزر وحركه المياه وحسبوا كل حاجه ورسموا التصميمات على الورق.. طيب وبعدين.. هيقعدوا يبصوا لبعض ؟؟ بعدين لازم فيه حد يعمل الكبارى دى نفسها , واحد حداد حرفى يعنى ينفذ الكبارى دى بايديه ودماغه يقطع الحديد ويلحمه ويعمل المفصلات ويتاكد ان الكوبرى شغال وزى التصميم بالضبط.

صوره الكوبرى وهو بيفتح فى الميه

يعني بناء الحضارة والنهضة والإنتصارت الحربية .. مرتبطة بالعمل الحرفي ..

[صانعة في الحياة]

اللي أنا قولته ده احتياجات الصناعات الكبيرة للحرفيين لكن أنتوا عارفيين أن أحنا الحلقة اللي فاتت ركزنا على الصناعات الصغيرة وقلنا للشباب لازم تعملوه مشروعات صغيرة ... زي الأثاث والملابس وإحتياجات المكاتب وأدوات المدارس ...

خلي بالك صاحب المشروع الصغير لما يفتح مشروعه يريد حرفي وإلا سيتوقف المشروع الصغير وبالتالي لنجاح المشروعات الصغيرة .... حلقة اليوم

بس أنا واخد ..حتة حتة



§ مثل الخرامة ... فضلات صاج يعمل منها خرامة ..



ولذلك الحلقة الماضية كان الحل في المشروعات الصغيرة ... والمشروعات الصغيرة محتاجة فننين وحرفيين ...لأن أي مشروع آخر دائرة فيه هو الحرفي أو الصنايعي المنفذ بدقة يعني من الآخر الحرف هي العمود الفقري للنهضة في الصناعة



عرفتم إزاي الصناعة والعمل الحرفي بيكملوا بعض ؟؟؟

ومفيش صناعة منغير العمل الحرفي ..وبالتالي مفيش نهضة من غير عمل حرفي

هذه القناعة الأولى اللي لازم تتغير ..مفيش نهضة من غير العمل الحرفي



ورد أن عمر بن الخطاب دخل السوق في خلافته فلم ير فيه في الغالب إلا النبط ، فأغتم لذلك ، فلما اجتمع الناس أخبرهم بذلك وعدد لهم في ترك السوق ، فقالوا : إن الله أغنانا عن السوق بما فتح به عغلينا ، فقال رضى الله عنه : والله لإن فعلتم ليحتاج رجالكم إلي رجالهم ، ونساؤكم إلي نسائهم"



ولقد "صدقت فراسة عمر في هذه الأمة ، فانها لما تركت التجارة بطرقها المشروعة المرغوبة وأساليبها الناجحة ، تلقفها غيرهم ، فأصبحت الأمة عالة على غيرها ، رجالنا على رجالهم ، ونساؤنا على نسائهم من كل شئ من الإبرة والمخيط إلي أرفع شيء وأثمنه" والذي قال ذات يوم "تعلموا المهنة فإنه يوشك أن يحتاج أحدكم إلي مهنته "

وده معنى الرباط في سبيل الله وسد الثغور فروض الكفاية



الشيخ محمد الغزالي له كلام عظيم في الموضوع ده وأن عايزكم تقروا كتبه لأن كله بتتكلم على النهضة بالذات كتاب () بيقول ...إن الحرف والمهن في العالم الإسلامي الآن ليست كفيلة باستقلاله عن غيره من الدول، ومما يؤكد ذلك "أنه لو قيل لكل شىء في البلاد الإسلامية: (عد من حيث أتيت) لخشيت أن يمشي الناس حفاة عراة لا يجدون من صنع أيديهم ما يكسبون ولا ما يركبون، بل لخشيت أن يجوعوا، لأن بلادهم لا تستطيع الاكتفاء الذاتي من الحبوب، وعلى هذا فإن

الله لا يقبل تديناً يشينه هذا الشلل الغربي ويجعل من الإسلام وأهله طفولة تحتاج من غيرها لأن يطعمهم ويقيهم ويمدهم بالسلاح إذا أراد" ...



القناعة الثانية : اللي لازم تتغير ..إحترام العمل الحرفي

أولا : خلينا نسأل ...

أين العمل الحرفي في بلادنا .... إختفى



طيب لما احنا لسه بناكل من خير الحرفيين القدامى عن طريق السياحه اللى جايه تشوف شغلهم واحنا محتاجين الحرفيين فى اكلنا و لبسنا و سكننا و سياراتنا لأ ده حتى فى دفاعنا وأمننا القومى, ليه النزعه الغريبه اللى فى بلادنا للتعالى على العمل الحرفى وعدم اعطاء الحرفيين مكانتهم الحقيقيه اللى يستاهلوها فى المجتمع, لدرجه ان الحرفى نفسه بيقول لأ انا عايز ابنى يدخل الجامعه (طبعا مش مهم يتعلم ايه ولا هيشتغل ايه ) المهم يدخل الجامعه.



