[الهديل]

السلام عليكم ورحمة الله وبركاته

اخواتى اخوتى فى الله
هذه خاطرة بالعامية المصرية قريبة الى الزجل أو الشعر الغنائى... هو أنا بصراحة مش عارفة هى ايه بالضبط .. كل ما أعرفه أنها تعبر عن مشاعر داخلى .. وبصراحة أنا مكسوفة و أنا أضعها هنا بس حسيت أنها مطوية فى طيات الورق من زمان وما حد كثير شافها.. باحرج أوريها لحد.. بس مادام هذه الأمنية فى علم الغيب هل ستتحقق أم لا..... ففكرت فى عرض الكلمات عليكم واقروها بسرعة قبل ما ارجع فى كلامى واحذفها ويارب تعجبكوا ان شاء الله....ويارب تفهموا كلكوا لهجتنا العامية...

... باتمناك


باتمناك مش كلمة وبس
باتمناك مشاعر تتحس
باتمنى أضم فى حضنى الدافى ..
ابنى وبنتى

باتمناك تكونى مدينتى
وبيوتك هى أحضانى
يدَّارى جُوَّاها أحبابى
تحميهم من غازى وعادى
وحبى يملى ويملى دروبك
وتتلاقى طرقك فى فؤادى
وشجراتك دى رمز حنانى
ترمى بفروعها ضلاية
وما تلاقى لضلتها نهاية
ولسكانك إنتى وبس..
أدِّى من عمرى ما يبقالى
وليهم يرخص كل الغالى
وأضحى والراحة حالى
وطعم التضحية يحلالى
وباتمناك تكونى مدينتى

/
\
/

باتمناك تكونى سفينتى
ومافى يوم يتكسر مجدافى
ومهما ولادى قسيوا علىَّ
وبقسوتهم جرحوا فىَّ
وإن كسروا همَّ مجدافى
هافضل نبع الحب الصافى
وبإيديا هاقودك يا سفينتى
وما فى يوم هاسمحلك تنكسرى
تنكسرى ازاى وأخسر أولادى
أولادى همَّ أكبادى
وطول عمرى عليهم بنادى
ده أنا حتى من قبل ما أشوفهم
باتمنى فى يوم ألمح طيفهم
وياما بكيت لربى أتمنى
بجمالك فى يوم أتهنَّى
باتمناك إنت يا أمومة
يا كلمة رقيقة وحنونة
باتمناك وبيكى مجنونة
يا شعلة مشاعر تتحس
باتمناك مش كلمة وبس
باتمنى بجمالك أحس


أختكم : الهديل

كتبتها فى 6،7- 2004