[طال السفر]

جيل هالايام خبرته في الحياة ضعيفه جداً ولا يعرف راسه من رجوله في أغلب الأحيان وحالته حاله!!
............
ودكم تعرفون وش الاسباب ؟
أنا أقولكم بعض الاسباب ؟
بصراحة ماعاد شباب هالايام يؤمنون بشئ أسمه القراءة والإطلاع . الواحد فيهم تلقاه بس كل همه شلون يفرفش ويبحث عن التسالي واللبس والكشخه والمطارد وراء موديلات الجوالات ومقالبتهم لشاشة التلفاز مع القنوات الداجه اللي في الحقيقة لو تعرفون اللي يديرونها ما تعطونهم وجه حتى في الشارع ولايمكن تتقبلونهم بالمره على أقل تقدير من هيئتهم .
................
ولو أن شباب هالايام قعدوا مع كتب من كتب سيرة النبي محمد صلى الله عليه وسلم حيث أن فيها من القصص والتهذيب والرشاد مالله به عليم وكتب القصص الروائة والخيالية وكتب الادب وكتب السياسة وكتاب رياض الصالحين وعلى رأس كل هالكتب كتاب الله عز وجل القران الكريم صدقوني كان تلقونهم جيل أقل ما تقول عنه أنه مثل جيل الصحابة الأفاضل ،
.
.
أنا كتبت هالموضوع على سجيتي ولم أتكلف فيه وأرجو منكم عدم التكلف في الكلام قولوا على سجيتكم مثلي وخلونا نناقش هالموضوع من كل نواحية . وصدقوني هناك خلل هالايام جعل هالجيل متخبط ولاهو عارف شلون يعيش وقته مثل الاولين .
.
.
وأكيد فيكم من له خبرة وراي سديد في هذا الموضوع بس مانبي الردود مطوله .
.
.
بعدين ياليت تناقشون الحلول يعني ما نبي ردود أفعال أكرر مانبي ردود أفعال لاننا سئمنا من ردود الافعال نبيها حلول وبس .
وقبل أختم بصراحه أنا سافرت عدة دول عربية وغيرها وانا اخص بعض الدول العربية هنا أشوف عيالهم في الشوارع تصرفاتهم وحركاتهم في الشارع غير تصرفات أولادنا وحركاتهم في الشوارع لأنك تلقى أولادنا تقول مضطربين بس معصبين على طول حتى في نقاشاتهم ولا أدري وش الاسباب ، وبعدين لا حظت شئ مهم في المدارس عندنا هذالايام حاطين شبوك على حوش المدراس تقول كأن المدرسة معتقل والله أني ماخبرتها في أيامنا . أنتم معي ولا لا . يالله عطونا سواليفكم .
.
0
أخوكم طال السفر

[خلووووود الخالد]

لي عودة

موضوع رائع

[طال السفر]

(قصتي مع أسرار القصص)


مرة من المرات رحت لحراج الخردة وكنت وقتها أدور على كتب وأشياء قديمة من التراث هوايه من هواياتي ،
المهم وأنا قاعد أدور وأشوف ، حصلت واحد باسط على كتب كثيرة أغلبها قديمة جداً وأثناء وأنا قاعد أفتش في الكتب
لفت نظري دفاتر مدرسية قديمة تعود إلى ثلاثين سنة تقريبا ، المهم إللي لا حظته على هذه الدفاتر أنها تخص أولاد وبنات من عائلة وحدة وهذا من واقع الاسماء الموجودة عليها،
وقلت لنفسي خلني أشوف كيف مستواهم الدراسي في ذاك الحين ، وبصراحه لقيتهم شئ يشرف كل علاماتهم في الدفاتر أمتياز وخطهم زين وترتيبهم جدا روعه وقلت لنفسي وانا قاعد اتفرج الله يذكر هذيك الأيام بالخير
اللي فيها حب وإخلاص للدراسة وتفاعل الطلاب مع مدرسيهم ..الخ
المهم قعدت أفتش وأقول لنفسي ليتني أجد سر بين هذه الدفاتر لهاالعيال المتميزين لعل أجد سبب في تفوقهم ونجاحهم بامتياز ،
والحقيقة أني وجدت كتب صغيره غير منهجية متناثرة من ضمن دفاترهم
وهذه الكتب الصغيرة تعود لنفس هؤلاء الطلاب واستوقفتني هذه الكتيبات الصغيرة وكثرتها وقلت لابد هناك سر في كثرة هالكتيبات الصغيرة مع هالاولاد المتفوقين وهذه الكتيبات هي عبارة عن قصص للصغار وللكبار
تتكلم عن كل شئ في التربية والثقافة والادب والعلوم والرحلات والشجاعة والدين والصبر والاحلام والامل والذكاء .......هلم مجرة
، وقلت لنفسي عز الله أنها بيت القصيد وراء تفوق هؤلاء الاولاد بعد توفيق الله . تدرون ليش أنا قلت أنها بيت القصيد !! لأني بصراحه حللتها مع نفسي وجد ت أنها كفيلة بالتربية من غير مربي وأنها تعطي الاولاد خبرة في الحياة وعبر وتعلمهم وتنير عقولهم بعد توفيق الله حيث أنها نتاج عقول علماء وأفذاذ لهم خبرة وباع كبير في هذه الحياة

