[غالية78]

عزيزي المستخدم :
هل تعرف مكونات البطارية وطريقة عملها؟!
هل ودك تعرف طريقة الاستخدام الصحيحة للبطارية؟!
هل ودك تعرف صحة النصائح اللي نسمعها دايم؟!
وهل تعاني من مشاكل بطاريتك وإنها ماتقعد إلا ساعه أو أقل؟!




طيب وش أسوي لك؟! هذي مشكلتك موب مشكلتي
<< مريضه




فيه شي مهم لازم نعرفه في البدايه ، إن البطاريات نوعين : نيكل و ليثيوم !
النيكل كانت تستخدم قديماً ، قبل تقريباً سبعة سنوات ، لكن المستخدمه حالياً
والموجوده في أجهزتنا المحموله والهاتف الجوال هي الليثيوم .


أقدر أشبك سلك الشاحن والبطارية موجوده في الجهاز؟!

نعم تقدر .. لأن بطارية الليثيوم في تصميمها الداخلي يوجد فيها
حساس وشغلته إنه يفصل الكهرباء عن البطاريه إذا اكتمل شحنها!.

الحساس في البطاريه زي الغطاء للعلبه ، تخيل لو عندك علبه
وتعبيها مويه مثلاً ، الطبيعي إنه إذا امتلت بتوقف وبتغلقها بواسطة
الغطاء ، لكن لو مافيه غطاء واستمريت تعبي وتعبي؟! الحاصل إن
الماء بيزيد ويفيض عن العلبه وهذا اللي يصير مع البطاريه ،
لو إن الحساس غير موجود ( الغطاء) والبطاريه قاعده تتعبى
من سلك الشاحن ( المويه ) اللي بيصير إن الشحن بيزيد وبتزيد
حرارة البطاريه لأنها اخذت طاقه أكبر من قدرتها وبالتالي ستنفجر !

لكن في بطارياتنا الحين ودام الحساس يعمل بشكل صحيح ، فيمكنك
وضع البطاريه وسلك الشاحن سوا في الجهاز لأن الحساس تلقائيا إذا
وصل شحن البطاريه 100% بيفصل عنها الكهرباء ، والجهاز في
هالحاله بيستهلك شحن من السلك وكأن البطاريه غير موجوده !
يعني البطارية وسلك الشاحن متفاهمين سوا لا تشيل همهم
بس لاتخلي الشاحن مشبوك مع البطارية
على طول .. لازم يقعد فتره قصيرة فقط .


طيب هل شحن البطارية وهي لم تفرغ بعد يؤدي إلى إتلافها؟!

الكلام هذا صحيح لكن في بطاريات النيكل فقط! ، لكن بطاريات الليثيوم
مختلفه وتقدر تستخدمها بدون ضمير ، تقدر تشبك الشاحن والبطارية
فيها مثلاً 40% يعني توها مافضت ، للتوضيح أكثر ناخذ مثال سريع :
الحين إذا جيت تطلع مشوار طويل ، وبطارية جوالك مافيها إلا النصف
بس بطبيعة الحال واللي نسويه كلنا إننا نكمل شحنها ، ونلاحظ إن بطارية
الجوال ممتازه وعمرها طويل ، مع إننا نسوي هالحركه ولا ننتظر البطارية
تفضى ! ، بطارية اللاب توب - ولأنها نفس نوع الجوال " ليثيوم " - تقدر
تسوي فيها نفس الشي ، وتشحنها وهي توها مافضت بعكس النيكل اللي
تخرب لو شحنتها شحن جزئي .


هل صحيح إني لو أشيل البطارية وأشتغل على سلك الشاحن أفضل لجهازي؟!

هذا صحيح قديماً في النيكل .. وبرضه صحيح في الليثيوم ..
بس في الليثيوم لازم تستخدم البطارية كل فتره " كل ثلاثة أسابيع تقريباً " ..
وما ينفع تشيلها فتره طويله ولا تستخدمها لأن هالشي يضرها ويقلل من عمر
الاستهلاك اليومي لها ..

مثلاً
لو عندك ورده ( للأسف وصلت هالمرحله من التشبيهات هههههههههه)
عندك ورده في حديقه .. ولا أسقيتها مويه فتره من الزمن .. تتوقع إن
الورده بتعيش؟! .. طبعاً لا ( معلومة جديدة الصراحه ) ، وبطارية
الليثيوم نفس الشي .. إذا قعدت فتره بدون شحن (شحن= ماء) بينخفض
أدائها بشكل كبير!

