[مذهله-3]

السلام عليكم ورحمة الله وبركاته

هل يمكن لي توكيل محامي أو محاميه دون علم ولي أمري (وآلدي) ؟؟؟

الموضوع حصلت مشكله بيننا نحن و أبناء عمي وتقدمنا بشكوى للشرطه
ثم تنازلنا في اليوم الثاني لأن القضيه صارت ضدنا ونحن البريئين
وفي اليوم الثالث والرابع كانوا أبناء عمي الأخرين الذين لم يكونوا في القضيه
بالتحرش لفظياً ضد أخواني وتتم تهدئة الوضع من قبل عمي وابوي
واخواني متعبعين اسلوب الحقران يقطع المصران

المهم أنا أبي اركب كاميرات مراقبه ع البيت مرخصه لحمايتنا .كيف السبيل لذلك ؟
والسؤال الذي كتبته اول الموضوع .

كنت بكتب الموضوع في منتدى استشارات قانونيه بس غير مسموح لي

اتمنى الرد لمن عنده الجواب المفيد ولكم شكري .

[موسى عبدالعزيز]

أعانك الله عليهم

[مذهله-3]

توقعت ألقى ردود لكثرة المثقفين والمتخصصين في المنتدى

[مذهله-3]

الموضوع جدي ممكن ألقى رد

[أزاهير الخريف]

تـــحيااتي لكي اختي ... انا أزاهير من السلطنه الشقيقه ....

...شوفي ماداام والدك حي وعندك ...اخوان والقضيه ماتستااهل وهم ابناء عمومتكم ... فماله داعي المحاكم

....لكن واضح ان في خلل بينك وبين ....اهلك .... كيف هم يرضون وانتي ماترضين؟؟؟

وشو القضيه ؟؟؟ وعشان ايش الكاميرااات ؟؟؟؟

هل السسسالفه قووووووووووووووووووووووووووووووويه لهالدرجه ؟؟؟؟؟؟؟؟؟

سسسالفة قووووويه ؟؟؟؟؟؟؟

[أزاهير الخريف]

..اتمنى من المعنيين ... والفااهمين بهالامور التحرك واجابة الاخت على تسسساؤلاتهااا ...

[مذهله-3]

القضيه كالتالي :-

يوم الأحد الماضي كان عندنا غدى على سلامة أخوي محمد ( كان مسوي عمليه وسويت له غدى )
وكان عائلي تغدينا واستاسنا قال مبارك أخوي لسعد أخوي رح الخيمة وجيب لعبة الزهرة ( الخيمه يجتمعون فيها الشباب قبال بيتنا )
وجاب سعد اللعبه والعبوا وخلصوا ورجعوا اللعبه
بعد صلاة العصر جا ولد أختي يسأل عن نرد اللعبه لأن عمه عبدالرحمن يسأل عنه والكل رد ما ندري
( أختي متزوجه ولد عميالكبير ) كل شوي يروح واحد أو وحده من عيال خواتي ويرجع وهم خايفين من عمهم
ويقولون وين النرد واتهم عبدالرحمن سعد أخوي وسعد يقول ما ادري عنه
أرسل له كلام مع ولد أختي والله لحق هالشنب إذا ما احطك بشنطة السيارة وأستمر التهديد طوال العصر
بعد صلاة المغرب أرسلت سعد في حاجه وتأخر وكان مبارك توه صاحي من النوم وما يدري عن التهديد
جا سعد وهو يبكي ويقول حطني عبدالرحمن في الشنطه ومسكني وخلا البزارين يتفلون علي (وانتم بكرامه)
طلع مبارك يتفاهم معه وليه يسوي كذا لاقى ابوي وقال ابوي انا بحلها واخذ سعد ووداه لأم عبدالرحمن يعلمها بالقصه
مبارك اخذ سعد وطلع وقال له رح اكسر زجاج السيارة اللي حطك فيها (سيارة عبدالرحمن) وقال لمحمد أخوي هج بسيارتي
ومسك مبارك ساطور وطلع يبي يكسر الزجاج جاووو عيال عمي كلهم وطبوا على مبارك وضربوة
أنا رحت افك مبارك وضربني عبدالرحمن بكوع يده وطحت على سيارة جيرانا
ورحت ابكي ادور ناصر زوج اختي يفزع لأن الجيران كلهم واقفين يتفرجون
محمد رجع يوم شافهم طابين على مبارك وفي هاللحظه ألتفوا على سيارة مبارك وكسروها
بالساطور حقنا بعد ما خذوه من مبارك (ومبارك ما استخدمه ولا حتى كسربه زجاج السيارة)
محمد من الخوف هج بالسيارة بعيد وطلع خارج المدينه وراح لأقرب مركز شرطه في مدينه مجاورة
وأبوي كان رايح لأمهم يعلمها مسكوه وسكروا عليه باب بيتهم عشان ما يطلع ويفك مبارك
ما ادري من استدعى الشرطه وهدى الوضع
أبوي قدم بلاغ للشرطه ان محمد صغير وما يعرف يسوق
وانا اتصلت على الهلال الأحمر ياخذ اخوي لأنه ينزف من خشمه وفي هلاثناء انا اغمى علي
والهلال الاحمر اخذنا أثنينااا
وطلبت الشرطه في المستشفى وجا الظابط يحقق معي
وا جاوو عيال عمي اللي ما كانوا موجودين في الحدث المستشفى يبون يضربون اخوي لاقو ابوي وهجموا عليه
وفكتهم الشرطه ولما قال ابوي للضابط لما جا وقال له الشرطه يشهدون قالوا لا ما نشهد على شي
و تم إيقاف عبدالرحمن لشكوانا ضده
ومبارك أخوي بتهامه أنه ضرب عبدالرحمن وقطع اصابعه (مع ان مبارك كان مضروب واللي يضربونه خمسه وما بيده شي خذوا الساطور منه )
ومحمد بيتهمة انه صدمهم بالسيارة وهج (مع انه هرب بالسيارة خوف على السيارة )
من بكرة قال الضابط المدير للشرطه انه القضيه علينا ومحمد ومبارك بيرحلون للسجن وسعد للاحداث
لأن الساطور لنا (مع ان البصمات بصمات عبدالرحمن واللي استخدمه عبدالرحمن)
وسعد لأنه كسر زجاج السيارة
واتهمنا أنا وخواتي بقذفه هوا وزوجته (بكل صراحه حنا دعينا عليه بقول حسبي الله ونعم الوكيل فيك فهل تعتبر قذف)
وقال لبوي حنا نتنازل وهم يتنازلون ولا يسجنون اخوانك ورحنا وتنازلنا و وقعنا على تعهد كلا الطرفين .

