[غلا..]

..{ الأسرار }..





يا رفيف الماء .. وفجر العيـد .. وأحـزان الموانـي
يا أكثر أهل الأرض طيبـة قلـب .. وأسـرار دفينـه*

المكـان اللـي هنـا .. مليـان ضحكـات ، وأغانـي
والكـلام اللـي بغيـت أقـول .. يحتـاج لـ سكينـه !*

شوفي الركـن البعيـد هنـاك .. كنـه صـدر حانـي
هـذا هـو اللـي يليـق بـ شاعـر و بنـت حزينـه!*

أنسـي الشـارع ، وعتمـات الزوايـا ، والمبـانـي
هاتـي يدينـك نلـف الغـيـم و نشـكـل مديـنـه !!*

عنـدي الليلـة كـلام و صمـت .. وأخـاف الثوانـي
تظلمه .. أو تظلـم اللـي فيـه كـم ضاعـت سنينـه*

بـس لازم تسمعـيـن الـلـي أبــي ولا تـرانـي
لو بـ أعيده لك .. نسيت .. ورحت أقول اللي تبينـه*

شي واحد قبل ما أبـدأ .. مـا أبـي أي شـي ثانـي
يخطر فـ بالك .. وأنا أكشف لـك شعـور تجهلينـه !*

إن أنا .. وبكـل مـا تحملـه " أحبـك " مـن معانـي
كنت ، وراح أبقى أحبك .. لين .. مدري وش هو لينه !!*

بـس والله ماقـدرت أنسـى .. ولا همـي نسـانـي
لا ذكـرت إنسـان .. فيـه أسـرار مابينـك وبينـه*

كـل مـا تطـري علـي فكـرة هــواك الأولانــي
أشعـر إنـي أنطعـن مليـون مـره مـن يديـنـه!*

أشعـر إن عيونـك .. الله مـا خلقهـا إلا عشـانـي
كيف كانت تبتسـم لـه؟!.. قولـي إنـك تخدعينـه !!*

صورة إنـه كـان يمسـح دمعـك .. تزلـزل كيانـي
وكيف كـان يلـم شعـرك .. ويتبعثـر فـي يمينـه*

حتى اسمـك يـوم رحـت أدلله .. حظـي رمانـي..
بنفس الاسم اللي يقول .. بذمتـك ماهـي غبينـه !؟*

وكنـي اللـي .. كـل مـا أناديـك بالاسـم الفلانـي
أطلـب النسيـان .. يتـرك منـه شـي تذكرينـه !!*

لا تظنينـي أنانـي .. لا .. أنـا مانـيـب أنـانـي
لو سلمت من الغرق . بـ أمـوت فـي ظهـر السفينـه!*

يا إني ما أكمـل وأعانـي .. أو أكمـل ثـم أعانـي..
كل ما اسمع طاري اسمه .. أو تجي عيني في عينـه!*

أينا كـان الضحيـه ؟.. وأينـا اللـي كـان جانـي ؟
مـدري !.. ولكـن قـراري لازم إنــك تقبليـنـه:*

مثـل مـا أكـره فكـرة إنـه واحـدٍ ياخـذ مكانـي
ما أقدر أجلس في مكـان إنسـان.. كنتـي تعشقينـه!*

★

[غلا..]

..{ سكة الذكرى }..



مرّني طيفـك .. وطيفـك صاحبـي مـدري عـدوّي
جايبٍ صوتك .. وصوتـك سكـة الذكـرى الحزينـة


قال أنا جوّي تكـدّر .. قلـت : ماهـو كثـر جـوّي
قال فرقانا غبينـة .. قلـت : وأكثـر مـن غبينـة

قال : أنا بـ أموت من غيبتك قل لـي ويـش أسـوّي؟
قلت : أنا أبغى الموت في غيبتك .. قل لي بس وينه؟!

قبل ترحل .. كنـت أقـول بيسـرح أيـام و يضـوّي
مثـل ماعودنـي اليـا اشتقـت لـه جابـه حنينـه

بـس هـ المـرة ثمـان شهـور وضلوعـي تــدوّي
كل يوم أشتاق لك .. يلعـن أبـو الشـوق وسنينـه

كـل ماعشمـت قلبـي .. قـال ياآآ ضلوعـي تقـوّي
ورحـت أنـا ويـاه نرقـب رجعـة اللـي فاقدينـه

نوب أقـول اليـا رجـع بكـون فـي قمـة هـدوّي
ونـوب أقـول الا أبزعـل وأتلـى مابينـي وبينـه

كل يوم أجلس علـى جـال البحـر وأقـول تـوّي ..
.. لاسألني : مافقـدت الحلـم فـي لمسـة يدينـه ؟!

