[رنـآ]

بسم الله الرحمن الرحيم
السلام عليكم و رحمة الله .

انا عندي مشكلات مو مشكلة اتمنى تساعدووني .

أبوي ما يصلي أبــد بس يصلي الجمعة و مو دايم أحيانا
و أكثر سوالفـه سب في الناس و ظن السوء ...

حتى اختي اللي بالجامعة تروح بنقل و مره ما جاء النقل و راحت امي قالت لابوي يوديها قال ابوي لأمي : انتي متفقه مع واحد !!
و انا يوم دريت قمت اهاوش ابوي ما قدرت اسكت عصبـت امي محترمة و اهلها ملتزمين و يجي يقولها كذا !
و اندم بعدين أني صرخت على ابوي بس ما اقدر امسك اعصابي من زمان و هو كذا يتهمها و يهاوشها على اتفه الاسباب و انا ساكته بس مليت إلى متى اسكت ؟؟
( أصلا امي شلون تتفق مع واحد و هي ما تعرف للجوالات ابـد بس جوالها و مو كثير تعرف يعني تعرف شلون تتصل بس و جوالها تحطه في اي مكان عندنا و عند ابوي يعني شلون تكلم واحد !! )
كم مره يهاوش امي و يتهمها حتى مره ضربها قدامي انا واخواني كلهم و قمنا نهاوش ابوي حتى اخوي الصغير مسكين قعد يصيح .
ما ادري ايش الحل
و أختي ما تصلي بعد و اخوي ما يصلي كل الصلوات بس بعضهاا و عاق بأبوي و أمي ما يهمه الا الفلوس و يصرخ عليهم يبي سيارة يبي فلوس يبي يسافر همه الدنيا ( حالتنا المادية متوسطة و الحمد لله ناكل نشرب عادي )
و امي مسيكينة ابوي من جهة و اخوي من جهة كل واحد يصرخ عليها و يسبهاا ( الله يحفظها و يصبرها ) .
و المشكلة اشوف معها حبوب و تروح تراجع في المستشفى اقولها انا واخواني وش فيك ما تعلمنا تسكت او تضيع السالفه و مره رحت شفت الحبوب خذت المطوية حقتها لقيت الحبوب ضد الاكتئاب ..
مدري شسوي
ابوي كل اهله ميتين ما عنده الا أخو واحد و يدري عمي ان ابوي ما يصلي بس ساكت و انا الحين افكر اروح اقول لعمي بس عمي اصغر من ابوي و ما راح يسمع له .

بيتنـا حووسـه ابوي يحوسه تخيلوا مجلس الرجاجيل يحط فيه اغراضه حق سيارات و اشياء ثانية مع ان فيه ملحق كبير حاطينه عشان يحط اغراضه فيه بس يحطها في المجلس و غير كذا سيارته كل شوي خربانه (مقربعه يعني) مع انه يقدر يشتري سيارة احسن منها بس يقول هذي ماتخرب كثير زي السيارات الجديدة و ملابسه وصخه مو مرتبه مع ان امي تنظف ملابسه و ترتبها بس هو اذا لبسها قام يصلح سيارات ومدري ايش و يوصخها و يروح فيهاا للشغل و للناس
عمي قال له ترى بناتك بيعنسن مو خاطبهن احد عشانك كذا و قعد ينصحه بس ابوي مطنش
انا مو مهتمه بالزواج توني ع الزواج اصلا بس اختي بالجامعة اخاف تعنس .
و أخوي الصغير كان مؤدب مرره و هادي الحين صار يصرخ على ابوي وامي و احيانا يضربهم تقول امي انه يسوي مثل ابوي او زي كذا مافهمت .
احس ابوي هو سبب المشاكل في بيتناا (بس مو قصدي ان ابوي اكرهه بالعكس احبه )
المشكلة انه كبير الله يحفظه متعدي الخمسين بس ما يصلي مع ان اللي كبره محافظين وملتزمين بصلاتهم .
نصحت اخواني بس قعدوا يضحكون علي وابوي قلت له ليش ماتصلي قام يقول لي انا اصلي و لا يروح يضيع الموضوع .
والله اني ادعي لأبوي بالهداية و إن شاء الله يستجيب دعواتي .

و فيه مشاكل ثانيـة بس لو اتكلم إلى بكرة ما راح اسكت .

المشاكـل تكبــر و تكبـر
اتمنى تساعدووني و راح ادعي للي يساعدني