[ربي أسألك العفو والعافية]

سولفوا تكفون لا عاد تسكتون ..
.. قبل لا أهوجس وياتيني بلاي

السكات يزود طعوني طعون ..

.. وتنكسر لا جا على راسي عصاي

سولفوا لو ما بغيتوا اتسولفون ..
.. قبل لا اقعد في الحزن رايح .. وجاي

واضحكوا لو بالعماله تضحكون ..
.. وجاملوني لو يضايقكم حكاي

لي وليفٍ راح جعله ما يهون ..
.. هو دواي وداي .. أو داي ودواي

راح لكن طيف زوله في العيون ..
.. مرةٍ قدامي ومرة وراي

وإن سكتوا جا وهو طيفه يمون ..
.. رحت أهوجس له وأبين له ولاي

مكسب عيوني من الفرقا مزووون ..
.. تمطر لطاريه .. والبرق ؟ أصدقاي

كل ما طروه لو هم يمزحون ..
.. احرموني من غداي ومن عشاي

أدري إنه ما تناسى الود كون ..
.. تسمع إذنه في قفاي اللسن عداي

وكانهم قالوا نسيته يكذبون ..
.. وإلا أنا فيه أمتلك نظرة وراي

كان حبه لي على خبري مصون ..
.. والله ان كني بقدري .. وبغلاي

ذي بقايا الحب وأطلال الجنون ..
.. والله أعلم في ضميره وش بقاي

غير طيعوني ولا عاد تسكتون ..
.. ولا والله إن أسمعكم بكاااي

،

،

،

بن فطيس المري

[سيدة الذوق]

،؛،.. الــبـارحـــة ..،؛،

البارحة ربي كتب لي ومريت ..
..دربٍ عليه بروق الأحباب لاحت


جيت المكان اللي جمعنا وخفيت ..
.. وقامت جروحي للجوارح وصاحت


ياليتني في لفة الدرب زليت ..
.. كان العيون من الدموع استباحت


التم غيم الدمع من يوم لفيت ..
.. وورقا القصيد لشوفة الغيم ناحت


وضحكت ماأبغي الناس تدري يبالفيت ..
.. لكنها غصبٍ على العين ساحت


حارت دموعي في عيوني وصديت ..
.. وأرمشت مابيها تبين .. وطاحت


وعقبه برق في العين براق .. واسقيت ..
.. خدي ووناتي بصدري تلاحت


وأنا أحسب إني في فراقه تشافيت ..
.. وان عبرتي من مدخل الزاد زاحت


اللي يحسب إني على البعد سجيت ..
.. والا ان عيوني للرقاد استباحت


ياليتني من قبل لا أحبه اقفيت ..
.. والا ان دروبي عن دروبه تناحت


أهون علي من البكا والتناهيت ..
.. وأشلا من سدودٍ على الناس باحت


عرفت كيف الحي يفرق عن الميت ..
.. وعرفت قيمة نعمتي يوم راحت


قولوله اني عقب بعده تدانيت ..
.. ورجلي عن دروب المعافين شاحت


البعد نار وطاعة العذل كبريت ..
.. يقصر على بعده .. ترى الكبد فاحت


المبدع محمد بن فطيس

[سيدة الذوق]