بعدها كل يوم يتحرشون في اخواني ويهدون الوضع ابوي وابوهم سواء بالكلام او التفحيط.

هم عيال عمي اصحاب سوابق وخريجي سجون وفيهم غيرة مننا لأننا اخلاقنا حسنه وجامعييين
ويبون يخفقون مبارك لأنه جامعي وماله سوابق

ودائما عبدالرحمن واخوه مبارك يتحرشون فينا بشكل او بآخر ويطلعون عينا اشاعات
و اقل شي يسونه لمبارك لما يلبق سيارته يجون يسكرون عليها بسيارة ابوهم عشان ما يتكلم
وابوي يهدي الوضع ويعطيه سيارته

أنا مليت من هالعيشه وبما اني صرت قادره حالياً على توكيل محامي أبي منكم النصيحه .

الله يجزاكم خير ..

[مذهله-3]

أزاهير الخريف

حياكـ الله وبياك وأشكرك ع مرورك وردك حفظك الله من كل مكروة

أنا ما أبي أبوي يدري لأنه راعي مرض وشايب في السبعين من عمرة
وكذلك أمي (الله يحفظ والدي و والدينك من كل سوء)

أما أخواني محمد وسعد صغار أما مبارك فهوا يعلم بكل خطواتي .

[عايش بدونك]

شـكــ وبارك الله فيك ـــرا لك ... لك مني أجمل تحية .

[ام ولد وبنت]

بسم الله والحمد لله والصلاة والسلام على رسول الله
السلام عليكم ورحمة الله

اختي الغالية قصتك قصة
وسالفتك سالفة
وبالاول وقبل كل شي نقول في التأني السلامة وفي العجلة الندامة صح ولا لا
والحلم والاناة صفتان يحبهما الله ورسوله صلى الله عليه وسلم كمل ذكر في الحديث
اللي اقصده مو كل مشكلة طراخ محامي وبعدها قضية
ثانيا شكلك انتي اكبر اخوانك عشان كذا منقهرة عليهم ؟؟؟
وثالثا انتي تحتاجين ترتبين موضوعك مع ابوك تجلسين تسمعين له مو تتكلمين وتفهمين وش بالضبط وجهة نظرة للموضوع وتشوفين حكمته وين
رابعا اذا فعلا انتي اكبر اخوانك لا تمشينهم هالطريق وتشجعينهم على المشاكل والقضايا
خامسا بالنسبة للموضوع اللي تنازلتو عنه في الشرطة خلاص ترفعين عليه قضية انتم اصلا تنازلتو ولا تم تحقيق ولا شي ثاني وصار تعهد
سادسا اذا كان قصدك على المضايقات اللي بعد التعهد هاذي ما تحتاج محامي تحتاجين بلاغ عند الشرطة بس لازم يكون عندك بينه (لان البينه للمدعي والحلف على المدعي عليه)
سابعا وبعدين ترا المحامين ما بيدهم العصا السحرية اللي تكسبك القضية
ثامنا اذا ودك استشارات قانونية تقدرين تستشيرين في المكاتب بس انا ما زلت لا ارى قضية انا اشوف هي بلاغ يتم عند الشرطة
تاسعا القوانين هاذي وامكانية توكيل محامي موجودة في كذا موقع يختص بالشؤون القانونية السعودية
عاشرا وهو سؤال خطر في بالي ليش اخوك ما يوكل المحامي او ليش اخوك ما يروح معك ترا للمعلومية انتي تحتاجين معرف ومحرم مو شرط نفس ولي الامر يعني اخوك ينفع يروح معك كمعرف ومحرم فهمتي

ارجو ان لا اكون تدخلت فيما لا يخصني واكون افدتك بما لدي من معلومات
وذا فعلا تبين تحمين اهلك واخوانك احسن طريقة هي الدعاااااااااااااااااااااااء وحصني انفسكم واهلك واكثري من دعاء اخر الليل ودعاء رسول الله صلى الله عليه وسلم
ربي اعني ولا تعن علي وانصرني ولا تنصر علي وامكر لي ولا تمكر علي واهدني ويسر الهدى لي وانصرني على من بغي علي .......الدعاء ..

وسبحان ربك رب العزة عما يصفون وسلام على المرسلين والحمد لله رب العالمين