بعض الرجاجيل يبقى طفل ما يكبر
عقلـه صغيـرٍ ونزواتـه يقودنـه
يخدعك في منطقه واللبس والمظهر
وتْقول هذا رجل مـا ظنّتـي منـه
يمكن تثق به ويصبح صاحبٍ تفخر
انك عرفتـه وودك تقتبـس فنـه
فبعض الرجاجيل لا منه هرج يسحر
تصدّق بهرجه وما يظهره من كنـه
يصور لك انه مهم وغاطس بابحر
من كثر شغله ويعرف انسه وجنـه
اومر تدلل ولا يهمك فهـو اخبـر
ولو تطلب الشمس يعطيها بلا منـه
ولا من بدا ينصحك في حكمته يبهر
دينٍ بعقلٍ وخبـره ماهـي لسنّـه
ويمكن لأجله تخسْر رجال لك مذخر
ولا تنتبه لين ما افعالـه يكشفنـه
يخور لحظه ويكشف كل ما يستـر
حتى انت صعبٍ تصدق ماروي عنه
ولا من تأملت وحطيته تحت مجهر
تلقاه سوسـه شياطينـه يعسفنـه
ياطيّب القلب ليتك هالزمـن تحـذر
ما كل رجل تثق في قولـه وظنـه
لاتعطي الغير سرك يافتـى تخسـر
ولا يخدعك من يجيد العزف والرنه