[نوره22]

السلام عليكم
ارجو ان لايكون هذا الموضوع مكرر ايضا

سليمة الى استراليا بحفظ الله ورعايته

كتابات - شلش العراقي

ستسافر سليمة الى استراليا ، لتتزوج من ابن عمها ارحيم الاسترالي الجنسية ، وبهذه المناسبة التاريخية والعزيزة على قلوب الجميع، اقامت ام سليمة حفلة توديع في بيتها ، دعت اليها جاراتها اللائي انشغلن بمسح دموعها على فراق ابنتها ، وسفرها الى قارة استراليا المليئة بالكناغر

رسمية خالة سليمة مدمنة فضائيات من الطراز الاول ، فهي عاشقة هيفاء وهبي التي تعتقد انها شبيهتها في شبابها ، هذه الخالة جلست تقدم النصائح تلو النصائح لابنة اختها فأول شيء طلبته منها هو تغيير (اللوك ) يعني تعديل شكلها وجعلها (مودرن) ، قصت لها ظفيرتيها وذهبت بها الى صالو جارتها، وعادت بها الى البيت وباشرت وشم جسد البنت المسكينة برسوم وكلمات اجنبية وعربية ، (حتى ارحيم ليكول اجيتيني متخلفة وكلشي متعرفين واني سويتج ادمية) ، فقد رسمت على كتفها الايسر عقرب اسود

وبعد الانتهاء من هذه المهمة النبيلة اعطت الخالة الحنون دروسا خصوصية في الحياة الزوجية،الى نوعية الشراشف الناعمة الملمس ،الى ملابس النوم والبخور والبقلاوة ، انهت الخالة رسمية دروسها بتقديم ورقة ملفوفة بقطعة قماش خيطت بعناية لتضعها العروس تحت وسادتها لتطرد الجن والشياطين الاسترالية تحديدا،

الان جاء دور العمة ،التي اوصتها باطاعة الزوج والامتثال لاوامره وعدم رفع الصوت امامه وعدم الذهاب الى السوك او للعيادة الشعبية او للجيران بدون علمه ، كما اوصتها بالنظافة وكنس باب البيت يوميا ونشر البسط والبطانيات على السطح (من تطلع الشمس) وان تكون (مرة شاطرة ) تكعد من غبشة تخبز وتطبخ وان لاتتشرط وتاكل الي الله قاسمه وتشارك رجلها بالحلوة والمرة.

وبالاضافة الى هاتين الوصيتين يمكننا تسجيل مجموعة اخرى من وصايا الجارات العزيزات

* بنيتي الاجانب مايحبون الغيبة والنميمة والقال والقيل ،

* الاستراليات عيونهن تكتل ديري بالج من الحسد ،يومية اقري المعوذات ونامي .

* الاجنبيات سمعهتن موهلكد لاتختلطين بيهن هواي ، تره يجرنج للطريق .

* مو تتبواسين وية الزلم مثل مايسوون بالتلفزيون تره عيب واكبر حرام

* خلي بالج على رجلج تره الاستراليات ياما هجمن بيوت .

* اذا كالولج (كود مورننك ) يعني صباح الخير واذا ( كود ايفننك ) يعني مساء الخير

* مو كل يوم زعلانه ، ترى الطيارة التكت مالته كلش كلش غالي

* اذا قدمولج بيبسي موتشربي كله ، جنج ماشايفه ، خلي منه شوية بالبطل

* لا اتخلين الزباله ببابيت البيت تره يجون ياخذوج الشرطة
* اذا سألوج شيعية لو سنية كليلهم كلنا مسلمين ماكو فرق .

* اذا طلكج ارحيم ، بس كليلهم هذا ارهابي وانت معليج، يصلخوه صلخ..وداعتج يودون جلده للدباغ

* اذا واحد غمزلج لاتكولين لارحيم زوجج ... سوي نفسج ما شفتي



استمعت سليمة لهذه النصائح القيمة واستاذنت الجميع لتنام ، الجارات زعلن و لم يرق لهن تصرفها هذا ، خاصة وهذه هي اخر مرة يلتقين بها لانها ستسافر غدا ، خرجن على الفور زعلانات وعقدن مؤتمرا في منتصف الشارع جاء فيه

* والله سليمة حظه فوك النخل حاتروح للاستراليا

* والثانية اتكول : هو ارحيم ما لكه غيرها ، لو سألني كان جبت اله احسن منه

* بالله هي هاي شكولات مال استراليا ، همه عايزيين كناغر ورايحتلهم سليمة ام بوز

* هسة هو ارحيم شلونة ، يكولون حتى باستراليا بعده نفس شكله

* وين الله ويرجعوها من الحدود عبالهم ارهابيه




بعض الكلمات مكتوبه بللهجه العراقية اذا كان هناك اي كلمه غير مفهومه ارجو ابلاغي وانا اشرحها للجميع