وهذا يقودنا لنقطه مهمه وهي عمر البطارية !
البطاريه لها عمرين : العمر الافتراضي + الاستهلاك اليومي ..
الاستهلاك اليومي : وهو الوقت اللي تقضيه يومياً في استهلاك البطارية
فيه ناس تقعد بطاريتهم 3 ساعات وفيه ساعتين وسبب هالاختلاف
بنعرفه فيما بعدين

العمر الافتراضي : وهو عمر البطاريه منذ تاريخ إنتاجها إلى انتهائها
وهذا له عمر محدد ولا له علاقه أبداً بطريقة استخدامك لها والعمر هذا
غالباً يكون 3 سنوات .

وفيه ناس تتوقع إنها لو شالت البطاريه من الجهاز ولا استخدمتها
بيطول عمرها الافتراضي .. طبعا هالشي خطأ .. وللتوضيح ناخذ مثال
هالحين اللبن لو شريته ( ياشين اللي يكتب موضوع حزة تقليط الغداء)
اللبن شريته اليوم مثلاً .. وتاريخ إنتهائه بعد أسبوع .. ولنفترض إنك
حطيته في الثلاجه وهو جديد .. ومر أسبوع وإنت ما أستخدمته أبداً ..
هل تعتقد إن اللبن موب منتهي وبيبقى صالح للاستخدام عشانك مافتحته؟!
طبعاً لا .. هو له تاريخ محدد ينتهي فيه بغض النظر إنت استخدمته أو لا ..
بطارية الليثيوم زي كذا برضه .. تموت بعد تاريخ إنتهائها .. لذلك انتبه
لتاريخ الإنتاج إذا جيت تشتري بطارية جديده .

الزبده إنك مستحيل تطيل العمر الافتراضي لكنك تقدر تزيد عمر الاستهلاك
اليومي وهذا اللي عليه العلم

طيب كيف أزيد الاستهلاك اليومي؟!

طبعاً البطاريه في تركيبها الداخلي تحتوي على خلايا cells وكلما زاد عدد الخلايا
زاد عمر الاستهلاك اليومي .. يعني نسمع إن بطاريات تقعد ساعتين وبطاريات
ست ساعات هذا كله سببه عدد الخلايا .. وعدد الخلايا في البطاريات أنواع :
4 خلايا - 6 خلايا - 8 خلايا .
وأكيد كل مازاد عدد الخلايا كل مازاد سعر البطاريه + أدائها .
وتقدر تطلب البطاريه بـ 8 خلايا من وكيل الشركه اللي شاري منهم جهازك .

طيب الحين نجي للسؤال الأهم واللي يشتكي منه الكثيييير وهو أساس الموضوع

يقول لك أنا شريت بطاريه تقعد 4 ساعات .. بس إنها ماتقعد معي إلا ساعه بس
وتخلص .. وين المشكله؟! .. أرشديني يا فوزيه الدريع

المشكله هي قيامك بفعل أشياء تستهلك من البطاريه كثير .. والنقاط التاليه
توضح الطريقه الصحيحه في استخدام البطاريه " الفقره هذي مهمه جداً
وتطبيقها يطيل عمر البطاريه ( شخصياً يوم طبقتها صارت بطاريتي تقعد
ساعتين ونصف بعد ماكانت تقعد ساعه وربع ! )



يتـــبـــع ،،،،،

[غالية78]

[ 1 ]
الخلفية
ألوان الخلفية الفاتحة والفاقعة تستهلك كثير من البطارية لأنها تاخذ أكبر
قدر من الألوان والبكسل ، حتى الخلفيات المتحركة واللي فيها تصاميم
تحتوي على ألوان فاقعة ورسوم كثيرة ، هذي تستهلك برضه!
بالعربي يفضل إن خلفيتك يكون لونها غامق وبدون صوره يعني
إقلب جهازك عزاء

[ 2 ]
سطوع الشاشة
ومعروف إنه كلما زاد السطوع زاد الاستهلاك للبطارية ، لذلك يفضل
التقليل من السطوع وطريقتها إنك تضغط زر fn مع زر f6 وطبعا
تختلف من جهاز لآخر بس المهم إنك تضغط زر fn + زر مرسوم
عليه شمس وسهم لأسفل

