[غيوم ممطره]

السلام عليكم ورحمة الله وبركاته

وآهني :- من تاب لله من ذنوبه / وأناب ..زهد بـ ( دنياً ) .. مساوي كثرها / قلّها

البارحه : ليلة ٍ
كن بـ سماها ( ضباب) ,
يامل عين ٍ جفاها النوم .. يا ملّها !
سوادها اسود سواده ..
من جناح الغراب!
من عقدة ٍ يتعب الحّلال .. ما حلّها
دنياي في عيني:
آرخص من جناح الذباب
ماعاد ابي ( ياسمينتها ولا فلّها ) ,

حاسبت نفسي وضاقت بي وساع الرحاب
............ كثرت خطاياي مدري كيف ابـا اقلّهـا !

جاهرت ب.. ذنوبي اللي كنهّن الهضـاب
............ وقصّرت في واجبات ٍ كنـت فاطـن لهـا

تبعت درب الخطاء وآخطيت درب الصواب
............ اتبع هوى نفسي اللي غـيّ ارضـاً لهـا

يالله .. وانت المجيب اللي مادونك حجاب
............ تقدر تعـز النفـوس .. وتقـدر تذلّهـا

يامحيي الارض بأمرك من حقوق السحاب
............ اعوذ بك .. من ذنـوب ٍ عاتقـي ملّهـا

واعوذ من دعوة ٍ تدعـى ولا تستجـاب
............ ومن كلمة ٍ مادريـت ابهـا وانـا ازلّهـا

انا :
بـ [ وجهك وجاهك ] ,
من
شديد العذاب !
( عبدك ) ونفسي الى آخطت رحمتك من لها ؟
ما أخذت للآخره قبل رحيلي :-
زهاب
انا .. وناس ٍ معي ماني بـ [ محصي ٍ لها ] !

كم واحد ٍ يطرد آمال ٍ سوات السـراب
............ شي ٍ يبي ياصلـه وأشيـاءً ماياصلّهـا

يجمع حطام ٍ .. مصيره للفنا والذهـاب
............ ومن الطمع عنـده ان الارض يحتلّهـا

اغرته بنت الهوى والقلب الاقشر شباب
............ وانساق معها وهي ما احد ٍ خليلٍ لهـا

ماحث رجله على درب الاجر والثـواب
............ اسحرته المغريات وصار .. عبـد ٍلهـا

في غفلته كم رقد واصبح وودّا وجـاب
............ اظله ابليس .. مع نـاس ٍ قـد اظلهـا

يشعب ركابه مع اللي يشعبون الركـاب
............ نسى ان الايام شجـره زايـل ٍ ظلهـا

لابد من ساعـة ٍ مابعدهـا الا المـآب
............ الله ما يهمل عبـاده .. اليـا امهلّهـا

وآهني :-
من تاب لله من ذنوبه / وأناب
زهد بـ (دنياً ) .. مساوي كثرها / قلّها ,
مشى على :
[ سنة محمد ونهج الكتاب ] !
تبع دروب ٍ .. ( قليل الدين ) ما دلّها,
مع :
مسبلين اللحا
ومقصرين الثياب,
ناس ٍ .. على طاعة الله /ياحلو دلّها ,

منشى البنادم تراب .. ومرجعه ل..التراب
............ والروح أمانه على من هو وديـع ٍ لهـا

اليوم صفحه .. وعمر المودماني كتـاب
............ مـدوّن ٍ فيـه .. دق اعمالـه وجلـهـا

ماضايع ٍ منه حاجه .. في نهار الحسـاب
............ كل ٍ يبي يشوف مافي صفحتـه / كلهـا

كلمات/ مشعان البرَّاق