،؛،.. دكـــــتور العـــيون ..،؛،

(يامؤمن الريفي )انا جيتك زبون..
.. جيتك على مدح اكثر الناس وعنيت

جيت وتعالى الله عمّا يشركون..
.. لولاه (يامؤمن) لطبك ما اهتديت

راضي بحكم الله علي مهما يكون..
.. عالج عيوني لو بعد طبك عميت

ودي اخاشر فالبصر من يبصرون..
.. واشوف دربي لا سرحت ولا ضويت

والى قنصت اثبت مع اللي يثبتون..
.. واشوف طيري كل ما اوميت ودعيت

ياااكثر ما يضرب خويي (الطابلون)..
.. من كثر ما اكلّته مطباات وكليت

وودي اشوف اللي علي يعرضون..
.. وبعض الليالي ودي اسري دون ليت

وااشوف ناس ٍ فالقفا ما يرحمون..
.. اما وقفت لصاحبي والا مشيت

من دون نظاره ولا هم يحزنون..
.. يااا كثر ما كسّرت كشمات وشريت

لكنٌ يا دكتور جعلك ما تهون..
.. ابغيك كلمت راس دامك ما بديت

اسمع......ولا ابغي اللي وزانك يسمعون..
.. ربي كتب يكشف لك اسراري وجيت

صورة عديل الروح عندك فالعيون..
.. واخاف تقطعها بموسك ما وعيت

ولا عليك امر..اطوها تحت الجفون..
.. وعقبه لو تقطع عيوني ما شكيت

هي راس مالي والعرب ما يدركون..
.. اني على باب الممات و ما حكيت

ياقو قلبي يوم قفن الضعون..
.. اللي على ذاك الموادع ما بكيت

ويا صبر صبري والعواذل يحسبون..
.. اني دلهت من الهوى والا سليت

اسكت عساهم من سكاتي يسكتون..
.. وانا عن اللي في ضميري ما انتهيت

وادور الفرحه مع اللي يسهرون..
.. وان ذكروني خذت فنجال وسريت

اخذت من وقتك يا دكتور العيون..
.. عالج عيوني لو بعد طبك عميت

واستر علي واللي معك لا يفطنون..
.. انت الوحيد اللي بعد ربي دريت

بن فطيس المري

[Ŝђǿǿq Ťąbσύĸ]

عقبال ياماخذ فـؤادي ميـة عـام ..=ضيعتني منك وأنـا مـا إهتديتـك
لا ..ما نسيتك كيف بأنساك مـا دام .. =ذكرى الفراق تهزني لـو نسيتـك
حبك قدر وأنا على ديـن الأسـلام ..=مكتوب في وجه الجبين ورضيتـك
لك في الضمير الود والحشمه أتوام ..= ولي في ضميرك مثل ما أنا بغيتـك
ولك منزلٍ في نايف القلـب وخيـام ..=وذود الغـلا ترعـاه ولا شكيـتـك
يفطر عليك القلب وإن فارقك صـام .. = والله لوإنك شـوك سـدره كليتـك
القلب طيرٍ لادعـي للهـوى حـام ..=وألا إنت وكره من كثـر ماهويتـك
كن العيون من النظر عقبـك أيتـام .. =وكني ماريت الا إنت من يوم ريتك
وكنك معي وأنا فقدتك مـن أعـوام ..=مـع الخيـال ألقـاك كنـي لقيتـك
من صعب وصلك ما تهنيتك أحـلام .. =وإن جابتك فزيت شـوق ومحيتـك
يعني وصالك صعب وأهدافي أوهـام ..=يعنـي زرعتـك للقـدر ماجنيتـك
صبرك يقولون العرب كـل الأيـام ..=يوم عليـك ويـوم لاجـاك جيتـك
ويا قلب ياللي ورثك جـروح وآلام ..=بليتنـي ماهـو بانـا إللـي بليتـك
ولعتني من عادني في الهوى خـام ..=وأسرفت بي وأنا خطامـك عطيتـك
طعتك وزبدة طاعتـك هـم وهيـام ..=مالله كتب لي واستخرت وعصيتـك
لوللقلـوب أسـواق بايـع وسـوام ..= لاابدلـك وإن جيتنـي ماشريـتـك
والا إنت ياللي جيش عينيك مقـدام ..=لا اقنعت منـك والرجـا مارجيتـك
كني سجين بين..إفـراج ..وإعـدام ..= وكنك سجن وأنـا بنفسـي بنيتـك
تنبيك عن حالي محاصيـل الالهـام ..=وتخبرك نظراتـي نهـار التقيتـك
عقب الوصال اللي على عين من لام ..=قدهو يكفيني عن الوصـل صيتـك
وقدني الى مريت بالشـارع العـام ..=لديت من ما في الضميـر ودعيتـك
أدري إن صوتي ماقطع عشرة اقدام ..= وأدري بي اعود الى مـن نصيتـك
ياشينهـا يامحنـيٍ راس الأبـهـام ..=ماقدر على شوفك وأنا عنـد بيتـك
الأعمار ما تضمن وأنا أخاف الأحكام ..=ارثيك خـاف أودعـك مـا رثيتـك

