[غيوم ممطره]

السلام عليكم ورحمة الله وبركاته


هذي وصايف والبشر معدن وجنس


دنيا بها تغيير واليوم غير أمس
وأنا حسب رايي باقول الحقيقه

هذي وصايف والبشر معدن وجنس
وكلٍ على ماقيل يتبع فريقه

رجلٍ كريمً والكرم لابسه لبس
صدره وسيع ولا يجي فيه ضيقه

ورجلٍ حكيم الراي مابرايه اللبس
اليا ولعت رايه يطفي الحريقه

ورجلٍ شجاع اليا احتمى الماقف الضبس
وقت الغضب كلٍّ يجنب طريقه

ورجلٍ لصعبات الشدايد وقف ضرس
يَطحن ولا يِطحن وحمله يطيقه

رجلٍ تقل ذئبٍ ونوبً تقل نمس
يحذر عدوه ثم يحذر صديقه

ورجلٍ خبيث وقلب اسود وهو نجس
يفرح اليا من شاف عثرة رفيقه

ورجلٍ مثل ماقلت موقت على اللمس
لو تلمسه يثور بأيّة دقيقه

ورجلٍ مثل عود الجرايد اليا يبس
قاسي ولا تنفع به أيّة طريقه

ورجلٍ مع التيار ومطفي الكبس
يومي به التيار مثل العليقه

رجلٍ تقل لمعة مرايه على الشمس
وقت الرخاء مغير يلمع بريقه

في حاجتك مابل حلقك اليا يبس
سراب والعطشان مابل ريقه

واستغفر الله خالق الجن والأنس
عن زلة السانً وذنبً ماطيقه.

~~~~~~~~~~~~~~~~~~~~~~
للشاعر/ عبيد القلادي.