بالله عليكم من منا حافظ قصة وحدة ويعرف يلقيها للاولاد بطريقة مشوقه والله أننا كل يوم مثل أمس وماعندك أحد هذا ماوجدته من حل وركيزة تساعد الاولاد على الذكاء والتفوق فهل عندكم في بيتوكم قصص لا تقل عن 100 كتيب قصة والله ما ظنتي .
يالله نبي مداخلتكم ومثل ماقلنا لكم اطرحوها على السجية .
وانا احب اخبركم اني من اليوم ورايح بروح اشتري كراتين قصص وان شاءالله أحصل فيها تغييرايجابي لاولادنا وهذا ما اتوقعه بكل تأكيد لانه بصراحه أكثر ماكان يشدنا وحنا صغار القصص ويا ما تعلمنا منها واصبحت لنا ركيزة في كل شئ وعلى راسهم الادب والاحترام وغيرها كثير .
انا منتظر ردودكم . وقبل اختم ماتلاحظون شلون اولاد الاجانب غرفهم متروسه قصص . مو متروسه دفاتر بس وكتب منهجية . فتكم بعافيه .وجبتها على السجيه . سلام
.
.

طال السفر

[خلووووود الخالد]

والله الصلاح والتوفيق أولا من الله سبحانه وتعالى ...

ثم يأتي دور الوالدين من توجيه وتربية وتعلم وغرس الثقافة وحب العلم في نفوسهم ...

يعني ممكن تجد اولاد عاشوا ايتام بلا ام ولا اب ولم يجدوا من يربيهم ويوجههم لكنهم ماشاء الله

متفوقين ونجحوا في حياتهم واصبحوا ناجحين في المجتمع ونجوم لا معين ..ولا أدري ان كانت

هذه حالات استثنائية .!

وطبعا بالتأكيد للوالدين دور اساسي وكبير ..

في زرع الثقة ..وقوة الشخصية ...في ابناءهم ...

فإن لم يتشربوها من بيتهم فلن يجدوها في الشوارع ...او على الارصفة ...

وقد كنت اتذكر والدي رحمه الله ...حيث كان حافظا لكتاب الله ومحبا وعاشقا للقراءة

فغرس هذا التوجه في نفوسنا ...فلا زلت اتذكر كيف يحتفي كل يوم جمعة ...فيخرج جميع الكتب من المكتبة

ويبدأ بتنظيف المكتبة بعناية ...ثم يقوم بتبخير كتب القرآن والسنن والكتب الدينية ...بأطيب انواع

العود ويعيدها لمكانها بعناية ...

فشعرنا بقيمة وأهمية العلم .....

وهذا ترك اثر وتأثير كبير في نفوسنا وشخصياتنا

وبالنسبة لفكرة القراءة للأطفال من سن مبكر من السنتين فهي فكرة رائعة وسهلة التطبيق

لكن الشكوى لله ..حنّا شعب ماله خلق وطولة بال لعياله ...كلش يصارخون عليهم ...

ولا قعدوهم قدام التلفزيووون عشان ينفكون من ازعاجهم وصجتهم ولجتهم ..........!


شاكرة لك موضوعك

[طال السفر]

خلوود الخالد

اولا رحم الله والدك رحمة واسعة

ثانيا أشكرك لين تطفشين على هذه المداخلة اللي مامثلها

وأهنيئك على هذه الصراحه وهذا حالنا كلنا
وأنتي جبتيها في أخر شئ بيض الله وجهك

حنّا شعب ماله خلق وطولة بال لعياله ...كلش يصارخون عليهم ... ولا قعدوهم قدام التلفزيووون عشان ينفكون من ازعاجهم وصجتهم ولجتهم

ومازلنا في انتظار
.الوفود المشاركة

[city_dreem]

موضوع مهم جداً .. وباعتقادي أن مكانه الأفضل في منتدى الحوار والمناقشة ..
ولنا رأي سيرعف به قلمنا لاحقا ..


