بصراحه قناة الجزيره معروف عنها بأنها تضخم الأمور وتحب ان تتدخل في خصوصيات بعض الدول وأن كان الأمر لا يمس الدول الأخرى من اجل اثارة المشاكل والفتن..
في مجتمعي ومحيطي وبين اهلي ومعارفي لم اسمع ولم ارى احدا تعلم الهنديه او كلم شخص هندي باللغه الهنديه.. الا من له تجاره تتصل بهم او من كان عمله مباشر معهم.. فمن الضروري انه تكون عنده خلفيه بلغتهم عشان يكون على علم بكل مايجري من حوله..و مب بس اللغه الهنديه ممكن الانجليزيه والفرنسيه عشان التواصل والسهوله في العمل..
بس عدنا في الامارات كل الهنود يتكلمون معانا بالعربي بس مب كل الاماراتيين يكلمونهم بالهندي.. كل جنسيه غير عربيه تعيش على ارض الامارات الطيبه مجبوره انها تتعلم لغتنا وتتعامل معانا بالعربي مب العكس.. وغير الهنود عدنا الاندونيسين والفلبينين والكثير من الجنسيات بس نحن مب مضطرين نتعلم كل اللغات العالميه ..هم المجبورين يتعلمون العربيه ويكلمونا بلغتنا ولا مابيعيشون في بلادنا الحبيبه صح.. ولا بتمشي امورهم.. من الخدامه لين اكبر تاجر اجنبي..
اغلب الخدم عدنا من الاندونيسين والفلبينين والهنود بس ولا مره فكرت ربة البيت ولا افراد الاسره انهم يتعلمون لغتهم عشان التواصل والتفاهم..!!
وليش قناة الجزيره خصت دبي في هالموضوع والهنود مب موجودين بس في دبي بل في الامارات كلها..ولا لانه دبي اصبحت من اهم دول العالم ومحط انظار الجميع..!!
في مواضيع وتقارير اهم في العالم من قضيه تراجع اللغه العربيه في دبي الى المركز الثاني والثالث .. اللي يقول داخلين في سباق!!
وسواء الموضوع يخص دبي ولا غيرها.. على مااعتقد انه كل دول الخليج اتعاني من عدد كبير من العماله الخارجيه والي لها تأثير كبير على الحياه الاجتماعيه.. مثلا السعوديه بدأت تقلل من سائقي الاجره الباكستانيين واكيد بسبب تأثير سلبي عليها.. وغيره
والله يعينا ويرحمنا برحمته..