[*&*الروح النقية*&*]

***

ياللي ورى ركنك تلوذ المساكين
واسجد لمرضاتك واذلل جبيني
***
عبدك على عهدك ومدك بلا حين
وانا على بابك وتعلم كنيني
***
ازريت لا عدل كفوف الموازين
وازريت اسد الربع من عشر ديني
***
لبيه ثم لبيه لبيه مرحب وسهلين
ياعز وجهين وثمرها سنيني
***
واجل واغلا ما تحلت به العين
واعز وابرك من اجيه ويجيني
***
واهلا ولو اهلا توقف مع اسمين
وقفتها ما بين الاسمى وبيني
***
واثنين ما افرق فالغلا ومتساوين
إلا إني افرق بين عيني وعيني
***
ليت انهم فالصدر حرز عن البين
والموت قبل يمرهم يحتويني
***
وبواهج الرمضا ضلوعي بساتين
وليا وطوها فرشهم راحتيني
***
اطيب وامرض واغضب العمر وازين
وانصى المجافي واجفى اللي يبيني
***
واحب واكره واحشم انسان واهين
في ذاتهم واقرب بهم مبعديني
***
واصل على رجوى رضاهم للقصين
واقطع بمبعدهم ولوه يميني

***

معهم بلى وكم ومتى وشهو ووين
لا ليه كيف ودينهم في وتيني
***

ولو ان عمري يصرف ايام واسنين
قسمت عمري عدل مع غالييني
***
واليا نزلت اقبل اكفوفهم لين
اوصلت راسي مطلع الفرقديني
***
وانا فدا ماطى قدم رجل الاثنين
من دون اقول اللي تحوشه يديني
***

مادامي أسبرهم على الأرض حيين
يا ثالث الأعياد لا تحتريني
***
استبدل الدنيا بضحكة حاجبين
وابهم عن اللي كنت ابيه ويبيني
***

وامين من جودك ومن جودك امين
يالله عسى الجنة جزا والديني
***
من أروع قصائد الشاعر خالد العتيبي