[Ŝђǿǿq Ťąbσύĸ]

ياهيـه إلتفـت لـي وإسمـع دعـاي لـك يــا هـيـه=تــرى عـادتـك تـشـبـع مـــن الـبـعـد واتـواجــه
دعيـتـك بـصــوتٍ يـاصـلـك لـيــه مـــا تـوحـيـه=وأنا أسمع ضلوعك من صدى الصـوت لجاجـه
عـلـيـك الـفــؤاد إخـلاجــه مـصـمــخ راعــيــه=خــف الله فــي راعـيـه مـــا تـسـمـع إخـلاجــه
تــرى العـفـو قــد جــاك أولــه وإغـتـنـم تـالـيـه=وتـــرى الـحـلـم بـحــرٍ غـيــر لا تـامــن أمـواجــه
وتـــرى الـــود لـيــلٍ مـظـلـمٍ جيـتـلـك ســاريــه=سـراجــه وصـالــك والـجـفـا يـنـفـخ سـراجــه
وتـرى قصـرنـا الـلـي كــم سـنـة نجـمـع ونبنـيـه=هــوى الـعـذل طـيــح بـابــه الـعــود وسـيـاجـه
لـــي أيـــام مـــدري ويـــن دارك ولا أدري لـيــه=وأنـــا خـابــر إنـــي بـــاب شـفــك ومــزلاجــه
غــيــابٍ بــــلا ســبــة هــجــادٍ بـــــلا تـنـبـيــه=وجفا أغلـى العـرب نـارٍ علـى الكبـد وهاجـة
نضـج قلبـي مــن البـعـد وش حاجـتـك تكـويـه=جـفـاك الجـمـر والصـبـر فــي بـعــدك الـصـاجـه
وطـبــع حـبــك بقـلـبـي والأيـــام مــــا تـمـحـيـه=هـــذا هـجــرك يــحــاول يـمـوجــه ولا مــاجــه
يـمــوت الأمـــل لـكــن ظــنــون الــغــلا تـحـيـيـه=وعـــروق الـوفــا فـالــروح والـقـلـب وجـاجــة
خبرتوا حدٍ يبكي علـى واحـدٍ يبكيـه؟؟!!=وخبرتوا حدٍ مسجون ما يبغي إفراجه؟؟!!
أحــبــه ولا أبـغـضـتـه عــلــى شــــيٍ يـســويــه=ولا زالـــت رقــــاب الــرجــا فــيــه مـنـعـاجـة
عـسـى مـنـزلٍ ضـمـه حـقـوق الـوسـم تسـقـيـه=وتضحـك لـه الدنيـا وهــو يضـحـك حجـاجـه
فـقـد خـاطـري شــي مـــن الضـيـقـة مسـلـيـه=وغـدت روحـي مـن الـنـاس واللـيـل هجـاجـة
أروح لـمــكــانٍ خــابـــره .. خــابـــره يـأتــيــه=أســوق الـقـدم صـوبـه وهـــي مـالـهـا حـاجــة
مــكــانٍ نــزيـــه وأول مـواجــهــي لـــــه فــيـــه=وأنـــا خــابــرٍ مــــا رجــــل مـثـلــه بــدواجــة
لـعـل وعـسـى مـــا حـدنــي للـمـجـي يـدعـيـه=وأشـوفــه وأنـــا مـــا ودي أسـبــب إحـراجــه
يـحــب الـجـريـح آخـــر دروب الـلـقـى ويـجـيــه=وتـحــب الـقــدم جـيــة مــكــان أول مــواجــه

[وفااا]

: : شكــرا لـكن .. اخـواتي الغاليــات شوق تبــوك ممتنـــه جـدا .... لقــربــك ... أشكـرك أخيـه .... فقـد أعطيتـي المـوضوع بهاء ونكهـة خاصه بإختياراتـك الجميلــه ..... سعدت بقربـك كثيــرا ..... ( لاخـلا ولاعــدم ) : : ربـي أسألك العفـو والعـافيــه أرحـب بكـل نـزف تأتيـن بـه ... وأشعـر بـدفء قلبـك شكـرا لـك .. وشكـرا لتـواصلـك العــذب .. الرقيــق ... القريـب .... : : سيـد الذوق & الـروح النقيــه سعـدت كثيــرا بإنضمامكــن لاحـرمنـي الله صـدق اخــوتكــن .... شكـرا لــكن : : شـوق .. واصلــي .. وإن توارى خطي سأبقـى متــابعــه ... : : :

