[ام محمد/]

السلام عليكم ورحمـة الله وبركـآته

أول شي أبي أكلمكم عن فضل النصيحـه او فعل الخير ولو شي بسيط ..
تأكدي أن اي خيـر او نصيحـه تقومين فيها ..! راح تترجم لك بشكل حلو ماتتصورينـه ..
راح يجي يوم وتضيق فيك الدنيـا وتطيحين بمشاكل وهموم مالها أول ولا أخر.. وتفرج لك بشكل أشبه بالسحـر ..
فقــط ..! أدعـي الله بكل عمل خير سويتيـه لأحد واللي أقولـه عن تجربـه لي ما أنسـآها ..

العام سويت عمليـه جراحيه وخايفه منها لأن نسبة نجاحها تحت الـ 90 % .. دعيت الله بكل خير سويته هذا من غير التزامي بالصدقـه.. ووقتها كنت أسمع بشارات حلوه عن بنات قد ساعدتهم وعاونتهم ..
وربي يابنات أن نسبة العمليه نجحت فوق النسبه اللي توقعوها الأطبــاء ..
والكل تفاجأ من هالشي (أهلي .. صديقاتي .. خوالي وعمامـي ............ ألخ)
كلن يقول كانت نسبتها قليله !! كيف أرتفعت كذا؟؟؟؟؟؟

عشان كذا تأكدوا أن كل شي ينكتب هنـا هو بميزان الحسنات ودعوات الكل ..
وأن الجميـع ماينسـى أي نصيحه تقدمينها لو كانت بسيطـه ..
أغلب البنات اللي هنـا أعمارهم صغيـره أو نقدر نقول كبار !! بس ماعندهم أحد يوعيهم ويفهمهم ..

ألحين راح أعطيكم أساسيــآت تهم كل فتـاة ( عازبــه .. مخطوبــه .. متزوجــه .. مطلقــه ....ألخ ) الفايده للجميع بأذن الله ورح تلاقين الأشياء اللي ماتعرفينها من قبل وحبذآ لو تطبقين كل اللي فيها .. وصدقينـي هذي هي الأحلام والأمنيات الطبيعيـه لكل بنت في هالحيـــآه ..

[ام محمد/]

أولآ : الأيمـان باللـه ..

الأيمان أنك تكونين مليااانه تفاؤول من داخلك ..

مؤمنه بقضاء الله وقدر وأن كل شي بقضاء وقدر ..
أستغرب أن فيه بنات تتذمـر وتزعـل لأسباب تتعلق أولآ وأخيرآ بالقضاء والقدر ..

وعلى سبيل المثال لآ الحصـر/

- تتمنى تدخل قسم في الجامعه .. وتتبخر الأمنيـه بقسم ثاني ..
- تتمنى الزواج من شخص بعد مايتم خطبتها عليـه وتتفركش وتخرب .. وتتزوج غيــره ..
- تتمنـى الأنجاب بفتـره وما يكتب لها الله الرزق بأطفال ..
- تتمنى الوظيفـه بالرغم من ان عندها شهادات .. ومع ذلك ما تلقـى لها أبدآ ولو مهما سعت ودورت ..

المفروض كل حدث يصير لك تقولـي (ربي ماكتب لخيـره منه .. ربي مؤجـل رزقـي لحكمــه منه ....) ..

صدقيني لو كان قلبك مع الله وبكل حالاتك .. يغنيك هالشي ويريحك من كل هم ينزل عليك ..

وحده من بنات عمي تخرجت من الجامعـه وظلت 4 سنوات جالسه بالبيت .. بدون وظيفه وزواج!

طبعآ الكل يحس أن وضعها مو طبيعي والكل يسأل ليه ماتوظفت؟ ليه ما تزوجت؟ مع انها أسباب بيد رب العالمين وهذا شي أكيد ..
البنت صابره وموكلها أمرها لله ومطنشه نظرة وكلام الناس لها ..
بعد هالسنوات الله رزقها بالوظيفه والزوج بنفس الوقت!!
مو أي وظيفـه .. ومو أي زوج .. والله شي تحسد عليـــه ..
الرجل متدين وأخلاقـه عاليـه والكل يتمنـى يناسبه .. والوظيفه براتب كبير فوق الـ 5 ألآف ..

سبحآن الله ....!!

صبرت ونالـت خيــر ....

راح أقترح عليكم برنامج يومـي حلـو.. استمري عليـه وعودي نفسك تعالجين مشاكلك من بدايتها باللجوء ألى الله ..!

ومن ثم أخذ الرأي والمشوره من أهل أو أصدقاء أو أي حد ..
بشــرط أنه راح ينفعـك ويوجهـك صح .. لا تشتكين لمجرد شكوى وبس عشان مايتمللون منك الناس ويحسونك أنسانه تدور حول دائره مفرغـه ..

الرنامج هو :-

* الصدقــه ..