[ 3 ]
تشغيل عدة برامج
المستخدم اللي يفتح ثلاثة برامج وكم صفحة النت ، وفاتح الماسنجر
يبربر ولعبة يدهر عليها وملف صوتي يسمعه وبعد كل هذا يقول ليه
بطاريتي خلصت بسرعه؟!
خلصت لأنك استهلكت البطاريه كثيييير ، برضه إذا كنت شابك هارديسك
خارجي أو فلاش - طابعه - ماسح ضوئي - سي دي ، المقصود أي
جهاز خارجي مشبوك مع جهازك بيستهلك من البطاريه .

[ 4 ]
عملية إغلاق جهاز الكمبيوتر تستهلك بطارية!!
الحين إذا قفلنا الجوال وجينا فتحناه عقب ، نلاحظ إن البطارية نقصت!
الشي هذا موجود حتى في اللاب توب ، لأن استهلاك الطاقه مايوقف
توقف تام ، طيب كيف أحل هالمشكله وأخلي الاستهلاك يوقف بمجرد
إيقاف التشغيل؟!

الحل : إبدأ > تشغيل > نكتب " regedit " > بيفتح لنا نافذة محرر
التسجيل وفيها خمس مجلدات > نفتح المجلدات التالية بالترتيب :

HEKY-CURRENT-USER
Control Panel
desktop

بعد مانختار الأخيرة بيفتح لنا في الجهه الثانية " على اليسار " عدة
ملفات ، نبحث عن ملف اسمه " power off active " ، نضغط عليه
باليمين : ونختار تعديل ، نغير القيمه الموجوده من زيرو إلى واحد
بعدين موافق
وبعد كذا بنلاحظ إن البطاريه تصير محفوظه ولا تنقص بعد الإغلاق.

[ 5 ]
البرامج اللي تكون تحت عند الساعه وتكون مفتوحه ، هذي تستهلك
من البطارية لذا يفضل إغلاقها عند عدم الحاجة إليها .

[ 6 ]
المواصفات
طبعاً كل شي زين له ضريبه ، وضريبة المواصفات الزينة للجهاز هي
استهلاكها الشديد للبطاريه ، والمواصفات يقصد بها مواصفات الهارديسك
والذاكره والمعالج .

[ 7 ]
الواير لس
الأشياء السابقه ممكن تكون معروفه لكن اللي استغربته وكان يقوله
( المهندس إسلام عبد الحميد في برنامج حياة تك ) إن البلوتوث
يستهلك من البطاريه ، لأنه يشتغل على الواير لس ويظل طوال
الوقت يبحث عن أجهزه حوله ، لذا ينصح إنك تقفل البلوتوث بعد
ماتستخدمه على طول .

[ 8 ]
الحرارة
الحراره من ألد أعداء البطارية ! ، لأنها تتلف وحدات الليثيوم ،
لو كنت شايل بطاريتك يشترط إنك تحفظها في مكان درجة حرارته
معتدله ، طبعا حرارة الجهاز ما تأثر لأن البطارية مصممه على إنها
تتحملها لكن الحراره الخارجيه تأثر بشكل كبير .
وغير الحراره فيه الرطوبه ، يعني أهل جده والشرقيه تخرب
بطاريتهم بسرعه ههههههههههه << فاهمه غلط

طيب كيف تزيد حرارة البطارية؟!




في الصورة شرح التركيب الداخلي لبطارية الليثيوم ،
والخضراء هي الخلايا ،
والشي اللي فوق الخلايا " يرمز له بالحرف A " هذا يسمى مجس
كهربائي وهو له وظيفه مهمه جداً وهي مراقبة حرارة البطارية !
مثلاً لو تركت جهازك في السياره وتعرضت البطاريه لحراره شديده
وجيت تشغل الجهاز بعد فتره ، بتلاحظ إن الجهاز ماينفتح على طول ،
يقعد فتره بعدين ينفتح ، والسبب إن المجس الكهربائي في حالة تعرض
البطاريه للحراره يمنع تشغيل الجهاز عشان ماتزيد حرارة البطاريه ،
ولا يسمح بتشغيل الجهاز إلا بعد مايبرّد البطاريه لأن لو شغّله ممكن
تتعرض البطاريه للانفجار!

