[حامد نوار]

البخـل طبـع مستحيـل عـلاجـة
والجود طب لكل الأمـراض وعـلاج
جيت الرفيق اللي بشـوش حجاجـه
اللي بحـزات الرخـاء مثـل هـداج
قال العلـوم وقلـت طـلاب حاجـة
حاجة يسر ماهي تكاليـف واحـراج
ان كلفـت يكفـي العـذر والمواجـه
وان كان جت من يسر صاحبك محتاج
واومى براسه مثـل راس الدجاجـة
وهز المتون وراح وجهه كما الصاج
واقفيت من عنـده مطفـي سراجـه
ولي حاجة ماعطيتهـا كـل هـراج
عرض العلوم لغيـر اهلهـا سماجـه
والصاحب الطيب له الـدرب ينعـاج
وكم ضيقة ياتـي بعدهـا انفراجـه
ياليت كـل اصحابنـا مثـل سهـاج
الصاحـب اللـي مايعكـر مـزاجـه
ولا حطلـه كثـر المعاذيـر منهـاج
ولا الردي صيـده يضيـع بعجاجـه
ماتسبقه في سرعة الـروغ ميـراج

[حامد نوار]

يا صمت لا تفرض علـى هاجسـي صمـت
عط هاجسـي فرصـة ليـا صـرت جـازم
و عن خوض هرج النقص يا صمت قد صمت
والصمـت حكمـة لأغلـب الهـرج هـازم
مـن سـم عمـرو وزيـد انـا ماتسممـت
ماهـم بـقـدوه لــي بـشـد المـحـازم
وليـا فقـدت المـاء لفـرضـي تيمـمـت
وعلـى دروب الـعـز مـاضـي وعــازم

[حامد نوار]

إستعدي يابيوت الشعـر موقفنـا خطيـر
قامت الغربـان تفـرد فالسمـاء جنحانهـا

ذا يطير وذا يحـط وذا يحـط وذا يطيـر
نوب في روس الجبال ونوب في وديانهـا

ما درت بإن الجبل راسي فالأول والأخيـر
ثابت وما همتـه لـو ناعقـت غربانهـا

والحمول اليا ثقلت ما يبرك لها الا البعيـر
والدروب الكايـده حنـا نعـرف حصانهـا

[حامد نوار]

من نم لك نم بك ولا فيه تشكيـك
وأيـلاه قـد أزرا رفيقـك وأزراك
عندك حكا فينا وعندي حكـا فيـك
وأصبحت كارهنا وحنـا كرهنـاك
ما أخطاك ما صابك ولو كان راميك
واللي يصيبك لو تتقيت ما أخطاك

[حامد نوار]

راحوا الرجال اللي على الحق متواصين

اخفاف النفوس وأهل الطوايـا السليمـه

[حامد نوار]

ما اصير ضد العذر هزله والسمين
من جاب له عذر اتحفوى واعذره
و ليل السهر دايم نديم العاشقيـن
و ثمر الحسد والشر للي يبـذره

[حامد نوار]

كـم قايـدٍ فالمعركـه يهـدم بـيـوت
مايبتـنـي بيـتـه وكــل ٍ يـهـده
وكم فارسٍ ماهـاب فالمعركـه مـوت
المـوت يرحـل بـه ثمانيـن شــده
وكم روس قوم ان جيتهم صاروا سكوت
ردوا سـلام وكـن فالنـاس صــده

[حامد نوار]

هيضتني بالمثل ياهلال وقـت الأخيـر
يـوم المـآذن بذكـر الله يعمرونـهـا
يا شين جرح الرفيق وشين جرح الغرير
اللي فعـول الجمايـل مـا يشوفونهـا
راعِ الوفاء بالعهود يصير مثل الأسيـر
ما يقـدر يخـون بعهـودٍ يخونونهـا
مهما حصل عنده الاسرار في قوع بيـر
ماهم بقدوه لـه اللـي مـا يحفظونهـا

[حامد نوار]

رغم الحذر والحرص من هرج الاشرار
واقفايتـي مـع مبعـدات الفجوجـي
لحقوني الاشـرار بهتـان و اصـرار
و اسرار مهنتهـم بزيـف الهروجـي
مرضى النفوس شكوكهم صارت كثـار
و إلهم مـع البهتـان روج ٍ وروجـي

[حامد نوار]

ماصاب عبدٌ ضر والآه/ مشكـاة
الا كتب له حسنةٌ مـن وراهـا
والغيب علمه عند رب السماوات
والنفس ما تملك سعدها وشقاها
والصبر مفتاح الفرج في الملمات
ودنياك ما احدٌ قد وصل منتهاها
والعبد يُكثر بالدعاء والمناجـاة
ورحمة إله الكون تكسي سماهـا