[خلووووود الخالد]

بســــــــــــــــــم الله الرحمن الرحــــــــــــــــــيـــــــــــــــم

الســــــــــــــلام عليكم ورحمة الله وبركاته
سنخصص في هذا القسم بمشيئة الله موضوع خاص بالدواوين الشعرية وأتمنى أن نصل ان
شاء الله الى قسم خاص متكامل قائم بذاته خاص فقط بالدواوين الشعرية لكبار الشعراء
ورموزهم
وسنبدأ على بركة الله بالشاعر الكبير والهرم الشعري الكبير (( أمـــير الشعر احمد الناصر الشايع))
وهذا بناءا على طلب الشيخ فهد العصيمي حفظه الله أنه عندما سمع أني سأعمل ديوان لكبار الشعراء
أرسل لي هذين البيتين

عندي طلب يا خلووود مثلك يسويه =ابدي بامير الشعر جزل المعاني
أحمد ولد ناصر عسـى الله يخليـه =راعي الوفا والمعرفة والسماني

وهذا ردي عليه حفظه الله :

أبشر وامير الشعر لازم نبديه =ونبدا بإسمه مايجي شخص ثاني
شاعر كبير ولازم انّا نوفيه = ونعطيه حقه بين قاصـي ودانـي.

وهذه نبذة مختصره عنه



اسم الشاعر : احمد بن محمد بن ناصر الشايع ال موسى ال زمام المساعره الدوسري



العمر : 90 عاما ,ولقد بدأ الناصر رحلته مع الشعر في وقت مبكر منذ الصغر وتميز عن أقرانه الشعراء بدماثة الخلق ورحابة الصدر كما تميز أيضاً بصوته الشجي وموالاته الجميلة وأشعاره الهادفة وألحانه العذبة، ونظراً لكونه يمتلك موهبة شعر المحاورة فقد جرت له الكثير من المحاورات الشعرية الرائعة مع كبار الشعراء الأفذاذ الذين عاصرهم الناصر وقد لقب بأمير شعراء الرد لكونه يتمتع بسرعة البديهة والذكاء الحاد، والأخلاق الطيبة، والاتزان داخل الميادين الشعرية والمحافل.. فقد أحبه الناس وارتبط بعلاقات طيبة مع مختلف شرائح المجتمع خاصة الشعراء، وبالرغم من أنه خطف الأضواء وكسب شهرة واسعة وقاعدة عريضة من جماهير الشعر الشعبية ومحبيه على مستوى الجزيرة وبعض البلدان العربية، إلا أنه يُعد شاعراً متواضعاً إلى أبعد الحدود وأكثر مما يتصوره البعض، وقد زاده هذا التواضع شهرة كبيرة وواسعة بين الجمهور والنقاد وأصبح الكل يطرب به
عاش طوال عمره في محافظة الزلفي بدا كتابة الشعر منذ الصغر في المحافظه
و اول قصيده قاله عن محافظه ومسقط راسه الزلفي وهو دائما مايذكرها في ابياته
وهو يعد من اقوى الشعراء على ساحه الشعر الشعبي والمحاورة ( المراد )
كما شارك ابو محمد في العديد من الأمسيات في بيروت و الدوحه والمنامه و دول الخليج العربي وبعض الدول العربيه ومناطق المملكه .
وسنورد هنا مجموعة من روائعه وقصائده المميزة




وسنبدأ بقصيدته او مرثيته في ابنه محمد رحمه الله
هذه القصيدة قالها الشاعر الكبير أحمد الناصر الشايع في رثاء ابنه محمد رحمه الله الذي توفي قبل شهر أو أكثر بحادث مروري فقال هذه القصيدة الباكية