طيب كيف تنفجر البطاريه؟!




هذي الصورة فيها شرح تركيب خلية واحدة ، الخلية حولها
ثلاثة رقائق :
الالكترود الموجب - العازل - الالكترود السالب ، وكل هالرقائق
مغموره في سائل اسمه الايثر .
طيب الحين نشرح كيف تحترق البطارية ، العازل اللي موجود
في الخلية شغلته إنه يعزل الالكترود الموجب عن السالب ،
الحين لو زادت حرارة البطارية بيشتعل الايثر وإذا اشتعل
بيحترق العازل وطبعا إذا احترق بيتلاقى الالكترود الموجب مع
السالب وتلاقيهم ينتج عنه حراره هائله جداً تحرق الخليه كلها
والنار الناتجه عن حرق هالخليه الواحده بتحرق كل الخلايا
المجاوره وبالتالي تنفجر كل البطاريه !

وفي المقطع التالي نشوف ناس مهبل تحرق بطارية الجهاز ، لا بعد
من زود الهبال يوم انفجرت صرخوا بفرح عامر : أوووووه ياااااا

كود:

يتـــبـــع ،،،،،

[غالية78]

طبعاً أي شي بالدنيا لو أجهدته بالعمل يحتاج تنشيط ،
حتى الآدمي اللي هو الإنسان
لو تعب في الدوام وحامت تسبده بيحتاج إلى تغيير جو وتنشيط ،
والبطاريه كمان عاوزه كده
وطريقتها إنك تسوي لها عملية تفريغ وشحن ( كل شهر ) !
وهي إنك تشحن البطارية كامله وإذا وصلت 100% إفصل عنها
سلك الشاحن واشتغل عليها لين ُتستهلك وتوصل 0% ،
" بعد كذا نشحن البطارية إلى النصف أو أكثر ..
وبعدين نشيلها ونشتغل على الشاحن إلى الشهر
الجاي "





هنا فيه شي مهم يجب أن يُذكر ، وهو إن بطاريات الليثيوم إذا خربت لا تُصلح !
لأن الفني اللي بيصلحها لك ممكن يغير ترتيب الخلايا ،
يحسبها مثل بطارية الريموت إذا ضعفت نغير ترتيبهم عشان تشتغل ،
وهالشي ماينفع نسويه في بطارية الجهاز لأن الخلايا مرتبه ترتيب معين
وليس عشوائي وأي تغيير فيه ممكن يسبب مشاكل إذا رجعتها للجهاز!
عاد إذا مايهمك وودك تحترق بكيفك هذي شي راجع لك

وإذا نويت تشتري جديدة لازم تنتبه لثلاثة أشياء :
تاريخ الإنتاج - 8 خلايا - ويفضل إنها تكون من نفس شركة جهازك .



إذا كنت قاعد تتفرج على فيديو بالجهاز ، بتلاحظ إنك بين فتره
والثانيه لازم تحرك الماوس عشان تروح الشاشه السوداء اللي
ظهرت ، وكثير من الناس تظن إن هالشاشه لها علاقه بشاشة
التوقف ، بينما علاقتها الحقيقية هي بالبطارية والشاحن
طيب كيف نجعل هالشاشه السوداء ماتظهر؟!
الحل من خيارات خصائص الطاقه ، وفيها أشياء ثانيه تقدر تعدلها،
إذن هيّا بنا نلعب بخيارات الطاقه

* تقدر تدخل لها بطريقتين :
1- كليك يمين على أي مكان في سطح المكتب > خصائص > تبويب شاشة
التوقف > الطاقة
2- كليك يمين على رمز البطاريه بجوار الساعه > ضبط خصائص الطاقة



الشاشة السوداء :
من " إعدادات نظام الطاقة - محمول \ محمول صغير "
بعدين من " إيقاف تشغيل جهاز العرض " : نختار أي وقت نبغاه
وطبعاً أقصى شي هو : " بعد 5 ساعات "
الخيار هذا نسويه للاثنين : الكهرباء + البطارية .