تصدقي للمحتاجين والفقراء ولو بخمسـه او عشره ريال .. وبأي مكان تتواجدين فيه وتحسين ان في مجال انك تتصدقين ..

اذا ماتقدرين عطي أبوك أو أخوك أو زوجك ووصيـه يتصدق لأي محتاج .. وخليك حريصه على هالشي!
اتصدقي بكل اوجه الصدقه من مال أو من اغراض في البيت أو من ملابس ..
سوي جمعيه للصدقه للناس المحتاجين مع أهلك وصديقاتك يعني كل شهـر جمعي مبالغ بسيطه وخذيها للجمعيات أو عطيها محتاجين من اللي حووولك ,
وحتى الابتسامه تعتبر صدقه .. و تونيس المستوحش صدقه وغيره وغيره .....
صدقيني كل كربه تنفرج لما ترفعين يدينك لله وتدعين / يارب أأجرني بكل صدقـه تصدقت فيها بحياتي ..
وربي مايخيب دعائك ولا يرده بأذن الله ..

* الأستغفــار ..

قال الله سبحانه وتعالى:

( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً{10} يُرْسِلِ السَّمَاء عَلَيْكُم مِّدْرَاراً{11} وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَاراً )

رددي الأستغفار بكل وقت و كل يوووم 1000 مره ..

سواء كنتي تشتغلين بالمطبخ ,, أو في السيـاره ,, أو السـوق ,, أو لما تواجهك مشكله ,, أو لما تمري بضائقه ماليـه ......ألخ ..
وكلي أمورك لله وأستمري على الأستغفار .. وما يحتاج أعلمك فضلها ونتيجتها لأنه شي يعجـز عن الوصف ..

* الدعـــاء ..

قال تعالى (( أمن يجيب المضطر اذا دعاه و يكشف السوء)) النحل 62

أول شي حطي ببالك أن الله سبحانه قادر على أجابة دعائك ..
ولا تستعجلين الأجابـه لأن بعض الدعوات تكون استجابتها بتكفير الذنوب ..
رددي دايم [لا اله ألا انت سبحانك أنتي كنت من الظالميـن ] ...
وسيد الأستغفـار [ اللهم أنت ربي لا إله إلا أنت خلقتني و أنا عبدك وأنا على عهدك ووعدك ما استطعت ، أعوذ بك من شر ما صنعت ، أبوء لك بنعمتك على و أبوء لك بذنبي فاغفر لي فإنه لا يغفر الذنوب إلا أنت ] ..
و هذا دعـاء أرددهـ دايم والله يشهد عمري مادعيت به الا واستجابت مهما كانت الدعوه مهمه او تافهه ..
[ اللهم اني اسالك بان لك الحمد لا اله الا انت / المنان يابديع السماوات والارض ياذا الجلال والاكرام / ياحي ياقيوم /
أني أسالك .............. ]
(ثم ادعي بما شئتي من امور الدنيا والاخره ) ..

و تحري اوقات اجابة الدعاء مثل..

[ليله القدر .. جوف الليل ... وقت السحر.. عقب صلوات الفريضة..بين الاذان و الاقامة ..
عند نزول المطر.. يوم الجمعة .. في السجود.. يوم عرفة ... عقب الوضوء..في شهر رمضان ..
في مجالس الذكر.. عند صياح الديك ... حال اقبال القلب الى الله و اشتداد الاخلاص و عند رقة القلب ...
عند الاضطرار... عند وقوع الظلم عليك... حال السفر ... حال الصيام ... الدعاء في الحج و العمرة ].....

[ام محمد/]

* النوم على وضـوء..

توضـي قبل النوم وأقرأي المعوذات وآية الكرسي وأذكار النوم ..

و حاولي ماتسترجعين مشاكل واحداث سيئه تطيّر النوم من عيونك ..
فكري وقولي/ وش فايدة التفكير ألحين؟؟؟؟ راح تنحل المشاكل وأنا بفراشي؟ كل شي راح يتعدل بهاللحظه..؟
أنسي كل شي وتعوذي من الشيطـان وخلي نومك هادئ ومريح ..

* قيـام الليـل ..

الله ينزل في الثلث الاخير في الليل ويقول: هل من تائب فاغفر له وهل من سائل فاعطيه وهل من داعي فاستجيب له ،،

الله بجلالة قدره وهيبته وعظمته نازل لك انتي نازل عشانك نازل يقولك:
أسالي وانا اعطيك ..
إدعي وانا بستجيب لك ..
توبي وأنا بغفر لك ...
فـ ادعي الله من قلب .. وصيحي فضـفضـي له .. اشكيله حالك،،
صدقيني بيتحقق كل اللي تبغينه و ثقي فهالشي لأن سبحانه قال: [انا عند حسن ظن عبدي بي] ..

* قراءة سورة البقــره ..

وخلي بالك مع القراءه وحطي بنيتك إنك تقرئينها لغرض كذا وكذا .. مثل تتزوجين تحملين تتوظفين .........الخ

ولما تخلصي من قرائتها يكون جنبك علبة مويه (أنفثي فيها وأقرأي المعوذات ثلاث مرات) وأشربيه ..