يا بعد نوم الليل عن حجـر عينـي =صبر على ما صار من وال الأقدار
صبرت صبر بـاح منـه الكنينـي =أضحك مع العالم وكني علـى نـار
ما غير أهوجس بين نفسي وبينـي =يعلم بها العلام فـي كـل الأسـرار
تقل اتحـرى لـي علـوم تجينـي =مع الطروش اللي يجيبون الأخبـار
فهمـت رأس العلـم مـن كلمتينـي =من يوم قالوا جـا محمـد ونصـار
تكسّـرت عقبـه جرايـد يميـنـي =عز الله اني عقب ما صار صبّـار
مـن عقبهـا ونيـت لـي ونتينـي =ونة غريب بالخلا ضـاع واحتـار
لـولا الله أبـرك ثـم قـوة يقينـي =لا طير مثل الطير من كف صقـار
تخنقنـي العبـره وأفـرّك يدينـي =واحترت مثل مصالي النار والغـار
علـم يخلـي كـل قاسـي يلينـي =كنه على قلبي رصـاص أم كـرار
الـى ذكـرت عيالـه المصغرينـي =هــذا يعزيـهـم وهــذاك زوار
احد على جنبه واحـد لـه ونينـي =جتني هموم القلب من كل الأقطـار
قلت اصبروا والله مـع الصابرينـي =الله يكافيكـم صواديـف الأشـرار
عسى عوضنـا الحـي بالميتينـي =ناصر ونايف ذخرا سـر واجهـار
وأحمد وعبـدالله ذرانـا الحصينـي =صغار سن وان بدا الـلازم كبـار
يجبر عزاي اللي بخلقـه ضمينـي =محيي العروق الميته عقب الأمطـار
مالي عن المكتوب فـوق الجبينـي =لو رحت شرق وغرب ويمين ويسار
صليت نصف الليل لـي ركعتينـي =أطلب لـه اللـي للخطيـات غفَّـار
خفف ذنوبه يـا أرحـم الراحمينـي =في ماقفٍ ما ينفعـن فيـه الأعـذار
جعله برضوانـك مـن الفايزينـي =بالماقف اللي به يضيعـن الافكـار
في ماقفٍ بـه كـل خافـي يبينـي =تمت وصلى الله على سيد الأبـرار

وهذه قصيدة أخرى له :

أذن المـذن ونـادى طـول صوتـه بالمنـاره=وقمت طولـي للسفينـة ثـم فليـت الشراعـي
لو يزيد الموج مانـي فالبحـر سـواق طـاره=عارفٍ مجرى السفينـة فـي نـزولٍ ورتفاعـي
كـل رجـال ٍ هواجيسـه علـى قـد اقـتـداره=والحظيظ اللي مع العربـان عاقـل واجتماعـي
العرب لـو بشرونـي كـان سلمـت البشـاره=في بيوت مخترعهـا طيـب العـرف اختراعـي
بين الأثنيـن المفاهـم فـي محلـه والمشـاره=لو يجون اخوان صلب أو هم خوان من الرضاعي
حجة الغايب معه ومـن اعتـذر قبـل اعتـذاره=مايضيقن النفوس ولا الـدروب اللـي وساعـي
وانـت عنـدك لاتعلـم بالثمانـيـن الـحـراره=والهروج الضايعة مثل الهمل من غيـر راعـي
صابر بالحـق دام الحـق مـن جـار ٍ لجـاره=لو نجيبه دين ياصالـح مـن البنـك الزراعـي
والسعادة حـظ والا العـرف والمعنـى شطـاره=لو رضاك بعيد اسافر له على النقـل الجماعـي
وسع الخاطـر ولابـه كسـر يحتـاج الجبـاره=دايم العاقل وسيع ابطـان ماهـوب انـد فاعـي
اعتذرت من الرفيق وزبـدة الهـرج اختصـاره=إن عذرني كثر خيره وإن ومر بأمـره مطاعـي
قصة جت من رفيقك غصب من غيـر اختيـاره=سألفـه ومخالفـه ماودنـا الهـيـن يـذاعـي

البارحه واليـوم عينـي طواريهـا كثيـره= عيني طواريها كثيره وش اسـوي بعينـي
ماجا خبر وعلوم وطروش من ديره لديـره= وطروش من ديره لديره يسلـون االحزينـي
من ينصر المظلوم كوده الى سمع السريره=كوده الى سمع السريره حكم بينـه وبينـي
هجر وسهر وهموم ضاقت على كل الجزيره=ضاقت علي كل الجزيره وانا ضلعي متينـي
لاهل الغرام سلوم ومصيبه الفرقى كبيـره=ومصيبه الفرقى كبيره عساهـا ماتجينـي
عيني تعاف النـوم بالليـل يالله الستيـره=بالليل يالله الستيـره يبـا الخافـي يبينـي
نادو عقيد القوم ياقـوم ملـزوم استشيـره=ياقوم ملزوم استشيره لـو انـه مايبينـي
يازارع اليشموم ليتك تبيع بحسـن سيـره=ليتك تبيع بحسن سيره علـي او تشترينـي
ان بعت باول سوم سموك ابو خير وخيـره=سموك ابو خير وخيره وابو قلـب فطينـي
رضيت بالمقسوم سافر عساها لك سفيـره=سافر عساها لك سفيره وانا وش في يديني
انا له المحكوم ماهمنـي مخلـوق غيـره=ماهمني مخلوق غيـره بحبـه مشترينـي
لو قيل لي منجوم راضي وخلوها قصيـره=راضي وخلوها قصيـره ولا بّيـح كنينـي

