[فتاة مؤمنة]

	السلام عليكم ورحمة الله وبركاتة اليوم التدوينة جت عفوية بدون سابق تخطيط بس لمعرفتي بأهمية الموضوع حبيت أتكلم فيه نقص فيتامين د .. المرض الصامت صراحة أكاد اجزم انو الأغلبية الغالبة عندهم نقص فيتامين د وهم ما يدرون فعشان كذا حبيت اسوي البوست اليوم عن فيتامين د : طيب يا حجازية اش هيا اهمية فيتامين د ؟ انا اقولكم فيتامين د اش فايدته يقوي المناعة يبعد خطر الاصابة بمرض السرطان ويساعد على امتصاص الكالسيوم الي كلنا عارفين اهميته للاسنان والعظام بيقلل من خسارتة ويساعد الجسم على امتصاصة يبعد خطر الاكتئاب واهم فائدة انو يساعد على امتصاص كل المعادن وترسبها بالعظام << خطيرة مرا هالنقطة يعني لو كان عندك نقص بالفيتامين هذا حتنقص كل المعادن بالجسم فوائدة كثيرة اترك لكم حرية البحث عنها كمان طيب اش هيا اعراض نقص فيتامين د : هشاشة العظام << بعيد الشر يارب مشاكل الاسنان والجلد و الشعر تعب عام ارق وعدم انتظام النوم الم بالعظام التقلب المزاجي و احيانا الاكتئاب ضيق بالتنفس طيب .. انا من الناس اللي عندها نقص فيتامين د وقريب اكتشفت انو عندي نقص فيه يمكن من اسبوعين ما توقعت انو فيتامين واحد مسبب لي الاعراض هادي وهي انو جلست فترة احس باعراض غريبة كسل ارهاق خمول وتعب لكل الجسم ودوخات والنوم قليل جدا باليوم 4 الى 3 ساعات بس احيانا احس باحساس كانوا احد ضاربني مية مرة مستواي الدراسي انخفض الالام بالعظام والعضلات << طبعا على فترات متباعدة لكن الخمول والارق وضعف الذاكرة كان بيستمر ناهيكم عن الشحوب في الوجه عدم وضوح الرؤيا وخفقان بالقلب الاجهاد بسرعة وجفاف ببشرتي بشكل مو طبيعي وتساقط شعري كنت افكر كل هاذي الاعراض من فقر الدم ورحت اشتكيت للدكتورة وقلت لها على اللي صاير ومن قبل انا جيت لانو رجلي تعورني وعملوا لي تحليل دم وكانت الدكتورة شاكة بنقص فيتامين د وقالت لي كل اللي فيك نقص فيتامين د وتقول كمان انو صار مرا منتشر و خصوصا بين البنات وصار لازم تنتبهوا لانفسكم وتتعرضوا للشمس كويس الشيء اللي صدمني انو انا حريصة جدا جدا اني اتعرض للشمس وتقريبا اقل شيء اجلس ربع ساعة لكن قالت لي لازم تكون ايدينك ورجولك متعرضة مباشرة للشمس اش وصفت لي الدكتورة .. نقط فيتامين د للاطفال اعطتني الحرية في طريقة الشرب يا اما 50 نقطة باليوم او علبة وحدة اشربها كاملة كل اسبوع لمدة شهرين طبعا اخترت يوم واحد وحبوب كالسيوم و معاها فيتاميناتي المعتادة وبما اني بنت مدمنة نت )) لحد النخاع قررت اني ابحث وابحث عن هذا النقص وحصلت كم معلومة البعض خوفتني والبعض ريحتني خلاصة القول ما ابغى اي احد يجي يسالني عن النسبة اللي لازم ياخذها او شي انا كتبت البوست البسيط هذا للتنبية كل واحد يحس عنده الاعراض هاذي كلها او بعضها يروح يكشف ويحلل والدكتور هو اللي بيوصف له النسبة المناسبة لانو لو انت وصفت لنفسك ممكن يحصل لك تسمم بعيد الشر وبتتاثر الكلى وحاجات كثيرة مضرة كل شيء باعتدال نجي لمصدر فيتامين د .. اكيد بالمرتبة الاولى وبقوة الشمس افضل مصدر لفيتامين د هي الشمس وبتعطيك حاجتك من الفيتامين واكثر ولازم زي ما قلت فوق التعرض يكون مباشر لها الاكلات المتوفر فيها فيتامين د : السلمون الفطر وخصوصا الشيتاكي زيت كبد الحوت البيض الحليب عصير البرتقال السردين والاسماك عامة تقريبا الامراض اللي ممكن تحصل لك من نقص فيتامين د بعيد الشر يارب : السكري من النوع الثاني الضغط سرطان المبيض هشاشة العظام سرطان الثدي سرطان القولون وكمان في دراسات تؤكد انو عند النساء انخفاضة اكثر من الرجال فكل وحدة مهتمه بجمالها تحلل وتتاكد واخيرا شكرا للي وصل لنهاية البوست هذا واتمنى لكم دوام الصحة و العافية روحوا حللوا واتطمنوا ودعواتكم لياا بالشفاء والحقوني على تويتر @ab00la والسلام عليكم ورحمة الله وبركاتة منقول مما راق لي

[غيوم ممطره]

موضوع شامل بالفوائد,,
سلمتي.

[nada_07]

معلومات مفيدة
سلمت يمناك

[3lyaa]

الله يحمينا ويحفظنا

[أم رضوى]

معلومات مفيدة
بارك الله فيك

[الرنيم م]

عوااااافي طرح مفيد ومميزز

[ام عزوز المحسن]

معلومااات مفيده جزاك الله خير