ياهيه إلتفت لي واسمع دعاي لك يـا هيـه=ترى عادتك تشبـع مـن البعـد واتواجـه
دعيتك بصوتٍ ياصلـك ليـه مـا توحيـه=وأنا أسمع ضلوعك من صدى الصوت لجاجه
عليـك الفـؤاد إخلاجـه مصمـخ راعيـه=خف الله في راعيـه مـا تسمـع إخلاجـه
ترى العفو قد جـاك أولـه وإغتنـم تاليـه=وترى الحلم بحرٍ غيـر لا تامـن أمواجـه
وترى الـود ليـلٍ مظلـمٍ جيتلـك ساريـه=سراجه وصالـك والجفـا ينفـخ سراجـه
وترى قصرنا اللي كم سنة نجمـع ونبنيـه=هوى العذل طيـح بابـه العـود وسياجـه
لي أيام مـدري ويـن دارك ولا أدري ليـه=وأنا خابـر إنـي بـاب شفـك ومزلاجـه
غيـابٍ بـلا سبـة هجـادٍ بــلا تنبـيـه=وجفا أغلى العرب نارٍ على الكبـد وهاجـة
نضج قلبي من البعـد وش حاجتـك تكويـه=جفاك الجمر والصبر فـي بعـدك الصاجـه
وطبع حبـك بقلبـي والأيـام مـا تمحيـه=هـذا هجـرك يحـاول يموجـه ولا ماجـه
يموت الأمـل لكـن ظنـون الغـلا تحييـه=وعروق الوفـا فالـروح والقلـب وجاجـة
خبرتوا حدٍ يبكـي علـى واحـدٍ يبكيـه؟؟!!=وخبرتوا حدٍ مسجون ما يبغـي إفراجـه؟؟!!
أحبـه ولا أبغضتـه علـى شـيٍ يسويـه=ولا زالـت رقـاب الرجـا فيـه منعـاجـة
عسى منزلٍ ضمه حقـوق الوسـم تسقيـه=وتضحك له الدنيا وهـو يضحـك حجاجـه
فقد خاطـري شـي مـن الضيقـة مسليـه=وغدت روحي من النـاس والليـل هجاجـة
أروح لمكـانٍ خابـره .. خابـره يأتـيـه=أسوق القدم صوبـه وهـي مالهـا حاجـة
مكـانٍ نزيـه وأول مواجهـي لـه فـيـه=وأنـا خابـرٍ مـا رجـل مثلـه بـدواجـة
لعل وعسـى مـا حدنـي للمجـي يدعيـه=وأشوفه وأنـا مـا ودي أسبـب إحراجـه
يحب الجريح آخـر دروب اللقـى ويجيـه=وتحـب القـدم جيـة مكـان أول مواجـه