وأغلب البنات سبحان الله! تكون حلوه وأخلاقها عاليـه .. بس ربي مايكتب لها الزواج ..

او تتعسر امورها في خطبه أو وظيفه أو أنجاب .. > هي مجرد حالات نسمع فيها ونستغربها !!
أكيد خيـره من الله .. ويمكن أختبار وامتحان لها بأن تراجع نفسها وتقوي أيمانها وتواصل الدعاء والأستغفار ...

نصيحـه /

اللي متضايقه بحياتها تقرأ سورة البقره
اللي حياتها الزوجيه كلها مشاكل تقرأ سورة البقره
اللي متزوجه من زمان وربي مارزقها لذريه تقرأ سورة البقره
اللي ودها ربي يرزقها الزوج الصالح تقرأ سورة البقره
اللي مريض وتعبان يقرا سورة البقره
اللي عندها اي هم او غم او اي مصيبه يقرا سورة البقره

أو ممكن تشتغليها بالمسجل وتسمعينها وأنتي تقومين بشغل البيت او جالسـه ع النت ..

ومعروف أن البيت اللي تشغل فيه سورة البقره مايدخله الجن ولا يقرب له الشيطان ان شالله ..
السوره هذي عظيمـه وخليك حريصـه على قرائتها او سماعها دايم واهم شي لا يوسوس فيكم ابليس وتقولون طويله....

هذا رابط لسور القرآن بصوت الشيخ احمد العجمـي ..

حملي السوره وحطيها في جوالك او الاب توب وأسمعيها دايم

كود:

http://www.islamway.com/?iw_s=Quran&iw_a=view&id=21

~* قد ماتقدرين أعملي لو جزء من هالنقاط عشان يتقوى أيمانك بالله وصدقونــي راح تشعرين براحة بال وأرتيـاح بكل جوانب حياتك مهمـا كانت عسره وصعبـه ... ~*

ثانيــآ : الأيمــان بالـذات ..

الله خلق بداخل كل أنسان طاقه كبيره عشان يوصل لكل اللي يبغـآهـ .. خلق فيه قوة عظيمة تمحي كل ضعف وأستسلام ..

ومن ثم عطانـا نعمة العقل وميزنـا عن باقي خلقه ..
الأيمان القوي بهذي القدرات راح يخليك تحققين كل احلامك ..

والأحلام ماتحقق ألا أذا كنتي تملكين صوره ذهنيـه حلوهـ عن ذاتـك ..

ويكون بأعتقادك انك انسـآنه قادره على أنك تصنعين فرق كبير وتأثرين في غيرك .. وان قدراتك وطاقاتك مالها حدود ..

لازم تعملين على اصلاح نفسك وتطوير شخصيتك وأستدراك أخطائك .. لأن كل شي يبدأ من الداخل ..

واعتبري اليوم هو نقطة انطلاق لكِ وإذا ماكانت حياتك مثل اللي تخيلتيها أو تمنيتيها !! واجب عليك من اليوووووم ابتكار حياة جديده تناسبك .. وفكري كيف راح تحققينها ..

[ام محمد/]

** أبدأي بتحقق اهدافك بالحيـآه..

دايم لما نسأل أي بنت (وش هدفك بالحياه...؟؟)
تقول بتردد: ممممم مافيه شي معين كثيره أهدافي .. أو تقول: ما أدري ..
تواجهون صعوبه بتحديد الهدف .. ليــه؟؟

- التخرج من المدرسه بنسبه عاليـه ..
- الحصول على شهادة البكالوريس ..
-الحصول على شهادة المايجستير ..
- الحصول على وظيفة مناسبه ..
- الترقيـه في مجال العمل ..
- الزواج والأستقرار مع الرجل المناسب ...............ألخ

هذي بعض من الأهداف والكل يسعـى لها.. أعتمديها بس أمشي حبه حبه لما توصلين لقمة الحيــآه الناجحه اللي صممتيها ..
ولو كان هدفك بسيط المهم يكون بحدود المعقول والواقـع و تعبري عنه بصوت عالــي ولا تخجلين من حد ..

أنا جربت هالطريقه و صارت حياتي من أحسن مايكون وكل هذا بفضل ربي ومن ثم تصميمي لنفسي الحياة اللي أبغاها ..
لما اخطط لهدف أسعـى عشان أحققه .. ولما يتحقق أسعـى للهدف الثاني ألى الثالث ألى الرابع .......... سلسلة أهداف مالها نهايه !
متفائله بأني راح أكسر الدنيا بطموحاتي ولا أنتهـي عند واحد بس ..