نـهار ثالث عــقب عيــد رمضــــاني =ناس عطاها الله وناس محرومه
أحداٌ قضى عيده ســــلام وتهانــــي =وأحداٌ توصله الكواكـب همومــه
صادفت صدفه من صدوف الزماني=منها قوي الحيل تفتــر عـــزومه
هذا زمـــان الهـــــم والإمتحانـــــي =وقت على قلبي تعاقــب سهــومه
الاولــه كـــامل جميـــــع المعـــاني =مزبن المضيون شرع الخصومه
محمــد اللـــي فالقســـى والليــــاني =عقبه سمـايه غــــايبات نــــجومه
والثانيــه باقـــرب قريــب ودانـــي =خامــس عيالي يوم جتني علــومه
قـالوا مابين الخـــاصره وحلبــاني =ولدك مـات اللـي تـرجـى قـدومـه
جـاء يومه المـوعود باربـع ثواني =قـلت السـبب قـالوا دنا منه يـومه
عــلم عـلى الكبد الصخيفه كواني =كـية عطـب ما تنشكـى للحكومـه
تهشمت كـــل الضلوع المــحاني =مـفجوع والمـفجوع ماحداٌ يـلومه
أخذت لي ساعـه وأنـا في مكـاني =حسبت لي عشرين طيحة وقومه
ألـيا بغـيت الهـرج ييبـس لسانـي =والذاكره عـندي تـقول معـدومه
قــمت أتلــفـت وتسـمـع بـاذانـي =مـن شـاف حـالي ماتهنـا بـنومـه
مما بقـلبي رحـت باللـيـل عـاني =للـموتر اللي مابقى ألا رسـومــه
عـن روحـتي ياليت ربي نهـاني =ولا شفت دمه ساٌيـح في هـدومه
قـمت ودفنتـه والـله المـستعـاني =في خـرقة بيضا عـليه مـحـزومه
يـم الـقويـعيـه بـلاد قـحـطـانــي =والـحر غـير لون وجهي سمومه
وأقفيت من عنده وعشري ثماني =مـثل المـصبـح والبـلاد محكومـه
والله لـولا نـي وســيع البطانـي =لا صكها مثل أشقر الريش حومه
طاوعت نفسي مير عقلي قواني =عـن الخطا ما فيه نفس معصومة

وهذه صوتيه للقصيدة

ليت العمر ينباع والله لشريه = وأروح للطيّب وأزوّد سنينه
وإلا الردي لعل تقصر لياليه = ما من وجوده فايده خابرينه
أفزع مع الطيّب عسى الله يخليه = اللي لفعل الطيب تبذل يمينه
خل الردي لعل تكثر بلاويه = ثقيل دم وفوق ذا ثقل طينه
ياللي عبيده تطلبه ثم ترجيه = أعطف على عبدك وقوّه بدينه
وإلا الردي ما همني وش يجي فيه = لو غاب ما همب العرب فاقدينه
لا واحسافه كيف يصبح مساويه = النذل والطيّب سوى بالسفينه
مواقف الطيّب تعزه وتغليه = وإلا الردي لعل ربي يهينه
أشكي على اللي شامخات هقاويه = أبو محمد جعل ربه يعينه
مواقفه هالحين وإلا بماضيه = ترفع له البيضاء على أعلى جبينه
اللي يلبي كل صوت يناديه = رجل المواقف كلنا عارفينه
إليا لفى كل الجماعة تحييه = أحد يحب الخشم وأحد يدينه
من حشمته كل يحبه ويغليه = أبو محمد جعل يبطي ونينه
أقول كلمة حق والله ما أرجيه = أرجي كريم كلنا عابرينه