[موضي]

مابقى الا سـود الايـام تحرمـك الرقـاد
كيف الاوهـام اتجـرأ اتسريـك مغبـون




من متى تجزع من الدمع وتخاف البعـاد؟
من متى تقفي بك ظنون وتجيبك ظنـون؟





صرت تاخذ كذبتي صدق، ومزاحي وكـاد
لو بقول اني بخونك تحسب انـي بخـون





ماتعرف ان كل شاعـر يهيـم بكـل واد؟
وانهـم دايـم يقولـون مـالا يفعلـون؟




ابك انا لاقلت ابنسـاك وانكـرت الـوداد
والله انـي مانسيتـك وولاهـم يحزنـون





من جزع من صفعة الشمس يطمع بالبراد
ومن فقد وجهاته الخمس يلقى بك ركـون





اعتبرها هفـوة انسـان او كبـوة جـواد
لو بتسمح فانت غالي ولو تجـرح تمـون





عـد صداتـك مـروة وطعناتـك ضمـاد
خلهن لاراحـن طعـون ولا ردن طعـون





خنجرك يستاهل الطعـن ومتونـي شـداد
ومنك يازين الخناجر ويا بخـت المتـون





ردلي حنيـة المـزح باحسـاس الجمـاد
خلنا واحد يجي صلـب والثانـي حنـون





موت فيني واندفن فيـك بثيـاب الحـداد
وان حييت أموت لرضاك واحيا بك بهـون





مره ارقد بالكفـن وانـت ترقـد بالمهـاد
ومرة ارقد بالمهد وانـت ترقـد بالكفـون





ادري ان شجونك شجون واعنـادك عنـاد
والبلا ان عنادك عناد وشجونـك شجـون





ربك اللي سخرك لـي تقـود ومـا تقـاد
والله الخالـق ولله فـي خلقـه شــؤون





ازرع ضلوعي من رضاك وابشر بالحصاد
لعنبو من جيت ترضيـه وتـرد امحـزون





بس تسوالك بلد ؟ قـول تسوالـك بـلاد
انت كل العالـم بكـون ولحالـك بكـون





مابعـد محبتـك حـب ومـرادك مــراد
غير كونك سيد حشاي تدري من تكـون ؟





نعمتين اختصوا الخلق من جـود الجـواد
كافل الأرزاق مـن حيـث مـالا تعلمـون





البنـون ونعمـة المـال بعيـون العبـاد
زينة الدنيا بـلا شـك فـي كـل العيـون





مثل زينة دنيتي بـس عنـدي شـي زاد
من عرفتك صاروا المال وانـت والبنـون





انتشي بك نشوة التيـه لعنـاق الرشـاد
وافزع الك فزعة القرم لشهـاب الزبـون





واحصنك تحصين الأرزاق عن درب الفساد
واعشقك عشق المظاليم لفراق السجـون





لو تزيد الشـوق جمـرة تحولنـي رمـاد
لو يزيد العشق شعـرة بوصـل للجنـون





خـل هقواتـك كبيـرة ونظراتـك بعـاد
كانك انت بكبرك تهون من اللي ما يهون ؟





ازعلك وارهن حياتي تحت رحمـة زنـاد
تهبى لا والله الا انـت والمـوت تهبـون





عاد اذا ما ارضاك هرجي ولا اللي قلت فاد
انـنـا لله وانــا الـيـه راجـعــون





وانت باكر بتعـرف علـى نـاس جـداد
والكلام يجيك من كل شكـل وكـل لـون





لاتحسب ان كـل كلمـة بتسمعهـا وكـاد
ولا تصدق هرج شاعر وتخدعك الظنـون





دايم اعرف كـل شاعـر يهيـم بكـل واد
وان هم دايـم يقولـون مـا لا يفعلـون





حتى انا اللي قلت اعشقك وما اطيق البعاد
يمكن اطلع ماعشقتك .. ولا هم يحزنـون