ولو كان اللي حولك مايشجعون اهدافك .. ما عليـه أنتي شجعي نفسك وخليك قريبه من اللي يشجعون طموحاتك وتقوي فيهم .. مثل أبوك او أمك أو زوجك ! لا تخلين اليأس يسيطر عليك لأن نتيجه تحقق اهدافك راح تسعد أهلك أو اللي حولك بالمقدمـه !!
وراح تذوقين طعم وحلاوة الأنتصـار بعدها وتنسين كل أحباط واجهتيه .. بس خليك واثقـه من نفسك وأهدافك وواصلــي أحلامك وطموحاتك ولا توقفين عند عثره وحده ..

أنصحكم بقراءة كتاب (عظمـاء بلا مدارس) .. شوفي أغلب المشاهير والعلماء كيف كانت بداياتهم .. وربي شي يحبس الأنفاس من روعته ..!
كيف بدأو من الفقر والحرمان والجوع وبالأخير نالوا شهادات ومكانات عاليـه وحصدوا الملايين والسمعـه الحلوه من وراء هالشي ...
وانتم الغالبيه منك ربي منعم عليكم بالخيــر بديرة الخيــر ولا ينقصكم شي ولله الحمد ..
بس حددي أهدافك وحققيها بأقرب وقت ......


** حاربي كل الصعوبات اللي تواجهك ..

راح تواجهين صعوبات وعقبات ممكن تأخرك وتقّيدك ..
لكــن! خلي ايمانك بقدراتك أقـوى وأكبر من هذي الصعوبات ..
اذا تبين تعيشين حياة سعيده لازم تفكرين وتتصرفين بشكل أكثر أستقلاليـة ..!
هالشي راح يعطيك أحساس بالأرتياح لأنك ماتضطـرين تشرحين مبرراتك للناس عن شي تعملينـه ..
يكفيـك الراحـه لما تأدين أي عمل وتأكدي أن (الأستمتاع) هو أقوى مبرر يمكن أن يتوصلون له الناس ؟؟
قراراتــك ..!! خذيها بنفسك وتصرفي بحريّـه ولاتجبرين نفسك على أنك تدافعين قدام الناس ..
بالنهايـه .. كل شخص يعيش حياته بالطريقه اللي تعجبه .. واللي ينتقدك بأشياء معينه تأكدي انه بحياته يسوي اللي أكبر منها وأعظم ..

على سبيل المثال لآ الحصـر/
في بعض المجتمعات عندهم عيب أن البنت تشتري لاب توب .. او عيب تستخدم النت > لا تستغربون باقي فيه ناس بهالعقليات ..
تعرفت على وحده في منتدى من فئة ذولا المجتمعات ... طبعآ تستغربون كيف وصلنـا لبعض؟؟؟
تقول/ بالبدايه جمعت من مكافئاتها لين جابت حق الجهاز وأشترته .. كل أهلها وقرايبها عارضوا أن كيف بنت عندها لاب؟؟
بصعوبة أقنعت اهلها وحطتهم قدام اللأمر الواقع والباقي طنشتهم .. بس واحد من أخوانها قالها بالحرف الواحد: أذا دخل النـت البيت أنا أطلع منه!!!
فتره بسيطه وراحت أشترت كونكـت وبدأت تستخدمه .. > طبعآ كل ماتبغى شي ينرفض بدون أي مبرر وهذا اللي يضايقها ..
لما شاف أخوها الكونكت ماناقش ولا عصب بس سألها : من وين جبتيه؟؟
قالت ببساطه: اشتريته لأني أحتاجـه ...
تحلف هالبنـت أن بعد شهور من هالصعوبات وصلت لدرجـه ان أخوانها هم يشحنون لها شريحة الكونكت .. وبعدها حطوا DSL بالبيت عشانها ..
وأذا خرب جهازها يصلحونه على حسابهم ..

> شوفوا كيف تمسكت بقراراتها ولا تنازلـت عن أي حق من حقوقهـا لأن معروف أن اللي يتنازل مره راح يتنازل لأكثر من مره ...



** نمـي ثقافتـك وأكسبيها من كل المجالات ..

أقرأي .. أقرأي .. أقرأي ..........

أقوى مؤشر بـأهميّة القراءة.. هو الأمر الإلهي للنبيّ محمد صلى الله علية وسلم بكلمة "اقــرأ" ..
في بداية أوّل آية سماوية نزلت عليه ..
وفيـه دراسات وضحت أن حوالي 70% من المعلومات التي يتعلّمها الإنسان، ترجـع له عن طريق القراءة ..
أما الباقي فـ يتعلّمه بالبحث والسؤال والتأمّل .. والاستماع .. والربط .. والاستنتاج .. والتجربة.. وغيرهـ من المواقف الحياتية المختلفة ..

واللـه يابنــات مايموت العقـل ويسبب لنا ضعـف في تصرفاتنـا غير قلة القراءه ..
الفتـره الأخيـره أغلب أستخدامتنـا للكمبيوتر والنـت .. فـ كثير يكتفون فيها بزيادة ثقافتهم عن قراءة الكتب أو الصحف اليوميه اللي صارت قليل ماتقرأ يعني مو مثل قبل وللأســف ..
البعض يستخدمها صح وبشكل واسع وذكـي .. والبعض يستخدمها خطأ وبشكل محدوووود "شات وفيس بوك ...." بس..

