السلام عليكم ورحمة الله وبركاته
سمعت لي كلمة مدري وش اقصاهـا
حزت بصدري وأنـا مانيـب هارجهـا
لو كل كلمـة إليـا جتنـا طردناهـا
بعنـا الثمينـة بسعـر مايخارجـهـا
لو مـرت السمـع ماكنـا سمعناهـا
ونقفـل الـراس عنهـا لا يبرمجهـا
ومـن يـم هـذا لـهـذا مانقلنـاهـا
والناس واجد وتلقـى مـن يروجهـا
مـن جابهـا بيـن خلـق الله و وداهـا
لو به مراجل تـرى نفسـه يسمجهـا
ومن حاسب الناس عن سابق خطاياهـا
يقعد بـدارن خـلا مـاداج دايجهـا
في كنة تشوي الجربـوع رمضاهـا
وتابس غصون الشجر من حر واهجها
والناس بالحق حتى الشيخ ما أرضاها
ماترضي النـاس لـو انـك تحججهـا
ياللي تبـا الطيبـة خذهـا وعطناهـا
وخـل الطريفـة طريـة لا تثلجهـا
واضرب طريق الأوادم وامش ممشاها
واضرب دروب العرب وأدرج مدارجهـا
وأرسم لنفسـك حـدود ولا تعداهـا
من حط نفسه بدرب الضيق يحرجهـا
وان كان نفسك هواهـا قـام ينحاهـا
حط الأعنة بروس الخيـل وأسرجهـا
وفكـر بمنكافهـا قــدام مغـزاهـا
واضرب حساباتها وتشـوف ناتجهـا
وكل بعضده يمـوح الدلـو برشاهـا
وتلقى كبود الضوامي مـن يبرهجهـا
ان كان توك على صـدرك تهجاهـا
حنـا ترانـا نـدرس فـي مناهجهـا
لو هي صعيبة ليا انعاجت عدلناهـا
واللي تجي مستقيمـة مـا نعروجهـا
نهتـم فـي وزنهـا وابـرام معناهـا
ومـن الكرستـال واللولـو نتوجهـا
مثـل الجواهـر ليـا منـا نضمناهـا
وسلوكها من جديد الـزري ننسجهـا
مـن يـم مصباحهـا نبعـد معشاهـا
إليا قعـد راعـي الضلـع يدرجهـا
مخايـل ترتـدم والصـدر منشـاهـا
ان دك بالـبـال داكــوك يهيجـهـا
وليا أمطرت ضاقت الوديان في ماهـا
تاخذ ليا الحول ما يبسـت مدالجهـا
وان صدت الناس عنا ما أعترضناهـا
مـا تقفـي النـاس عنـا ونتولجهـا
وإن جاتنا الطيبـة بالطيـب زدناهـا
الطيبـة بالعسـل والسمـن نمزجهـا
وان جاتنا الثانيـة نصبـر ونرفاهـا
يمكـن إليـا فـاق راعيهـا يعالجهـا
وان عادهـا عـودة ماعـاد ينساهـا
من حربة في صميم الصدر نولجهـا
مسمومـة يبلـش الدكتـور بدواهـا
مايقنـع الخبـل ليـن أنـه يلامجهـا
الشاعر
عبدالله بن زويبن الحربي (رحمه الله )