[غيوم ممطره]

السلام عليكم ورحمة الله وبركاته



فكرت في دنياي بالعرض والطـول


فكرت في دنياي بالعرض والطول
وأصبح خطاها ما يساوي نصفها

لو طاب لي في عيشها كل ماكول
كيف أهتني في تمرها من حشفها

تضحك لنا الايام والغيب مجهول
واتعبت نفسي ما تحقق هدفها

نفسي لها هومات وتصول وتجول
ولا بد دورات الزمان تعسفها

لو أشرب الصافي قراح ومزلول
كم شربة للكبد تنكر عدفها

أسمع وانا قلبي عن الهرج مقفول
وفي صدري الأسرار ما احد كشفها

لو تعجبك يمناك والزند مفتول
لا بد ما الايام تثبت ضعفها

تصفي لك الايام ساعات وتزول
لو مهلت لك منك تخلي طرفها

كم واحد كنه عن الموت مكفول
واقفا وباقي عملته ما صرفها

وش عاد لو عمرك يكمل مية حول
من شاف تالية النهاية عرفها

أعرض عن الزلات وابعد عن القول
وخالف هوا نفسك ونزه شرفها

وترا الطريق اللي عن العدل معزول
اما يهين النفس ولا حرفها.
______________________________
للشاعر/غازي بن مهنا الشيباني.

[أنا ليا]

أعرض عن الزلات وابعد عن القول
وخالف هوا نفسك ونزه شرفها

وترا الطريق اللي عن العدل معزول
اما يهين النفس ولا حرفها.
روعة

[زهووور؛؛]

لو تعجبك يمناك والزند مفتول
لا بد ما الايام تثبت ضعفها

تصفي لك الايام ساعات وتزول
لو مهلت لك منك تخلي طرفها

ابيات رائعه شكرا لك " غيوم ممطره "على الانتقاء الجميل 🌹

[عبدالرحمن المقباس]

شكرا على الابيات الجزله والحكيمة
وفعلا من تفكر في الدنيا وجدها لاتساوي تعبها إلا من تعب لآخرته وجد وسعى وطلب الله التوفيق والمعونة
نسأل الله العفو والعافية والتوفيق في العلم والعمل
لي فقط تعديل وهو تعديل عن عدم موافقة كلمة وهي في البيت الذي يقول :
لو اشرب الصافي قراح ٍ ومزلول : كم شربة ٍ للكبد تنكر عدفها
أتوقع والله أعلم أن الكلمة الأخيرة تصحيحها عذفها بالذال وليس بالدال
لأن العذف هو الرديء من كل شي ويقول الشاعر الكبير محمد العبدالله القاضي في قصيدته المشهوره في وصف القهوة :
دنّيت له من غالي البن ما لاق : بالكف ناقيها عن العذف منسوق
فالأولون كانوا يطيبون القهوه أي ينقونها ويلقطونها ثم يحمسونها ثم يطبخونها في مجلس واحد
وهذا معنى قوله أنه نقاها أي لقطها او طيبها أي أزال الرديء منها وأزال ماتعلق بها من أي شيء آخر كالعيدان او الأتربة وهكذا
وفقنا الله واياكم