القراءه لها فائـده بأنها تطرد الوسواس والهم والحـزن ..
لما تنشغليـن بقراءة كتاب أو أي موضوع معنـاها أنتي مشغوله عن التفكير بأي شي ثاني ...
وكمان حلوه بأنها تعطيك طلاقه باللسان وتتدربين عن الكلام الواضح المتوازن ..

الترم اللي راح في الكليـه كان عندنـا بحث نقدمـه شرح قدام الدكتوره .. فـ كل بنت اشتغلت على بحثها وطلع من أحسن ما يكون ,,
بس وقفوا قدام مشكلـه كبيره بالنسبه لهم وهي / الجرأه بالوقوف قبال الطالبات + المهاره في القراءه بصوت واضح ومسموع ..
وربي ما أبالغ أن 50% من البنات اخفقـوا بهالشغلـه لدرجه أن الدكتوره خسفتهم بالدرجـات ولا همها عروض البروجكتر اللي تكلفوا عليها ولا أوراق البحث المطرزه والمزينه بأفضل الأشكال ..
تصوروا يعني توقف طالبه وتقرأ بهالطريقه :[ أأأأأ .. ان العلاج ... أأأأأ... بالتحليل ..أأأأ.... النفسي ...أأأأ... يهدف ...أأأأأ... إلى ...أأأأأ.... مساعدة ..............]
صدقونـي ما أبالغ .. البنات ماتطلع علومهم ألا بهالمواقف اللي تحتاج تساعد نفسها بأي طريقه لكن تعجـز.!!
مو لضعف موقفها .. لأ ... لأنها تفتقـر لكثير من الأساسيـات والمهارات ... أقلها القراءه ..
حتى أذكـر الدكتوره صارت تصرخ على الطالبات بأعلى صوتها تقول/ أقرأووووووووو أقرأووووووووووو وصلتم للعشرين سنه وأكثر ولا تعرفون تقرأون عدل؟؟؟؟

أنـا أستغرب من اللي تقول (ما أحب القراءه .. ما اطيقها .. أتملل منها .. وش الفايده خلصنـا دراسه وأنتهينـا ) ..
وتكبر على هالكره والنتيجـه !! أن قناعاتها وأفكارها في أغلب الأشياء غلط .. وتصرفاتها ببعض المواقف أكبر غلط ..
ومصره ان القراءه مارح تضيف لها شي بحياتها ..
ما جاء ببالكم فوائدهـا بأنها تنمـي عقـلك وتصفي ذهـنك وتعطيك فائده من تجارب الناس يعني تصير ثقافتك واسعـه بأشياء خارج نطاق أسرتك ومجتمعـك .. ...
حلو أن لما تتناقشين مع احد في موضوع تقولين / قرأت في الكتاب الفلاني أو قراءت في الصحيفه الفلانيه .........
حتى مستقبلآ أذا تزوجتي راح يكون شريك حياتك فخور فيك بأن زوجته تملك ثقافه عاليـه وعندهـا أسلوب بالكلام والأقناع ......ألخ ..
يعني الفائده لك أنتي أولآ ومن ثم لزوجـك وعائلتك مستقبلآ ....


هذا كتاب تأملات أسمه (فجر طاقاتك الكامنه في الأوقات الصعبـه) .. للمؤلف / ديفيد فيسكوت ..
حمليه بجوالك وأقرأيه في وقت الفراغ وتأملي كل جمله فيه .. صديقني بيغير فيك أشياء كثيره زي ماغير فيني




كود:
http://arabsh.com/plpjbtgo7e12.html



~* خليـك وصـيـة على نفسك ووجـهـي حياتـك الوجـهـه الصحيحة السليمـه اللي تسعدك وتريحك ... ~*

[ام محمد/]

ثالثـآ : تعاملك مـع الأخريـن ..


البعض من البنات يلاقون صعوبه في التعامل مع الغير أو عندهـم خجل أو تحفظ أو حيره بأنها عاجزه تكسب صداقات أو علاقات اجتماعيـه كبيره وواسعـه تثق فيها بكل الأوقات..
تأكدي بأنك لو تميتي على الخجل أو التحفظ الزايد!! مارح تكونـي انسانه اجتماعيـه وهالشي راح يسبب لك عقبه في طريق التقدم والنجاح وتحقيق الأحلام ...



* هذي قواعد بسيطه للتعامل مع الأخرين وكسب محبتهم وأحترامهم: -


[١] الإبـتــســام ‏...

إبتسامتك تعلــي من مقامك!
أبسط وأسهل لغه جسديه ممكن ان تتكلمين فيها هي [ الإبتسامه ] ..
بس هذا ما يعني أنك تظلين مبتسمه دائمآ وتتظاهر بوضع ابتسامه على وجهك!
لكـن خلي الإبتسام عاده حسنه نابعه من الإحساس بالموده تجاه كل إنسان تعرفينه أو بخاطرك أن تتكلمين معه..


