[القلب الكبير]

السلام عليكم ورحمة الله وبركاته

من فترة سرت مركز تجاري عندنا في بوظبي ...

لكن لما بديت امشي داخل هالمركز شكيت اني في بوظبي !!!

وخطر في بالي اني في دولة أوروبية ... مسيحية ... اتجهز حق الاحتفالات برأس السنة الميلادية !

ديكورات ... ومصاريف باهظة اندفعت عسب يظهرون الاحتفالات هذي !

وهالمظاهر كلها اتشوفها وين ما سرت ! ياني قهر فظيع في قلبي !

ومن عقبها سرت مركز تجاري ثاني نفس الشي ! في وسط المركز حاطين شجرة كبيرة تضرب السقف من طولها

وحوالينها غزلان وابوهم نويل !! وين ما دشيت في المحلات اتلاقي التجهيز لرأس السنة الميلادية !

منتشر في كل مكان وين ما لفيت ودقيت براسك انلاقي نويل وربعه !

يوم طلعت من المركز عرفت اني في حبيبتي بوظبي وللأسف الشديد والحزن الأشد اني اشوف هالشي في بلادنا :(

وصلني مسج من كمن يوم بعد من نادي سيدات ابوظبي بأنهم بيقيمون حفل شواء على انغام الموسيقى بمناسبة رأس السنة ! رديت عليهم بمسج انصحهم انه ما يجوز ! لكن شو بتقول يوم ان اصلا ادارتهم ادارة الهيلتون النصرانية والستف كله بريطاني ... يعني يو بلادنا ويابوا معاهم اعيادهم !

والله اني مقهورة وايد ما ادري شو اسوي ...

المصيبة اللي اكبر عن جي ان اتلاقي من المسلمين من يحتفل معاهم ... لا ويهنئ باعيادهم فتلاقي من المسلمين من يهنئهم بميلاد المسيح بألفاظهم !! او يروح يحتفل وياهم ... ظنا منه المسكين انه يجامل ... او انه يبين الجانب المشرق من الاسلام ! وما يدرون انهم باعوا دينهم وانهم باؤوا بغضب الله عزوجل لانهم شاركوا في منكر وهنوا عباد الصليب بعبادتهم له وتمجيد عيسى عليه السلام وهو منهم برااااااء

السموحة منكم على الاطالة

اللهم اهدي ضالنا .. واغفر لمسيئنا .. وثبت مهتدينا :(