[عــفاف]

السلام عليكم ورحمة الله وبركاته
بسم الله الرحمن الرحيم

حبيت ندردش ونسولف عن مواقف صارت لنا فحياتنا ماتنسى سواء مضحكه او مرعبه
وانا شخصيا احب اسمع او اقراء عن المواقف الحقيقيه وخصوصا اذا كان صايره مع الشخص نفسه واتحمس معها واستمتع..
وانا راح ابداء بموقفين مستحيل انساهم الاول مضحك والثاني مرعب وكلهم ايام طفولتي..

الموقف الاول: كنت ادرس بثاني ابتدائي في الرياض بمدرس حكوميه وكان عندنا اختبار ماده مااذكر وشي لكن ماده عربيه وفرقت الاستاذه الطاولات وكل طاوله لحالها وانا طبعا بوجهي الجدار وزعت الاوراق وكان في اسأله كثيره ومن هالاسئله فيه سؤال دقرت عنده:
اكملي الفراغات التاليه:
1-ذهبت ..........الى المدرسه..
كان وقتها كأن الدنيا سكرت بوجهي يالله ياصعب السؤاال وقاعده اعصر مخي ياربي من الي ذهب للمدرسه
فجأه وقفت الاستاذه بمحلها وقالت ان هالسؤال اكتبي فيه أي اسم أي اسم..
وفرحت اذكر اسم هو الوحيد الي اعرف إملاءه ..وكتبت الاسم في الفراغ بكل ثقه وراحه..
جمعت الاستاذه الاوراق وقامت تصححها بنفس الوقت ويوم وصلت لورقتي تفاااااجاءة بالاجابه الي انا كتبتها في الفراغ..انصدمت ماكانت مصدقه..قالت باعلى صوتها وهي تضحك(عفاف!!!! ذهبت ..الدجاجه الى المدرسه؟!!!!) وضحك الفصل وانا من الفشله قمت اضحك معهم^^ ..ولا كانها انا الي ينضحك عليها ..برائة الطفوله..^^

الموقف الثاني:كنت صغيره وعمري 6 سنوات ونص وكان اليوم عيد وبالليل وكان ابوي عازم ارجال وامي مشغوله بالمطبخ..
طلعنا انا واخوي بالشارع بجنب بيتنا وكان في انوار قليله بالحاره يمكن بس ثلاثه اعمدة اناره لونها ابيض وكانو جيران الحاره مو في بيوتهم الي مسافر والي رايح عزيمه والي مدري وين رايح المهم بالحاره كل البيوت فاضيه ماغير بيتنا طلعنا انا واخوي الي اكبر مني بسنتين نلعب اهو معه الكوره يلعب فيها وانا على كبوت السياره الي موقفه عند تقريبا باب جيراننا الي بجنب بيتنا على اليمين ووحاطه انعولي اكرمكم الله بجنبي حتى اذكر لونها اسود وقاعده اتفرج ع اخوي وهو يلعب بالكوره وقرب مني بمسافه قال توشفين البيت هذا(قصده البيت جيراننا الي بجنب بيتنا ع اليمين )واشر عليه وقال تراهم مو فيه حتى شوفي انوارهم طافيه وكان البيت ع يساري وناظرته من فوووق لتحت وناظرت الباب وكان نصه تقريبا عليه نور ونصه مظلم وكاني حسيت باحساس غريب مو مطمن ابد ورجعت والتفت ع اخوي اناظره يلعب لكن هالاحساس خلاني التفت مره ثانيه ع الباب وياليتني مالتفت..
لقيت شخص واقف عنده كانه ظل اسوووود وعرفت انه متين كان عليه فنيله وسروال طويل ابيض الداخليه العاديه الي يلبسونها العيال وكانت الفنيله منفوخه يعني متين وكان ع راسه قبوعه كبييره الي مصنوع من سعف النخل لونه حليبي المهم انه اول ماشفت هالشخص صحت باعلى صوتي وع طول طبيت من السياره ورحت اركض للباب بيتنا والتفت وراي بشوفه هو يلحقني ولا لا.. وعلى طول طلع ابوي (اهو كان بالاساس طالع بيدخلنا او بيشوفنا فعلى طول لقيته قدامي وقت بحاجته)ويوم شفت ابوي حسيت بفرحه مابعدها فرحه واضمه وقمت ابكي.. ويسألني وش فيك والتفت اناظر للباب جيراننا الي شفت فيه الشخص وناظرت للسياره لقيت عليها نعولي قلت وانا ابكي واشر ع عليها:ابي نعولي ..قال ابوي لخوي جب نعولها وتعال ..وكان اخوي منصدم مايدري وش فيني وخاف لان فجأه نقزت اركض واصيح واناظر لباب جيراننا وهو يناظر لكن مايشوف الي اشوفه .. وحس بخوف وراح وجاب انعولي وجاء..^^




ان شاء الله تكون استمتعتو بمواقفي واعجبتكم ..^^مع اني صرت اخاف من الظلمه وماحبها حتى اني احلم فيها دايم اخلي نور غرفي مفتوح ماطفيها الا اذا بغينا نروح لمكان..^^ الله لايوريكم..^^
والي يبي يعلق يقول الي يبي ..اتقبله بصدر رحب..
استنى مواقفكم وردودكم وتعليقاتكم بكل شووووق...^^
.
.
.