حشوه فيليه
المقادير :
-نص كيلو فيليه دياي
-حبتين جزر مبروشين
-نص فلفل اصفر مكعبات
-قفشه كبيرة كزبره مفرومه
-4-5 حبات مشروم مقطع مكعبات
-بصله صغيره
-حبه ماجي
-نص كوب ماي
-نص قفشه صغيرع اعشاب مجففه
-كاري ربع قفشه صغيره
-كزبره بودر قفشه صغيره
-دارسين رشه
-كركم ربع قفشه صغيره
-زيت نباتي بحدود قفشه كبيره
-رز ( عيش )
- شعريه مفتته
-زبده
-ملح
-ماجي الارز حسب الرغبه ( مو ضروري وانا عن نفسي ما استخدمه بس يعطي نكهه حلوه للعيش للي يحب )
الطريقة:
نقصص الدياي شرايح طويله
نغسل العيش عده مرات لين يصفى لون الماي وبعدين ننقعه بماي دافي وملح فتره ونشخله
نحمي الزيت ونضيف الدياي ونحمسه لين يقلب لونه وبعدين نضيف البصل والكزبره ونحركهم لين يذبلون وبعدين نضيف الجزر والفلفل والبهارات ونحركهم
نذوب الماجي بالماي ونضيفه لهم مع ونتركهم لين يكمل نضجهم وينشف الماي
المقادير:
جبن موتزريلا
جبن تشيدر مقطع الى اصابع
حبتين الى 3 طماط مفروم
زيت نباتي
مقادير الكريب : انا استخدمت 3 اضعاف هالمقدار
2 بيض كبار
نص كوب طحين
3\4 كوب حليب سائل ( انا احب اخلط حليب بودر مع ماي )
رشه ملح
رشه جوزة الطيب
مقادير البشاميل:
كوب حليب بودر
4 اكواب ماي
او لتر حليب سائل
4 حبات زبده صغيره
4 قفاش كبيره متروسه طحين
رشه فلفل ابيض
رشه ملح
رشه جوز الطيب
شوي جبن بارمزان( تقريبا رشتين او اذا مو متوفر حطو جبن موتزريلا )
الطريقه:
خلطت مقادير الكريب وحطيتهم بالثلاجه.. نخفق البيض ونضيف عليه كميه الطحين مع الملح وجوزه الطيب وبعدين نضيف لهم الحليب بالتدريج ونصفيه بمشخل ونتركه بالثلاجه نص ساعه على ما تحضر الحشوه
نصبه بمقلا تيفال او جهاز البانكيك ونخلي السمك ضعيف يكون احلى ونتركه لين يتلون ونقلبه... هالعمليه ماتاخذ وقت
ناخذ الجبن وقفشه من الحشو ونحشي فيه الكريب ونلفه على شكل اسطوانه ونحطه بالبايركس
ناخد باقي الصلصه المتكونه من الحشو ونخلطها مع طماط معصور ونصبهم فوق الكريب
نحضر البشاميل : عن طريق تذويب الطحين بالحليب ونحطه مع الزبده ونحطه على النار ونحركه باستمرار لين يثقل ونضيف له الملح والفلفل الابيض وجوزه الطيب والبارمزان ونصبه فوق الكريب.. اذا ما تحبون هالطريقه انا ذاكره طريقه ثانيه للبشاميل وتقدرون تستخدمون البشاميل الجاهز
نرش فوقه جبن موتزريلا مبشور وندخله الفرن لين يتحمر الويه وبالعافيه
منقول