[سيدة الذوق]

يالغايب اللي غابت سنيني معاك
يا جعل ما جاني من الفرقا يجيك
استغفر الله جعل ما جاني فداك
حتى لو ان نهايتي على يديك
مسامحك واللي بقوله في قفاك
خيرك كثير و يرحم الله والديك
ما صار شي ابلا رضاي والا رضاك
اللي مهو فيني وأبيه ألقاه فيك
كنت السما في عيني وعيني سماك
كانت حياتي كلها منك و إليك
كنت بيديني مير مدري من خذاك
حسبي على تقصيري و حسبي عليك
علمتني وش الحياة من الهلاك
في موادعك هذا و في جيتك ذيك
يا كيف ابلقى شخص يسواني سواك
كل ما نويت انهيك في شخص ابتديك

ابدى أقارن مستواه بمستواك
وأخاف لا تزعل وأبيعه و أشتريك
والمشكله رغم محبتك و غلاك
واني رغم كل شي مشتاق و ابيك
ما هوب من حقي يضايقني جفاك
ولا أعشقك ولا ألمحك ولا أحتريك
لكن ما يخفاني ولا أظن يخفاك
حقي عليك انك تطمني عليك


للشـــاعر :محمد جار الله السهلي.