[2] الـمـصـافـحـه بـحـراره‏ ..

- إذا أتقنتي طريقة المصافحه راح تعطين الطرف الآخر إشاره حلوهـ بأنه يآخذ منك اللي راح تقولينه.
كوني الباديـه بإلقاء السلام أو بمد اليد للسلام مع إبتسامه خفيفه .. وإذا ماكان الطرف الآخر يعرف اسمك ماعليـه عرفيه بنفسك ..


[3] الإتـصـال بـالـنـظـر ..

بالنظره والإبتسامـه تحسسين اللي قبالك بالإهتمــام ..

- إبدأي بالنظر لعيون اللي تتكلمين معها مع الإبتسامه لفتره قصيره أو لثواني بس .. ثم غيري بنظرك لـ معالم وجهها ; لشفايفها ولشعـرها وخدودهـا ^ـ^ .. ثواني وارجـع ناظري بعيونها ولا تزيد النظر عن فتره الكلام بينكم ..

لاحظت دايم لما اجلس مع بنت مثلآ في الكليـه ..
أنا احكي وهي سرحانه تناظر بالرايح والجاي .. أقولها / انتي معاي؟ ركزي أنا جالسه أتكلم !!
تقول / ايوه معاك ... وترجع تناظر يمين وشمال ..
أنا طوالي أقفل على الموضوع وأسكت ..
لأن لو جات هي وتكلمت معاي أنا راح اطبق استراتيجية الأتصال بالنظر أحترامآ لنفسي ولها .. لكن لما أنا أجي وأتكلم معاها وتتصرف بهالطريقه .. لأ .. بكذا هي ما أحترمت نفسها ولا أحترمت وجودي ..

فـ دايم خلوا تصرفاتكم نابعه من حبكم لأنفسكم ولأحترامكم لذاتكم .. لأن الأتصال بالنظر شي ضروري ومن أداب التعامل مع الغير واللي كثير يفتقدون لها ....

[4] أسلوبــك بالكلام ....

بسؤال واحد ممكن تكسبين أصدقاء ... كيف؟؟؟
ممكن لو قابلتي بنت لأول مـره أو بينكم معرفه عاديـه مجرد سلام وبس ... وحابه انك تكسبينها كـ صديقـه ..
مثلآ أكتشفي شي أيجابي فيها ,, سواء في لبسها أو تصرفاتها أو طريقة كلامها ثم أمدحيها بهالشي وبعدهـا اسأليها سؤال بسيط سهل تجاوبك عليه ..
وبكذا تكوني وفقتي في الكلام معها ..
او .. ممكن تلاحظين شي غريب معها وتسألينها عنه .. كتاب أو غيره .....
وأستمري في الكلام ..
او .. تسألينها سؤال ضروري تجاوبك عليـه لموقف معين يعني ...

افتحي مجالات في الكلام بأي موضوع مناسب .. بس أنتبهي تسألين اللي قبالك عن أي شي يتعلق بـ(حياته الخاصـه) ..
لأن مو على كل حال ممكن تجاوبك وهالشي يسبب أحراج لك أنتي من ردة فعلها ..
وأذا كنتي حابه تعرفين أي معلومه عنها وماتدرين أذا هالشي يمثل خصوصيه لها أو لها .. اسأليها بشكل مهذب مثل:-
" أذا ما عندك مانع .. ممكن أعرف ليـه .........؟"
أو " بعد أذنك ممكن أسألك سؤال أن شاء الله تقدرين تجاوبيني عليه .........؟"

وحلو أنك تتكلمين عن نـفـسـك وشـخـصـيتـك .. بس بحدود..!!!
اول شي/ لا تحكين للي قبالك قصة حياتك كلها وتقولين تفاصيل ماتعني له أي أهميـه... لأن هالشي يسبب ملل ..
ثاني شي/ لا تعظمين نفسك وترفعين من قدراتك وأمكانياتك مثل: (أنا حلوه .. أنا ذكيه .. أنا الكل يمدح فيني .. أنا الكل يحبني .. أنا الكل يغار مني......)!!
> وأنتي ضامنه أن اللي قدامك بتصدق كل اللي تقولينه خخخخخخخخخخ

احكي ببعض الأخطاء اللي تمرين فيها أو بعض نقاط الضعف بشخصيتك .. لأن هالشي بيخليك أقرب لنفس اللي قبالك وراح يعطيه شعور بالأرتياح تجاهك أكثر ..
أحكي عن أهدافك وطموحاتـك ؟؟ عشان الناس يساعدونك ويشورون عليك بتحقيق هدف معين ..