مادريـت أن البحـر ماقـال لأمـواجـه تــروّي !
و مادريت أن الغـرق هـو حجّـة غيـاب السفينـة

مادريت .. أو مابغيت أدري .. ولاأدري وش بسوّي
لو رجعت .. وشفت طيفك فـي الممـرات الحزينـة

وين ابنسى وانت طيفـك صاحبـي مـدري عـدوي
مارضى يتـرك لـ غيـره شبـر واحـد فـي المدينـة!

[غلا..]

..{ آخر دروبـــي }..



يا بشر تكفـون حلّـو عـن سمايـه
ما يصيب الهرج لو الهـرج صوبـي


كـم سكـت لكـم بمـا فيـه الكفايـة
اشتموني لو زعلتـوا واشمتـوا بـي

عيبونـي واتركونـي فـي عمـايـه
واتركوا لي واحـد يرضـى عيوبـي

اتركـوا لـي واحـد يمسـح شقايـه
كل ما حـط الزمـن دوبـه و دوبـي

ذاك والله لـو ذكـرت انـه ورايــه
اشعر إن الكـون كلـه وسـط ثوبـي

يكفـي انـه لـو يسولـف للمرايـه
كن صوته يهمس لـ صورتـه.. ذوبـي

كيف أنا مـا أذوب مـا دامـه معايـه
اسمعه و أسهر معـه لآخـر دروبـي

كل مـا قـال السهـر درب الغوايـة
قلت كلـه مـن عيونـك هبّلـوا بـي

وكل ما قـال الخطـا ماهـو خطايـه
قلت له قـل للعيـون السـود توبـي

ضيعتـنـي واســأل الله الهـدايـة
وين أجيب العقل.. أجيبه من جيوبـي

من يعرفـك مـا يـدل العقـل رايـة
يا شروق العمر.. مدري يـا غروبـي

أذكر انك كنـت لـي مثـل الهوايـة
لو تروح ولو تجـي يبقـى شحوبـي

بس مدري كيف صرت اليـوم غايـة
وصرت أجي و أروح مدري عن دروبي

يـا بعـد عمـر الكتابـة و القـرايـة
يا الشمالـي يابـو الملـح الجنوبـي

لا قريـت اللـي كتبتـه يـا رجايـه
رح وبلغ ربعـي اللـي جننـوا بـي

قلهـم يمكـن يخـلـون الوشـايـة
و إن تمادوا خلهم مهمـا حكـوا بـي

أنت خلك بـس فـي الدنيـا عزايـه
لا تفكر في العـواذل وأنـت صوبـي

ادري إن كـل درب ولــه نهـايـة
بس أنا باقـي معـك لآخـر دروبـي

★

[همس الوعد]

إن أنا .. وبكـل مـا تحملـه " أحبـك " مـن معانـي
كنت ، وراح أبقى أحبك .. لين .. مدري وش هو لينه !!*

💔
أن كنتي انتي وبكلك يا( غلا ) سكنتي القلب ومافيها من حياتي
لازلت احبك وانتهى الحكي ... لين ....صار ماادري وش قريته

ربي لايحرمني منك ياغلاتي
اختيارات ذوق بس حزينه فديتك 💝

[الى الجنة أسعى]

يالغلا ..... مكتوب لي الحزن دايم معايا
يكفي معي وحولي واثره بالمنتدى ورايا
...........

سلمت يمينك والذائقه الرائعه رغم الحزن وكثر الالم واللي عنه احاول اني اصد


***********

[غيوم ممطره]

قصائد شعرية جميلة,,
سلمت لنا ذائقتك,,
ونتمنى ان لا ينقطع تواصلك معنا في هذا المنتدى
شكرا لك.

[عبد الله الصالح ,,]

إن أنا .. وبكـل مـا تحملـه " أحبـك " مـن معانـي
كنت ، وراح أبقى أحبك .. لين .. مدري وش هو لينه !!*
***
أبيات رائعة وتصوير شاعر مبدع ..
وإنتقاء أروع من أختي / غلا..

[jsd 5awe]

شوفي الركـن البعيـد هنـاك .. كنـه صـدر حانـي
هـذا هـو اللـي يليـق بـ شاعـر و بنـت حزينـه!*

أنسـي الشـارع ، وعتمـات الزوايـا ، والمبـانـي
هاتـي يدينـك نلـف الغـيـم و نشـكـل مديـنـه !!*

............


كل يوم أجلس علـى جـال البحـر وأقـول تـوّي ..
.. لاسألني : مافقـدت الحلـم فـي لمسـة يدينـه ؟!

مادريـت أن البحـر ماقـال لأمـواجـه تــروّي !
و مادريت أن الغـرق هـو حجّـة غيـاب السفينـة


صح لسآن شآعرهآ , قصآيد متقنه وذآئقه لآ تقتنع آلآ بمآ هو حقااً جميل , بس مآعرفنآ من شآعرهآ

[ضامي ألغيث]

قصيدة رائعة ويعطيك العافية على هذا الابداع