[دحمي]

بسم الله الرحمن الرحيم

السلام عليكم ورحمة الله وبركاته


سواليف خذ وخل

كل ما بين فتره وفتره نبي نشوف سالفه من واحد من المشتركين او من الاعضاء

وانا بكون اول واحد يبداء وعشان الان وقت العطله الصيفيه


وكما هو معروف ان اكثر المناسبات تكون في العطله

سالفتنا عن الاعراس وما يدور في بيت الزوجيه


المهم سالفتنا اليوم الي اتمنى انها تعجبكم

سالفتنا اليوم عن واحد عريس جديد توه في شهر العسل

بعد ليلة الزواج والطقطقه والردح والمناقز في العرس المعازيم راحو لبيوتهم وهم يدعون بالتوفيق للعروسين وان الله يرزقهم بالذريه الصالحه


من الصباح الباكر بعد الفطور وتجمع اهل المعرس ومباركتهم للعروسين كانت رحلة الطياره لجده الساعه 11 صباحا

راحو للمطار ويوم وصلو اكتشفو انهم نسو التذاكر وقعدو في المطار لين جتهم التذاكر (هذا بعد وقت مستقطع من الهواش من المسؤول عن نسيان التذاكر)

من اخو المعرس الي جاي طاير للمطار وكانت الرحله فاتتهم وطارت وقعد في الانتظار وبعد محاولات مع واحد من

موظفين الخطوط رحمهم الموظف وعطاهم حجز على الرحله الي بعدها وطارو ووصلو لجده وسكنو في الفندق يوم كامل

وبعدها سافرو لمكه اعتمرو وطلبو من الله التوفيق وراحة البال واالاجتهاد في الطاعه

وبعد اسبوع طارت بهم الطياره في جوله لمدة اسبوعين








وحان وقت العوده للرياض وما ادراك وش بيصير في رجعتهم من احداث




وما ادراك ما بعد العودة








ما اطول عليكم



بعد ما رجعو وجاهم الاهل من الطرفين يسلمون عليهم وكل واحد من الجماعه اخذ هديته وراح وبعد يومين حوالي

الساعه عشر الصبح قامت العروس على صوت جرس التلفون يدق متواصل يعني ان الموضوع مهم ولازم يردون


ردت العروس ونصف وجهها نوم الووووووووووووووووو (ياطول هال اللو ذي )رد المتصل وقالت العروس هلا يمه
صبحك الله بالخير قالت ام العروس ماشاء الله عليكم نايمين الا ههالحزه (الا هذا الوقت )قالت العروس وهي واضح انها
تجامل لايمه قايمين من زمان بس كنت اريح شوي (وش تريح منه ما عندها الا النوم وش فيه غيره لاشغل ولا مشغله)

المهم قالت الوالده ترا انا عازمه الجماعه في استراحه بعد عشره ايام مناسبه صغيره ما فيه احد غريب ما غير الجماعه

بس حول خمسين حرمه مانيب مكثره ولافيه كلافه قامت العروس ونقزت من مكانها مرتاعه(خايفه)وشو يمه وليه ما
علمتيني من بدري عشان احسب حسابي واتجهز الحين وش اسوي ياربيه ......

المشكله مهيب هنا المشكله في المعرس الي كان نايم وهو مرتاح ويتبسم يحلم مبسوط وهنا بدت المشاكل

قامت العروس و اسحبي المفرش من فوق المعرس يالله قم تاخرنا الضعيف فتح عيونه وقام يركض وهو ما يدري وش
السالفه وصدم في الكرسي الي حول السرير وقام يركض ثانيه وصدم في الباب (هذا مو نشاط في المعرس بس هذا
تاثير الروعه ) الضعيف نقز من فراشه وقام يتخبط ما يدري وين يروح



بعدها الوضع ركد شوي وفتح المعرس عيونه وبعد تركيز عرف انه في بيته وفي غرفه نومه وجا لزوجته وش فيك

عسا ماشر وش صاير قالت العروس امي دقت علي وعازمه الجماعه بعد عشر ايام يالله نبي نروح للسوق ابي اشتري

قماش والا فستان يالله يمديني اتجهز ناقصني اغراض كثيرة يالله قم بسرعه


تخيلو شكل المعرس وهو طايره عويناته في زوجته وهي رايحه جايه وهو بعد ما بعد صحى من روعته الاوله قاله طيب


