أقسام الموقع

هدى وهداية

نصبح على شوف انتهاكات وخراب
.........ونمسي على دمع وتنهات وونين
بصدورنا شيء تذوب اله الهضاب
.........وافعالنا والواقع رياح وطحين
على العيون من الفتن مثل الضباب
.........ماعاد ندري من يسار ومن يمين
ما للضعيف الا الدعاء لو مايجاب
.........ما غيره الا الشوف مكتوف اليدين
يالله زلزل تحت الاعداء التراب
.........والطف بنا واحقن دماء المسلمين
ندعوك ياقادر على جعل السحاب
.........جيش لنصرة قلة مستضعفين
اغرقهم بنوع من انواع العقاب
.........غرق الغلام اللي يحسب انه فطين
والا اخذهم يا مجري سود الحقاب
.........اخذ العجوز اللي بقت في الغابرين
ذوقهم اللهم انواع العقاب
.........اللي عثوا في ارضك من المفسدين
والطف بمن لبسوا من التقوى ثياب
.........عبادك المستهدفين المتقين
تكالبت عليهم انياب الذئاب
.........ولا غير عونك يامعين الصابرين
من بينهم شيبه يعجزون الشباب
.........من وقفته من طولها في الركعتين
من بينهم عذراء توّن بلا حجاب
.........حجابها لفوا به الجرح المكين
تصيح ماهو من الم ولا صواب
.........تبغى الحجاب اللي خذوه المسعفين
طفل عن عيون امه الثنتين غاب
.........تبكيه عين وتلتفت لاخيه عين
من هول مايجري لهم شاب الغراب
.........ياوسع حلمك وانت مافوقك مدين
ادعيك وانت ادرى بحال اهل المصاب
.........وامد كفي لك يا اكرم الاكرمين

محمد بن فطيس