أتذكـر مره كنت أحكـي لزميله معاي بأيام الثانوي الله يذكرها بالخير .. كنت أقولها : احب أكتب مقالات وودي أنشرها في مجلـه بس صعبه لأني ما اعرف أحد في الصحافه...
قالت: والله؟؟ خلاص هاتي المقال وأنا أساعدك ..
أسبوعين وألا المقال في جريده وبأسمي بعد .. انهبلـــت منها!!!
> وقتها كانت عندي موهبه في النقد الفني يعني أنتقد أعمال فنيه "مسلسلات وأغاني هابطه" اكتبها في أوراق وأخبيها بس ..
شوفوا كيف مجرد حديث بسيط بيننـا وين وصلنـا فيه ...
بس نشرت هالمقال هذا ولا طمعت بأكثر لأن دراستي كانت أولى من الأنتقادات الفنيه خخخخخخخخخ

[ام محمد/]

* أذا كانت تواجهك صعوبات في التعامل تعيقك عن كسب صداقات مثل :-




{1} التعليقات السخيفه اللي تضايقك ..

الناس البالغين والعاقليـن ما يثورون لأي تعليق سخيف أو نقد يجرح ...
من فتره لثانيه ممكن تواجهين أحد يسـيء لشخصيتـك واللي أغلبها تكون أختبـار لك بأنك تردين وتعلقين أو لأ؟؟؟؟
أنتي هينـا خليك أكبر من كذا ولا تضطرين تشرحين وتبررين .. [ أبتسمـــي .. وأسكـتـــي أو أطلعـي من المكان اللي أنتي موجوده فيـه ] ..
اغلب التعلقات السخيفـه تكون بداخلها أحساس بالغيـــره منك .. وبأي حال هي تستفزك عشان تتصرفين بطريقه ماتعجبك أبدآ ولا ودك فيها ..

على سبيل المثال لا الحصر/

حضرتي زواج او مناسبه أجتماعيه عاديه .. وكنتي طالعه وآآآآو بلبسك وأناقتك وبشرتك وشعرك ..
والكل يعرف عنك من قبل ان بشرتــك فيها عيوب "شاحبه أو فيها حبوب شباب ..." ..
شي طبيعي أنهم راح يستنكرون منظر بشرتك يقولوا/ ماكنتي كذا وفجأه تغيرتي؟؟؟؟؟
هنـا عاد أستلمي تعليقات وكلام أستفزازي من البنات :
فلانه وش حاطه على بشرتك؟؟ وش الخلطه اللي أستخدمتيها؟؟ من ورانـا هالحلاوه علمينـا خلينـا نستفيد ونصير حلوين زيك؟؟
>> مع العلم أنك ماأستخدمتي أي شي وكانت نفسيتك تعبانه من هم الدراسه أو لظروف ثانيـه .. وعدت هالظروف وأرتحتـي وعلى هالأساس أرتاحت بشرتك ..
أذا بتقولين لهم / ما أستخدم أي شي ! مايصدقون ...... تحلفين لهم بالله ! مايصدقون .............

عشان كذا انتي مو مجبوره تبررين أكثر لأنهم حطوا برأسهم فكره ولازم تسايرينهم فيها ..
ألا أذا كنتي رايقـه لهم أضحكي وقولي / آآآآآسفـه هذا سر ومااعلمكم ...> واستمري بتبادل التعليقات لما تطفشين خخخخخخ ..

وممكن لو واجهتـي أي تعليق سخيف من الناس في مواقف ثانـيـه .. أبتسمـي .. و أسألي / أمممم أوكي.. فيه شي ثاني ودك تقولينه لي؟ أنا أتقبل النقد وأذا كنت عملت حاجه غلط علميني ...

> بكذا تكوني ارتحـتـي لأنك أحرجتيهم بأدبك وهدوئك وبالتالي بينتي لهم سوء تصرفهم معك ..

{2} نظـرة الناس لك وتعليقاتهـم :-

- أحس عنـود ماتحبنـي....؟
- أحس سوسن تتصدد عني ولا تبي تجلس معاي ...؟
- ساره ماتتصل علي ولا ترسل لي أبدآ ..أنا ضريتها بشي ولا ادري....؟
- تهقين أعجبت الناس في عرس أمس..؟
- تتوقعيـن هذولا الناس راح يعلقون على اللي سويته أمس ...؟

أغلب البنات مشغولاااااات بنظرة غيرهم لها .. أو وش راح يقولون عنها .. لدرجـه تعوق أرادتها وتعجزها عن تحقق أحلامهــا ...
أذا أنتي تصرفـتـي بشكل طبيعـي وعاااادي بالنسبه لك وواثقه أنك ما أزعجتي حد بشي .. فـ ليش تفكرين زياده بكلام الناس أو تخمنين أفعالهم ؟؟
اذا ما اعجبتهم أفكارك وقناعاتك .. تأكدي أن هالشي يخصهم ويمثلهم وأنتي مالك اي علاقـه فيه ..

عنود ماتحبك هذا شي راجع لها ... انتي اللي يحبونك أكثر من عنود ؟
سوسن تتصدد عنك .. الله يحفظها ... أنتي متأكده انك ما ضايقتيها بأي كلمـه وصدودها راجعه لمزاجيتها ؟
ساره ماتتصل .. الله يساعدهـا ان كان عندهـا ظروف وأنتي كمان لك ظروفك وأشغالك ......................ألخ ..

