انا بخير..ان كان هذا سؤالك
و ان كان غيره..لا تحاول ولا تقول
ما راح ارد الا على ( كيف حالك )
و اقول ماشي الحال .. لو كان مشلول !
ماطيق بعدك..بس مابي وصالك
معادله سهله ولا تبغي حلول !
هم دلّلوك و جيت تعرض دلالك
و انا معي ذا الطبع ما هوب مقبول
عند الرجوله .. أشّر و طاب فالك
و عند المواقف .. سلّني سيف مسلول
لكن اذا كان الدلع هو مجالك
غلطان يوم اخترت لك شخص مب ( كول )
غرك جمالك ؟ .. بكرا تلعن جمالك
و تعود لي من صدمة الوقت مذلول
و انا على خبرك خصيم المهالك
اذا قسيت يصيبني داء ( ابو الهول )
قد قال ابوي ..احفظ رفيق ٍ عنا لك
و اللي تمادى بالجفا خلّه يزول
لا تلتفت له لو ترجّى وصالك
منته مكلّف به ولا عنْه مسؤول
مع السلامه روح و الدرب سالك
بابي عن رْياحك غدا اليوم مقفول
حتى الشموع اللي ارسمت لي خيالك
طفّيتها بكيفي .. و كل شي معقول !
فوق الهموم و حزني .. القلب شالك
حبيتك و لك قلب مغتر معلول
تعبان بَعدي..صح؟ .. و انا كذلك
خلّك بعيد احسن .. و انا بْعيد .. لاحول !