[حره بنت الاحرار]

السلام عليكم ورحمه الله وبركاته

اخواني اخواتي اتمنى تساعدوني وتشورون علي

لكل شخص مشاكل بحياته ويبي احد يساعده على حلها

المشكله انو انا ابوي متزوج على امي مايقارب 15 سنه عمره ماقصر معنا كل الي نبيه يجيبها

مو مقصر

بس المشكله بالتفرقه بالمعامله الي يعاملها زوجتها الثانيه هو مايعاملنا بشي شين لا والله بس انو مثلاَ

لما يسفرنا يكون متضايق معنا ومايبي يمشينا يبي يودينا للي يبي هو واغلب شي يبي يجلس بالشقه ولما يجي وقت الرجعه يرجعنا اول العصر او المغرب نرجع

وهو لما يسفرهم يوديهم كل الاماكن الي هم يبونها طبعا نعرف من كلامهم مافيه مكان ماودهم له

ولما يرجع من السفر لما يكون معهم اي سفره لهم عمره مارجع قبل الساعه 3 بالليل او الفجر واحيانا توصل لصباح

واحيانا يزيد لهم يوم عن الايام الي الي نسافرها ودايم لما نسافر لمنطقه اهلنا اهل ابوي وامي بنفس المنطقه يبي يسفرهم هم ويبي هم الي يركبون معه وهي ماتركب الا معه

ومره سفرنا ولما رجعنا سفرهم هم برا المملكه وحنا لا وكل عيد يعيد معهم اول عيد لنا وعيد لهم الحين لا كل الاعياد لهم

معاملته لهم غير عنا حنا نستقبل الضيوف وكل مواجيبه وهي لا بس مدلله وهي بيتها من افخم الاثاث وحنا بيتنا حنا الي اثثنه بفلوسنا حن كبار ولي اخوان موظفين

ومن كثر ماغثنا بالتفرقه قلنا له مانبيهم ولا نبي نشوفهم وقال مااسامحكم لو تقطعون اخوانكم

والله العظيم كرهتمهم من كثر مايحبهم ويداريهم علينا حنا مايدرينا

السفر هم اول ناس يسافرون لو قلنا له بنسافر هوشنا ولما هم يقولون نبي نسافر يسفرهم

بكل شي رفرق بينا وبينهم وكل شي لهم يعجيه وكل شي لنا مايعجب

ولما نقوله شي يقول طول عمري اودي امكم واجيبه يحاسب امي على شي قبل يتزوج


الحين يقول انتم عندكم اخوانكم يودنكم انا مو فاضي حتى بالمشاوير الي بالبلد دائم يوديهم ويجيبهم ولما نقول له ودنا يهاوشنا

لما يسفرهم لهلهم حق واجب ولما حنا نسافر لهلنا ونبيه يودينا نتفجئ انو يبي زوجته الثانيه وعيالها هم الي يرحون

اخرها الحين فيه زواجات بالصيف اغلبهم يقربون لنا مع العلم انو امي وابوي عيال عم والزواج ماباقي شي عليه وهو وداهم قبل فتره يحضرون زواج لهلها والحين يقول روحو انتم انا بودي اخوانكم

احيان ماودي اسامحه على الي يسويه واحيان اقول هذا ابوي مهما سوا
هل انا اثمه لو اتكلم معه ويحتد النقاش ؟؟؟

هل انا اثمه لو اقطع الوصل بيني وبين عياله الثانين ؟

[Nesma32]

السلام عليكم ورحمة الله وبركاته

شوفي اختي اول شئ قارني بين تعاملكم وتعامل البيت الثاني لابوكم

يمكن ابوك يرتاح عندهم فأنتي اعرفي كيف زوجته واخوانك من ابوك يتعاملون مع ابوك وافعلوا مثلهم .

حاولوا انكم تجذبون ابوك لكم خلوه يشتاق لكم ويحس بالسعادة عندكم .

اجيبي على اسئلتي هذي وان شاء الله نكمل الباقي .

