السلام عليكم ورحمة الله وبركاته
سد اللزوم
يالله انـك تجنبـنـي دروب الـحـرام
ياكريـمٍ لمرضاتـه نحـج ونـصـوم
يا عظيمٍ دعيتـه تحـت ستـر الظـلام
افرج الضيق والكربات وأجـل الهمـوم
طالـت السالفـه والعيـن عيّـت تنـام
والرجاء والامـل بيديـن ربٍ رحـوم
رحت شرق وجنوب ورحت غربٍ وشام
مالقيـت الوجيـه اللـي تسـد اللـزوم
كل مأنصى حدٍ كنـه يغصـب المقـام
عاقدٍ حاجبـه ضـارٍ بحـب الخشـوم
غرته ضحكة الدنيـا وجمـع الحطـام
غافـلٍ مـادرى ان الآدمـي مـايـدوم
لين صـرت اتعداهـم بـدون احتـرام
لو عليهم بشـوت وفـي يديهـم ختـوم
ليه اسلـم علـى مـن لايـرد السـلام
ليه اجامل حيا وأرفـع مقـام الرخـوم
علمتني سنيني طـول عشريـن عـام
وأتعلـم مـن الايـام فـي كـل يـوم
وكل درسٍ بنـى بيـن الحنايـا خيـام
ثابتٍ فالضميـر وفـي خيالـي يحـوم
واطرد الغيب ماأمـل التعـب والهيـام
ولو تقـل المـوارد ماتمـوت العـزوم
والـردي ماجعلتـه فالشدايـد حــزام
اعـرف اللـي ليامنـي نصيتـه يقـوم
وانـت يالايمـي ماعـاد فيهـا مـلام
نعنبوهاحـيـاه ليانسـيـت السـلـوم
ايه بعض الكـلام يمـر بـرد وسـلام
مير بعض العلوم يصيـر فيهـا علـوم .
*****************
للشاعر/علي سالم العازمي العتيبي