كل سنه فى عيد الام بنفرح بتكريم الام المثاليه . هى الام اللى كافحت وعلمت اولادها لغايه ما وصلتهم الجامعه بغض النظر إشتغلوا بعد كده ولا جلسوا في البيت.

[صانعة في الحياة]

ليه كل واحده تقول لأبنها انت لازم تخش الجامعه علشان لما تيجى تتجوز وتتقدم لواحده بنت ناس تقول لهم انا معايا شهاده جامعيه ( طيب أهوه دخل الجامعه وطلع عاطل و ما اشتغلش ولا عرف يتقدم لبنت الناس وبنت الناس هتعنس).



كل ده للاسف لان مجتمعاتنا لا تقدر العمل الحرفى وتتعالى عليه.



هى دى علاقتنا بالحرفيين بالضبط, محتاجينهم فى كل حاجه فى حياتنا ومنعرفش نعيش لحظه من غيرهم , وفى نفس الوقت نتعالى على العمل الحرفى.



طيب ايه اللى خلق الصوره السلبيه فى اذهاننا عن العمل الحرفى.



1- اولا سياسه الاستعمار فى التعليم ويقال ان كان فيه وزير تعليم فى مصر أيام الاحتلال الانجليزى اسمه دنلوب .. قال ان التعليم مهمته يخرج الموظفين اللى محتاجاهم الحكومه ، الاستعمر الأوربي لأبلادنا في الوقت ده ماكانش عايز يطلع حرفيين وصناع بالعكس ما كناش عايزيهم يكونوا موجودين ليه .. ؟؟

لأن أصلا سبب الاستعمار كان أن يسوق منتجاته اللي بيصنعها شبابهم في أوربا.. لكن محتاج إداريين يبقوا موظفين فكان التعليم اللي حطه دنلوب لخدمة احتياجاتهم ..



وبالتالى ارتبط فى أذهان الناس التعليم بالوظيفة والقعده على المكتب ويبقى اسمه فلان افندى , فى حين ان العائلات قبل كده كانت بتستمد اسماءها من حرف اصحابها , النجار والحداد والخباز والسقاف ( اللى كان بيعمل الاسقف) وهكذا .



طب دولوقتي مشي الأستعمار ومشي دنلوب وفضل التعليم زي ماهو ما اتغيرش من يومها إلي النهاردة ..يخدم أهداف الاستعمار اللي اتحطت من مئة سنة



أدي ذلك إلي ...



1- فشل نظم التعليم بعد كده فى خلق تعليم فنى موازى له قيمه.. عندنا فى مصر مدرسه فنيه وحيده هى اللى بتخرج حرفيين جيدين جدا , المدرسه دى تابعه لجمعيه خيريه ايطاليه اسسها الايطاليين اللى كانوا عايشين فى مصر زمان اسمها ( دوم بوسكو)



أدي ذلك إلي ...



2- إهتمام شديد بتعليم الجامعيين وإهمال شديد بتعليم الحرفيين وتثقيفهم والإرتقاء بيهم مما نتج عنه انخفاض شديد في المستوى التعليمي والثقافي والتهذيبي للحرفيين في حين أن الغرب اهتم بتعليم وتثقيف وتهذيب الجامعيين والحرفيين زي بعض بالضبط وصرف علي الاثنين باهتمام شديد فطلع الجامعي والحرفي متقاربيين في المستوى الثقافي والأخلاقي

في الغرب تقابل أي واحد ... يقولك أن ابني يدرس في المدرسة الفنية الفلانية أو المعهد الصناعي الفلاني ...في برامج الtopshow تليفزيون الإنجليزي ..تجد الدكتور والمهندس وجنبهم النقاش والميكانيكي ..وتحس أن البرنامج شايل نفسه لان التعليم عندهم اهتم بالحرف واهنا هنتكلم بالتفصيل في حلقة التعليم ازاي نرتقي بالتعليم الفني والحرفي وتثقفيهم وتهذبيهم كمان ..



أدي كل ذلك إلي....



3- إظهار الحرفيين فى الاعلام , الحرفى فى الاعلام انسان جاهل مبهدل صوته عالىبيشتم ويتخانق مع مراته وهى غالباً زيه فى سلوكياتها, صوره تؤدي إلي عدم إحترام المجتمع للعمل الحرفي والنفور منه والتعالي عليه ، وكان الأولى بالإعلام وكان الأولى بالتعليم بدل ما يترأ علي الحرفيين ويعالج الموضوع بشكل سطحي أن يحط برامج تربوية للإرتقاء بالمستوى الثقافي والتهذيبي للحرفيين بدلا من إتخاذهم مادة للسخرية لسلوكيات مش هما السبب فيها