[القلب الكبير]

هلا والله قمر ..

لا يكون انتي اللي عصبت عليج المديرة مب انا ؟

حبيبتي مشكووورة وايد... لا اتعصبين ولا شي غناتي ... وبعدين شكلج عصبية الله يعين اذا كنتي تشتغلين :)

شوفي الغالية ... عندي مبدأ جمييييييييييل علمني اياه ربي سبحانه وتعالى

" ادفع بالتي هي احسن فاذا الذي بينك وبينه عداوة كأنه ولي حميم "

هذا المبدأ جربته وايد ... وكان له تأثير سحري حتى على المديرة وغير المديرة في حياتي بشكل عام ... ترا كلنا نقدر انعلي صوتنا ونتلفظ بألفاظ انخلي اللي جدامنا يهابونا لكن اختي الهيبة اللي اتيي بالخوف تزرع الكره .. خليها اتيي بالحب احسن وهذااللي اتعلمناه من سيرة النبي صلى الله عليه وسلم ..

وصدقيني الغالية هذا مب ضعف كثر ما هي مداراة ... دارهم ما دمت في دارهم :)

يعني لو عصبت وعليت صوتي ورديت وناقشت واحتديت في الرمسة ... طيب وبعدين ! ؟ شو النتيجة اللي وصلت لها ؟ غير ان الكره انزرع بيني وبين اختي ... وفوق هذا كله ممكن ما ارتاح في شغلي ابدا

لكن انا الحمدلله احب مدرستي احب الستف اللي وياي احبهم كلهم واحترمهم كلهم ويكفي بعد انج اتشوفين الابتسامات العريضة كل ما طليتي عليهم وفرحتهم بلقاج ... تظنين لو كنت عصبية واخذ حقي بايدي ولساني بلقى البشر في وجوههم؟

" المؤمن الذي يخالط الناس ويصبر على اذاهم خير من المؤمن الذي لا يخالط الناس ولا يصبر على اذاهم "

وبعدين هال40 دقيقة اللي تميت اسمعها فيهم اتكلمت هي عن كل شي ضايقها سواء مني او من غيري او من الضغوط حسيت هي تبا حد يسمعها وانا سمعتها

تدرين طلعت من عندها وهي تدعي لي انا اعرف ان قلبها ابيض عشان جي ما زعلت منها وايد او اني ما بقيت على ظيجتي منها

وصدق علي بن ابي طالب رضي الله عنه : " ان الله وزع بينكم اخلاقكم كما وزع بينكم ارزاقكم "

اللهم اقسم لنا من الاخلاق وافر الحظ والنصيب حتى نكون اقرب الناس الى الرسول صلى الله عليه وسلم مجلسا يوم القيامة

دمتي لي اخت يا قمر ... وربي يبارك فيج