[وفااا]

اختار سمحات الدروب النظيفه=اللي غسلها رايح المزن برشاش
يمشونها قوم النفوس الشريفه=اللي ضمايرهم نقية كما الشاش
ابيوتهم مثل الحصون المنيفه=ما هي لطير البوم غيران واعشاش
واحلالهم للضيف دايم مريفه=لو رجلهم يسرح ويضوي على ماش
والرجل منهم ما يخلي رديفه=إن مات مثله مات وان عاش له عاش
وان مات منهم رجل عقب خليفه=يطهن نحور القوم ويرد الادباش
يعرف هدف روحه ويعرف وليفه=ما يعرف الخونة ولا هو بغشاش
وليا رزقه الله بعذراء عفيفه=ايحطها ما بين نونه والارماش
ماهو على الخفرات يستل سيفه=وان طالعوا فيه الرياجيل ينحاش
حلو النبا سمح المحيا لضيفه=ويصير له خادم مسخر وفراش
وان مد ما مدت يمينه قصيفه=مدت يمينه تبهر الخبل واللاش
واليا هرج تلقى علومه طريفه=ما هو لهفوات المناعير منقاش
وان شبت النيران ما هو بليفه=في ساعة الكربة سواي ورشاش
سده بعيد ولا أحد يعرف غريفه=ولا هو لعرض المكرم العرض نهاش
والشوك في جنبه سوات القطيفه=إن كان ما له بيت مامون وافراش
ما يرتكي فوق الخبول الضعيفه=اللي ليا حركتها قدرها طاش
وان جا نهار كل قرم يعيفه=ما هو ليا ثارت على القوم رماش
الكذب يعرف بين الأجواد زيفه=والصدق مثل السيف صاطي وحشاش
وصحيفتة يا طيبها من صحيفه=ولها من العقال كاتب ونقاش
حاز المراجل والمراجل كليفه=الا على اللي كل ما رامها هاش
وان شاف له من جانب القوم خيفه=تلقاه للخيفة مهاجم وبطاش
الصدق والمعروف والطيب كيفه=ويغبش لها مع طلعة الفجر مغباش
للحمل ما تلقى جنوبه صخيفه=حوله بروق تعمي العين وافلاش
يصبر على جرحه ويمسح نزيفه=طبه بشبه خير من طب الاحباش
ولا هو كما سبع سنونه ضعيفه=دايم يلحسها وللعظام عراش
وان شاف له في غيبة الناس شيفه=ما هو بخبل لاخضر العود قراش
دنياه لن صارت ذلول عسيفه=طوع لها كل عاصي ونفاش
وان كان قفت ما عليها حسيفه=ولا هو ورا هوج المعاصير قشاش
وان جاع ما وقع كما طير جيفه=وان عري ما يلبس سماليل وأخياش