من هنا تقدر تعدل " إنذار البطارية الضعيفة "
أكثر الأجهزة يجيها إنذار إن البطارية فارغه إذا وصلت 10%
وتقدر من هالنافذه تغيرها وتخليها زي ماتبي :
0% أو 20 % ، آز يو لايك



من هنا تشوف كم باقي على البطاريه ويقضي شحنها
فيه هنا شي مهم ، يجي يعطيك إن الباقي مثلا ساعتين
وتتفاجأ بعد ساعه بس إنه يقول خلاص البطاريه فضت
والسبب طيب؟! .. السبب إن الوقت اللي يعطيك إياه
هو في حالة الاستهلاك الطبيعي ، لكنك تزيد الاستهلاك
بتشغيل برامج كثيره وهذا اللي يقلل الوقت .



من " أزرار الطاقة "
تقدر تغير خيارات " عند إغلاق غطاء جهاز الكمبيوتر المحمول "
فيه خيارين : وضع استعداد " وهو اللي إذا رجعت تفتح الغطاء يطالبك
بكلمة مرور وهذا طبعا ًفي حالة إنك حاط كلمة مرور لجهازك "
بس عيب هالخيار إنك إذا اغلقت الغطاء ينقطع الاتصال بالانترنت .
الخيار الثاني : عمل لا شيء .


للفائده قمت برفع الموضوع على شكل كتاب الكتروني " صيغة pdf "


كود:
http://www.mediafire.com/download.php?oyl1j1fjnzz


يتـــبـــع ،،،،،

[غالية78]

ملاحظات مهمه

<< توها تتفطن

(1)

كثير منكم فهم إنه إذا شال البطاريه بتخرب أكيد .. وطبعا البلى
من شرحي

اللي ذكرته في الموضوع إنه ماينفع تشيل بطاريتك فتره طويله
لكن ينفع تشيلها فتره قصيره

وفي مثال الورده ذكرت إنك إذا ما أسقيتها ( فتره من الزمن)
وكذلك البطاريه .. تخرب إذا تركتها (فتره طويله) بدون استخدام .
لكن إذا كنت شايلها فتره قصيره الوضع عادي !

بس لازم كل شهر أو 3 أسابيع تقريبا تستخدمها .. أما إنها تقعد
فتره أطول بدون استخدام .. هنا تكون مشكله .

طيب متى أشيل البطاريه ؟! (فتره قصيره طبعاً)

هذا إذا كنت تشتغل يوميا على الجهاز وبشكل متواصل ..

طبعاً الناس في استخدامهم للجهاز نوعين
1- فيه ناس تشتغل على اللاب توب كل ثلاثة أيام تقريبا أو إذا
فتحوه يومياً يستخدمونه ساعه أو ساعتين فقط !

2- وفيه ناس يومياً تفتح جهازها وطول الوقت تتركه مفتوح ويشتغل!
هذا النوع الأخير هم اللي يشيلون البطاريه ويشتغلون على
الشاحن ( مثل ماذكره الأخ ملك )

النصيحه هذي تذكر كثير في مقالات إستخدام البطاريه .. لكن
شخصياً من يوم شريت الجهاز ماشلت البطاريه أبداً وللحين تشتغل
بدون مشاكل رغم إن لي سنتين و5 شهور أستخدمها
واستخدامي للجهاز ليس من النوع الأول ولا الثاني .. لأني مره أقعد
أسبوع ما أفتح جهازي ومره يقعد يومين مفتوح

بس حبيت أقول لكم هالمعلومه تبرئه للذمه

(2)

مع كل جهاز لاب توب يجي كتاب " دليل المستخدم " User's Manual
وفيه فصل بالكتاب اسمه " فصل الطاقه "
قرائته تزيد معلوماتك عن الشحن والبطارية ، و شرحه واضح وممتاز .

..... منـــــــــقــــــــول .....

[اليزيدي]

جزاك الله خيرا

[اليزيدي]

جزاك الله خيرا

[غالية78]

المشاركة الأصلية كتبت بواسطة اليزيدي جزاك الله خيرا

وإياك أخوي

[afadeil]

يعطيك الله العافيه

[غالية78]

المشاركة الأصلية كتبت بواسطة afadeil يعطيك الله العافيه

المشاركة الأصلية كتبت بواسطة الفرج من ربي معلومات رائعة يعطيك العافية

المشاركة الأصلية كتبت بواسطة راضيه بقسمة الله شـكــ وبارك الله فيك ـــرا لك ...

[الفرج من ربي]

معلومات رائعة
يعطيك العافية