[*جمال الروح*]

انا انسانه كأي انسان له احاسيس ومشاعر يتمنى من يبادله اياها
تزوجت برجل احببته كثيرا لدرجه انني اراه كل شئ في حياتي منذ ان دخلها
لاكن بعد سنه ولمن خلفت ننه جميله تغير كل شي ماعاد صار يحس فيني البيت فندق وكل ماقلتله شي كال تبون تموتون من الجوع؟قلتله الله الرزاق مع عملك ما احد يموت من الجوع لاكن مافي فايده وطبعا مرة سنتين على المشاكل
انقلب بعدها الحب الى كره وشك لاني شفت عليه اشياء كثيره تغضب الله قبل كل شي كيف انا المشكله فوق كل هذا انه دايم يكذب علي في كل شي ما عاد اقد اصدقه اواثق فيه واذا كشفته مبرراته مالها معنا
باجماعة الخيرتكفون اش اسوي
للامانه اهو فيه صفات حسنه تخلي الواحد يحتار في امره
والله اني مره تعبانه لدرجه اني سرت اعاني من صداع صارله معي سنه وسرت مررررررررررررره عصبيه حتى بنتي ماعاد اتحملها واحيان اضربها بعدين اراضيها وانا ابكي لانها مالها ذنب
ممكن اكون شريكه في الخطأ بس حرام اتحمله كله

[طار شوقي للفردوس]

اهلا أختي جمال الروح :

أختي تأكدي انك اكثر وحدة تعرف الحل لهذي المشكلة "لاني شفت عليه اشياء كثيره تغضب الله قبل كل شي" احنا ما نعرف ايش طبيعة المشاكل او ليش زوجك يتصرف كذا !!

بس انا اتوقع انه افضل طريقة المواجهة اجلسي معاه في يوم لحالكم ارسلي بنتك عند امك او امه ورتبي البيت وانت تزيني زي ايام زواجكم الأولى مادري انتي ادرى بالأشياء الي يحبها زوجك

وذكرية بأيام زمان وكيف كنتم وصارحية بس بهدوء ايس صار ليش تغيرنا وين مشاعر ايام زمان وخلية يتكلم لا تقاطيعه وتقولي هذا مو برر او انت تكذب لا اسمعي وفكري زييييييييين قبل

ماتردي وإن شاء الله خير وكمان انصحك بالرقية من كثر ماسمع قصص والله يمكن لا سمح الله يكون فيك عين او شي لانك تقولين فجاءة وصار عندك صداع مادري انتي لاتتوهمين بس

حطي هذا احد الأحتملات

الله يسعدك ويجعل زوجك قرة عين لك ويجعلك قرة عين لزوجك ويحفظ بنتك ويحفظكم وكل المسلمين من كل سوء يارب ...

وإن شاء الله المتزوجات الي في المنتدى يعطوك نصايح احسن ..
: )
والسلام عليكم ..

[الجودي123]

هلا بك اختي

اختي مثل ماقالت لك الاخت طار شوقي للفردوس كلامها حلو

وبعدين كل الرجال كذا بس يبي لهم مسايس يعني يبي لهم وجه بشوش كلمة حلوة أسلوب هادي

أنا أنصحك ماتحاولين تراقبينه او تكشفينه في شي ولو حصل حاولي مايدري عشان ماينفر منك

تصدقين أنا أعرف وحدة جميلة تزوجها واحد من حبه لها يقول لأصدقاءه أنا تزوجت ملكة أنا تزوجت حورية

ومامر عليهم فترة بسيطة إلا وهجرها وتزوج عليها ..

من شاف مصيبة غيره هانت عليه مصيبته

الله يسخر لك رجلك وجعلها يدور رضاك وجعلك ملاك في عيونه..

[*جمال الروح*]

مشكورين على الردود الي تشرح الصدر
بس والله تواجهنا كثير حاولنا نتصارح اكثر وقتها الله عليه تقولي احسن زوج في الدنيا قليله عليه يومين بس ويتغير كل شي


كلام الليل يمحاه النهار

بس زي ماقلتوا اللجوء الى الله افضل وسيله
لاكن والله كنت محتاجه اتكلم والقى احد يسمعني ويقلي كلام مريح يعطيني امل في الحياه
واسمع كلام طيب مثل كلامكم مشكورين على الدعوات الحلوه (((اللهم امين))))

[أم ميمونه]

السلام عليكم ورحمة الله وبركاته
الأخت جمال الروح أداوي الناس وأنا عليل أنصحك وأنا مثلك الحمد لله أختي حاولي تفهمينه ممكن أحد مضيق عليه في الشغل أو أحد زعله بكلمه ويكون هو من النوع الي مايشكي توددي اليه ولا تهمليه انت كلميه لا تنتظري ان يكلمك اسأليه ملي عليه حياته اتمنى من الله أن يفرجها عليكي وعلي .