[عبدالرحمن الحربي]

آسف أنا في جيتي لك تسرعت
ظنيت ألاقي فيك شيٍ فقدته

كنت أحسبك مجروح مثلي تولعت
جربت فرقى شخص قلبك وهبته

كنت أحسبك من مر جرحك تجرعت
حبيت فيك احساس طفلٍ لمحته

لوقلت آآآه بوسط روحي توجعت
ولو شفت دمعاتك شعوري سكبته

ولو تطلب عيوني أبد ما تمنعت
وأعطيك قلبي لو بعد ماطلبته

وصلت بك أعلى مكان وتربعت
وفي قلب غيري ياالغضي ماوصلته

وأصبر على صدك وأشوفك تدلعت
وأعطيك ود وما أظنك حسبته

أذهلتني بطباعك اللي تطبـّعت
حتى قصيدي فيك أبد ما فهمته

لو كان غاياتك حروفي فأنا بعت
وأفرح بجرح المشاعر اللي جرحته

وأرجوك من صدك تراني تشبـّعت
خلك مع اللي عاجبك أو عجبته

يكفي قهر في جيتي لك تواضعت
تركت غيرك لأجل عينك وبعته

ياليتني عن حب مثلك ترفـّعت
ياليت قلبي قبل أعرفك دفنته

لكن ببعد دامني بك توهقت
الـلـه يرحـم حبـنا اللي ذبحـته

أنا شريت الود والحين أنا بعت
وأنا عطيتك قلبي اللي قهرته

في يوم جيتك أطلبك ود وأقنعت
نفسي بإنك شخص عادي عرفته

كمّــل حياتك مثل ما أنا توقـّعت
تبقى أسير الماضي اللي فرضته

ولا يحزنك إني إنسان وتراجعت
حولك بدالي ألف شخصٍ عجبته

أما أنا لا يمكن أخضع ولا طعت
يحرم علي أعطيك قلبٍ خذلته

بريّحك من شوفتي يوم قاطعت
إسلوبك اللي به تجامل كرهته

غلطان يا المقفي أنا ما تتبـّعت
غيري يتابع خطوتي ما تبعته

ما ينحني راسي لو إني تقطعت
وما هو بنا من لارميته لقطته

وإن كان غرك حكي عذالي وطعت
الله يعلم كيـــف قلبي سكنتـــه

اللي ملا قلبك علي وتسمـّعت
خله يعوّض شخص مثلي خسرته

أنا بما فيه الكفــايه تولـّــعت
واللي بقى من قلب فيني حرقته

وإن شفتني صدفه بعينك تطلـّعت
ذكـّرتني بإنسان غــالي فقدتــه

بأول لقا سلمته إحساسي وضعت
غلطة حياتي يوم قلبي سلبته

وأستسمحك فالبعد كاني تراجعت
ما عاد بلقى فيك شي ٍ فقدتــه

طبعك مثل غيرك وطبعي كما كنت
أحب شخص ٍ ولا تركته تركـــــته


أعجبتني وأتمنى تعجبكم