[هدى وهداية]

للحزن بوجيه المساكين ساحات
تنطق لو ان الصمت هيمن على البوح

بسكاتهم تسمع للاوجاع صرخات
وبنطقهم تلمح علامات وجروح

يحكون لاكن حكيهم ماله اصوات
حتى ولا صوت(ن) من الحزن مبحوح

يبكون دم وينزفون ابتسامات
لو كان دم الوجه مخفي ومفضوح

في نهجهم هات اقبلت وادبرت هات
وان املوا مابالافق عارض يلوح

لو يقدرون يترجمون المعاناة
قالوا .. لو ان القول ماهو بمسموح

اوراقنا غصت بكثر الكتابات
من كثر شرح(ن) مالقى صدر مشروح

نظلم ولانعلم ونحلم بوقفات
في محكمة شرع(ن) به العدل مذبوح

نحتاج وقفة من وقف خمس الاوقات
لحظة خشوع الروح مع خالق الروح

احدن يحب الذات ويعيش للذات
واحدن عن اللذات بالذات مكبوح

شف هاليدين الطاهرات العفيفات
اللي تمد الطيب من غير مصلوح

صارت ملاعق للبطون الخبيثات
اللي تعج بريحة الخبث وتفوح

يامسرحية زيف الايام مافات
مامات واللي راح ماهو بمدموح

الله ياليت ان الكواليس شاشات
ونشوف ماخلف الكواليس بوضوح

لو الوفا بالوجه يرسم علامات
كم وجه شخص(ن) بالردى كان ملفوح

من مات واسمه حي مامات لو مات
ومن مات ذكره مات لوكان به روح

وانا من اعماق البحر والمتاهات
اخذت روحي قبل ماروحي تروح

قل للعيون اللي يديها قصيرات
درب الامل له باب مازال مفتوح

للحزن بوجيه المساكين ساحات
تنطق لو ان الصمت هيمن على البوح


م / ن