[الفجـــر]

قبل ما أتزوج: كان عندنا
عزيمة رجال عشاء ، و احنا من طبعنا لما تكون عندنا عزيمة أمي و خواتي نجيب الجهده ، الى ان يطلع العشاء على سنقت عشرة ، و كانت أختي توها صغيرة و تحب الحركات على العشاء ، و لما خلصنا قلنا لابوي
علشان يقلط الرجال ، الا الاخت تنشب ما تبغى تطلع ، و نحاول فيها يابنت الحلال ، و ما طلعت الا يوم قلنا لها في المطبخ روحي خليهم يحطون لك ، و لما طلعت على طول قفلنا الباب ، و دخل ابوي الرجال ،، أختي
الحلوة راحت للمطبخ ولما مالقت نفس حركات العشاء جاءت تركض بسرعة بس لما شافتنا صاكين الباب قعدت تصيح فهاوشتها أمي ، فسكتت شوي ، عاد احنا جالسات في الصالة نسولف ، الا أختي تصيح باأعلى
صوتها و هي تطل من تحت باب المقلط ، بيخلصونه بيخلصونه الحيوانين ،، و تطق على الباب ، عاد أحنا دورونا كل وحدة طيران لغرفتها خايفات يجي أبوي أو أخوي ، بس أشوى أمي على طول سحبتها معنا
للغرفة و انا ماسكة نفسي لا أطب في بطنها ، بس أشوي الرجال من صجتهم ما سمعوها ، و أخوي لما سمع الطق على الباب جاء يقول هاه تبون شيء .... قلنا لا سلامتك و احنا ميتين من الضحك



=======================

هاذي وحده تقرب لي تزوجت وهي صغيره وجابت عيال المهم بنتها تدرس ثاني ابتدائي
وراحت الام مجلس الامهات ورجعت
وكانت قاعده تجهز الغدا الا فجاءه دخلت عليها بنتها توها جاايه من المدرسه قالت
له يماما البنااات يقولون امك صغيره تقول واطمر في حلقهاا اقول اصصصص بعدين كملي لين جلسنا على الغداا تبي رجلهاا يسمع هالكلام
تقول يوم جلسو يتغدون سالت بنتها قالت وش تقولين من شوي في المطبخ والام مبسوطه تبي رجلها يسمع
قالت البنت صديقااتي يقولون امك صغيره مرررره بس شينه وتخووووف ضروسهاا مره كنها ساحره
خخخخخخخخخخخخخخخخخخخخخخخخ


=======================

مرة كنا مجتمعات انا و خواتي في بيت أهلي ، و جاءت بنت عمي تتهوى عندنا ، و احنا جالسات في مجلس النساء نتقهوى و نسولف ، كانت بنت عمي معها بنتها صغيرة توها تجلس ، و العيال يلعبون ولدي و عيال خواتي
، و احيانا يدخلون علينا اذا يبغون شيء ، ولدي يحب الصغار ، دخل يبغى مني حاجة و بعدين وهو بيطلع انتبه للبنات ، فأبتسم و راح لها ،، انا كنت أظن انه بيحبها و بيروح ، بس لما شفته ساكت و بس يطالعها و يبتسم
أوجست خيفة قلت في نفسي أكيد بيسوي شيء حتى أمي خافت ،، أمها البريئة قالت: عاجبتك تعال حبها بزوجك أياها ، ولدي على طول قال: وااع ، بنتك كنها قرد ... وووووااااااه أنا كانه منكب علي
موية باردة حتى مرت أخوي تقول أنا طالعت وجهك على طول تلقب و رحمتك ، و أهاوشه و أطلعه من المجلس و أرجع اعتذر لأمها و انا شوي أصيح من الفشيلة ،، وهي تخفف علي و تقول ما عليه بزارين ...

=====================================
طيب وحده من صاحبات اختي تقول كنا مرره جالسين انا وامي واخواتي وزوجات اخواني ...المهم تقول كنا هذيك اللحظه ساكتين ..وفي وسط الهدوء هذا جت بنتي(ماادري كم عمرها)
بس اكيد صغيره مره..تقول:جت عندي وقالت بصوت عااالي وفي قمه البرود:ماما تتذكرين بابا يوم عطاك كف!!! تقول انا خجلت مررره والمصيبه انه ماقد عطاني هالكف اللي تقول عنه..



