[الدكتور فهد بن سعود العصيمي]

الحمد لله والصلاة والسلام على أشرف الأنبياء والمرسلين سيدنا محمد وعلى آله وصحبه أجمعين، وبعد:

هذه قصيدة قلتها في رثاء والدي رحمه الله وأسكنه فسيح جناته، وغسله بالماء والثلج والبرد، وقد توفي في يوم الأربعاء الموافق 21/6/1429هـ وفي الساعة الواحدة والنصف ظهرا، بعد معاناته مع المرض، و قد ُنوم في مستشفى الملك فهد للحرس الوطني عدة مرات، ولمدد متفاوتة، وتوفي بعد ذلك بأسبوع، والحمد لله رب العالمين.

***

1* راح الربوع وراح من يجمع الناس = راح الفقيد اللي ما نلقى بديله
2* راح الذي للخير يا ناس عساس = راحت معه كل المعاني الجميلة
3* هو للكرم يا ناس والله مقياس = يمناه بالخيرات دايم جزيلة
4* يحسن على الأغراب من كل الأجناس = يشفي كبود عقب ما هي عليلة
5* سمعته بين الناس أثمن من الماس = دايم يوصينا بفعل الفضيلة
6* دايم بفعل الخير باذر وغراس = نفسه تحب الخير ما هي بخيلة
7* هاتف ورد ما هوب حبر بقرطاس = ثالث ربوع جماد مافيه حيلة
8* قالوا توفى أبوك وقّف بالأنفاس = يالله تجاوز عنه يسّر سبيله
9* الكل بعده ضايع الفكر محتاس = فالبيت والشارع وكل القبيلة
10* حتى طريق الخرج يضرب بالاخماس= ماظن أحد بعدك يبوي يعني له
11* كم مرة كنا مع ابوي جلاس = سولافته تسبيحةٍ وتهليلة
12* ياللي تقوم الليل مبعينك نعاس = تناجي لمولاك في كل ليلة
13* ماهو كما المحروم يبشر بالافلاس = اللي لهى بدنياه يلقى الفشيلة
14* أذنت بالمحراب بالوقت وقياس = صوتك يهزم ابليس جيشه وخيله
15*كل ما تألم قيل لا بآس لا بآس = منا وكل عيالنا مع جميلة
16* جميلة اللي ما مشت درب الأنجاس = تمشي على دروب الشرف والفضيلة
17* جعل الذي صابك من أوجاع وارجاس = يدخلك جنات باهلها ظليلة
18* حطيته بقبره برفقٍ وإحساس = سندته لجنبه قريب لخليله
19* في ها الدقايق صار بالرآس هوجاس = وشلون أباحط التراب و أهيله
20* أحثي وأنا أعوذ من كل خناس = بعدين حطينا عليه النثيلة
21* حقك يا بو محمد على العين والراس = وتشوف منا برٍّ يسيل سيله
22* يا بوي ياللي كنت للناس نبراس = السالفة يا بوي معكم طويلة
23* وان كنت في معناي ما نيب غطاس = عذري ترا الموضوع صعبٍ أشيله

***
تعليقات:

1* كان رحمه الله يحب أن نجتمع عنده كل يوم أربعاء، فمجلسه يجمع إخوته وأولادهم دوريا، وكان يحسن للجيران، وبخاصة إن سمع عن أرملة أو أجانب، ولا يرتاح حتى تصل صدقاته لهم، مادية أو عينية.
2*جميلة هي زوجته يرحمه الله .
3* تشرفت بإدخاله قبره، والله يجعله روضة من رياض الجنة، وهو قريب من قبر والدتي غفر الله لها.

4* طريق الخرج كان ولا يزال هو مكشاته المفضل.
***