أقسام الموقع

هدى وهداية

يا حمد يا ابيك خذها لو ان عادك صغير
ضم ضايعها وتلقى معك مردودها

خل في عينك كبير الربع دايم كبير
بارك الله في رجال تقدر عودها

جات بك ركعة ضعيف مع الثلث الاخير
التزم بركوعها والتزم بسجودها

بشروني بك وسقت البشارة للبشير
والبشاير بين ربع الرجال تزودها

النوايا ياحمد دلو و الايام بير
والمضامي يبس من طول املها عودها

اهقى بك خير ما دام فالهقوات خير
والسحابة فوق راسك تدن رعودها

لقني وجهك على شان اقرر لك مصير
البيوت اللي تشيد على عمودها

بنت ابوها يا حمد فسرت معنى الاسير
حزن روحي يا حمد عندها وسعودها

ناقة ما استاسمت وسم جدانك تصير
شعرة من شعر وجهك مادمت تقودها

لا تعذرب للبدو ناقة ولا بعير
ما غلى عند البدو يا حمد من ذودها

والخطا لا جاك من شخص لكن شخص غير
الجماعة انتبه نقصها من زودها

والقصير الله اكبر يا ابيك من القصير
قول تكفى يا قصيري لا عاد تعودها

سودة قلوب النشاما ماهي سودة عسير
كل من طقه ولعها يروح يرودها

و امنع بخشم السلاح الشجاع المستجير
امنعه ويموت غل العرب بكبودها

لا تكذب دون حقه و لو جاك النذير
لو يكذب محزم البندق وبارودها

والعهد لله ثم الوطن ثم الامير
يا حمد ويش الرياجيل لولا عهودها

صقرتني لك ليالي الزمن صقار طير
افرزوها طرح طرحن وجاك يسودها

يا حمد و ان طعتني ضف جنحانك و طير
جود خلق الله يا ابيك من ماجودها

الشاعر/ علي الغياثين