========================

في عصرية جتنا جارتنا مع بنتها الدلوعة ..صغيرة عمرها 5سنوات
المهم.. كنت انا واختي الكبيرة جالسين معاها ونسولف ونضحك والبنية تتسمع السوالف(عوبة)
لين جا طاري العطور واحدث شي بالاسواق .. وعاد جارتنا طلعت من شنطتها عطر جديد شاريته
تمدحه وتقول شموه ورشوا عاااادي ..... اختي الكبيرة عادي خذت وطشت شوي
وانا قلتها ....اخاف اخلصه عليك(امزح معاها) عاد هي قالت لا خذي راحتك عندي منه اثنين بالبيت
عاد هني قالت بنتها بصوت عالي يصم الآذان: كذااااااابة ماعندها الا واحد بسس
ههههههههههههههههههههه انا االصراحة ماقدرت اكتم ضحكتي ووحرام هي تفشلت مرة من بنتها
ومشيناها انا اختي وقلنا ياحليلهم الصغار يفشلووووووون

====================================


قبل مااتزوج حصلت .. ( كنا مره من المرات قاعدين مع جدي مع بنات عماتي وعمومي ..
طبعاً جدي كبير بالسن وتعب وطاح علينا (اغمى عليه) احنا ماعرفنا وش نسوي وقعدنا نصيح وماكان فيه رجاجيل بالبيت ماعدا ولد عمتي واتصل للأسعاف ..
وعاد بنت عمتي صغيره واخوها الي اصغر منها .. البنت اول ماشافت جدي غايب عن الوعي والاسعاف اتشيله جلست تصفق
وتغني جدي مات جدي مات وتتنطط وفرحانه .. واخوها الخبل يصرخ على امه يقولها ابي فلوس سيارة الاسكريم واقفه << يفكر سيارة الاسعاف سيارة اسكريم !


واحنا بهالموقف رغم ان كنا نصيح متنا من الضحك .. والحمد لله جدي بهذاك الوقت ماصار له شي ..
بس الحين الله يرحمه



=================================

عندي ولدي الكبير الحين قبل يوم صغير هبل الكل والجميع
مره كان عند أمي ضيوف على العشا والناس مستانسه وتتعشى ولا الأخ
ما خذ نعول الحريم ومغطسها بالمغسله والصابون فوقهم يقول يبي يغسلهم
والناس مساكين يضحكون من الفشله ودهم يذبحونه لكن مجاملة مو قادرين



========================================


جارتي اسمها عزه وبنتي يوم كانت اصغر وتونا كنا متعرفين عليهم تقولي ماما وين خاله عنزه
والله فشيله يلست اعلمها عزه مب عنزه لين حفظت الاسم خفتها اتقول جدامها عنزه ويطيح ويهي هذيج الحزه


========================================


عمره 5 سنوات الله يحفظه

وابوه متعود يقول له هو واخته ياعيال الذيب( يعني يمدح روحه ابو الشباب)

المهم مره كنا بالسياره رايحين بيت اختي

وصلنا وحنا ننزل من السياره ولدي يقلد ابوه

يقول لأخته يالله انزلو ياعيال الذيب

يالله ياعيال القطو يالله يالله


يالله ياعيال الكــــــــــلب


على نياته مسكين

انا متت من الضحك على وجه ابوهم طاح وجهه

خخخخخخخخخخخخخخخخخخخخخخخخخخخخخخ

===============================



زوجي يوم كان صغير وكانت خالتي (ام زوجي) في النفاس جتهم حرمه كبييرة تزورهم وكانت متغطيه وهي تسلم عليهم
طبعا زوجي يلاحقها يبغا يشوف وجهها اذا فتشت (اللقافه من يومه صغيير)المهم الحرمه قعدت وهي لسى متغطيه قام زوجي انسدح قدامها على بطنه وحط وجهه على يدينه (حشى تلفزيون)يستناها تفتش
وم افتشت الحرمه قال وعععععععععععععععععع لا بعد بالصوت والصورة.. تقول خالتي انا.. انواااع الفشاايل. ويوم طلعت الحرمه قام وراها (بيكملها) وسك الباب بقووووووة وقال يلللللللى



======================================== ========


المهم هاذي حكايه يقولها ابو البزره هو مره رجه واظاهر بنته طالعه عليه
واحد من مواقفها يقول مره خالاتها متجمعين في بيتنا يقول يوم دخلت وتركض لامها وتقول
(ياويلتس جا ابوي موب قايل لتس لا تدخلين اخواتس للبيت قومي ظفي نعالهم ولا شوفيلتس صرفه )
صار وجه امها كذا وابوها يقول والله اني ماقلت شي مادري من وين جابت الكلام البنت صغيره عمرها 4 او5 سنوات



===================================
اذكر موقف محرج وهو ان ولدي يوم كان ابو خمس سنين كانت اختي توها متزوجة وزوجها كان عند أهلي بالمجلس
وهو الله يذكره بالخير قصير مرة بالنسبة لاختي وكان ولدي مستغرب وكان يطالعة بطريقة محرجة لين تجرأ وسأله انت ليه ما كبرت؟؟
اخواني وابوي يالله مسكوا روحهم بس هو تدارك الموقف وقال
لأني يوم كنت كبرك ما أشرب حليب00


منقولة