[so0ocar]

السلام عليكم ورحمه الله وبركاته


بعد السلام والتحية اخواني واخواتي اعضاء منتديات الدكتور فهد العصيمي حفظة الله

وبصراحة شديدة وواضحة انا لسه متزوجة مالي الا شهرين

طبعا زوجي اكبر مني بسنة وحدة فقط كثير اغبط نفسي لان افكاره مثل افكاري

شخص حبوب وطموح

وقبل كل شي انا اعرف ان الكمال لله وحده وان ما في احد بهالدنيا كامل وانا ما اطالب بهالشي

لكن زوجي عجزت افهمه احيانا ابكي لان افتقد للكثير من الاشياء ابي زوج اقل شي يحسسني بالامان

بالراحة بانوا والله انا موجود

صراحة زوجي من بداية الزواج اغلب كلماته جارحة وقذرة واذا انتقدته قال والله هالكلام ما اقولة

الا عندك او امزح معاك وانا مزحي ثقيل

غير كذا شكاك يعني تصدقون من ثاني ليلة وهو يفتش بجوالي وبالاسماء تخيلووا

لا و حتى برامج الجوال يحسب انا اللي مدخلتهن وتحقيق حتى مع صديقاتي

واذا طفشت منه ومن تصرفاته وقلت له انو صديقاتي بنات ناس وراهن اهل واخوان يغير الموضوع

ويقولي والله ادري ويبتسم

لدرجة اني ما اقدر اميز صدقة من كذبة ومزحة من جدة

تعبت والله تعبت وانا مالي شهرين متزوجة غير كذا كثير قايم باهلة فوق الازم والمشكلة

ان كل اخوانة وخواته متزوجين الا واحد ولد عشان ما اكون كذابه عندكم

يعني تخيلو وقت الظهر اتصال ومن مين اخته وايش تبغى امي تقول وينكم ؟!

او امه اللي اخذتها معاي تعتمر وفاتحة لها قلبي والله العظيم اني ابغى راحتها وحنا نبغى نحرم نزلنا نغتسل

حذفت علي درزن كلمات وجلست تضحك هي ولدها

وبعد ما انتهينا من العمرة جلسنا بمطعم بعد ما اعتمرنا بنتغدىشافت بسة تتمشى قالت لي ارضعي البسه

عاد انا انكمشت من كلمتها وسكت بس ولدها رد عليها واخذ يعاتبها

لا والشاطر الحين انا بشهر العسل راح يزور خواته عاد تخيلو الاستقبال لمن انتي تتعاملي

كصفر ع الشمال فعاد قلت لامة استري ما واجهتي جلست اخته تضحك

الحمدلله على نعمه العقل بس

عاد هو اعتذر لي عن اللي صار واتاسف

بس مو قادرة ودي اصارخ بوجهه وامسح وجهه بالبلاط قسم بالله اني متحمله غصب

وخايفة انفجر فيه واخلية يكره اليوم اللي عرفني فيه

يعني فوق ما اني متحملته هو اتحمل اهلة ليش اهلي يعاملونه كولد لهم وامي تعامله

بلطف واحسان واخواني يقدرونه وما عمرهم قالوا له كلمة شينه حتى خواتي محترماته

طيب انا ليش اتحمل الاذية من ناس هيك

وليت ولدهم شهادته عالية اقل مني شهادة وما عيرته بشي بالعكس محترمته جدا

ومراعيته ومراعية ظروفة يعني تخيلووا انا ايام عشاي وغداي وفطوري جبن وخبز اسمر وشاهي

الحمدلله على كل حال والله العظيم ما قلت شي ولا اتذمرت

وهو يحسب وش راح وش باقي لا ويقولي دوبك على الموجود واذا راح يم شغلة

بلع لحد ما يشبع ولا يسال فيني

واخر مرة يقولي والله خساير وديون عشان ...... ( قال كلام يقصدني فية )

المشكلة انا مو من الناس اللي تزعل او تبكي او حتى ياضح ان صار فيها شي

انا شخصية يعني لمن اسمع كلامه وتصرفات او مثل تصرفات اهلة ياليتني ازعل والله ياليت

لا اجلس افكر شلون راح اتاقلم مع هالعقليات يعني بجد انا بنت زي اي بنت

بس مع انسان عقليته مسكينه وحالته ضعيفة على شنو اصبر وعشان شنو اصبر

واهلة مثله للاسف كلهم يتصلون وقت الراتب عشان الفلوس

او امه اللي تبي تنط من بيت فلانة لبيت علانة وتعال جبني ووديني

او وينك وش مسوي وهو ما شاء الله يفتح الصنبور قدام امه وانا يقولي ياويلك

ان دروا اهلك عن اي شي حتى باع خاتمي عشان يسدد فاتورة قالي لا تقولين لهم

واخر مكالمه مع امه والمشكلة متصل عليها من جوالي فتح السبيكر قاعدة تحذف كلام وهو يضحك معاها

يعني والله ما اقول الا شين وقوي عين

عاد انا ضاق خلقي وقلت والله لا اتصل باهلي وكل كلامك اقولة قدامهم والله العظيم

وقال لا هذة امي امي قلت ميخالف

واخذ الجوال وادق على اهلي واقعد اتكلم انا وامي واختي واحذف رموز واتكلم عشان ما يفهمني

ابي بس اقهرة ابية يحس على الاقل يوم سكرت الجوال قعد يسالني طبعا عن بعض الامور

ولا جاوبته قلت شي خاص سكت وحاول يغير الموضوع ويغير الجو

بصراحة انا قاعدة اعاملة بحترام والله العظيم صابرة علية بس ما اشوفة يحمد ربه على هالشي

ما عمري تذمرت عنده على العيشة اللي انا عايشته والله ايام انام وانا جوعانه او مقهورة من تصرف يسويه

ما عمري شكيت لامي او اخواني عنه

وفوق كل هذا طول الشهرين جالسين بالشقة ما طلعني الا مرة وحدة وبسيارة يدور ما نزلنا

لانه يسب منتزهاتهم ومهي عاجبته المدينه اللي يشتغل فيها بس انه شغلة مريح فيها

لانه يشتغل يومين والباقي جالس على قلبي وما عندنا شي نسوية الا نصحى ناكل نتفرج ع التلفيزون

او يكلم امه من جوالي يرفع ضغطي معاها لان جواله ما فية شحن

وما يطلع الا عشان خوية يبغاه ضروري او الاستراحة بس والحقيقة تنقال ما يتاخر علي

اللي ابغاة

ومدامني في بداية طريقي هل ممكن القى طريقة اقدر اتاقلم فيها معاه ؟

ليش على كثر ما اقدم له واتنازل له عن اشياء ما اشوفة مقدر هالشي ؟ او مالي عينه ؟

شرايكم اعاملة العين بالعين وارفع ضغطة مثل ما تسوي هالحريم واطلب منه اشياء ما يقدر عليها ؟

يعني وش اسوي انا بعمري بصراحة خايفة اتحسف على هالزواج

واشوفة مستعجل بالحمل وانا اقولة لية مستعجل اصلا ظروفنا مرتبكة هالايام يقول ما احنا صغار ؟!

فهموني تكفون وين الخلل ؟

وانا على صح ؟ او لا؟