ايضا في انتظار اراء الاعضاء

[حره بنت الاحرار]

المشاركة الأصلية كتبت بواسطة انمار السلام عليكم ورحمة الله وبركاته شوفي اختي اول شئ قارني بين تعاملكم وتعامل البيت الثاني لابوكم يمكن ابوك يرتاح عندهم فأنتي اعرفي كيف زوجته واخوانك من ابوك يتعاملون مع ابوك وافعلوا مثلهم . حاولوا انكم تجذبون ابوك لكم خلوه يشتاق لكم ويحس بالسعادة عندكم . اجيبي على اسئلتي هذي وان شاء الله نكمل الباقي . ايضا في انتظار اراء الاعضاء

بالعكس مره مزعجين

ومايحترمون ابوي بالعكس لما يقول لهم لا مايسمعون كلامه وكل شي يبونه بالغصب

وبنته الكبيره تقول انا دايم ارفع ضغط ابوي بالعكس حنا دايم نرحم ابوي ونوفر له ومانبيه يزعل

وكلامه اوامر بس هم لا حتى بناته الصغار معاملتهم معه مو زينه انااشوف هذا الشي بعيني

ودايم يزعجونه ويتصلون عليها بكل مكان نبي ونبي

[بلاتين]

والله يااختي بتتعبين نفسياً بالمقارنه .. ولو تتكلمي من اليوم ليوم الدين ماراح تتساوون .. من رأيي منة الله ولا منة خلقه .. سافروا لوحدكم واعتمدوا على أنفسكم وخليك رسميه مع أخوانك من أبوك ( ماله داعي تعرفين وين راحوا ووين جو ) ماراح تستفيدين شي راح يرتفع ضغطكم وتكرهون أبوك .. والله التفرقة تصير حتى لوكانو الأولاد من أم وحدة ..

[رحلة زمن]

اختي نصيحه لوجه الله لا تقارين الى يسويه ابوكم معكم ومع ما يسويه من اخوانك الثانين لانو انتي التعبانه في الاخير وكلا عايش حياته وانا اختلف مع اختي الدكتوره ريم بانو تخلين علاقتك رسميه مع اخوانك من ابوك بالعكس تقربو من بعض وترى الدنيا فانيه واذا تكلمتي عندهم عن ابوك اذكري لهم انكم مبسوطين ومستانسين على السفر معه ولاتينون لهم شى هذه نصيحتي لك لوجه الله ومن تجربه

[محبة خالقها]

حبيبتي لو بتقارنين بجد بتتعبين وبعدين هم حطي فارق السن بينك وبين اخوانك الثانين اذا هم اصغر منج فهم يحتاجون رعايه وترفيه اكثر وبعدين هم وش ذنبهم عشان تكرهيهم ابوج اللي يفرق مب هم وانا ادري انج بتقولين ماحد راح يحس الا اذا جرب وانا معاج في النقطه هذي بس هذا قدر ومكتوب وارضي باللي ربي عطاج وياه لانه بعدين بعد عمر طويل اذا ابوج راح بتندمين اذا راح وهو غضبان عليج والدنيا ماتسوى كلها يومين وحنا متيسرين
واعذرني اذا كان كلامي فيه اي اشكال والله يوفقج ان شاء الله ويريح بالج

[حره بنت الاحرار]

ليه مااكرهم وهو يشوفهم احسن منا

ليه مااكرهم وهم الاولين بكل شي

ليه مااكرهم وهم الي اخذو ابوي منا

عندي اخوان بنفس العمر مع اخواني الي من ابوي وربي انقهر عمرهم نفس عمر اشقائي بس المعامله تختلف

اثنين من اخواني العيال نفس السن واحد شقيقي والثاني من ابوي

شقيقي دايم ابوي يحطمه ويهزئه ويقوله اخوك الثاني احسن منك واشطر منك وانت تغار منه لو وش مايسوي تبي مثله

ودايم ياخذ ولده الي من زوجته الثانيه معه لما يسافر وماياخذ اخوي

اول كانت علاقتنا مع اخواني ممتازه وكنا معهم بكل شي لدرجه صرنا مثل الشغالات لزوجة ابوي الثانيه اذا راجت اي عزيمه يودينا ابوي نجلس عند عيالها حتى لو حنا معزومين يقول اخوانكم ابد من الناس

نطلع ايام الاختبارات من اختبارنا لبيتهم لين تجي امهم

امي كل صباح يجيب له عيالها الصغار عندها عشان امهم موظفه ترضعهم وتغير لهم ولا بين بعينهم بالعكس