[Ŝђǿǿq Ťąbσύĸ]

وفــااا ... اللــه يسلمك يـالـغـلا

وكل الـشـكـر لـجـمـيـع مـن شـارك بــهــذا الـمـُـتـصـفـح الـرائــع ...

[Ŝђǿǿq Ťąbσύĸ]

بــســم اللــه الــرحـمــن الــرحــيم شـاعــرنـا لـهـذا الإسـبـوع شــاعــرآسر ... يـُـجـيـد تـوظـيـف المـفـردة في تـناغم حـسي مـوزون ... كــتب لـلجـنادريـــه فـبلـغ الـمـجــد الشعـري ... مـن الـشعـراء الـذين يغـلب عـلى شـعرهم فـخـامة الـكـلمة وقـوة الـمعـنى... تـجـد فـي قـصـائده الـحـُـزن العـمـيق والكـبرياء والـشـمـوخ في آن واحـــد... كـثير الحـديـث عـن الـجـرح في قـصائـدة... ويـنـدر أن تـجـد قـصـيـدة من قصـائـده لا يتحـدث فيها عن الجـرح ... ولـكـل جـرح معـنى ... فـكـل جـرح يخـتـلف عن الـذي قبله وعن الـذي يـليه عـنـده هـو من الشعراء الـذين أجـادوا إسـتخـدام فـن من فنون الشعر وهو التضاد الـمـنسـجـم مما يمـيز شعره عن غيره... مـدرسـة شـعـريـة مـسـتقـله ... تـفـرد بالـكـلـمـة والإسـلـوب والصـورة والمعـنى .. شــاعــرنـا لـهـذا الإسـبوع هـو الـشـاعـر : :: مــســاعــد الــرشــيــدي :: بـإنـتـظـار مـُـشـاركـاتــكـم ... دمــتـــم بــود

[ربي أسألك العفو والعافية]

حب جديد

حب جديد وقصيدة عشق مجنونـه
الله يحييـك ياحـب لفـى تــوه

حـب لكلـه وحـبٍ بـس لعيونـه
حبين باقصي خفوقي بس له هوه

ايه انصتي ياشجون الروح ممنونه
جاني رقيق المشاعر ناوي الخـوه

جاني حبيبي وعمري فرحة غصونه
ربيعها يوم سال السيل مـن نـوه

يوم انهمر لي حنانه باعذب لحونه
قلت الله الله صفا جوي على جـوه

والله لاحبه ولو حظي وقف دونـه
مافيه قوه تصـد الحـب بالقـوه

بس انتظر يازمن لين اعلن المونه
ومن بعدها اللي تسوي يازمن سوه


الشاعر ،،،، مساعد الرشيدي

[Ŝђǿǿq Ťąbσύĸ]

بين فرحة لقاك وهم فرقاك=لاتذكرت جرح ولا نسيتك
حي هالشوف ماتنمل دنياك=شف سواة العيون ليا لقيتك
عين تشربك شوف وعين تظماك=لاذبحني ظماك ولا رويتك
قمت أخيلك هنا ... وهناك .. وهناك=وين ترحل بي النظره نصيتك
إن تبسمت قلت الموعد شفاك=وإن تمنعت بإنفاسي دعيتك
وإن طلبت الغلا قلت الغلا جاك=وإن سكنت الخفوق البيت بيتك
وإن نثرت القصيد بدرب لاماك=ذاع صيت القصيد وذاع صيتك
يارجا العمر لو حفتك الأشواك=ليتك أول طريق القلب ليتك
ودع البرد كف ضم يمناك=صافح الود قلبي يوم جيتك
حي هالشوف رغم هموم فرقاك=لوتناسيت جرحي مانسيتك