شكراً ..

[ســـــامي العتيبي]

السلام عليكم ورحمه الله وبركاته
حبيت اشكرك اخوي طال السفر والمنتظر مل صبره والشوق يامحبوب في ناظري شاب <<<
على هالموضوع واحب اشارك ازا سمحت لي..
ايام اول كان الاهل يعتمدون على الولد تقدر تقول ابو 6 سنوات واللي مثله هو رجال البيت وماسك البيت على كتفوفه << مثلي احم
اما الحين الولد ابو 8 سنوات خايفين عليه لايطلع الشارع ولين صار بثانوي صار رجل نقدر نقول نعتمد عليه
ايام زمان الولد يمشي مع ابوه وين ماراح يتعلم امور المرجله اما الحين جالس في البيت مع الماما<<< طبعا الا من رحم ربي
ونرجع للتلفزيون ايام التسدح على القناه الاولى
ايامناا كنا نشوف برامج مفيده حتى عالم الحيوان كنه نشوفه والحين لو تجيب سمكه تقول لهم وش هي يقول
بعه خخخخخخخخخخخخخخخخخخخ
الله على ايام بشار المفهي جاب لي الظغط وانا صغير على كبر عيونه امه تمر جنبه ومايشوفها
وانا من التحمس اصارررخ واقول امك ياغبي التفت و90 حلقه يدو امه هههههههههههههه
واما حاليا تعال نشوف وش يناظرو ياما ابطال الديجتال او الجاسوسات ولا على الالعاب البلايستيشن اللي تتدمر العقل
ماتشوفون عيالنا تناديهم وهو فاتح فمه مايدري وش السالفه
واسف على الاطاله
تقبل مروري..

[طال السفر]

سامي العتيبي ........ الشاعر الشاب
ياهلا والله
والله ياخوي انك صادق هذا حالهم المساكين ، وربي المرجله في شق وهم في شق ، إلا من رحم ربي
والله يازين قناتنا الأولى وياليت يجي نيزك مار على هلاقمار الصناعية ويدمرها ايه والله ونرجع مثل أول قناة وراضين فيها و صدقني بيرجع كل شئ طبيعي . لا وبزيدك من الشعر بيت شفت الجوال آآآآآآآه يالجوال مليون مره
ليتهم خلوه تلفون عادي يستقبل ويرسل بس من دون تخزين يعني مثل تلفون أول لا تخزين ولا غيره أفتح نوتتك وأتصل وبس . شكرا على هيدي الطله

[هنادي26]

مرحبا..
الحلول برأيي وباختصار كما طلب الأخ "طال"..

- أن يستوعب الآباء حقيقة دورهم في تنشئة الأبناء..وهذي ( جُـل ) الحكاية
فالأبناء عجين كيفما شكله الوالدان أستقر وكان.. اللهم حالات استثنائية ..
كما ذكرت الأخت "خلود" .. وكما ذكرت أيضاً التوفيق من الله ..

والباقي من الحكاية على الأبناء فعليهم عدم التخاذل والركون إلى حجة..
(( والله أهلي ماعلموني ولا ربوني ولا اهتموا فيني )) ..هذه مجرد أعذار..
فإذا وصل الواحد منا لسن معينة يمكنه من خلالها تمييز الصح والغلط فاللوم يقع عليه..
وفي النهاية الأم والأب بشر ولاتتوفر لدى الجميع الخبرة والتعلم الكافي لإدارة الأبناء..


ـــــــــــــــــــــــــــــــ
همسة لك "خلود" سارعي بنقل الموضوع إلى حيث ساحة النقاشات
لينال نصيبه المستحق من المشاركات فهو هنا في الظل تقريباً ..


دمتم

[طال السفر]

أختي هناااااادي
كلام جميل جدا
وإن شاءالله سوف نجمع الأراء ونحاول أن نطلع بفائده وعلى أقل تقدير نقدر نحدد المسئوليه من خلال هذا المبحث السريع . لعلنا نصل إلى قناعة تامة حول هذه القضية والسبب وراء ضعف مفهوم شباب اليوم عن الحياة وعدم إدراك البعض منهم ماله وما عليه .إتجاه نفسه أولا ووطنه ومجتمعه ودينه بالدرجة الأولى .
.
في إنتظار الوفود المشاركة