[شـفاء]

اثرت فيني وحبيت انقلها لكم...

بنادق مهجتي معبأ فشقها و الغلا نيشان
أبا طلق روحي في قلب القصيد وأنبض أبياته

أبذبح حزني من أقصى الشعور لأول الإخوان
وأسيل عمره وتشرب عيون العمر دمعاته

وحيد ولا معي إلا أخوي بداخلي غفيان
ترفرف ضحكته وأطلق نعاسي لصبح ضحكاته

في بالي أرقد وأدري حزين وشارد وبردان
وأنا أنثر برده من فوق الخيال وجمر سجاته

ينام وأعقد بعين البداية جمرة التحنان
ينام وأعقد بعين الأغاني كل نهاياته

يدور قلبي تتفتت ضلوعه يطحنه حرمان
يجوع القلب يحضني في جوعي وأكل فتاته

وأطل من الألم أحضن حياة الشارع الولهان
يلملم حسرتي ويكسر وجودي بشوق إضاءاته

تعبت تمليني طعون تصب من خنجر الخلان
تعبت تستنزف عيوني دموع العين طعناته

ياخي ليه تغيب وليه تتركني وأنا شفقان
لقر من يقلب جبال الهموم بعزة إثباته

أعرفه لا وصل كنه صقر من صفوة الويلان
يكش جلد السما إن شافت مخاليبه وهداته

رجالاً تربط حزام القبيلة وتنفلت شجعان
وأخوي يربط رجال القبيلة حزام هقواته

كريم(ن) ماهو من يبني فعايل صيته الديوان
في صدره دلته وهيله وفناجيله وتمراته

إذا كان الكرم حمس الهلا في مهجت الضيفان
أخوي من حمس قلبه لضيفه وصب فزعاته

وكم تكفى كرمت بين البشر ممزوعه الوجدان
أخوي قبل لا ترمى عليه يقط نخواته

حزين السيف بكفوف الأوادم طافي ذبلان
بعد ما نام دم اللي سقى فعله وومضاته

ياخي أقعد وقعد خضوعي بداخل الشريان
تنام ولا بقى هم(ن) قطف من دمي غفواته

غريبه وشلون يكسرك الغياب ويقلبك نسيان
ودفتر جيتك ياخي طوى من عمري صفحاته

يجيني مدري ولا لكن أعرف لا وصل جيعان
قسم وإن جاني لأنحرني لجوعه تحت خطواته

وصل زواله هذاك اللي وصل ما يشبهه إنسان
هذاك اللي وصل شايل عذاب العمر وآهاته

وجيت ألحين ياخي بعد ما شالتك أمتان
بعد ما ودهم غسل الجسد عن كل نزواته

ابد لا ينغسل هذا الشهم مغسول بالفرسان
أخويه من غسل روح الجسد في طهر نياته

أيا دفان دخيل الله... لا تدفنه يا دفان
دخيلك خلني أدفن في بالي جمر بسماته

وهف بسماته من هذا المكان لأخر الأحزان
وأنا أطحن موته في جوع الكلام وأخبز سكاته

أنام وشلون لا صار الإخو جايع وأنا شبعان
أخوي اللي كسر قلبه لجوعي وجاع لحظاته

أخوي اللي يمزمزني معاليقه إذا عطشان
أخوي اللي ثنى عمره من أجل أطلع مسافاته

يدين القبر ضمني وسط حضن الأخو نعسان
أبرقد دام لي قلب(ن) دفن وياه نبضاته

أكيد أنه وسط قبره سمع طق الخطاوي الآن
ألا ياليت أنا المدفون وأنا أسمع طق خطواته

[Ŝђǿǿq Ťąbσύĸ]

قـصـيـدة مـؤثــره ...
تـسـلـم يـمـيـنـك

[احلاام عمري]

صح لسان كاتبهاا

[شمس نجد]

الله يغفرله ويرحمه ويسكنه فسيح جناته

صح لسان الشاعر سالم السيار

انتقاء رائع شفاء .. شكراً لكِ

[سحابة ماء]

شكر على القصيدة الرائعة

[طالبه كليه]

سلمت اناملك

[شـفاء]

شكراً للجميع
سعدت بتواجدكم جزاكم الله خيراً

[طال السفر]

:
شفاء .. إنتي كاتبه مميزة ...! .؟
أتمنى أشوف لك كتابة نثرية في القريب .....!
كوني ســعيدة .!:
دمتي لمحبيك
:
طال السفر

[شـفاء]

المشاركة الأصلية كتبت بواسطة طال السفر : شفاء .. إنتي كاتبه مميزة ...! .؟ أتمنى أشوف لك كتابة نثرية في القريب .....! كوني ســعيدة .!: دمتي لمحبيك : طال السفر

شكراً لك الله يسلمك
سعدت بتواجدك في متصفحي..

ربي يحفظك

[ارينا]

سلمت يمناااك ولاعدمناك