يقول ابوي وش سويتو لها دايم ماتبونهم لما شفنا انو الجميله مو بينه قلنا له مانبيهم وكل يوم عن يوم ننغث منهم

يبي نخدمها ونراعيها هي وعيالها وحنا مايهمه

اكره ادخل بيتهم انقهر من الفرق الي بينا وبينهم اكره اشوفهم والله العظيم اخوي الصغير صار مايبي المدرسه الي فيها اخوي الثاني يقول ماابي مدرسه فيها فلان

لما نجيب هدايا لخواني اشقائي يزعل ويقول جيبوا لخوانكم الثانين لدرجه مره اخذ هديه اختي الصغيره من يدها ووداها لبنته الثانيه يقول لاختي يجيبون لك هديه بعدين

لما يشوف اخوي عندهم شي ويقول لابوي ابي مثله يقول امهم جابته ولما حنا نجيب لاخوي يروح يشتري لهم مثل الي نجيبه لاخوي

ومره خربه العبه حقتهم وكانو يلعبون مع اخوي بلعبته ولما جو يروحون قالو لابوي يابون ياخذونها معهم جاابوي يبي ياخذها معهم جلس يصيح اخوي يقول حقتي ماابيهم ياخذونها ويهاوشه لحد ماقالت له امي لاتاخذ العبه اسكت وقاله تلعب الكلاب بجثتك

مو شي يقهر وربي يقهر وربي يقهر

[Nesma32]

اختي والله قصتك تحزن وبصراحه حاليا ما عندي حل

لكن عليكم بالدعاء ان الله يؤلف بينكم وبين ابوكم

اسال الله باسمائه الحسنى وصفاته العلى ان يحنن قلب ابوك ويسخره لكم ويؤلف بين قلوبكم

آمين يارب العالمين

[أردواز]

احيان ماودي اسامحه على الي يسويه واحيان اقول هذا ابوي مهما سوا
هل انا اثمه لو اتكلم معه ويحتد النقاش ؟؟؟
نعم تأثمين لاتنسين الأيه ولا تقل لهم اف ولا تنهرون ...الى اخر الاية
فما بالك برفع الصوت

هل انا اثمه لو اقطع الوصل بيني وبين عياله الثانين ؟
حرام قطع الارحام يالغالية

والله اني احس بك وبمعاناتك انا لست بارعة في النصح ولكن يالغاليه اياك اياك والحقد والكره على ابوك
مالك الا الصبر وش تسوين واذا جوا لاتسمحين لهم يضايقونك خليك بارده ولا تسولفين ولا تبينين اذا تضايقتي لان يمكن يفرحهم ذا الشي وعشان كذا يقولون ابوي سوا لنا وفعل بالعكس خلي اذن من طين واذن من عجين
وارسمي الابتسامه على وجهك
ولا تنسين اذا ابتسم المهزوم افقد المنتصر لذة الفوز
اما اذا كانوا طيبين فقط والدك خلاك تبعدين عنهم فانصحك ان تكسبينهم وتتقربين منهم مهما كان ذولا اخوانك والدعاء باستمرار ان يحنن ابوكم عليكم واسأل الله ان يلهمك الصبر انتِ واخوانك خاصة امك..

[التسجيل إجباري!]

صفي قلبك ولا يدخل له الحسد والحقد وثمن عليتس بالدعاء اللهم سخر لنا والدي وحببنا لقلبه وحننه علينا وأدعي وأنت متيقنة الإجابة وتوكلي على الله ولا تقطعي علاقتك بأخوانك من أبوك واحسني علاقتك معهم واحتسبي الأجر ووالدك لامانع من النقاش لكن بهدوء حوار هادئ بعيدا عن رفع الصوت والغضب والعناد او الكلام الغير سنع من مقارنات او توضحين انه يحب زوجته الثانية وعياله ويفرق بينكم كل هذا لاتحاولين تقحمين نفسك فيه وخلي علاقتك بوالدك جيدة وصدقيني الاستغفار والدعاء الدعاء الدعاء بيفرجها ربي
الله يسعدك ويوفقك لا تفرحين الشيطان بالخلافات مع الوالد ولاتنسي المحافظة على الأذكار وسماع القرآن {هدى وشفاء .

أختكم