وأهـم شي أهـم شي وأحط تحته مليوووون خــــــط!!!!!
لا تصدقين أي كلام يوصلك من احد وتعصبين وتثورين .. قبل ماتتأكدين من الخبر وتعرفين الحقيقه وش هي ....؟
القيل والقال أشطبيه من رأسك ...
واللي يجي يقول: فلانه قالت عنك كذا!
قولي ما اصدق لما أسمع بأذنـي او أشوف ....

والله والله يابنـات ان أغلب الصداقات والعلاقات هالأيام تنهدم بسبب كلمـه او سالفه تافهه مالها أي أساس ..
وشوفي كيف العلاقات ألحين توترت والناس قامت تتحسس من بعضها بسبب ترسبـات ماضي مالها أي داعـي ...

حافظـوا على احبابكـم قد ما أنتم تقدرون .. وأي علاقـه تسبب لك توتر أو تضايقك بحياتك أنهيها بس قبل ماتتأكدين أنك تركتي لها بصمـه حلوه عنك ماتنسـاها
لأن فيه بنات تتغير ظروفهم بسفـر او زواج أو مكان دراسـه غير عن مكانك فـ بالتالي تتغيـر عليك بشكل ما ودك فيـه وتحت ظغوط فوق أرادتها أو أن هالتغيـر بأختيارهـا ...
فـ بالحالات ذي أو حالات تشبهها أفضل لك تنسحبين من حياتهـا بهدوء عشان تحافظيــن على الحب والود والأيام الحلوه اللي كانت بينكم لا تصير مشاكل وتتفارقون بزعل ....

أنصحكم بكتاب (كيف تتقبل الناس ..؟ وتتجنب أيذائهم)..
للمؤلفه / عابده مؤيد العظم ..
شي خرافي هالكتاب ..كل شي بخاطرك عن تصرفات الناس راح تلاقينه مع الحلول طبعآ ..
حاولت أحملـه لكم على ملف تكست بس ماحصلتـه أبدآ .. أذا فيه أمكانيـه انكم تشترونه لا تقصرون وصدقوني مارح تندمون وسعره اضن بـ 35 ريال ...
عن نفسي ! أستفدت منه كثييييييير بشكل غير معقول ..

~* مـحـبـة الآخـرين والأهتمام فيهـم وفي أي مـوقـف هو (مـفتـاح الـنـمـو الروحـي) .. وكلما كـنـتي أكثر أحساس باللي حولك وحبيتهم وساعدتيهم ،، كلما تـحقـق لـك الكثـر من النجاح والتقدم في الحياة ~*

[ام محمد/]

وبــس

بكذا أكون أنتهيـت من الموضـوع وهو جــزء بسيط من اللي بجعبتـي ..
وباقي أكثر وأكثر وأكثر ...
عساني أحصل وقت وأكمل لكم الباقي.. بس أهم شي أني عطيتكم أساسيــات تهمكم ..

يالله يابنـآت ...
علمـــوا الحيـاه عن باقي أحلامكـم ...
وعيشـوا الحيــاه بالطريقه اللي تعجبكــم ..
أبتسمـوا
وأضحكـوا
وأفرحــوا
وأنسـوا كل هم دآم الله معاكـــم .. والله يعطي الكل على قّد النيــه ...

سيفي هالموضوع وحطي بجوالك أذا حسيتي أنك أستفدتي منه ..
أفيدي نفسك وغيـرك باللي تعرفينـه واللي يجهلونـه .. وأتركـي لك بصمة خيـر بأي مكان تتواجدين فيه ..


لا تحرمونــي من أحلامكم .. خلونـي اعرفها عشان أشارككم فيها ..

اللي تكتفي بالمرور هنـا رجآئي لاتحرمني دعواتها بظهر الغيب ..
اي وحده تستفيد من الموضوع لاتبخل علي بدعائها الله يعلم وش قد محتاجته ....


مما رااق لي / ( وتين / الاقلاع )

فمــآن الله

[رذاذالمطر]

أم محمد
..موضوع رااائع وجميل ومفيد....ونقل مميز وهادف...والبنات هناااك ماشاء الله ..ابداااع
ربي يسلمك ويسلمهم ....

لاهنتـــــــــــِ يالغلا

[ام محمد/]

المشاركة الأصلية كتبت بواسطة رذاذالمطر أم محمد ..موضوع رااائع وجميل ومفيد....ونقل مميز وهادف...والبنات هناااك ماشاء الله ..ابداااع ربي يسلمك ويسلمهم .... لاهنتـــــــــــِ يالغلا

ياهلابك رذاذ المطر


لاهنتِ ع موروك الكريم وحسن ثنائك عليه

جزآكِ الله خير

[وطن روحي]

جزاك الله خير