وش فيه اصبري لين العصر ويسهل الله كل امر عسير ما طارت الدنيا












ولسالفه تكمله غدا ان شاء الله





احداث الحلقه القادمه



مضاربه بين العروسين في اليوم الخامس والعشرين من شهر العسل




مناقشه حول الذهاب للسوق





الزوج يفتح ابواب الدواليب وماذا يجد يا للهول ؟؟؟؟؟؟؟؟؟؟؟؟؟؟؟؟؟؟؟


تابعو معنا باقي السالفه



غدا بحول الله

[IMG][/IMG]

[&فرح&]

هههههههههههههه

حلوة عروس وتبي ملابس جديدة ،،،،،

ننتظر الحلقة القادمة،،،،

طنق طنق>>>>>>>>>> شكلك نسيتها

[صيته]

ههههههههههههههههههههههههه

اقووووووووول المسكين الضعيف من الحين بتبدااا شغل السيطره عليه حلوووووووه سحبت المفرش


ننتظر البقية معك يااااااااااااااادحيم تسلم الله يعطيك العاااااافية مااقصرت والله

[ورد الريـاض]

هههه


كمل يالدحمي خلنا نشوف نهايتها


اكيد ماعطاها مهرها الا قطبه

يستاهل ماجاه

[****وسن****]

ههههههههههههههههه

يعطيك الف عافية ننتظر باقي القصة بس لاتتاخر علينا ...اتحمسنا ...

تحياتي..
****وسن****

[الفنان التشكيلي]

هههههههههههههه
رائع يا بو دحيم

[دحمي]

هههههههههههههه

حلوة عروس وتبي ملابس جديدة ،،،،،

ننتظر الحلقة القادمة،،،،

طنق طنق>>>>>>>>>> شكلك نسيتها

&فرح&


هذي المشكله من جد لها شهرين هالعروس وهي غاثه اهلها ودوني السوق وابي الخياط تطلع من الخياط وتنقز للسوق تنقي ذيك الي يحطونها على الهدوم كسورات وحزم ودناديش


شكرا على مرورك والحمد الله ان الموضوع عجبكم










و













طنق



















طنق









تحياتي

[دحمي]

صيته


________________________________________
ههههههههههههههههههههههههه

اقووووووووول المسكين الضعيف من الحين بتبدااا شغل السيطره عليه حلوووووووه سحبت المفرش


ننتظر البقية معك يااااااااااااااادحيم تسلم الله يعطيك العاااااافية مااقصرت والله




مشكوره صت صت على مرورك على قولتك بدت السيطره وشكل الضعيف اخرتها بينوم في غرفه لحاله وبيقفل عليه الباب وعلى قول اخواننا المصريين (ياروح ما بعدك روح)

[دحمي]

قمـر الريـاض


هههه


كمل يالدحمي خلنا نشوف نهايتها


اكيد ماعطاها مهرها الا قطبه

يستاهل ماجاه







حيا الله مشرفتنا العزيزه


والله اسعدني مرورك على المشاركه بس عاد الرجال بيعرس وما دفع الا قطبه (الظاهر ان المهر مدفوع بالتقسيط)

شكل الي قاهر المعرس ان كل المهر راح في خلاقين بس على قولك حقه ماجاه هو الي جايبه لنفسه وشو له يوهق نفسه وياخذها


بس الظاهر ان هذي عقوبه الله فيه .

________________________________________

[دحمي]

ههههههههههههههههه

يعطيك الف عافية ننتظر باقي القصة بس لاتتاخر علينا ...اتحمسنا ...

تحياتي..
****وسن****



اهلا والف مرحبا خيتي وسن

تبين الصدق حتى انا انتظر الباقي بس وش اسوي براسي كل ما جمعت فكره عن الباقي يجي واحد من الاهل وغير في النص ويقول لا كذا ما يصلح حط هالكلمه تراها بتصير اجمل (كني واحد يعمر له فله وكل شوي جايه واحد من الجيران والا الجماعه وقوله ليه حاط باب الصاله كبير والا ليه الدريشه(الطاقه)حاطها اقواس حطها مربعه ازين)


ان شاء الله بتكون للقصه نهايه بس عاد مدري متى الله بيكتب الحلقه الاخيرة.


شكرا على مرورك

]