[*&*الروح النقية*&*]

سبحان من يرزق بتوع الملايين
الرازق اللي ما يخيب الرجا به

لي عم عنده معرضٍ للصوالين
أموت واعرف بس من وين جابه

وإذا سألته قال بعت الدكاكين
ما يدري إني ما هضمت الإجابة

الشاهد إني رحت له قبل يومين
في قصره العامر ودقيت بابه

قال ارحب ارحب عدّ ورد البساتين
يا مرحبا باللي لفا يا هلابه

قلت البقا عدّ النفل والرياحين
يا شيخ شمل اهل الكرم والذرابه

قال اسلم الله يحفظك لي من العين
وآمر أوامر حضرتك مستجابه

قلت الصراحة طالبٍ قرب غالين
ودي تزوجني كريمتك يابه

ثنّى وقال اهلين والله وسهلين
والكون ترخص لجل عينك رقابه

لكن ترى عندي شروط وقوانين
قلت اشرط اشرط يا حبيب الغلابه

قال أولاً مهر العروسة ثمانين
غير الرسوم وغير حق العصابه

والثانية عمك يبي منك سبعين
رسم الأبوّة والنسب والقرابه

وام العروسة حقها منك ستين
عشانها ست الحسن والمهابه

واخوانها كلن يبي منك خمسين
عداً ونقداً تندرج في حسابه

وخواتها الخمس اعطهن من ثلاثين
عشان تتوثق عروق النسابه

وتجيب طقم عيار واحد وعشرين
وخاتم من الماس المصفى ترابه

واكياس متروسة كعوب وفساتين
ألوانها واشكالها ما تشابه

وموتر بسواقه وفيلا بدورين
أثاثها من بطرته ينحكابه

واحجز لنا قاعة بقصر السلاطين
واحجز بها رقاصتين وربابه

وامنع دخول اهل اللحى والبزارين
واعزم أمير المنطقة بالنيابه

هذي الشروط اللي على بالي الحين
وذكرني اللي ما حسبنا حسابه

قلت اذكر الله يا عدو المساكين
واستغفره لا يبتليك بعذابه

الظاهر إنك منت عارف أنا مين
أنا لو ارقا فوق متن السحابه

ما جبت حتى نص درزن مواعين
واضحك بكيفك واعتبرها دعابه

شروطكم هذي شروط المجانين
شروطكم شغل ابتزاز ونهابه

شروطكم تقصم ظهور البعارين
شروطكم همّن وغم وكآبه

شروطكم والله سيوف وسكاكين
تذبح بنات المجتمع مع شبابه

وين الرضا والعطف واليسر واللين
اللي ذكرها الله بمحكم كتابه

وين الصفات اللي أمرنا بها الدين
وين اختفى نهج النبي والصحابه

يا عم جعل اللي خلقنا من الطين
يرد عقلك من خطاه لصوابه

ويجعل نصيبي عند غيرك قل آمين
ويحسن عزا الصابر ويجزل ثوابه

قال انت لو فكرت تفكير صاحين
ما شفت في مجمل شروطي غرابه

حنا بعصر العولمة والمزايين
ماهوب عصر الفلسفة والخطابه

الناس تسعى للرتب والنياشين
وانت اهتمامك بالشعر والكتابه

والشعر ما ينفعك لو هو دواوين
ما دام جيبك مثل بيت الخرابه

يا بوك لا تسمع كلام المصاخين
واسأل مجرب عاش في وسط غابه

قلت الله اكبر يا محرر فلسطين
من يسمعك يحسبك ذيب الذيابه

تراك شايب راس مالك ريالين
والبنت ما تسوى جناح الذبابه

قال انقلع مالت على وجهك الشين
لا عاد اشوفك عندنا يالزلابه

قلت ابشر ابشر لكن الباب من وين
واقفيت من عنده على صوت بابه

************************************************** ******

منقول

[يمامة الوادي]

شكرا لك(^_^),,,

[طال السفر]

الروح النقية
تواجدي هنا بكثره
ما اجمل اختياراتك سيدتي
ممنوع الغياب

[*&*الروح النقية*&*]

.
.
.
.
الف شكر لكم جميعا ...

[Ŝђǿǿq Ťąbσύĸ]

بجـد غــاليتـي إخـتـيار روعـه

وهـي فـعلاً قـصـيده تـُـعالـج مـشكله مـُـتفـشـيه

بــكـل المـجـتمعـات ويـعانـي مـنـهـا الـكـثـيـر مـن الـشـباب

نـسـأل اللـه الـهـدايــه للـجـمـيـع

دمــتِ بــود

[الراضيه]

*القناعه زينه *


قطع رزق البنت والسبه الطمع...

[الراضيه]

مشكوره يالروح النقيه على الموضوع

هاااااااااااه عاد لاتكثرين غيبات تراني أحب مواضيعك*********

[الراضيه]

مشكوره يالروح النقيه على الموضوع

هاااااااااااه عاد لاتكثرين غيبات تراني أحب مواضيعك*********