[الهديل]

a7

بما أنكم أصدقائى
فأحب أن أعرض عليكم جانبا من حياتى
كما يعلم بعضكم من خلال بياناتى
أنا طبيبة فى بداية حياتى
وهذه الخاطرة كتبتهاو انا فى فترة الإمتياز وهى سنة كاملة نمر خلالها على أقسام مختلفة ومنها قسم الاستقبال الذى نعمل فيه كممارس عام لمدة شهر وتكون النبطشية فيه 12 ساعة صباحية أو مسائية0 وكنا نطلق على مكان الإستقبال كشك الاستقبال(الممارس)00 وهذا الشهر كان عذاب لأننا فى بداية حياتنا واحتككنا بالناس من كافة الأشكال والأصناف0ومنهم المتمارضين لأسباب مختلفة منها لفت نظر من حولهم وجذب اهتمامهم وهناك من يأتون منتحرين بسم فئران أو غيره أو أطفال متناولين (يبلعون) خواتم أو لعب صغيرة أو من ياتون دوريا على المستشفى لأسباب مختلفة منها انهم فقراء يطلبون العلاج وكنا أحيانا كثيرة لا نجلس خلال النبطشية الا ربع أو ثلث الساعة فقط وأثناء نبطشيات الليل نظل مستيقظين لأن هناك مرضى تأتى طوال الليل أوننام ونحن جلوس على سرائر المرضى فى انتظارهم0 هذا اثناء الليل00ولقد أتى لناس من الهند كذا مرة اثناء عملنا00 وكنا نأكل ونشرب خلسة لأنه ليس لدينا وقت00 ولهذا كتبت هذه الخاطرة الساخرة بعنوان( يوم الهنا) وهى نعبر عن اجهادنا فقط ولكن هذا العمل عمل انسانى شريف ولكننا بشر ونتعب ونجهد000والله واحيانا احس ان هذا العمل واحشنى جدا ونفسى اروح اقف شوية هناك00بس مش كتير :)

يا كشك العذاب والضنا
شربت فيك المر أنا
فيك اليوم بيعدى سنة
ويوم فراقك يوم الهنا

شفنا فيك المتمارضين
وناس لسم فيران واخدين
واللى جايين منتحرين
وعيال لخواتم وفلوس بَالعِين (اى يبلعون اشياء)

كرهت فيك صوت الإسعاف
نفسى أنام00هاتولى لحاف
تعبانة00عطشانة00هايجيلى جفاف
وعلى قوايم المرضى هانضاف

أهلا بيكوا فى الإستقبال
بس بلاش الإستهبال
نعالج دوخة على اسهال
واللى مغشى عليه فى الحال

على قد مافيك ياكشك اتعلمت
كتير سهرت واتألمت
وعلى سريرك وأنا قاعدة نمت
ولغير ربى لأمرى ما سلّمت

طبيب لآلام مريض بيداوى
إن كان مصراوى أو هنداوى
أو لزيارة كشكنا غاوى
ومين لألامه هو يداوى

واللى يخفف طول الأيام
ويخلينى مرتاحة أنام
دعوة مريض مسكين غلبان
شفاه الله من الآلام

آه منك يا كشك الممارس
ياكشك العذاب والضنا
ده يوم فراقك هيكون هَنَا

هديل